PAULINAPA * qusanpa umanpim doctorkuna tarirurqaku hatun tumorta, qusanqa 54 watallanpiraqmi karqa. Doctorkunam willaykurqaku qusanqa manaña unay killakuna kawsakunanmanta, chay yacharusqanwan imayna tarikusqantam Paulina willakun: “Manam ima ruwaytapas atirqanichu, muspaypi hinam tarikurqani”, nispa.

Achka runakunam Paulina hina tarikunku. Mana hampiy atina unquyqa pitapas hapirunmanmi. Ichaqa, achka runakunam chayna unquywan tarikuq ayllunkuta sumaqta atiendenku. Chaynaqa, ayllunchik mana hampiy atina unquywan kaptinqa, ¿imaynatataq atiendechwan? ¿Imaynatataq kallpanchachwan? Chaymantapas, ¿imakunatam ruwananchik unquqta mana amirunapaq? Unquq wañuy patanpiña kaptinqa, ¿imayna kanantam yachananchikña? Puntataqa rimasunchik, manaña hampiy atina unquywan tarikuq runakunata imanasqa sasa atiendey kasqanmanta.

KUNAN TIEMPOQA ASTAWANMI RUNAKUNAQA UNQUNKU

Ñawpaqtaqa allin kaq nacionkunapipas, achkaqmi imapas qunqayllamanta pasaruptin wañuqku utaq ima unquywanpas wañuqku mana hampi kasqanrayku. Wakinkuqa hospital mana kasqanraykum wasillankupi ayllunkupa qawasqan wañuqku.

Kunanñataqmi, unquqkunaqa doctorkunapa hampi qusqankuwan allinyanku, chaymi unay wata kawsakunku. Achkaqmi ichaqa, sumaqta mana allinyasqankurayku sasa qawana kanku. Chaymi sasa pachachina, sasa mikuchina, sasa atiendena kanku.

Chayraykum kunan tiempopiqa, achka runakuna hospitalpi wañunku hampipas mana  atisqanrayku. Chaymantapas achka runakunam ayllunku wañukuqtaqa mana rikurqakuchu, chaymi ayllunku wañukuptinqa utaq unquptinqa ima ruwaytapas mana atinkuchu. Hinaptinqa, ¿imaynatataq allinta qawanmanku unquq ayllunkuta? ¿Imataq chayta ruwanankupaq yanapanman?

IMAM RUWANAYKICHIKPAQ TANTEAYCHIKÑA

Paulina hinam, muspaypi hina achka tarikunku manaña hampiy atina unquyta doctorkuna ayllunkupi tariruptinku. Chayna llakipi tarikuspaykiqa, unquq aylluykita sumaqta qawanaykipaqmi tanteanayki. Huk kutipim, Diospa runan kaynata Diosta mañakurqa: ‘Vidayku tukuruq kallasqantaqa qampunitaq yachachillawayku. Yuyaywan ñuqayku kawsanaykupaq qampuniña yachachillawayku’, nispa (Salmo 90:12). Diosta mañakuy unquq aylluykita wañukunan punchawkama sumaqta qawanaykipaq.

Sumaqta qawanaykipaqqa puntamantam tanteanayki imam ruwanaykichikpaq. Unquq aylluyki allintaraq rimakuptinqa, tapuwaqmi aswanyaruptin pim paypa rantinpi imamantapas tanteananpaq. Unquqpa tanteasqanman hina imatapas ruwaptikiqa manam ayllupipas atipanakuy kanqachu nitaq pipas imapas ruwasqanwanqa hukmanyasqaqa qipanqachu. Unquqtam tapuwaq, aswanyaruptin hinalla kawsananpaq imayna yanapanankumanta utaq imakunawan hampinankumanta. Unquqwan qallariymantapacha rimaspaqa, yachasunmi wañukunan punchawkama imayna atiendeyta. Bibliam nin: ‘Runapa ruway munasqanmi mana qispinchu mana tapurikuspa ruwasqanrayku’, nispa (Proverbios 15:22).

