“Agradecekuqtaqyá kaychik” (COL. 3:15).

46 KAQ TAKI “Gracias” nillaykikum Jehova Dioslláy

¿IMAMANTAM YACHASUNCHIK? *

1. Samaria llaqtayuq runaqa, ¿imaynatataq agradecekuq kasqanta qawachirqa?

LEPRAWAN unquq chunka runakunaqa manam ima ruwakuytapas atirqakuchu. Uyarirqakum ima unquytapas Jesus hampiy atisqanmanta. Chaymi paykunaqa mana iskayrayarqakuchu Jesus sanoyarachinanmantaqa. Huk punchaw rikuruspankum qaparispa nirqaku: “¡Jesus, yachachikuq, llakipayariykullawaykuyá!”, nispanku. Jesusñataqmi paykunata uyariykuspan llapallankuta hampiykurqa. Llapallankuchá sunqunkupi agradecesqa * tarikurqaku Jesus paykunata hampisqanrayku. Ichaqa huknillanmi agradecekuq kasqanta qawachirqa sunqumanta rimasqanwan. Chay runaqa Samaria llaqtamantam karqa, sanoyarusqanta qawaspanmi qaparispan Jehova Diosta hatuncharqa (Luc. 17:12-19).

2, 3. (1) ¿Imanasqataq wakinpiqa mana agradecekuchwanchu? (2) ¿Imakunamantam yachasunchik kay yachachikuypi?

2 Chay runa hinam ñuqanchikpas agradecekuq kananchik hukkuna ñuqanchikrayku imatapas ruwasqankumanta. Ichaqa wakinpim agradecekuyta qunqaruchwan.

3 Kay yachachikuypim yachasunchik agradecekuq kayqa imanasqa ancha allin kasqanmanta. Yachasuntaqmi imaynata ñawpaq tiempopi wakin runakuna agradecekuq kasqankuta qawachisqankumanta, hinaspa mana agradecekuq kaqkunamantapas.  Chaymantapas yachasunmi imakunata ruwaspa agradecekuq kasqanchikta qawachinanchikmanta.

¿IMANASQATAQ AGRADECEKUQ KASQANCHIKTA QAWACHINANCHIK?

4, 5. ¿Imanasqataq agradecekuq kasqanchikta qawachinanchik?

4 Jehova Diosqa qatipakunapaqmi, agradecekuq kasqantam qawachin payman sunquyuqkunata bendecispan (2 Sam. 22:21; Sal. 13:6; Mat. 10:40, 41). Bibliam nin: “Qamkunaqa kankichik Diospa kuyasqan churinkunam, chaynaqa paytayá qatipakuychik”, nispa (Efes. 5:1). Chaynaqa, agradecekuq kaytaqa munanchik Jehova Diosta qatipakuyta munasqanchikraykum.

5 Chaymantapas, agradecekuq kaytaqa munanchik kikinchik hinaspa hukkuna kusisqa kanankuta munasqanchikraykum. Chaytaqa tupachichwanmi miski mikuyta yanukuruspa hukkunawan kuska mikuruywan. Imamantapas agradecekuwaptinchikqa kusisqam tarikunchik. Chaynallataqmi ñuqanchikpas agradecekuptinchikqa wakinkuna kusisqa tarikunqaku, ¿imaynanpi? Qawanqakum kallpanchakusqankuqa allinninchikpaq kasqanta utaq imapas quykuwasqanchikqa kusichiwasqanchikta. Chayta ruwaspam anchata kuyanakusunchik.

6. Qurimanta manzanaqa, ¿imapitaq tupan agradecekuq kaywanqa?

6 Agradecekuq kayninchikqa ancha allinmi. Bibliam nin: ‘Qullqiwan adornasqa qurimanta manzana hinam tupaqninpi sumaq rimaykunaqa’, nispa (Prov. 25:11) ¿Manachu chayna manzanaqa kuyayllapaq hinaspa ancha chanin qullqipaq? ¿Imaynam tarikuchwan chayna manzanata quykuwaptinchikqa? Chaynallataqmi pitapas imamantapas agradecekuspaqa kusichisunchik. Chaymantapas, imaynam ñuqanchik achka watakuna waqaychachwan qurimanta manzanata, chaynallataqmi chay runapas agradecekusqanchiktaqa mana qunqanqachu.

