WINSTON hinaspa warmichan Pamela Payne iñiqmasinchikkunam Australasia betel wasipi yanapakuchkanku. Paykunaqa kunankamam kusisqa kawsakuchkanku, chaywanpas wakinpiqa sasachakuykunapim tarikurqaku. Wawachankum wiksallapiraq wañururqa, chaymantapas huk law llaqtakunaman rispankuqa chaypi yachaq runakuna hinam yachananku karqa. Chayna sasachakuykunapi tarikuspankupas hinallam Diosman sunqu karqaku, iñiqmasinchikkunatapas kuyarqakum hinaspapas kusisqam Diosmanta willakurqaku.

Wawqillay Winston, niykuwayku Diosta imayna riqsisqaykimanta.

Australia nacionpa Queensland llaqtanpim wiñarqani, wasiypi kaqkunaqa mana Diospi iñiqmi karqaku. Llaqtaymanta karupi yachasqaykuraykum mana huk runakunawanqa anchachu rimaq kani. 12 wataymantapacham Diosmanta yachayta munarqani, chaymi Diosta mañakurqani paymanta chiqap kaqta yachanaypaq. Watakuna pasaytam Adelaida llaqtaman rirqani, chaypim llamkayta tarirurqani. 21 wataypi kachkaspaymi Sydney llaqtaman purikuq rirqani, chaypim riqsirurqani Pamelata. Paymi rimapayawarqa israelismo britanico niq religionmanta. Chay religionpi kaq runakunam ninku Israel runakunapa miraynin kasqankuta. Adelaida llaqtaman kutispaymi chay religionmanta rimarqani huk llamkaqmasiywan, payqa Jehova Diospa testigonkunawanmi bibliamanta yachachkasqa. Chaymi llamkaqmasiyqa willawarqa imakunata bibliapi yacharusqanmanta, chaypim musyakururqani warmallaraq kachkaspay mañakusqayta Dios uyariykuwasqanta. Diosmanta hinaspa munaychakuyninmanta chiqap kaqtam yachayta qallaykurqani, chayqa karqa “ancha valorniyuq perlasta” tarichkaymanpas hinam (Mat. 13:45, 46).

Panillay Pamela, qampas warma kachkaspaykiraqmi Diosmanta chiqap kaqta yachayta munarqanki ¿aw? Niykuwayku imaynam chay karqa.

Wiñarqanim Coffs Harbour llaqtapi (Nueva Gales del Sur). Tayta-mamay hinaspa abuelitoykunam israelismo britanico religionniyuq karqaku. Paykunaqa turiyta, ñañayta hinaspa primoykunatawanmi yachachiwarqaku chay religionpi kaq  runakunallata Dios kuyasqanta. Chayna yachachiwasqankumantam iskayrayarqani, hinaspapas manam sunqumantachu Diostaqa kuyarqani. Chayraykum 14 wataypi kachkaspay huk religionkunaman riyta qallaykurqani, chay religionkunaqa kaykunam karqa: Anglicano, bautista hinaspa adventista. Chay religionkunapipas Diosmanta chiqap kaqtaqa manam yacharqanichu.

Tiempopa risqanman hinam, aylluywan Sydney llaqtaman astakurqaniku, chaypim riqsirurqani Winston qusayta. Paywan religionmanta parlasqaykuraykum Adelaida llaqtaman kutispan Jehova Diospa testigonkunawan bibliamanta yachayta qallaykurqa. Chaymantam sapa qillqamuwaspan bibliamanta achka textokunata qillqamuwaq. Qallariypiqa piñakuqmi kani bibliapa textonkunata qillqamuwaptin, ichaqa pisi-pisimantam musyakurqani Diosmanta chiqap yachachikuy kasqanmanta.

1962 watapim Adelaida llaqtaman astakurqani, chaypim Winston yacharqa. Paymi nirqa Thomas hinaspa warmichan Janice Sloman iñiqmasinchikkunata wasinpi yachanaypaq. Paykunaqa ñawpaqtam Papua Nueva Guinea nacionpi misionero karqaku. Chaypiqa 18 watallaypiraqmi kachkarqani, chay iñiqmasinchikkunaqa kuyakuqllañam karqaku. Paykunam yanapawarqa Jehova Diosmanta astawan yachanaypaq, manam iskayrayarqanichu Diosmanta chiqap kaqta tarirusqaymantaqa. Winstonwan casarakusqay qipatam kusisqa Jehova Diosta yupaycharqaniku. Sasachakuykunaqa karqam, chayqa yanapawarqakum astawan Diosman sunqu kanaykupaq.