IMAYNATAM YANAPAWAQ

Unquqtaqa sumaq rimaykunawanmi kallpanchananchik. Paykunaqa munanmi kuyanata hinaspa mana saqinata. Chaymi qillqakunata ñawinchapuna, munasqan takikunata takipuna utaq imapas munasqanta ruwapuna. Wakin unquqqa munanmi makinta hapiykuspa kuyakuyllawan rimapayanata.

Watuspanchikpas willakunanchikmi pim kasqanchikta. Huk qillqam nin: “Wañuy patanpiña kaptinchikpas rinrinchikqa uyarinraqmi. Unquq manaña kuyuriptinpas rinrinqa uyarinmanraqmi. Chayraykum, unquqpa qayllanpiqa sientichinapaq hinaqa imatapas mana rimanachu”, nispa.

Atikuptinqa kuskam Diosta mañakuwaqchik. Bibliam willawanchik apostol Pablowan  iñiqmasinkuna hatun sasachakuypi kasqankumanta. Chaymi paykunaqa huk law llaqtapi iñiqmasinkuta ruegakurqa, paykunapaq Diosta mañapunankupaq (2 Corintios 1:8-11). Hukmanyasqa kaspa utaq llumpay unqusqa tarikuspaqa Diostam mañakunanchik, chayqa ancha allinmi.

LLIWPAS WAÑUQLLAM KANCHIK

Wañuy patanpiña ayllunchik tarikuptinqa llumpay llakisqam kanchik. ¿Imanasqa? Wañuyta mana munasqanchikraykum. Runakunaqa unanchasqa karqanchik manam wañunapaqchu (Romanos 5:12). Chaymi Diospa palabranpas nin wañuyqa runapa ‘enemigon’ kasqanmanta (1 Corintios 15:26). Chayraykum runakunaqa, kuyasqanchik ayllunchik wañunantaqa mana munanchikchu.

Chayna kaptinpas, unquq ayllunchik wañukunanmanta yachayqa yanapawasunmi sumaqta atiendeykunapaq hinaspa mana llumpay llakisqa kanapaq. “ Wañuy patanpiña tarikuptinku” niq yachachikuypim kachkan, unquqkuna wañukunallanpaqña imayna tarikusqankumanta. Ichaqa, manam lliw unquqkunachu chaynalla tarikunku.

Unquq ayllunchik wañukuptinqa, allinmi kanman pi amistadninchikwanpas rimayninchik. Unquqta qawaqkunaqa munankum sumaq rimaykunawan kallpanchaykunata. Diosninchikqa kuyakuq kasqanraykum niwanchik wañuqkunaqa mana imatapas sientesqankumanta (Eclesiastes 9:5).

DIOSLLAM PIMANTAPAS ALLINTAQA QAWAWANCHIK

Pipas yanapawananchikpaq niwaptinchikqa manam wischupakunachu

Diosninchikpim hapipakunanchik ayllunchik unqusqan tiempo chaynataq wañukusqan qipamanpas. Diosqa riqsisqanchik runakunapa sumaq rimayninkunawan hinaspa ruwasqankunawanmi kallpanchaykuwanchik. Paulinam willakun: “Riqsisqaykuna tukuypi yanapaykuwanankutaqa manam wischupakurqanichu. Qusaypas chaynataq ñuqapas cuentatam qukurqaniku Jehova Diosqa riqsinakusqaykuwan yanapawasqankumanta. Manam haykapipas qunqasaqchu”, nispa.

Arí, Jehova Diosmi pimantapas allintaqa qawawanchik. Unanchawaqninchik kasqanraykum sumaqta yachan llaki qatiruwaptinchik imayna tarikusqanchikta, chaymi payqa kallpanchaykuwanchik. Chaymantapas, Diosqa niwanchikmi manapas unaymanta wañuqkunata kawsarichinanmanta hinaspa wañuyta chinkachinanmanta (Juan 5:28, 29; Apocalipsis 21:3, 4). Manaña wañuy kaptinqa, apostol Pablo hinam nisunchik: “Yaw wañuy, ¿maytaq atiyniki? ¿Maytaq wañuchinaykipaq tuksinayki?”, nispa (1 Corintios 15:55).

^ par. 2 Sutikunaqa cambiasqam kachkan.