“Ñoqam qawariykullaspay consejasqayki” (SAL. 32:8).

1, 2. ¿Imaynatam Jehova Diosqa serviqninkunata qawan?

TAYTA-MAMAKUNA warmachankuta imayna pukllasqankuta qawaspankuqa admirakunkum sapakama imapas allin ruwasqankuta qawaspanku. Yaqapaschá kikikipas chayna kasqanta qawarqanki. Huknin warmachaykiqa ichapas allinta pukllan, hukninñataq allinta dibujan otaq makinwan imatapas sumaqta ruwan. Warmachakuna imataña ruwayta atiptinkupas, tayta-mamakunaqa anchatam munanku chay imapas yachasqankupi ñawparinankupaq yanapayta.

2 Jehova Diospas churinkunamantaqa nanachikunmi. Arí, kunan tiempopi serviqninkunaqa, ‘llapallan nacionkunamanta munayllapaqña kaqkunam’ kanku (Ageo 2:7NM). Aswan ‘munayllapaqñaqa’ kanku iñiyninkuraykum. Chaymantapas, ichapas qamqa qawarqanki kunan tiempopi Testigokunaqa sapakama imatapas aswan allin ruway yachasqankuta. Wakinkuqa huñunakuykunapim sumaqta yachachinku, wakinñataqmi imapas allin lloqsinanpaq sumaqta tanteanku. Achka cristianakunañataqmi huk rimaykunata chaylla yachanku hinaspankum Diosmanta allinta willakunku. Wakinñataqmi allinta yanapakunku hukmanyasqa iñiqmasinkunata kallpanchaypi otaq onqoq iñiqmasinkunata  yanapaypi (Rom. 16:1, 12). ¿Manachu kusikunchik congregacionninchikpi chayna iñiqmasinchikkuna kasqanmanta?

3. ¿Ima tapukuykunatam kay yachachikuypi kutichisun?

3 Ichaqa, iñiqmasinchikkunamanta wakin mozo-sipaskuna otaq chayllaraq bautizakuqkunam, iskayrayanku congregacionpi imayna astawan yanapakuyta. ¿Imaynatam paykunata yanapachwan imapas ruway atisqankupi ñawparinankupaq? ¿Imanasqam imapas yachasqankupi reparananchik chaynapi Diospa qawasqanman hina qawanapaq?

DIOSQA ALLIN KAQKUNATAM SERVIQNINKUNAPI QAWAN

4, 5. ¿Imaynatam Jueces 6:11-16 willakusqan qawachiwanchik serviqninkunapi Jehova Dios allin kaqkuna qawasqanta?

4 Bibliapa willakusqanman hinaqa, Jehova Diosqa manam serviqninkunapa allin ruwasqallankutachu qawan, aswanqa imapas ruway atisqankutawanmi. Rimarisun Gedeonmanta. Paytam Jehova Dios akllarurqa Madian casta runakunamanta llaqtanta librananpaq. Gedeonqa yaqapaschá admirakurqa huk angel kaynata rimariykuptin: “¡Yaw kallpasapa qari, Tayta Diosmi qanwan kachkan!”, nispa (Juec. 6:12). Gedeonqa manamá chaypiqa “kallpasapa” kasqanpaqchu hapikurqa. Aswanqa iskayrayarqam libray atinanmanta hinaspapas mana kaqpaq hinam hapikurqa (leey Jueces 6:11-16).

5 Jehova Diosqa allin kaqkunatam Gedeonpi qawarqa, chaymi Israel runakunata librananpaq akllarurqa. Chay rikuriykusqan angelpas qawarqam trigota wayrachinanpaq kallpawan waqtasqanta. Ichaqa manamá chayllatachu chay angelqa qawarqa. Chay tiempopi runakunaqa, libre pampapim trigonkutaqa eraqku chaynapi wayrachinankupaq. Gedeonmi ichaqa uvas saruna pozopi trigonta wayrachichkarqa, chaypiqa wayrachichkarqa Madian casta runakuna rikuruspa mana qechurunankupaqmi. ¡Payqa allin yachayniyoqmá karqa! Diosqa manamá chakrapi llamkaq kasqallantachu qawarqa, qawarqataqmi allin tanteoyoq kasqantapas. Chayna kasqanta qawaspanmi llaqtanta librananpaq akllarurqa.

6, 7. a) ¿Israel runakuna hinachu Jehova Diosqa Amosta qawarqa? b) ¿Imataq qawachin Amosqa imakunamantapas yachasqanta?

