WARMALLARAQ kachkaptinmi Jordan sutiyuq runaman barcocha kaqlla tajadorchata riqsisqan runa quykurqa. Kunankamam waqaychachkan chay tajadorchata. Paymi willakun: “Aylluypa amistadninku Russell runam warmallaraq kachkaptiy chay tajadorchataqa quykuwarqa. Wañukusqan qipatañam yacharurqani chay runaqa abueloytawan tayta-mamayta imaynam sasachakuykunapi tarikuptinkupas allinta yanapasqanmanta. Chaymi kunankama chay quwasqanta waqaychani”, nispa.

Jordanpa willakusqanmi qawachin, agradecekuq runapaqa mana ancha chaninniyuq regalopas ancha allin kasqanta. Bibliam willawanchik Diospa ima quwasqanchik ancha chaninniyuq kasqanmanta, ninmi: “Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq”, nispa (Juan 3:16).

Diospa quwasqanchikwanqa wiñaypaq kawsaytam atichwan. ¿Imataq kanman chaymanta astawan allin? Wakin runakunaqa manam ancha chaninniyuqpaqchu hapinku Diospa chay quwasqanchiktaqa, sunqumanta Diosta serviqkunam ichaqa ancha chaninniyuqpaq (Salmo 49:8; 1 Pedro 1:18, 19). Ichaqa, ¿imanasqataq Diosqa churinta ñuqanchikpa rantinchikpi wañunanpaq kachamurqa?

Apostol Pablom niwanchik: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa”, nispa (Romanos 5:12). Punta taytanchik Adanqa Diosta mana kasukusqanraykum wañurqa. Chaymi, Adanpa mirayninkuna kasqanchikrayku lliw runakunaqa wañuqlla kanchik.

“Huchapa pagonqariki wañuymi, Diospa regalonmi ichaqa señorninchik Cristo Jesusrayku wiñaypaq kawsakuy” (Romanos 6:23). Chaymi  Diosqa, wañuymanta “librawananchikpaq” churin Jesucristota kay pachaman kachamurqa ñuqanchikrayku wañunanpaq. Chayraykum, haykam Jesucristopi iñiqkunaqa wiñay kawsayta haypanqaku (Romanos 3:24).

Chaymanta rimaspanmi apostol Pablo kaynata nirqa: “Diosmanyá gracias kachun ancha-ancha kuyakuynin quwasqanchikmanta”, nispa (2 Corintios 9:15). Arí, ñuqanchikpa rantinchikpi Jesuspa wañusqanqa Diospa ancha hatun kuyakuyninmi. Ichaqa, ¿imanasqataq ñuqanchikpa rantinchikpi Jesuspa wañusqanqa ancha allin Diospa tukuy ima quwasqanchikmantapas? ¿Imanasqataq mana chaynallachu Diospa tukuy ima quwasqanchikwanqa? * ¿Imaynatam Diosta agradecekuchwan hatun kuyakuyninmanta? Qatiqninpim chaykunamanta yachasunchik.

^ par. 8 Jesusqa mana pipa hikutasqanmi ñuqanchikrayku wañurqa (1 Juan 3:16). Ichaqa, kay qatiqnin yachachikuykunapim yachasunchik, ñuqanchikrayku Jesus wañunanpaq Dios imata ruwasqanmanta.