Caballokunam pampapas qusnirinankama kallpachkanku. Tawa caballopi sillakuqkunamanta bibliapa willakusqanqa yaqa chiqaptapunipas kallpachkanmankupas hinam rikchakun. Punta kallpaq yuraq caballopi sillasqa riqmi chayllaraq akllasqa atiyniyuq kamachiq. Qipanta kallpaq puka caballopi sillasqa riqmi kay pachamanta hawkayayta chinkachinanpaq kallpachkan. Chay puka caballopa qipantañataqmi, yana caballopi sillasqa balanzata hapistin kallpachkan, chay caballo lluqsiruptinmi huk qayakuy uyarikurqa mikuy mana kananmanta. Tawa kaq ayay-ayay caballopi sillakuqñataqmi wañuywan sutichasqa kallpachkan, chay caballom qawachin unquykunawan wañuykuna kananmanta. Sepulturañataqmi qipallanta qatimuspan achkallay-achka runakunata wañuchichkan (Apocalipsis 6:1-8).

Crystal sutiyuq warmim nin: “Apocalipsis qillqapi tawa caballopi sillakuqkunamanta ñawinchaspaymi llumpayta mancharikurqani. Piensarqanim kayllapiña Diospa piñakuynin kasqanta hinaspa wañunaymanta”, nispa.

Ed sutiyuq runam nin: “Tawa caballopi sillakuqkunamanta hinaspa imanasqa sapa caballo colorniyuq kasqanmantam yachayta munarqani. Chaymi sapa caballo imakunawan tupasqanmanta yacharuspay chayraq imanasqa sapa caballo colorniyuq kasqanmanta yacharurqani”, nispa.

¿Yaqachu qampas paykuna hina piensanki? Kay tawa caballopi sillakuqkunamanta bibliapi willakuyninqa ancha riqsisqam, kayqa tarikun Apocalipsis qillqapim. Kay willakuykunamanta yachasqaykim anchata yanapasunki. Diosmi niwanchik Apocalipsis qillqapi willakuyta entienderuspaqa hinaspa chayman hina kawsakuspaqa kusisqa kawsakunanchikmanta (Apocalipsis 1:1-3).

Apocalipsis qillqapi tawa caballopi sillakuqkunamanta willakuyqa manam runakunata manchachinanpaqchu qillqasqaqa kachkan, aswanqa kallpanchananpaqmi. Chaymi kay willakuywan achka runakuna iñiyninkupi kallpanchasqa tarikunku, hinaspapas hamuq tiempopi allinña kawsakunankumantam manaña iskayrayankuñachu. Qamtapas kay willakuykunaqa yanapasunkimanmi. Qatiqnin yachachikuypim chaymanta yachasun.