6 Rimarisuntaq Diosmanta willakuq Amosmanta. Wakin runakunaqa ichapas paytaqa mana kaqpaq hinata hapirqaku, Jehova Diosmi ichaqa allin kaqkunata paypi qawarqa. Kikin Amosmi nirqa oveja michiq hinaspa purun higoskuna rantikuq kasqanta. Chay higoskunataqa wakchakunam mikuqku. Taytacha-mamacha yupaychaq Israel nacionpa chunka ayllunkunaman willananpaq Jehova Dios akllaruptinqa, wakin Israel runakunaqa manapaschá allintachu qawarqaku (Amos 7:14, 15).

7 Amosqa uchuy llaqtachamantam karqa. Chaywanpas, payqa allintam yacharqa chay tiempopi runakunapa costumbrenkunamanta chaynataq kamachiqkunamantapas. Yaqapaschá allinta yacharqa Israel nacionpi imakuna pasakusqanmanta, yacharqataqchá hichpan nacionkunapi imakuna pasakusqanmantapas rantikuqkunawan tupasqanrayku (Amos 1:6, 9, 11, 13; 2:8; 6:4-6). Bibliamanta yachaq runakunapa nisqanman hinaqa, Amosqa allin qellqaqmi karqa. Payqa manam qellqayllachu-qellqarqa, aswanqa tupanachiykunatawan rikchanachiykunatam servichikurqa. Amasias sutiyoq sacerdoteman mana manchakuspan Amospa tukuy nisqanmi qawachin Jehova Dios payta akllasqanpi mana pantarusqanta. Amospa imapas ruway atisqanqa manam sutillatachu qawakurqa, Diosmi ichaqa chay ruway atisqankunata allinta servichikurqa munayninta ruwananpaq (Amos 7:12, 13, 16, 17).

8. a) ¿Imatam Jehova Diosqa Davidta nirqa? b) ¿Imanasqam Salmo 32:8 nisqan allinta kallpanchawanchik?

8 Arí, Jehova Diosqa serviqninkunapa imapas ruway atisqankutam qawan. Rey Davidtam nirqa haykapipas pusananmanta  hinaspa qawariykuspan consejananmanta (leey Salmo 32:8). Chayna kasqanqa allintamá kallpanchawanchik. Wakinpiqa ichapas iskayrayachwan imapas ruway atisqanchikmanta, chayna kaptinpas Jehova Diosqa yanapawasunmi mana piensasqanchik kaqkunata haypanapaq. Imaynam huk tayta churinta allinta yanapan puriyta qallaykuptin, chaynam Jehova Diospas iñiyninchikpi ñawparisqanchikta qawaspan yanapawanchik. Chaypaqmi servichikun iñiqmasinchikkunata, paykunam yanapawanchik imapas yachasqanchikta allinta servichikuspa ñawparinapaq. ¿Imaynatam chayta ruwanku?

HUKKUNAPA ALLIN RUWASQANKUPI REPARASUN

9. ¿Imaynatam iñiqmasinchikkunapi piensanamanta apostol Pablopa nisqanta kasukuchwan?

9 Apostol Pablom lliw cristianokunata kallpancharqa iñiqmasinkupi piensanankupaq (leey Filipenses 2:3, 4). Chayta ruwaspaqa imapas ruway atisqankupim reparasunchik hinaspam chaykunamanta kallpanchasunchik. ¿Imaynataq tarikunchik imapas allin ruwasqanchikmanta pipas kallpanchaykuwaptinchik? Yaqa llapanpiqa chayna niwasqanchikmi allinta yanapawanchik hinalla ñawparinapaq. Chaynallataqmi iñiqmasinchikkunata imapas allin ruwasqankumanta niykuptinchikqa, kallpanchasqa tarikunku iñiyninkupi hinalla ñawparinankupaq.

10. ¿Pikunatam astawanqa yanapananchik?

10 ¿Pikunatam astawanqa yanapananchik? Llapanchikmá munanchik pipas yanapaykuwananchiktaqa. Ichaqa, mozo-sipaskunatawan chayllaraq bautizasqa kaqkunatam astawanqa yanapananchik, chaynapi congregacionpi imapas ruwaykunapi allinta yanapakuspanku ñoqanchikwan kuska kusisqa tarikunankupaq. Chaynata mana yanapaptinchikqa congregacionpi imapas ruway munasqankum chinkarunman, Bibliam ichaqa kallpanchawanchik congregacionpi imapas ruwaykunata haypanapaq (1 Tim. 3:1).

11. a) ¿Imaynatam congregacionpi anciano huk mozota yanaparqa manchapakuq kasqanta atipananpaq? b) ¿Imatam Julienmanta yachachwan?