Wawqillay Winston, willariwaykuyá bautizakusqaykimanta qipaman Diospaq imakuna ruwasqaykimanta.

A. Watukusqayku islachakuna hinaspa llaqtakuna.

B. Kiribati hinaspa Tuvalu islachakunapa tarjetachakuna. Ñawpaqtam chay islachakunataqa suticharqaku Gilbert hinaspa Ellice.

C. Coralina de Funafuti sumaq islacha. Manaraq misionero iñiqmasinchikkuna chay islachaman chayachkaptinkum, chaypi yachaq iñiqmasinchikkunata watukurqaniku.

Casarakusqayku qipallatam Jehova Diospaq astawan llamkanaykupaq “hatun punku” kichakuykurqa (1 Cor. 16:9). Chaypaqmi yanapawarqaku iñiqmasinchik Jack Porter, payqa llaqtan-llaqtan watukuqmi karqa, ñuqaykutapas watukamuwarqakum. Chaypim pay hinaspa warmichan Roslyn kallpanchawarqaku killapi 70 horata willakunaykupaq, pichqa watam killapi 70 horata willakurqaniku. Kunanqa Jack Porter iñiqmasinchikwan kuskam llamkachkaniku Australasia betel wasipi. 29 wataypi kachkaspaymi llaqtan-llaqtan watukuq karqani islas del Pacifico sur lawkunapi. Chay islakunatam nanachikurqa Fiyi nacionpi betel wasipi kaq iñiqmasinchikkuna. Chay islakunapim kay llaqtakunata watukurqaniku, Kiribati, Nauru, Niue Samoa Norteamericana, Tokelau, Samoa, Tonga, Tuvalu hinaspa Vanuatu.

Chay watakunapiqa, karu islachakunapi yachaq wakin runakunaqa mana allinpaqmi hapiqku Jehova Diospa testigonkunataqa. Chayraykum mana imatapas ruwaqchu kaniku piñakunankupaq hinaqa (Mat. 10:16). Chay islapa llaqtachankunapiqa iñiqmasinchikkunaqa asllam karqaku, wakinpiqa manam karqachu maypi samapakunaykupaq. Chaymi wakin runakunataña samaykachiwanankupaq niq kaniku. Kuyakuqllañam chay runakunaqa karqaku.

Wawqillay Winston, anchatam munanki qillqanchikkunata huk rimayman ruwayta, ¿imaynatam chayta qallaykurqanki? Willaykuwayku.

Samoa nacionpi punta apaqkunapaq yachachikuy.

Tonga nacionpi iñiqmasinchikkunapaqqa tongano rimayninkupi qillqakunaqa asllam karqa. La verdad que lleva a vida eterna niq qillqawanmi runakunaman bibliamanta yachachiqku, chay qillqaqa ingles rimayllapim karqa. Punta apaqkuna huk killa yachachikuyman risqankupim tantiarurqaku kimsa punta apaqkuna chay qillqata tongano rimayman ruwayta qallarinankupaq, paykunaqa pisillatam inglestaqa rimarqaku. Warmichay Pamelañataqmi chay qillqata tongano rimayman ruwasqankuta maquinawan qillqarqa. Chaymantam apachiq kaniku Estados Unidos nacionpi kaq betel wasiman, chaynapi achkata ruwanankupaq. Iskay killapim chay tongano rimaypi qillqaqa qispirurqa. Chay qillqa tongano rimayniyuq runakunapa rimasqankuman hina mana kaspanpas achka runakunatam yanaparqa Diosmanta yachanankupaq. Qillqanchikkunata huk rimayman ruwaqchuqaya ñuqaykuqa kaniku, chayna kaptinpas chaypi yanapakusqaykum anchata kusichiwarqaku.

 Panillay Pamela, willaykuwayku Australia nacionmantaqa, ¿imaynam karqa risqaykichik islakunapi kawsakuynikichikqa?

Llaqtan-llaqtan watukuq kaspaykum wakinpi kay carropi samapakurqaniku.

