Arí, kanmi. Ichapas tapukunki ¿imaynanpitaq mana allin angelkunaqa rikurirurqa?, nispa. Yuyarinanchikmi angelkunaqa runakuna hina tanteakuy yachaq kasqankuta. Adantawan Evatam Diospa huk angelnin umacharurqa Diosta mana kasukunankupaq, chaymantapacham kay pachapi runakunaqa manaña Diosta kasukunkuchu (Genesis 3:1-7; Apocalipsis 12:9). Bibliaqa manam willawanchikchu chay angelpa sutintaqa nitaq Diospa contranpi manaraq hatarichkaspan hanaq pachapi ima ruwayniyuq kasqanmantapas. Ichaqa willawanchikmi Diospa contranpi hatarirusqan qipaman satanaswan sutichasqa kasqanmanta, satanas ninanqa “contrapi churakuq” ninanmi, bibliaqa sutichantaqmi diablowanpas, chay ninanqa “llulla rimaq” ninanmi (Mateo 4:8-11).

Chaymantapas, Noeypa tiemponpim achka angelkuna hanaq pachapi kawsakuyninkuta saqispanku kay pachaman hamurqaku, runaman tikrakuruspankum huchapakurqaku hinaspa mana allinkunata ruwarqaku. Chaynatam, chay allin angelkunaqa mana allin ruwaqña rikurirurqaku (Judas 6; Genesis 6:1-4; 1 Pedro 3:19, 20).

¿Imataq chay mana allin angelkunata pasarqa? Kay pachaman sinchi parata Dios chayachimuptinmi aycha cuerponkuta saqiruspanku hanaq pachaman kutikurqaku. Ichaqa Diosmi manaña chaskirqañachu, aswanqa ‘llumpa-llumpay tutayaypim’ utaq “tartaro” nisqanpim presocharurqa (Judas 6; 2 Pedro 2:4). Demoniokunaqa satanastam kasukunku, satanasqa ‘demoniokunapa kamachiqninmi’, paymi allin angel hina qawachikuchkan (Mateo 12:24; 2 Corintios 11:14).

Bibliam nin Diosqa churin Jesucristota kay pachata kamachinanpaq 1914 watapi churasqanmanta. * Chay churasqan qipallanmanmi satanaswan demoniokunaqa hanaq pachamanta kay pachaman wischumusqa karqaku, kay pachallapiña kanankupaq. Chaymi kay pachapi tukuy mana allinkunaqa yapakuchkan (Apocalipsis 12:9-12).

Tukuy mana allin ruwaykunapa yapakusqanmi qawachin demoniokunapa munaychakusqan tiempoqa tukunanmantaña. Ñamá Jesusqa kay pachaman kutimuspan demoniokunata presocharunqaña, hinaspam kay allpa pachanchikta sumaq huertaman tikranqa, Jesusqa kay pachatam waranqa wata kamachinqa. Waranqa wata tukuytam, demoniokunaqa kacharisqa kanqaku pisi tiempolla runakunata engañanankupaq. Chaymantañataqmi wiñaypaq chinkachisqa kanqaku (Mateo 25:41; Apocalipsis 20:1-3, 7-10).

^ par. 6 Jesucristo kay pachata kamachimunanmanta astawan yachayta munaspaqa qaway ¿Imatapunim Bibliaqa yachachin? niq qillqapa 8 kaq yachachikuyninta, chay qillqaqa Jehova Diospa testigonkunapa ruwasqanmi. Hurquwaqtaqmi www.jw.org/quy.