 DIOSTA YUPAYCHAQKUNAM AGRADECEKUQ KASQANKUTA QAWACHIRQAKU

7. (1) Salmo 26:6-8 nisqanman hinaqa, ¿imaynatam Davidqa sutillata qawachirqa agradecekuq kasqanta? (2) ¿Imaynatam Asafpa mirayninkunapas sutillata qawachirqaku agradecekuq kasqankuta?

7 Davidqa agradecekuq kasqantam sutillata qawachirqa (qaway Salmo 26:6-8). Payqa sunqumanta imapas ruwasqanwanmi qawachirqa Dios yupaychayta chaninchasqanta. Chaymi llapa imakunata huñurqa Jehova Diospa templonta ruwanankupaq. Agradecekuq kasqankutaqa qawachirqakutaqmi Asafpa mirayninkunapas. Paykunaqa Jehova Diospaq sumaq takikunata takispankum yupaycharqaku. Huk kaqnin takinkupim Jehova Diosta agradecekurqaku tukuy ima ‘ruwasqanmanta’ (Sal. 75:1) Arí, paykunaqa agradecekuq kasqankutam sutillata qawachirqaku. Ñuqanchikqa, ¿imaynatam paykunataqa qatipakuchwan?

Roma llaqtayuqkunaman Pablopa cartasqanqa, ¿imatam yachachiwanchik agradecekuq kanamanta? (Qaway 8, 9 kaq parrafokunata). *

8, 9. (1) Pabloqa, ¿imaynatataq qawachirqa iñiqmasinkunata chaninchasqanta? (2) Chay ruwasqanqa, ¿imapitaq tukurqa?

8 Pablopas iñiqmasinkuna ancha kuyasqantam qawachirqa paykunamanta sumaqllataña rimaspan. Payqa Diosta mañakusqanpim sapa kuti agradecekuq iñiqmasinkunamanta. Iñiqmasinkunaman cartankunata apachisqanpipas paykunata ancha kuyasqantam qawachirqa. Romanos 16:1-15 qillqasqanpim 27 iñiqmasinkunapa sutinta qillqarqa. Prisca hinaspa Aquila iñiqmasinkunamanta qillqaspam nirqa: “Ñuqaraykum wañuypa patanpipas karqaku”, nispa. Febe iñiqmasinmantañataqmi nirqa: ‘Payqariki achkaqtam yanaparqa’, nispa. Yanapasqankunamanta hukninmi karqa Pablo. Chayraykum paykunata alabaykurqa anchata kallpanchakusqankumanta.

9 Pabloqa yacharqam wawqi-paninkunaqa pantaq kasqankuta. Chayna kachkaptinpas, Roma llaqtayuq iñiqmasinkunaman qillqasqan cartanpa tukupayninpim paykunapa allin ruwasqankumanta sumaqllataña rimarqa. Mayna kusisqaraq tarikurqaku chay cartata ñawinchaptinku uyariq iñiqmasinkunaqa. Chaywanqa astawanraqchá Pablowanqa kuyanakurqaku. ¿Ñuqanchikpas sapa kutillachu Pablo hina iñiqmasinchikkunata imapas nisqankumanta utaq ruwasqankumanta agradecekunchik?

10. ¿Imatam yachachwan Jesus qatiqninkunata agradecekusqanmanta?

10 Jesuspas Asia lawpi wakin qatiqninkunatam allin ruwasqankumanta agradecekurqa. Tiatira llaqtayuq qatiqninkunatam kaynata nirqa: “Ñuqaqa yachanim ruwasqaykikunata, kuyakuynikita, iñiynikita, Dios servisqaykita hinaspa sasachakuykunapi mana hukmanyasqaykita. Yachanitaqmi qipa ruwasqaykikuna punta ruwasqaykikunamantaqa aswanraq kasqantapas”, nispa (Apoc. 2:19). Manam Diospaq ruwasqanku yapakusqallanmantachu nirqa, aswanqa alabaykurqam sunqumanta chaykuna ruwasqankumanta. Arí, Jesusqa wakin qatiqninkunata allintaña kawsakunankupaq nispanpas, payqa paykunamanta rimayta qallarispanmi kallpancharqa, chaynallatataqmi tukurqapas (Apoc. 2:25-28). Jesusqa iñiqkunapa uman hinaspa paykunamanta nanachikuq kasqanraykum paypaq imapas ruwasqanchikmantaqa mana agradecekuwananchikraqchu. Chayna kachkaptinpas payqa agradecekuwanchikmi. Kay ruwasqantam qatipakunmanku iñiqkunapi punta apaqkuna.