Wakin islakunapiqa llumpaymi chuspikuna, rupay, ukuchakuna hinaspa unquykunapas karqa. Wakinpiqa asllam mikunaykupas karqa. Chayna kaptinpas kusisqam karqaniku, inti siqaykuytam ichu wasichaykumanta lamar quchata qawaq kaniku. Tutaykuqtañataqmi qawaq kaniku lamar quchapi killapa kanchariyninta. Chaykunata qawaspaykum astawan Jehova Diospa ruwasqankunapi yuyaymanaq kaniku hinaspa payta mañakuq kaniku. Chay ruwayqa kallpanchawaqkum.

Chay islapi warmachakunaqa kuyayllapaqmi kaqku. Yuraq runakunata rikuspankum chay warmachakunaqa qawapayaqku. Huk kutipim Niue islachaman watukuq riptiyku huk warmacha qusaypa brazonta hapiykuspan nirqa: “Kuyayllapaqmi puruykikunaqa kasqa”, nispa. Chay warmachaqa manam haykapipas brazonpi achka peloyuq runataqa rikurqachu. Chaymi chaynata nirqa.

Watukusqayku islakunapi wakcha runakunata qawaspaykum llumpay llakisqa tarikurqaniku. Chay islakunaqa sumaqllañam karqa, ichaqa manam allin doctorkunaqa kaqchu, manataqmi anchachu yakupas karqa. Chayna kaptinpas iñiqmasinchikkunaqa hawkam tarikurqaku. Kusisqataqmi karqaku ayllunkuwan kuska kaspanku hinaspa huñunakunankupaq wasi kasqanwanpas. Chaykunata qawasqaykum yanapawarqaku ñuqaykupas kapuqllaykuwan kusisqa Diosta yupaychanaykupaq.

Panillay Pamela, kunanñataq willaykuwayku, chay islakunapi kaspayki, ¿imatam ruwaq kanki yakuta tarinaykipaq hinaspa yanukunaykipaqpas?

Pamelam pachaykuta taqsachkan Tonga nacionta watukusqaykupi.

Taytaymi yachachiwarqa imayna vida pasayta. Yachachiwarqam yantawan yanukuyta hinaspapas kapuqllaywan kawsakunaypaq. Kiribati islachata watukuq rispaykum samapakurqaniku ichu wasichapi, chaypa pirqanmi kasqa raku suqusmanta. Yanukuqñataqmi kani cocopa qawa qarawan. Yaku wisiyñataqmi riq kani huk pozoman. Hinaptinmi chaypi sapakama warmikuna hatun kaspipa puntanpi latata waskawan wataykuspa yakuta wisisqaku. Qawasqallaqa manam sasachu karqa, ichaqa ñuqa wisinaypaq latata chuqaykuptiymi yakupa hawallanpi wanpuyta qallaykurqa, chayraykum chaypi llapallan kaq warmikuna asikuyta qallaykurqaku. Allinta asikuruspankuñam huk kaqnin warmi asuykamuwaspa yanapaykuwarqa. Chay islachakunapi runakunaqa ancha kuyakuyllawanñam sapa kuti yanapawaqku.

Iskaynikichikmi chay islakunata kusisqa watukurqankichik, ¿imatam yuyankichik chaypi llamkasqaykichikmanta? Willaykuwaykuyá

Winston: Sasatam amañarqaniku chaypi runakuna hina kawsakuytaqa. Huk kutipim, iñiqmasinchikkunapa wasinman rispayku qarawasqanku mikuyta qalayta mikukururqaniku paykunapaq mana puchuspa. Ichaqa musyakurqanikum paykunapaqwan chay mikuy kasqanta, chaymantapacham puchuqña kaniku. Chaywanpas iñiqmasinchikkunaqa kuyakuqllañam karqaku. Paykunaqa kusisqallañam kaqmanta watukuptiyku suyawaqku. Chay tiempopiqa chay iñiqmasinchikkunaqa huk law llaqtayuq iñiqmasinchikkunataqa manam riqsirqakuchu, ñuqallaykutam riqsiwarqaku watukuqnin kasqaykurayku.

Niue islachapi kaq iñiqmasinchikkunawan Diosmanta willakuq lluqsisqayku.

Chay islapi runakunaqa iñiqmasinchikkunatam niqku: “Kayllapichá kay religionnikichikqa kan”, nispa. Ichaqa ñuqayku watukuptiykum yacharurqaku Jehova Diospa testigonkunaqa enteron pachapi kasqanchikta.

Pamela: Itinikai Matera sutiyuq punta apaq iñiqmasinchikmi Kiribati islaman watukuptiyku tukuyta ruwarqa allin kanaykuta munaspan. Huk punchawmi chay iñiqmasinchikqa, chullalla runtuta canastachapi apamuspan “kaymi qamkunapaq” niwarqaku. Chay watakunapiqa wallpapa runtun tariyqa sasam karqa, iñiqmasinchikpa chay ruwasqantaqa manam qunqanikuchu.

