Yachachikuypa kasqanman rinapaq

Yachachikuyman rinapaq

“Allin ruwaq runaqa Jehova Diosraykum kusikunqa”

“Allin ruwaq runaqa Jehova Diosraykum kusikunqa”

DIANA iñiqmasinchikqa 80 masnin watayuqñam. Qusanqa Alzeheimer nisqanku unquywanmi unqurqa, chay unquywanmi imatapas qalaypaq qunqaruq, hinaspapas yuyaqkunata yanapaq wasipim wañukunankama karqa. Chaymantapas Dianapa iskay wawankunam wañukurqaku, chaywanmi payqa llumpay llakisqa tarikurqa. Hinaspapas Dianaqa cancer nisqan unquywanmi unqurqa. Chaykunawan ñakarispanpas Dianaqa huñunakuykunapi kaspam chaynataq Diosmanta willakuspam kusisqa tarikun, chayna kasqantam iñiqmasinkunapas ninku.

John iñiqmasinchikñataqmi 43 masnin watakuna llaqtan-llaqtan watukuq karqa. Payqa chay ruwasqanwanqa ancha kusisqam tarikurqa, ichaqa huk kaqnin ayllun unqusqanraykum llaqtan-llaqtan watukuq ruwayninta saqirurqa. Johnta unay watakuna riqsiq iñiqmasinkuna hatun huñunakuypi paywan tuparuptinkum, ninku Johnqa ñawpaqta hina kusisqa hinalla kasqanmanta.

¿Imataq Diana hinaspa John iñiqmasinchikkunata yanapan hinalla kusisqa kanankupaq? ¿Imaynataq pipas hinalla kusisqa kanman imawanña ñakarispanpas utaq Diospaq llamkayninta manaña ruwaspanpas? Bibliam niwanchik: ‘Allin ruwaq runaqa [Jehova] Diosraykum kusikunqa’, nispa (Sal. 64:10, Chuya Qellqa, 1987). Bibliapa chayna nisqanta allinta yachananchikpaqmi kaypi yachasunchik imam chiqapta kusichiwasqanchikmanta.

¿IMAKUNATAQ KUSICHIWANCHIK?

Casarakuspanchikqa utaq wawa-churiyuq karuspanchikqa utaq Diospa llaqtanpi imakunapipas astawan yanapakunapaq niwaptinchikqa kusisqam kanchik. Chaykunarayku kusisqa kayqa allinmi Jehova Diosmanta chaykuna hamusqanrayku. Paymiriki casado vidata qallarichirqa, wawa-churiyuq kananchikpaqpas unanchawarqanchik hinaspa llaqtanpi ima ruwananchikpaqpas niwanchik (Gen. 2:18, 22; Sal. 127:3; 1 Tim. 3:1).

Ichaqa chayna kusikusqanchikqa wakinpiqa manam wiñaypaqchu kanman. ¿Imanasqa? Casado vidapim huk kaqnin wañukunman utaq huk kaqnin huchapakurunman hinaptinmi llakikuypi tarikunmanku (Ezeq. 24:18; Os. 3:1). Chaymantapas churi-wawakunaqa tayta-mamantam hinaspa Jehova Diostam manaña kasukunmankuchu, chayrayku ichapas Diospa llaqtanmanta qarqurachikunmanku. Bibliam willawanchik Diosmanta willakuq  Samuelpa churinkunapas Diosmanta karunchakusqankuta. Kamachiq Davidpas huchapakusqanraykum ayllunpi achka sasachakuykunapi tarikurqa (1 Sam. 8:1-3; 2 Sam. 12:11). Chayna sasachakuykunaqa pitapas llakichinmanmi ¿aw?

Chaymantapas Diospa llaqtanpi ima ruwasqanchiktam qunqayllamanta saqiruchwan. ¿Imanasqa? Ichapas unqusqanchikrayku, huk kaqnin ayllunchikta yanapananchik kasqanrayku utaq Diospa llaqtanpi imapas kasqanrayku. Chaynapi tarikuq iñiqmasinchikkunam ninku ñawpaqta Diospa llaqtanpi imapas ruwasqankuwan kusisqa kasqankumanta.