11 Ludovic sutiyoq ancianom willakun mozo kasqanmantaraq yanapaykusqanku ancha allin kasqanta. Paymi nin: “Musyakurqanim sonqomanta pi iñiqmasinchiktapas yanapaptiyqa iñiyninpi allinta ñawparisqanta”, nispa. Willakuntaqmi manchapakuq Julien sutiyoq mozota imayna yanapasqanmanta, ninmi: “Payqa mana kaqpaq hina hapikusqanraykum, wakinpiqa hukkuna allinpaq hapinankuta munaspan imatapas llutanpi hina ruwaq. Ñoqam ichaqa qawarqani kuyakuq hinaspa congregacionpi yanapakuy munaq kasqanta. Chaymi paymanta mana allinta piensanaymantaqa, chay sumaq kayninkunapi reparaspay yanapaq kani”, nispa. Tiempopa risqanman hinam Julienqa siervo ministerial karqa, kunanqa precursor kaspanmi Diosta servichkan.

IÑIQMASINCHIKKUNATA YANAPASUN IMAPAS RUWAY ATISQANKUPI ÑAWPARINANKUPAQ

12. ¿Imaynam kananchik iñiqmasinchikkunata allinta yanapanapaq? Rimarimuy Jesusmanta.

12 Iñiqmasinchikkuna imapas ruway atisqankupi ñawparinankupaqqa, paykunapim allinta reparananchik. Ichapas pantasqankunapi reparanamantaqa sumaq kayninkunapi hinaspa imapas ruway atisqankunapi astawan reparananchik. Chaytam Jesuspas ruwarqa. Wakinpi apostol Pedro iskayrayaq runa kaptinpas, Jesusqa Cefas nispanmi suticharurqa, chayqa “rumi” ninanmi. Chaynata sutichaspanmi qawachirqa iñiyninpi rumi hina allinta takyananmanta (Juan 1:42).

13, 14. a) ¿Imatam Bernabeyqa Marcospi qawarqa? b) ¿Imaynatam mozollaraq kachkaspan Alexandre iñiqmasinchik yanapakuyta chaskirqa? (Qaway 28 kaq paginapi dibujota.)

13 Bernabeypas allin kaqkunatam Juanpi qawarqa, Juantaqa suticharqakutaqmi Marcos nispa (Hech. 12:25). Pablowan Bernabeymi punta kaq illasqankupi Marcosta  pusarqaku paykunata yanapananpaq. Ichaqa, Panfilia lawman chayaruspanku suwakunapa kasqan lawninta rinanku kachkaptinmi, qonqaymanta Marcosqa paykunata saqerurqa (Hech. 13:5, 13). ¿Imatam Bernabeyqa ruwarqa? Pantasqanpi reparananmantaqa Marcospa sumaq kayninkunapim astawan repararqa. Chaymantapas, yaqachusmi ñawparinanpaq hinalla yanaparqa (Hech. 15:37-39). Chayna yanapasqa kasqanraykum Marcosqa allin yuyayniyoq cristianoña karqa. Tiempopa risqanman hinam, Marcosqa Pablota yanaparqa Romapi preso kachkaptin. Chaymantapas, Colosas cristianokunaman cartata qellqasqanpim Pabloqa Marcosmanta allinta rimarqa hinaspapas kuyakuynintam apachirqa (Col. 4:10). Hinaspapas Pabloqa kaqmantam Marcosta qayarqa yanapananpaq, chaywanqa mayna kusisqachá Bernabeyqa tarikurqa (2 Tim. 4:11).

14 Kunanñataq rimarisun congregacionpi anciano Alexandre iñiqmasinchikmanta. Paymi yuyayniyoq iñiqmasin imayna yanapasqanmanta yuyarispan nin: “Mozollaraq kachkaspaymi llumpayta manchapakuq kani iñiqmasiykunapa qayllanpi Dios mañakuyta. Ichaqa huk ancianom allinta yanapawarqa imayna mañakunaypaq hinaspa hawkalla tarikunaypaq. Iñiqmasiykunapa qayllanpi Diosta mañakunaypaq manaña haykapipas niwananmantaqa, Diosmanta willakunapaq huñunakuypi sapa kuti mañakunaypaqmi niwaq. Chayraykum pisi-pisimanta manchapakuq kasqayqa chinkarurqa”, nispa.

15. ¿Imaynatam iñiqmasinkunata apostol Pablo kallpancharqa?

15 ¿Imatataq ruwanchik huk kaqnin iñiqmasinchikpi sumaq kayninkunata qawaspa? ¿Yaqachu kallpanchanchik? Romanos 16 capitulonpim, apostol Pablo 20 masnin cristianokunata kallpancharqa sumaq kayniyoq kasqankumanta (Rom. 16:3-7, 13). Arí, Pabloqa Andronicotawan Juniastam kallpancharqa paymanta puntataraq iñisqankumanta hinaspa iñiyninkupi allin takyasqankumanta. Kuyakuywantaqmi rimarqa Rufopa mamanmantapas, chaynataqa rimarqa ichapas maman hina imapipas yanapaykusqanrayku.

