“Hinaptinmi Felipeqa chay kamachikuq runawan kuska yakuman yaykuspan bautizarurqa” (HECH. 8:38).

52 KAQ TAKI Diospaqñam kunanmantaqa kanchik

¿IMAMANTAM YACHASUNCHIK? *

1. Adanpawan Evapa tantiakusqankuqa, ¿imapim tukurqa?

IMAM allin utaq mana allin kasqantaqa Jehova Diosllam ninman. Adanwan Evaqa Diosta mana kasukuspankum sachapa rurunta mikururqaku, chaywanmi qawachirqaku Jehova Diospi mana hapipakusqankuta. Kikinkumantam tantiakurqaku imam allin utaq mana allin kasqanta (Gen. 3:22). ¿Imapim chay ruwasqankuqa tukurqa? Manañam Jehova Diospa chaskisqanñachu karqaku, hinaspapas wiñay kawsayninkutam chinkarachirqaku. Chaymantapacham mirayninkunapas huchayuq kaspa wañunchik (Rom. 5:12). Chay tantiakusqankuqa anchatam ñakarichiwanchik.

Jesusmanta allinta yachaykuspanmi, Etiopia nacionpi kamachikuq runa bautizakuyta munarqa. (Qaway 2, 3 kaq parrafokunata).

2, 3. (1) Etiopia nacionpi kamachikuq runaqa, ¿imatam ruwarqa Felipe Diosmanta willaptin? (2) Bautizakuspanchikqa, ¿ima bendicionkunatam chaskinchik? (3) ¿Ima tapukuykunamantam yachasun?

2 Etiopia nacionpi kamachikuq runam ichaqa allinta ruwarqa. Felipe payman Diosmanta willaptinmi, Diospa hinaspa Jesuspa ruwasqankuta sumaqta yachaykuspan agradecekurqa, hinaspam chaylla bautizakururqa (Hech. 8:34-38). Chay runa hinam ñuqanchikpas Jehova Diostawan Jesusta agradecekusqanchikta qawachinchik Diospaqña kawsanapaq tantiakuspanchik hinaspa bautizakuspanchik. Chaywanqa qawachinchiktaqmi Jehova Diospi hapipakusqanchikta, hinaspa imam allin utaq mana allin kasqanta paylla tantiasqantapas.

3 Jehova Diosqa bendeciwanchikmi bautizakuptinchikqa. Payqa quwasunmi Adanpawan Evapa chinkachisqanku kaqkunata, hinaspa wiñay kawsaytapas. Chaymantapas Jesuspa wañukusqanwanmi Jehova Diosqa huchanchikta pampachawanchik (Mat. 20:28; Hech. 10:43). Hinaspapas Diospa  chaskisqan llaqtanpim aylluntin hina kachkanchik, suyachkanchiktaqmi hamuq tiempopi sumaq kawsakuytapas (Juan 10:14-16; Rom. 8:20, 21). Kaykunata yachachkaspankupas wakinkuqa iskayrayankum bautizakunankupaq. ¿Imakunawantaq sasachakunku bautizakunankupaq? ¿Imaynatam chaykunata atipanmanku?

¿IMAKUNAWANTAQ SASACHAKUNKU BAUTIZAKUNANKUPAQ?

¿Ima sasachakuykunatam wakinku atipananku bautizakunankupaq?

Manchakuq kasqanku (Qaway 4, 5 kaq parrafokunata). *

4, 5. ¿Ima sasachakuykunapitaq tarikurqaku Avery hinaspa Hannahqa?

4 Manchakuq kasqanku. Avery sutiyuq musupa tayta-mamanqa Diospa testigonmi kanku. Taytanqa sumaq runam hinaspapas punta apaqmi. Chaywanpas Averyqa manaraqmi bautizakunanpaq tantiakurqachu. Paymi nin: “Taytay hina mana kanaymantam manchakurqani”, nispa. Payqa piensarqataqmi Diospa llaqtanpi imatapas niptinku mana ruway atinanmanta. Payqa ninraqmi: “Llumpaychatam manchakurqani runakunapa qayllanpi Diosta mañakunaypaq, yachachinaypaq utaq huk ruwaykunatapas ruwanaypaq niwanankumanta piensaspay”, nispa.