¿PIKUNAM MANA AGRADECEKUQ KARQAKU?

11. Hebreos 12:16 nisqanman hinaqa, ¿imatam Esauqa ruwarqa Jehova Diosmanta chaskisqanwan?

11 Wakinkum ichaqa Diosta riqsichkaspankupas mana agradecekurqakuchu. Huk kaqninmi karqa Esau. Paypa tayta-mamanqa Jehova Diostam kuyarqaku hinaspa agradecekurqaku, Esauñataqmi Diospa kaqninkunataqa mana chanincharqachu (qaway Hebreos 12:16). ¿Imaynatam chayta qawachirqa? Payqa  sullkan Jacobmanmi piwi kayninta rantikururqa lenteja picantillapaq (Gen. 25:30-34). Chay ruwasqanmantam ñakakurqa hinaspam piwi churi hina mana chaskisqanmanta llumpa-llumpayta piñakurqa. Paypaqqa manam piñakunanpaq hinachu karqa, piwi kayninta mana chaninchasqanrayku.

12, 13. ¿Imaynatam Israel runakunaqa mana agradecekuq kasqankuta qawachirqaku, hinaspa chayqa imapim tukurqa?

12 Israel runakunapas, paykunapaq Jehova Dios tukuy ima ruwasqanmantam agradecekunanku karqa. Jehova Diosqa Egipto nacionmantam Israel runakunata hurqumurqa. Chaymanta qipallatam paykunataqa Jehova Dios waqaycharqa puka lamar quchapi Egipto nacionpa tropankunata chinkachispan. Chayta qawaspankum paykunaqa agradecekusqankuta qawachirqaku Jehova Diospaq takispanku. ¿Haykapikamataq chayna agradecekuq karqaku?

13 Sasachakuypi kaspankum qunqarurqaku Jehova Dios paykunapaq tukuy ima ruwasqanmanta, hinaspam agradecekuq kasqankuta manaña qawachirqakuchu (Sal. 106:7). Bibliam nin ‘chay chunniqpi Israelpa mirayninkuna Moisespa chaynataq Aaronpa contranpi rimasqankumanta’. Chayqa Jehova Diosmantapas rimachkanmanku hinam karqa (Ex. 16:2, 8). Chay ruwasqankuwanqa Jehova Diosmi piñakururqa, chaymi nirqa chunniqpi wañunankumanta. Calebwan Josueymi ichaqa mana wañunankuchu karqa (Num. 14:22-24; 26:65). Paykuna hina mana kananchikpaqqa, ¿imatam ruwananchik? ¿Imaynatam agradecekuqkunata qatipakuchwan?

¿IMAYNATAM QAWACHICHWAN AGRADECEKUQ KASQANCHIKTA?

14, 15. (1) ¿Imaynatam casarasqakunaqa agradecekuq kasqankuta qawachinakunmanku? (2) ¿Imaynatam tayta-mamakunaqa agradecekuq kayta yachachinmanku churi-wawankuman?

14 Ayllunchikta. Ayllu ukupi agradecekuq kaspankuqa llapallankum kusisqa tarikunqaku. Casarasqakunaqa sapa kutim agradecekuq kasqankuta qawachinakunanku, chayta ruwaspankuqa astawanraqmi kuyanakunqaku hinaspapas manam chayllaqa imatapas ninakunqakuchu pantasqankumantaqa. Warmichanta kuyaq qusaqa manam rimasqantawan ruwasqallantachu qawan, aswanqa ‘alabanmi’ (Prov. 31:10, 28). Yachayniyuq warmiñataqmi qusanta nin ruwasqankuna kusichisqanta.

