Yachachikuypa kasqanman rinapaq

Yachachikuyman rinapaq

¿Imanasqataq kallpanchakunanchik Diospa munasqanman hina kawsakunapaq?

¿Imanasqataq kallpanchakunanchik Diospa munasqanman hina kawsakunapaq?

Kaypi yuyaymanay: Chakrapi llamkachkaspa sinchi wayra-para kananmanta musyaruspaykiqa ¿manachu utqaylla wasikiman pakakunaykipaq ayqikunki?

Kunanpas yaqa chay sinchi wayra-para hinam llumpa-llumpay sasachakuy punchaw kayllapiña kachkan (Mateo 24:21). Chay llumpa-llumpay sasachakuymanta mana ayqikuyta atispapas atichwanmi wayra-paramanta hina pakakuyta. ¿Imaynata?

Jesusmi nirqa: “Hinallayá puntata maskaychik Diospa munaychakuynintawan paypa munasqan allin ruwayta, hinaptinqa qusunkichikmi imam pisipususqaykichiktaqa”, nispa (Mateo 6:33). ¿Ima niytam chaywan munarqa?

‘Puntatayá maskaychik Diospa munaychakuyninta’. Kaywanqa Jesusqa niyta munachkarqa imamantapas Diospa munayninta puntapi ruwanamantam (Mateo 6:25, 32, 33). Runakunaqa manam atichwanchu ima sasachakuykunatapas allicharuytaqa, Diosllam tukuy imataqa allichanqa.

Hinallayá Diospa munasqan allin ruwaykunata ruwasun. Arí, kallpanchakunanchikmi Jehova Diospa kamachikuyninkunata kasukunanchikpaq. Kikillanchik imapas allin kasqanta utaq mana allin kasqanta tantiakuspa kawsakuspaqa sasachakuypim tarikusun (Proverbios 16:25). Jehova Diospa nisqankunata kasukuspam ichaqa payta kusichisun hinaspapas kikinchikmi allin kawsakusun (Isaias 48:17, 18).

Chaynaqa, ¿imanasqataq Jesusqa nirqa: “Hinallayá puntata maskaychik Diospa munaychakuynintawan paypa munasqan allin ruwayta” nispanqa? Chaynataqa nirqa runakuna qullqiyuq kaspa kusisqa kanankuta piensaspanku chayllamanña  qukurunankuta yachaspam. Wakinñataqmi tukuy imawan afanasqa kasqankurayku Diospa munaynin ruwaytaqa qipancharunanku karqa (Mateo 6:19-21, 25-32).

Jesusmi ichaqa nirqa Diospa munayninta puntapi churaptinchikqa kikin Jehova Dios ima pisipuwasqanchikta quwananchikmanta. Hamuq tiempopipas Jehova Diosqa tukuy imataraqmi quykuwasun (Mateo 6:33).

Jesuspa qatiqninkuna Diospa munasqanman hina kawsakuspankupas manam qawarqakuchu Diospa nisqankuna ruwakusqantaqa, chayna kaptinpas hawkalla hinaspa kusisqam kawsakurqaku. ¿Imarayku?

Diospa kamachikuyninman hina kawsakusqankuraykum, paykunaqa Dios mana yupaychaq runakuna hinaqa manam ñakarirqakuchu. Paykunaqa Diospi hapipakusqankuraykum ima sasachakuykunaña kaptinpas mana hukmanyarurqakuchu. Chaymantapas, Jehova Diosmi paykunataqa yanapaykurqa ‘runakunapa mana haypay atisqan hatu-hatun atiyninwan’ (2 Corintios 4:7-9).

KALLPANCHAKUY DIOSPA YACHACHISQANMAN HINA KAWSAKUNAYKIPAQ

Jesuspa tiemponpi Diosta yupaychaqkunaqa kallpanchakurqakum Diospa munayninta ruwanankupaq. Paykunaqa, Diosmantam willakurqaku (Colosenses 1:23). Kay tiempopipas achka runakunam Diosmanta willakuchkanku ¿riqsinkichu paykunata?

Paykunaqa kanku Jehova Diospa testigonkunam. Paykunam Diosmanta willakunankupaq kallpanchakuchkanku Jesuspa kayna nisqanta kasukusqankurayku: “Diospa munaychakuyninmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy imapas tukunqa” (Mateo 24:14).

Jehova Diospa testigonkuna watukamusuptikiqa uyariykuy. Apostol Pablopa tiemponpi Berea llaqtayuqkunapas Diosmanta sumaq willakuyta uyarispankum astawan “yachayta munarqaku”. Kallpanchakurqakutaqmi “Diospa qillqanta sapa punchaw allintapuni” estudianankupaqpas hinaspa yachasqankuman hina kawsakunankupaqpas (Hechos 17:11, 12).

Qampas chayta ruwanaykipaq kallpanchakuspaykiqa kunanpas hinaspa hamuq tiempopipas hawkalla hinaspa kusisqam kawsakunki.