Chaynaqa, casarakuspanchik, wawa-churiyuq kaspanchik utaq Diospa llaqtanpi imakunapipas astawan yanapakuspanchikqa kusisqa kanchik, ichaqa chayqa manam wiñaypaqchu. Chaymi Samuelpa, Davidpa chaynataq hukkunapa ruwasqankunam musyachiwanchik ima sasachakuyña kaptinpas utaq imapas qunqayllamanta karuptinpas hinalla kusisqa kayta atinanchikmanta.

¿IMATAQ CHIQAP KUSIKUYTA QUWANCHIK?

Jesusqa yacharqam chiqap kusikuyqa imayna kasqanmanta. Hanaq pachapi Jesuspa kawsakusqanqa suma-sumaqmi karqa, chaymi payqa ‘tukuy tiempo Dioswan kusisqa’ karqa (Prov. 8:30). Kay allpa pachaman hamuspanñataqmi wakinpiqa llumpay sasachakuykunapi tarikurqa. Chaywanpas payqa kusisqam tarikurqa Diospa munayninta ruwaspan (Juan 4:34). Chaymantapas, ¿imataq payta yanaparqa ñakariykunata aguantananpaq? Bibliam nin: “Payqa hamuq tiempopi kusisqa kananta yachaspanmi pinqaytapas qipanchakuykuspan qirupi ñakarirqa”, nispa (Heb. 12:2). Yachasunyá chiqap kusisqa kaymanta Jesus ima nisqanmanta.

Huk kutipim Jesuspa 70 qatiqninkuna Diosmanta willakusqankumanta kutirqaku. Paykunaqa kusisqallañam kachkarqaku milagrokunata ruwasqankuwan hinaspa demoniokunatapas runakunamanta qarqusqankuwan. Hinaptinmi Jesus paykunata nirqa: “Amayá demoniokuna kasususqaykichikmantachu kusikuychikqa. Kusikuychikqa hanaq pachapi sutikichik qillqasqa kasqanmantayá”, nispa (Luc. 10:1-9, 17, 20). Arí, Diospaq imapas ruwasqanchikwan kusisqa kaspanchikpas, Dioswan kuyachikusqanchikmi aswan chiqap kusikuytaqa quwanchik.

Huk kutipiñataqmi huñunasqa runakunata Jesus yachachichkaptin huk warmi qayakamuspan nimurqa: “¡Mayna kusisqam wachakusuqniki hinaspa ñuñusuqniki warmiqa!”, nispa. Jesusmi ichaqa nirqa: “Manam chaynachu. ¡Kusisqaqa kanku  Diospa palabranta uyarispa kasukuqkunam!”, nispa (Luc. 11:27, 28). Pipas kusisqachá tarikun churi-wawankuna sumaq sunquyuq kaptinku. Paykunaqa aswan kusisqaqa kanqaku Diosta kasukuspanku hinaspa Dioswan kuyachikuspankum.

Chaynaqa, Diospa kuyasqan churin kasqanchikta yachaspallanchikmi kusisqaqa kasun. Sasachakuykunapi tarikuspapas hinallam kusisqa kayta atichwan. Chay sasachakuykunata atipaspaqa Diospim astawan hapipakusunchik hinaspa aswan kusisqam kasunchik (Rom. 5:3-5). Chaymantapas Jehova Diosqa paypi hapipakuqkunatam chuya espiritunwan yanapan. Chuya espiritunñataqmi runakunata kusisqata kawsachin (Gal. 5:22). Chayraykum Salmo 64:10 nin: ‘Allin ruwaq runaqa [Jehova] Diosraykum kusikunqa’, nispa (CQ, 87).

¿Imataq John iñiqmasinchikta yanaparqa hinalla kusisqa kananpaq?