15 Tayta-mamakuna, ¿imaynatam warmaykichikta yachachiwaqchik agradecekuq kanankupaq? Qamkunaqa yuyarinaykichikmi imapas ruwasqaykichikta utaq rimasqaykichikta qatipakunankumanta. Chaynaqa, allin  ruwasqankumantayá alabaykuychik, chaynapi paykunapas ruwasqaykichikta qatipakunankupaq. Chaymantapas yachachiychikyá agradecekuq kayta paykunapaq pipas imatapas ruwaptinku. Yanapaychiktaqyá sunqunkumanta agradecekunankupaq, chaynapi rimasqankuwan hukkunata kallpanchanankupaq. Clary sutiyuq iñiqmasinchikmi nin: “Mamay 32 watanpi kachkaspanmi qunqayllamanta sapallanña kimsa wawankunata uywayta qallaykurqa. Ñuqapas 32 wataypi kachkaspaymi chay ruwasqan sasa kasqanta yuyarirqani. Chaymi mamaypa ñuqaykurayku tukuy ima ruwasqanta ancha chaninchasqayta nirqani. Qayninpakunallam mamayqa niwarqa ñuqaykurayku tukuy ima ruwasqanmanta agradecekusqayta sunquchanpi waqaychasqanta. Niwarqataqmi chaypi sapa kuti yuyaymanaspa chaywan kusisqa tarikusqantapas”, nispa.

Churi-wawanchikkunatam agradecekuq kanankupaq yachachinanchik. (Qaway 15 kaq parrafota). *

16. ¿Imaynatam agradecekuq kasqanchikqa hukkunata kallpanchanman? Rimariy Jorge iñiqmasinchikmanta.

16 Iñiqmasinchikkunata. Paykunataqa anchatam kallpanchanchik agradecekuq kaspa. Rimarisun 28 watanpi punta apaq Jorgemanta. Llumpayta unqurusqanraykum killapuni mana rirqachu huñunakuyman. Kaqmanta huñunakuyman rispanñataqmi ñawpaq hina yachachiytaqa mana atirqachu. Paymi nin: “Iñiqmasiykunapaq mana imapas ruwayta atisqayraykum mana kaqpaqña hapikurqani. Huk punchawmi, huñunakuyniyku tukuruptin huk iñiqmasinchik kaynata niwarqa: ‘Tukuy ima ruwasqaykimanta hinaspa aylluypa qatipakunankupaq hina kasqaykimantam anchata agradecekuyki. Kay watakunapi yachachikuynikikunaqa anchatam yanapawarqaku astawan Diosman asuykunaykupaq’, nispa. Chaykunata uyarispaymi mana ima niytapas atirqanichu, wiqillayñam ñawiyman huntarqa. Chayqa anchatam kallpanchawarqa”, nispa.

17. Colosenses 3:15 nisqanman hinaqa, ¿imaynatam Jehova Diosta tukuy quwasqanchikmanta agradecekuchwan?

17 Jehova Diosninchikta. Payqa tukuy imamantam achkanpi yachachiwanchik. Chay yachachikuykunatam tarinchik huñunakuypi, qillqanchikkunapi hinaspa internetpipas jw.org niqpi. ¿Manachu huñunakuypi yachachikuykunata uyarispanchik, qillqanchikkunata ñawinchaspanchik utaq internetpi JW Broadcasting niqta qawaspanchik anchata kusikunchik? Wakiqninchikqa nirqanchikraqmi: “Kayqa ñuqapaq hinam ruwasqa kasqa”, nispa. Chaynaqa, ¿imaynatataq Jehova Diosta agradecekusqanchikta qawachichwan tukuy quwasqanchikmanta? (Qaway Colosenses 3:15). Sapa kuti Diosta mañakuspanchik “gracias” nispanchikmi (Sant. 1:17).

Huñunakusqanchik wasita allichaspa hinaspa pichaspam qawachichkanchik agradecekuq kasqanchikta. (Qaway 18 kaq parrafota).

18. ¿Imaynatam qawachichwan huñunakunanchik wasita ancha chaninchasqanchikta?