5 Hannah sutiyuq sipaspas ima ruwaytapas mana atinanpaq hinam hapikurqa. Ayllun testigo kachkaptinpas payqa piensarqam Diospa munasqanman hina mana kawsakuy atinanmanta. Wakinpim llumpayta hukmanyaruspan kikillan aychanta kuchukuq, hinaspam chaywanqa astawanraq hukmanyaq. Paymi nin: “Manam willakurqanichu pimanpas chaykuna ruwakusqaytaqa, ni tayta-mamaymanpas. Piensarqanim Jehova Dios chaykuna ruwakusqayrayku mana chaskiwananmanta”, nispa.

Amistadkunawan aysachikusqanku (Qaway 6 kaq parrafota). *

6. ¿Imanasqataq Vanessaqa bautizakunanpaq sasachakurqa?

6 Amistadkunawan aysachikusqanku. Vanessa sutiyuq sipasmi nin: “Amistadninwanmi 10 wata masninña riqsinakurqaniku”, nispa. Ichaqa chay amistadninqa manam Jehova Diosmanta chaytaqa munaqchu, chaymantapas manam bautizakunanpaqqa kallpanchaqchu, chaywanmi payqa hukmanyasqa tarikurqa. Payqa ninraqmi: “Sasachakuqmi kani amistadkunata tarinaypaq, chayraykum amistadniymanta karunchakuytaqa manchakurqani, piensarqanim chayna amistadtaqa mana tarinaymanta”, nispa.

Huchapakuruyta manchakusqanku (Qaway 7 kaq parrafota). *

7. ¿Imanasqataq Makayla sipasqa mana bautizakuyta munarqachu?

7 Huchapakuruyta manchakusqanku. Makayla 5 watanpi kachkaptinmi Diospa llaqtamanta turin qarqurachikurqa. Payqa musyakurqam turinpa ruwasqanqa tayta-mamanta ancha llakichisqanta. Paymi nin: “Manchakurqanim bautizakusqay qipata hatun huchata ruwaruspa qarqurachikuyta,  hinaptin tayta-mamay astawan llakikunanmanta”, nispa.

Chiqnisqa kayta manchakusqanku (Qaway 8 kaq parrafota). *

8. ¿Imanasqataq Miles musuqa bautizakuyta manchakurqa?

8 Chiqnisqa kayta manchakusqanku. Rimarisun Miles musumanta. Taytanqa mamanwanmi rakinasqa karqaku. Taytanqa testigom rikurirurqa, mamanñataqmi mana. Milesmi nin: “Mamaywanmi yacharqani 18 watapuni. Taytay testigo rikuriruptinmi payqa anchata piñakururqa, chaymi bautizakuruptiy ñuqawanpas piñakurunanmanta manchakurqani”, nispa.

¿IMAYNATAM SASACHAKUYKUNATA ATIPANMANKU?

9. ¿Imapaqmi yanapasunki pacienciakuq hinaspa kuyakuqllaña Jehova Dios kasqanmanta yachasqaykiqa?

9 Adanwan Evaqa Jehova Diostam qipancharqaku Diosta tukuy sunqunkuwan mana kuyasqankurayku. Chaywanpas Jehova Diosqa hinallam kawsanankuta saqirqa, saqirqataqmi tantiasqankuman hina churi-wawankuta uywanankupaq. Ichaqa Diosmanta karunchakurusqankuraykum mana allinchu tarikurqaku. Piwi churin Cainmi sullka wawqinta wañurachirqa, tiempopa risqanman hinañataqmi llapallan runakuna mana allin ruwaq rikurirurqaku (Gen. 4:8; 6:11-13). Ichaqa Jehova Diosmi churinta kachamurqa kasukuq runakunata salvananpaq (Juan 6:38-40, 57, 58). Pacienciakuq hinaspa kuyakuqllañam Jehova Diosqa, chayna kasqanmanta yachaspaykiqa astawanraqmi kuyanki. Adanwan Eva hina kaytaqa manachá munankichu, aswanqa munankichá Diosllapaqña kawsakuyta.

¿Imaynatam kay sasachakuykunata atipawaq?