Panillay Pamela, wiksallaykipiraq wawachaykipa wañukusqanqa llakikuypaqmi karqa, ¿imaynatam chayta atiparqanki? Willaykuwaykuyá.

29 wataypim wiksayakururqani, chaymi qusaywan kutirqaniku Australia nacionman. Tawa  killa qipatañataqmi sullu wawachayqa wañukurqa. Qusaywanmi llumpay llakisqa tarikurqaniku. Watakuna risqanman hinam sunquy tiyaykurqa, ichaqa wawaykumantam hinalla llakikuq kaniku. Ichaqa 2009 watapa 15 abril killanpi lluqsimuq Llaqta Cuidaq qillqanchikpim qawarqaniku leeqkunapa tapukuyninkuna, “Sichu huk warmi wañusqataña wachakuruptinqa, ¿hamuq tiempopi chay wawa kawsarimunqachu?”, niq yachachikuyta. Chaypim nirqa Jehova Dioslla chaymanta yachasqanta, nirqataqmi kuyakuq kasqantapas. Jehova Diosqa tukuy mana allinkunatam chinkachinqaña, chaypaqmi churin Jesusta churarun “diablopa ruwasqankunata chinkachinanpaq” (1 Juan 3:8). Yanapawarqakutaqmi chay qillqapi wakin yachachikuykunata ñawinchasqaykupas Jehova Diosmanta yachasqaykuta astawan chaninchanaykupaq. Imaynaraq kaymanku Jehova Diosta mana riqsispaqa.

Wawachayku wañukusqan qipatam kaqmanta tukuy tiempoykuwan Diospaq llamkayta qallaykurqaniku. Australia nacionpi kaq betel wasipim wakin killakuna yanapakurqaniku, chaymantañataqmi kaqmanta tawa wata llaqtan-llaqtan watukurqaniku Nueva Gales del Sur llaqtachankunapi hinaspa Sydney llaqtapipas. 1981 watapiñataqmi Australiapi kaq betel wasipi kaqmanta yanapakunaykupaq niwarqaku, kunanqa sutichakun Australasia lawpi betel wasiwanmi. Kunankamapas hinallam chaypi yanapakuchkaniku.

Wawqillay Winston, ¿yaqachu islas del Pacifico sur lawpi llaqtan-llaqtan watukuq kasqaykiqa yanapasunki Australasia betel wasimanta huk kaqnin cuentallikuq kasqaykipi?

Arí, anchatam yanapawan. Ñawpaqtaqa Australia betel wasipi kaq iñiqmasinchikkunam qawarqa Samoa nacionpi hinaspa Samoa Norteamericana islapi Diosmanta willakuy imayna ruwakusqanta. Chaymantañataqmi Nueva Zelanda betel wasiqa hukllawakururqa Australia betel wasiwan. Kunanqa Australasia betel wasim nanachikun Australia nacionta, Cook, Niue, Tokelau hinaspa Samoa Norteamericana islakunata, chaynataq Nueva Zelanda, Samoa, Timor Oriental, hinaspa Tonga nacionkunata. Kusisqam tarikuni chay lawkunata betel wasimanta watukuq risqaywan. Chay lawkunapi Diosman sunqu iñiqmasinchikkunawan kasqaymi anchata yanapawan betel wasipi kusisqa yanapakunaypaq.

Australasia betelpim kachkanku Winston hinaspa Pamela

Willakuyta tukuykunaypaq kayta nisqaykichik. Diosta riqsisqaykumantapacham musyaruniku ayllunku mana munachkaptinpas musu-sipaschakunaqa Diosmanta yachay munasqankuta (2 Rey. 5:2, 3; 2 Cron. 34:1-3). Jehova Diosqa kuyakuq kasqanraykum munan llapallanchik paymanta yachaspa wiñaypaq kawsananchikta.

Yaqa 50 wata ñawpaqta chayllaraq Diosmanta yachaspaykuqa manam imaniraqllatapas musyakurqanikuchu Diospaq llamkay sumaq kasqanmantaqa. Diosmanta yachay imamantapas aswan allin kasqanmantaqa manam iskayrayanikuchu. Chayraykum wañukunaykukama hinalla Diosman sunqu kasaqku.