 18 Jehova Diosta agradecekusqanchiktaqa qawachinchiktaqmi huñunakusqanchik wasita kuchun-kuchun pichaspa hinaspa allichaspa. Chaypaqmi sapa kuti kallpanchakunanchik. Kallpanchakunanchiktaqmi uyarinapaq utaq qawanapaq aparatokunata allinta waqaychananchikpaq. Huñunakunanchik wasita sapa kuti allichaptinchikqa unaytam takyanqa, chaymantapas manam achka qullqitachu hapisun imankunatapas allichananchikpaqqa. Kaykunata ruwaspanchikqa manam qullqinchiktaqa usuchisunchu, astawanraqmi enteron pachapi musuq huñunakuna wasikunata ruwanankupaq hinaspa allichanankupaq yanapakusun.

19. ¿Imatam yachachwan llaqtan-llaqtan watukuq iñiqmasinchikta hinaspa warmichanta ima pasasqanmanta?

19 Ñuqanchikrayku llamkaqkunata. Sasachakuypi tarikuq iñiqmasinchikkunata ima ruwasqankumantapas agradecekuptinchikqa kallpanchasqam tarikunqaku. Rimarisun llaqtan-llaqtan watuq iñiqmasinchikmanta hinaspa warminmanta. Llumpay chiri kasqanraykum willakusqankumanta pisipasqa hinaspa hukmanyasqa wasinkuman kutirqaku. Chaymi llumpayta chirisqanrayku watukuq iñiqmasinchikpa warmichanqa hina chay pachantillan puñuykurqa. Achikyaramuptinñataqmi qusanta nirqa manaña iñiqmasinkunata watukuq riysinanpaq hina kasqanmanta. Hina chay punchawllam betel wasimanta paypaq carta chayamurqa, chay cartapim iñiqmasinchikkuna payta sasaña kaptinpas tukuy ima ruwasqanmanta alabasqankuta nirqaku. Nirqakutaqmi sapa semana huk lawkunaman astakuyqa sasa kasqanmantapas. Qusanmi nin: “Chay nisqankuqa warmichaypa sunqunmanmi chayarurqa, chaymi llaqtan-llaqtan watukuq kasqaykuta saqinaykupaqqa manaña niwarqachu. Wakinpiqa ñuqapas watukuq kasqaytam saqinaypaq karqani, ichaqa warmichaymi kallpanchawarqa hinalla watukunaypaq”, nispa. Paykunaqa yaqa 40 watam iñiqmasinchikkunata watukurqaku.

20. ¿Imapaqmi sapa punchaw kallpanchakunanchik, hinaspa imanasqa?

20 Sapa punchawmi agradecekuq kananchikpaq kallpanchakunanchik. Agradecekusqanchikta pipas uyarispan utaq qawaspanmi kallpanchasqa tarikunman kay ñakariy punchawkunapi. Chaymantapas chayna agradecekuq kaspaqa iñiqmasinchikkunawanpas anchatam kuyanakusun. Hinaspapas chayta ruwaspam Jehova Diosta qatipakusunchik.

20 KAQ TAKI Kuyasqayki churikitam qumurqanki

^ par. 5 ¿Imatam yachachwan Jehova Diospa, Jesuspa hinaspa Samaria llaqtamanta lepra unquyniyuq runapa agradecekuq kasqankumanta? Kay yachachikuypim paykunamanta yachasunchik hinaspa hukkunamantapas. Yachasuntaqmi agradecekuq kasqanchikta hukkunaman qawachiyqa imanasqa ancha allin kasqanmanta, chaymantapas yachasunchikmi imakunata ruwaspa agradecekuq kananchikmantapas.

^ par. 1 ASTAWAN YACHANAPAQ: Agradecekuq runaqa paypaq imapas ruwasqankutam anchata chaninchan hinaspapas rimasqanwanmi qawachin agradecekuq kasqanta.

^ par. 55 DIBUJOMANTA WILLAKUY: Ñawpaq tiempopi Roma llaqtayuq iñiqkunam paykunaman Pablopa cartasqanta uyarichkanku. Sutinkuta uyarispankuñataqmi Aquila, Priscila, Febe hinaspa hukkunapas kusikuchkanku.

^ par. 57 FOTOMANTA WILLAKUY: Huk iñiqmasinchikmi warmi wawanta yachachichkan yuyaqña iñiqmasinpa tukuy ruwasqanta chaninchananpaq.