(Qaway 9-10 kaq parrafokunata). *

10. Salmo 19:7 nisqanpi yuyaymanayqa, ¿imanasqataq yanapasunkiman Diosta astawan servinaykipaq?

10 Jehova Diosmantayá hinalla yachay. Jehova Diosta astawan riqsispaykiqa aswanraqchá payta serviyta munanki. Avery musum nin Salmo 19:7 (qaway) nisqanta ñawinchasqan hinaspa yuyaymanasqan mana manchakunanpaq yanapasqanmanta. Bibliapa chayna nisqan kikinpi cumplikusqanta musyakusqanmi yanaparqa Jehova Diosta astawan kuyananpaq. Chaynaqa, Diosta kuyayqa yanapawanchikmi manaña manchakunapaq, yanapawanchiktaqmi paypa chiqnisqan kaqkunata mana ruwananchikpaq.  Hannah sipasmi nin: “Diospa palabranta hinaspa qillqanchikkunata ñawinchasqaymi yanapawarqa aychayta kuchukuyniyqa Jehova Diosta llakichisqanmanta cuentata qukunaypaq”, nispa (1 Ped. 5:7). Payqa kallpanchakurqam bibliapa nisqanta ruwayman churananpaq (Sant. 1:22). Kallpanchakusqanqa, ¿imapi tukurqa? Kikinmi nin: “Jehova Diosta kasukusqay allinniypaq kasqanta musyakusqaymi yanapawarqa Jehova Diosta astawan kuyanaypaq. Kunanqa manam iskayrayanichu imapipas pay yanapawananmantaqa”, nispa. Hannah sipasmi chay sasachakuyninta atipaspan Jehova Diosllapaqña kawsakunanpaq tantiakuruspan bautizakurqa.

(Qaway 11 kaq parrafota). *

11. (1) ¿Imam Vanessa sipasta yanaparqa allin amistadkuna tarinanpaq? (2) ¿Imatam qampas chaymanta yachawaq?

11 Amistadnikikunata allinta akllay. Vanessa sipasmi musyakururqa amistadnin Diosta servinanpaq harkasqanmanta. Chaymi paymanta karunchakururqa. Chaymantam payqa kallpanchakurqa huñunakusqanpi iñiqmasinkunawan hukllawakunanpaq. Payqa ninmi Noeypawan ayllunpa ruwasqan yanapasqanmanta, nintaqmi: “Noey hinaspa ayllunqa Diosta mana kasukuq runakunapa chawpinpim kawsarqaku, chaymi paykunaqa hukkunawanqa mana hukllawakuqkuchu”, nispa. Vanessa sipasqa bautizakusqan qipallatam precursora karqa. Ninmi: “Precursora kayniyqa yanapawarqam huñunakusqaypi iñiqmasiykunawan hinaspa huk iñiqmasiykunawanpas allin amistadkunata armanaypaq”, nispa. Qampas allin amistadkunatam tarinki iñiqmasikikunawan kuska Diosmanta willakunaykipaq lluqsispaykiqa (Mat. 24:14).

(Qaway 12-15 kaq parrafokunata). *

12. ¿Pitataq mana manchakurqakuchu Adanwan Evaqa, hinaspa chay ruwayninkuqa imapim tukurqa?

12 Ama imatapas manchakuychu aswanqa Jehova Diosllatayá. Jehova Dios llakichiyta manchakuyninchikqa allinmi (Sal. 111:10). Adanwan Eva Jehova Diosta manchakuspankuqa manamá paypa contranpiqa hatarikunmankuchu karqa. Ichaqa chay ruwasqankuwanmi ‘ñawinku kicharikururqa’, huk rimaypiqa paykunaqa musyakurqakum huchasapa runa kasqankuta. Musyakurqakutaqmi mirayninkunapas paykuna hina kanankumanta, hinaspa wañunankumanta.  Chaykunamanta cuentata qukuruspankum pinqakurqaku mana pachayuq kasqankurayku, chaymi higospa rapinta siraruspanku chaywan tapakurqaku (Gen. 3:7, 21).

