Yachachikuypa kasqanman rinapaq

Yachachikuyman rinapaq

Leeqkunapa tapukuyninkuna

Leeqkunapa tapukuyninkuna

¿Imanasqataq mana allinchu Jehova Diospa testigonkunapa qillqankunata internetpi utaq redes sociales nisqankupi churayqa?

Diospa llaqtan qillqanchikkunata mana imallapaq qusqankuraykum wakinqa piensanku jw.org niqmanta ima qillqatapas hurquspa internetman utaq redes sociales nisqankuman churayqa mana hucha kasqanta. Ichaqa chay ruwayqa manam allinchu Diospa llaqtanta sasachasqanrayku. “Leypa nisqanman hina” jw.org nisqanpi willakuymi * nin: “Dibujokunata, jw.org nisqanku internetpi kaq qillqakunata, jw letrakunata, takikunata, fotokunata, videokunata utaq jw.org nisqanpi ima kaqtañapas internetman churayqa manam allinchu”, nispa. Nitaqmi redes sociales nisqankumanqa churanachu. ¿Imanasqa?

Jw.org nisqanpiqa ima kaqñapas leypa amparasqanmi kachkan. Diospa llaqtanmanta lluqsispanku contranpi kaqkunaqa hinaspa chiqniwaqninchikkunaqa, qillqanchikkunatam internetman churarunku testigokunatapas hinaspa huk runakunatapas pantachinankupaq (Sal. 26:4; Prov. 22:5). Wakin runakunaqa qillqanchikpi yachachikuykunatam utaq jw.org letrakunatam servichikunku imatapas rantikunankupaq utaq celularkunapaqpas imatapas ruwanankupaq. Chayta ruwaq runakunataqa Diospa llaqtanqa quejakurunmanmi, qillqanchikkuna hinaspa jw.org nisqa letranchikkuna leypa amparasqan kasqanrayku (Prov. 27:12). Sichum Diospa llaqtan saqinman qillqanchikkunata internetman churanankupaq utaq jw.org nisqa letrakunawan imatapas rantikunankupaq hinaptinqa, manachá juezkunaqa Diospa llaqtanmanqa sayapakunmankuchu chiqniwaqninchikkunata hinaspa negociantekunata quejakuptinchikqa.

Qillqanchikkunata jw.org niqmanta mana hurquspanchikqa sasachakuypim tarikuchwan. Jehova Diosmi unayña akllarun ‘allin ruwaq yuyayniyuq sirvienteta’ yachachiwananchikpaq (Mat. 24:45). Kay ‘sirvienteqa’ jw.org, tv.jw.org hinaspa wol.jw.org nisqakunallapim yachachikuykunata churan. Chaymantapas JW Language®, JW Library® hinaspa JW Library Sign Language® nisqankunallatam ruwarunku celularpaq hinaspa huk aparatokunapaqpas. Chaykunapiqa manam kanchu rantikuqkunapa willakuyninkuqa nitaq satanaspa ima ruwasqanpas. Internetpi jw.org niqman yaykunamanta hukkunaman yaykuruspaqa manachá chiqap yachachikuykunataqa tarisunchu (Sal. 18:26; 19:8).

Chaymantapas internetman qillqanchikkunata churaptinchikqa, Diospa llaqtanmanta karunchakuqkunam hinaspa Diospa llaqtanpa contranpi kaqkunam chaypi iskayrayanapaq hina kaqkunata qillqanmanku. Wakin iñiqmasinchikkunam chaynintakama mana riqsisqa runakunawan atipanakunku, chay ruwasqankum Jehova Diospa sutinta astawan pinqaypi churan. Chayraykum mana kasukuqkunawan internetpi rimayqa mana allinchu (2 Tim. 2:23-25; 1 Tim. 6:3-5). Chaymantapas, wakin runakunam internetpi utaq redes sociales nisqapi llullakuspanku Diospa llaqtanpa hinaspa Diospa llaqtanpi punta apaqkunapa sutinpi rimanku. Manam Diospa llaqtanpi punta apaqkunapaqa mayqinninkupapas kanchu redes sociales nitaq sutinkuwan ruwasqa huk rikchaqkunapas.

Runakunata jw.org nisqanman yaykunankupaq nispanchikqa Diosmanta chiqap kaqta yachanankupaqmi yanapachkanchik (Mat. 24:14). Diospa llaqtanpa ruwasqanku jw.org, JW Library hinaspa chayman rikchakuqkunapas sapa kutim aswan allin ruwasqaña kachkan. Munanchikmi llapallan runakuna servichikunankuta. Chaynaqa jw.org niqmanta qillqanchikkunata hurquspa internetnintakama apachiyqa utaq imaynata yaykunankupaq niypas allinmi kanman. Runakunataqa jw.org nisqanman yaykunankupaqmi kallpanchananchik, chaynintakamallam ‘allin ruwaq yuyayniyuq sirvienteqa’ yachachiwanchik.

^ par. 1 Chay willakuyqa kachkan jw.org nisqanpa uray patachanpim “Imayna servichikunapaq” niq sutiyuq. Chaypim astawan willakun jw.org nisqanpi ima kaqkunawanpas imata mana ruwanamanta.