Frédéric iñiqmasinchikmi (ichoqpi) Ricota kallpancharqa Diosta hinalla servinanpaq (Qaway 16 kaq parrafota)

16. ¿Imaynatam mozo-sipaskunata yanapanman sonqomanta kallpanchay?

16 Pitapas sonqomanta kallpanchaykuyqa allintam yanapanman. Rimarisun warmallaraq Rico sutiyoq iñiqmasinchikmanta. Paymi hukmanyarurqa mana iñiq taytan bautizakunanta mana munaptin. Chaymi payqa piensarqa Diosta servinanpaq yuyayniyoqraq kananmanta. Chaymantapas, llumpay hukmanyasqam tarikurqa estudiaqmasinkuna asipayaptinku. Ichaqa, Frédéric sutiyoq ancianom kallpanchaykurqa, paymi nirqa qarinchakuspan Diosmanta willakusqanrayku chayna sasachakuykunapi tarikusqanmanta. Chaynata nisqanmi kallpancharqa iñiyninpi astawan ñawparinanpaq chaynataq taytanwan hawka tarikunanpaqpas. Chaymi 12 watanpi bautizakurqa.

Jerome iñiqmasinchikmi (alleqpi) yanaparqa Ryanta misionero kananpaq (Qaway 17 kaq parrafota)

17. a) ¿Imaynatam iñiqmasinchikkunata yanapachwan ñawparinankupaq? b) ¿Imatam huk misionero ruwarqa mozokunata yanapananpaq, hinaspa imapim tukurqa chayna yanapasqan?

17 Iñiqmasinchikkunata imapas allin ruwasqankumanta sapa kuti kallpanchaspanchikqa Jehova Diosta servinankupaqmi  astawan yanapanchik. Francia Betelpi achka wataña llamkaq Sylvie * sutiyoq iñiqmasinchikmi nin chay ruwaypi cristianakuna allintapuni yanapakusqankuta, warmikunaqa qarikunapa mana musyasqanku kaqkunatam musyanku. Chaynapim “kallpanchasqankuqa yuyayniyoq cristianokunapa kallpanchasqankuta allinta yanapan”. Payqa nintaqmi iñiqmasinchikkunata kallpanchayqa allinpuni kasqanta (Prov. 3:27). Guayana Francesa nacionpi misionero kaq Jerome sutiyoq iñiqmasinchikmi achka mozokunata yanaparqa misionero kanankupaq. Paymi nin: “Diosmanta willakusqankupi imayna rimasqankumanta otaq huñunakuykunapi allinta rimarisqankumanta kallpanchaptiymi manaña iskayrayankuchu hinaspapas astawanmi ñawparinku”, nispa.

18. ¿Imanasqataq ancha allin mozokunawan llamkayninchik?

18 Kallpanchachwantaqmi iñiqmasinchikkunataqa congregacionpi paykunawan llamkaspapas. Sichu huk mozo computadoramanta allinta yachaptinqa, huk ancianom ninman Internetpi jw.org nisqamanta yachachikuyta horqonanpaq, chaynapi mana computadorayoq yuyaq iñiqmasinchikkuna kallpanchasqa tarikunankupaq. Chaymantapas, Huñunakuna Salonta pichaspa otaq chaypi imatapas allichaspaqa allinmi kanman yanapaykuwananchikpaq pi mozotapas niyninchik. Paykunawan llamkaspam imayna kasqankuta yachasun, kallpanchasun hinaspa ima niy munawasqanchikta uyarisun (Prov. 15:23).

HAMUQ TIEMPOPAQ YANAPASUN

19, 20. ¿Imanasqataq iñiqmasinchikkunata yanapananchik ñawparinankupaq?

19 Israel runakunata pusananpaq Josueyta Jehova Dios akllaspanmi, Moisesta kaynata kamachirqa: “Kallpanchaspayki valorchay”, nispa (leey Deuteronomio 3:28). Kunan tiempopiqa astawanmi Jehova Diospa llaqtanqa yapakuchkan, chaymi unayña Diosta serviqkunaqa mozo-sipaskunata chaynataq chayllaraq bautizasqa kaqkunata imapas ruway atisqankupi ñawparinankupaq yanapananchik. Chaynapim astawan yapakunqa tukuy tiemponkuwan Diosta serviqkuna hinaspa congregacionpi allin yachachiq cristianokuna (2 Tim. 2:2).

20 Chaynaqa, hatun congregacionpiña otaq grupollapiraq huñunakuspapas hamuq tiempopaq piensaspayá llamkasun. Chaypaqqa, Jehova Dios hinam iñiqmasinchikkunapa imapas ruway atisqankupi reparananchik.

^ par. 17 Kay sutiqa cambiasqam kachkan.