13, 14. (1) 1 Pedro 3:21 nisqanman hinaqa, ¿imanasqataq wañuytaqa mana manchakunanchikchu? (2) ¿Imanasqataq Diosta kuyanchik?

13 Allinmi Jehova Diosllata manchakuyninchikqa. Ichaqa wañuytaqa manapunim manchakunanchikchu, ¿imanasqa? Dios taytanchik kawsakuyta wiña-wiñaypaq quwasqanchikraykum. Huchallikuruspa sunqumanta wanakuptinchikqa, Diosninchikqa pampachaykuwasunmi churinpa wañukusqanpi iñisqanchikrayku. Chaytaqa qawachichwanmi Diosllapaqña kawsanapaq tantiakuspa hinaspa bautizakuspa (qaway 1 Pedro 3:21).

14 Jehova Diostaqa kuyanchik sapa punchaw kawsakunanchikpaq tukuy ima quwasqanchikraykum. Kuyanchiktaqmi kikinmanta hinaspa munayninmanta imam kaqta yachachiwasqanchikrayku (Juan 8:31, 32). Paymi llaqtanman apamuwarqanchik allinta yanapawananchikpaq. Yanapawanchiktaqmi kunan tiempopi sasachakuyninchikkunata atipananchikpaq, chaynallataqmi sunqunchikta tiyaykachin hamuq tiempopi wiñay kawsayta haypananchikpaq niwaspanchik (Sal. 68:19; Apoc. 21:3, 4). Jehova Diosqa tukuy ima quwasqanchikwanmi kuyakuyninta qawachiwanchik, chaykunapi yuyaymanaspaqa astawanmi payta kuyasunchik hinaspa sunquntapas manam nanachiyta munasunchikchu.

15. Makayla sipasqa, ¿imaynatam manchakuyninta atiparurqa?

15 Makayla sipaspas huchapakuruspan Diosta llakichiytam manchakurqa, ichaqa chaytam atiparqa Jehova Dios pampachakuq kasqanta yacharuspan. Paymi nin: “Yacharurqanim llapallanchik pantaq kasqanchikta. Yacharurqanitaqmi Jehova Dios ancha kuyawasqanchikta hinaspa churin vidanta qusqanrayku pampachawasqanchiktapas”, nispa. Makayla sipasqa Diosta kuyasqanraykum payllapaqña kawsakunanpaq tantiakuruspa bautizakurqa.

(Qaway 16 kaq parrafota). *

16. ¿Imataq Miles sutiyuq musuta yanaparqa mamanpa harkakusqanta manaña manchakunanpaq?

16 Miles sutiyuq musuqa manchakurqam bautizakuruptin maman piñakurunanmanta. Chaymi llaqtan-llaqtan watukuq iñiqmasinchikpa yanapakuyninta maskarqa. Paymi nin: “Watukuq iñiqmasinchikpapas mamanqa manam Testigochu kasqa. Yuyaymanachiwarqam imaynata mamayman kikiymanta bautizakuy munasqayta ninaypaq, aswanqa manam taytay hikutawasqanraykuchu”, nispa. Milespa mamanqa chaywanqa piñakururqam. Chaymi Milesqa tantiarurqa wasinmanta pasakunanpaq, chaynapi bautizakunanpaq. Payqa ninraqmi: “Ñuqapaq Jehova Dios tukuy ima ruwasqanta yachasqaywanmi kusikurqani. Yuyaymanarqanitaqmi Jesuspa ruwasqanpi, chaymi yanapawarqa Dios ancha kuyawasqanta musyakunaypaq. Yanapawarqataqmi  Diosllapaqña kawsakunaypaq tantiakuspay bautizakunaypaqpas”, nispa.

TANTIASQAYKITAQA RUWAYPUNI

Jehova Dios ñuqanchikrayku tukuy ima ruwasqanmantam agradecekuyta atichwan. (Qaway 17 kaq parrafota).

17. ¿Imatam llapallanchik qawachiyta atichwan?