Chayraykum qallariyllapi rimamusqanchik Diana hinaspa John iñiqmasinchikkunaqa sasachakuykunapi tarikuspankupas hinalla kusisqa karqaku. Dianam nin: “Jehova Diospim hapipakurqani, imaynam huk warmachapas taytanpi hapipakusqanman hina”, nispa. Nintaqmi: “Musyakunim hinalla kusisqa paymanta willakunaypaq Jehova Dios yanapawasqanmanta”, nispa. ¿Imataq Johntapas yanaparqa? Paymi nin 1998 watapi solterokunapaq bibliamanta escuelapi yachachiq kananpaq nisqankuta, chaymi payqa nin mana haykapipas estudiasqanman hina chaypi allinta estudiasqanmanta. Chayraykum Johnwan warmichanqa mana ancha llakisqachu tarikurqaku llaqtan-llaqtan watukuq manaña kananpaq niptinku, paykunaqa ñawpaqmantaraqmi Jehova Diospa munasqanta maypipas ruwayta munarqaku. Paymi nin: “Manam imamantapas ñakakunikuchu”, nispa.

Achka iñiqmasinchikkunam ninku Salmo 64:10 nisqanqa chiqap kasqanmanta. Rimarisun Estados Unidos nacionpi betel wasipi llamkaq casarasqa iñiqmasinchikkunamanta, paykunaqa 30 masnin watakunam chaypi yanapakurqaku, ichaqa chaymantam nirqaku precursor especial hinaña kanankupaq. Paykunam ninku: “Imapas anchata gustasusqaykita manaña ruwaspaykiqa ancha llakisqam tarikunki. Ichaqa manam tukuy tiempoqa llakisqallañaqa kanaykichu”, nispa. Paykunaqa betelmanta lluqsiruspankuqa kachasqanku lawpi iñiqmasinchikkunawanmi chaylla Diosmanta willakuq lluqsirqaku. Paykunaqa ninkutaqmi: “Dios yanapaykuwanankupaqmi tukuy imamanta payta mañakurqaniku. Jehova Dios uyariwasqanchikta hinaspa chayman hina yanapawasqanchikta musyakuspaykum ancha kusisqa hinaspa kallpanchasqa tarikurqaniku. Yanapakunaykupaq kachawasqanku lawpi chayasqayku qipallatam wakin iñiqmasinchikkunapas precursorña karqaku. Chaymantapas iskay runakunatam bibliamanta yachachiyta qallaykurqaniku”, nispa.

‘WIÑAYPAQ KUSISQA KASUN’

Hinalla kusisqa kayqa wakinpiqa sasam kanman. Wakinpiqa llakisqachá tarikusun. Jehova Diosmi ichaqa sunqunchikta kusichiwanchik Salmo 64:10 nisqanwan. Hukmanyasqa tarikuspanchikqa yuyarinanchikmi ‘allin ruwaq runaqa [Jehova] Diosrayku kusisqa’ kananmanta. Huk rimaypiqa, imakunapiña tarikuspanchikpas Diosman sunqu kaspanchikqa kusisqam kasun. Chaymantapas yachanchikmi hamuq tiempopi Jehova Dios kay allpa pachata sumaqyachinanmanta. Chaypiqa Diosta yupaychaqkunaqa mana pantaqñam kasunchik, hinaspapas ‘wiñaypaqmi kusisqa kasunchik’ Jehova Diospa tukuy ima ruwasqanwan (Is. 65:17, 18).

Chaypiqa manañam unqusunñachu hinaspapas sapa punchawmi kallpayuq kasun. Kay tiempopi imapas mana allinkuna pasawasqanchikkunataqa manañam yuyarisunchu. Jehova Diosmi niwanchik: ‘Ñawpaq kaqkunaqa qunqasqañam kanqa, manañam pipas yuyarinqañachu’, nispa. Chaymantapas kuyasqanchik runakunam kawsarimunqaku. Imaynam wañukuq warmachata Jesus kawsarichiptin tayta-maman ancha kusisqa tarikurqaku, chaynam waranqantin runakuna ancha kusisqa tarikunqaku ayllunkuwan tupaykuspanku (Mar. 5:42). Chaymantapas chay tiempopi yachaq runakunaqa allin ruwaqmi kanqaku utaq mana huchayuqñam kanqaku, hinaptinmi ‘Jehova Diosrayku’ wiña-wiñaypaq kusikunqaku.