¿IMATAM YACHACHWAN IMAYNA UNANCHASQA KASQANCHIKMANTA?

Kaypi yuyaymanay: Mellizo runakunaqa sumaqtas entiendenakunku. Nancy Segal sutiyuq warmipapas kanmi melliza ñañan, Nancyqa mellizo runakunamanta astawan yachaqmi, ninmi: “Mellizo wakin runakunaqa chayllam entiendenakunku”, nispa. Huk warmipas ninmi: “Melliza ñañaywanqa sumaqtam riqsinakuniku”, nispa.

¿Imanasqataq sumaqta riqsinakunku hinaspa entiendenakunku? Chayqa kanmanmi imayna uywasqa kasqankumanta, chaywanpas yachayniyuq runakunam ninku cuerponku hinaspa imayna kasqanku chaynakamalla kasqanrayku aswan allinta entiendenakusqankumanta.

KAYPI YUYAYMANAY: Diosmiriki unanchawarqanchikqa, chayraykum payqa pi runamantapas aswan sumaqta entiendiwanchik. Chayta yachaspanchá Diosta serviq Davidqa Diosmanta kaynata nirqa: ‘Qanmi mamaypa wiksanpi ruwaykuwarqanki. Pakasqallapi tulluypa wiñasqanpas qanmantaqa manam pakasqachu karqa. [...] Sulluchallaraq kachkaptiymi rikuwarqankiña, [...] tukuy chaykunam libroykipi qillqasqaña karqa’, nispa (Salmo 139:13, 15, 16). Hinaspapas, Diosqa manam cuerponchik imayna ruwasqa kasqallantachu sumaqtaqa yachan, yachantaqmi imayna uywasqa kasqanchikrayku imayna genioyuq kasqanchiktapas. Chayraykum payqa sapakamata sumaqta entiendiwanchik.

BIBLIAM YACHACHIN DIOSQA SUMAQTA RIQSIWASQANCHIKMANTA

Diosta serviq Davidmi Diosta kaynata mañakurqa: ‘Dios taytalláy, sunqullayta qawaykuwaspaykim pim kallasqayta riqsiwanki. Tiyasqaytawan hatarisqaytapas yachankim, ima piensasqaypas qampaqqa yachasqallaykim. Dios taytalláy, manaraqpas rimarichkaptiymi, imam rimanaytapas yachankiña’, nispa (Salmo 139:1, 2, 4). Chaymantapas, sunqunchikpi ima kasqanta hinaspa ima munasqanchiktapas Diosqa yachanmi (1 Cronicas 28:9; 1 Samuel 16:6, 7). ¿Imatam kaymanta yachachwan?

Ichapas Diosta mañakuspanchikqa mana sumaqtachu tukuy ima niy munasqanchikta willakuchwan, chaywanpas Diosqa yachanñam ima niy munasqanchikta. Payqa qawamuchkanmi ima ruwasqanchiktapas, yachantaqmi imanasqa ruwasqanchiktapas. Yachantaqmi imapas mana sasachawaptinchikqa imakunataraq ruway atinanchikmanta. Diosmiriki kuyay yachaqtaqa unanchawarqanchik, chayraykum payqa sunqunchikta qawachkan allin ruway munasqanchikkunata yachananpaq (1 Juan 4:7-10).

Diosqa tukuy ima pasakusqantam qawamuchkan. Payqa yuyawanchikmi, chaymi pi runamantapas aswan sumaqta entiendiwanchik

 Bibliam nin:

  • “Jehova Diospa ñawinqa allin ruwaq runakunapim kachkan, rinrinpas listom kachkan [...] mañakusqankuta uyariykunanpaq” (1 PEDRO 3:12).

  • Diosmi nin: ‘Ñuqaqa qawachkaykim, yachachispaymi maymi purinaykita riqsichisqayki’, nispa (SALMO 32:8).

DIOSQA LLUMPAY LLAKIPAYAKUQMI

Diosqa llakipayakuqllaña kasqanmanta yachayninchikqa, ¿yanapawanchikchu sasachakuykunata atipanapaq? Arí. Nigeria nacionmanta Anam nin: “Llakipa intusqanmi karqani mana ima ruway atiq. Qusay wañukusqan qipallatam ñuñuypi tumorta doctorkuna tariruwarqaku, hinaptinmi operaruwarqaku. Hina chay tiempollapitaqmi wawaypa umanpipas unquy rikurirurqa. Iskayniykum hospitalpi karqaniku. Chayraykum llumpay hukmanyasqa karqani”, nispa.

¿Imataq Anata yanaparqa chayna llakipi tarikuptin? Paymi nin: “Yuyaymanaqmi kani bibliapa nisqankunapi. Gustawaqmi Filipenses 4:6, 7 nisqan, ninmi: ‘Diospa hawkayayninmi sunquykichiktawan yuyaynikichikta [...] waqaychanqa’, nispa. Chayta yuyarispayqa musyakurqanim Jehova Diosqa yuyawasqanmanta, chaymi mana iskayrayarqanichu tukuy llaki pasasqaytapas yachasqanmanta. Iñiqmasiykunapas sumaq rimaykunawanmi kallpanchaykuwaqku.

Manaraqmi allintaraqchu allinyani, chaywanpas allinniqñam kawsakuchkaniku. Yacharunikum ima sasachakuytapas atipanaykupaqqa Jehova Dios yanapawanankumanta. Santiago 5:11 nin: ‘Uyarirqankichikmi Job sutiyuq runapa ñakariykuna aguantasqanmanta, yachankichiktaqmi Jehova Dios payta bendecisqantapas. Arí, Jehova Diosqa llumpay kuyapayakuqmi hinaspapas llakipayakuqmi’”, nispa. Jehova Diosqa serviqnin Jobpa ñakarisqantaqa sumaqtam yacharqa, chaynam ñuqanchikpatapas imayna tarikusqanchiktaqa sumaqta yachan.