17 Eden huertapi sachapa rurunta mikurusqanwanmi Evaqa Jehova Diosta qipancharurqa. Adanpas Jehova Dios tukuy ima paykunapaq ruwasqanmanta mana agradecekusqantam qawachirqa. Llapallanchikmi qawachiyta atichwan paykuna hina mana kasqanchikta. Bautizakuruspaqa qawachinchikmi Jehova Dioslla allin utaq mana allin kaqta tantiaq kasqanta. Qawachinchiktaqmi kuyasqanchikta hinaspa payllapi hapipakusqanchiktapas.

18. ¿Imatam ruwanayki Jehova Diosta kusisqa servinaykipaq?

18 Bautizakusqanchikmantapacham Diospa kamachikuyninkunata kasukunanchik, manam sunqunchikpa munasqantachu. Arí chayqa wakinpiqa sasam kanman, ichaqa enteron pachapi iñiqmasinchikkunam kallpanchakuchkanku. Qampas atiwaqmi paykuna hina kayta. Chaypaqqa bibliamanta allinta yachay, chaymantapas iñiqmasikikunawan kuska kay hinaspa Jehova Dios kuyapayakuq tayta kasqanmanta paykunaman willay (Heb. 10:24, 25). Imamanta tantianaykipaqpas Jehova Diospa palabranta qaway hinaspa llaqtantakama imam nisusqaykita uyariy (Is. 30:21). Chaykunata ruwaspaykiqa kawsakuynikipim kusisqa tarikunki (Prov. 16:3, 20).

19. ¿Imatam sapa punchaw yuyarinayki, hinaspa imanasqa?

19 Jehova Diospa nisusqayki allinnikipaq kasqanta sapa kuti yuyarispaykiqa astawanmi payta kuyanki hinaspa kamachisqantapas ruwaytam munanki. Kayqa yanapasunkim kay pachapi kaqkunawan mana intuchikunaykipaq, chaynapi Jehova Diosta mana saqinaykipaq. Kaymanta waranqa wataman bautizakusqaykita yuyarispa ninki: “Chay ruwasqayqa suma-sumaqmi karqa”, nispa.

28 KAQ TAKI ¿Piraq Diospa ancha kuyasqan kanman?

^ par. 5 Bautizakunaykipaqqa allintam tantiakunayki. ¿Imanasqa? Chaymantam kay yachachikuypi yachasun. Kay yachachikuyqa yanapanqataqmi sasachakuykunata qawaspan bautizakunankupaq manaraq tantiakuqkunatapas.

^ par. 56 DIBUJOMANTA WILLAKUY: Manchapakusqanku: Musu iñiqmasinchikmi huñunakuypi rimariytaqa manchakun, chaymi astawan kallpanchakuchkan qillqanchikmanta allinta yachananpaq.

^ par. 58 DIBUJOMANTA WILLAKUY: Amistadkuna: Sipas iñiqmasinchikmi iñiqmasinkumanta pinqakuchkan estudiaqmasinwan purispan, tiempopa pasasqanman hinam ichaqa testigo kasqanmantaqa manaña pinqakunchu.

^ par. 60 DIBUJOMANTA WILLAKUY: Huchallikuyta: Diospa llaqtanmanta turin qarqurachikuptin hinaspa wasinmanta pasakuptinmi sipas iñiqmasinchikqa huchallikuy manchakuyta qallaykurqa. Ichaqa Jehova Diosta kuyaspanmi bautizakurqa.

^ par. 62 DIBUJOMANTA WILLAKUY: Chiqnisqa kayta: Musu iñiqmasinchikmi mamanpa qayllanpi Diosta mañakuchkan, payqa manam testigochu. Chaymantam mamanman Diospi iñisqanmanta willachkan.

^ par. 65 DIBUJOMANTA WILLAKUY: Manchapakusqanku: Huk musum bibliatawan qillqanchikkunata estudiachkan.

^ par. 67 DIBUJOMANTA WILLAKUY: Amistadkuna: Huk sipasmi Diospa testigon kasqanmanta manaña pinqakunchu.

^ par. 69 DIBUJOMANTA WILLAKUY: Huchallikuyta: Huk sipasmi bibliapa yachachikuyninkunata allinta yachaspan bautizakurun.

^ par. 71 DIBUJOMANTA WILLAKUY: Chiqnisqa kayta: Huk musum Diospi iñisqanmanta mana manchakuspan willachkan mana testigo kaq mamanman.