Yachachikuypa kasqanman rinapaq

Yachachikuyman rinapaq

¿Imam sonqoykita tiyachinman qosayki otaq señorayki wañukuptin?

¿Imam sonqoykita tiyachinman qosayki otaq señorayki wañukuptin?

BIBLIAM qosakunata nin: “Kikikichikta hinayá warmikichiktapas sapakama kuyaychik”, nispa. Chaynallataqmi señorakunatapas nin: “Warmiñataqyá qosanta respetachun”, nispa. Chaytam ruwananku “huk runa hinallaña” kasqankurayku (Efes. 5:33; Gen. 2:23, 24). Tiempopa risqanman hinam casarasqakunapa kuyakuyninkuqa astawan hukllawakun iskay sachakunapa sapinkuna arwinakuq hina.

Ichaqa, ¿imam pasakun huk kaqninku wañukuptinqa? Chaypim tukun casado vidankuqa. Yaqa llapanpim qosan otaq señoran wañukuptinqa llakisqa, sapallan hinaspa rabiasqa tarikunku. Pichqa chunka pusaqniyoq watam Daniela sutiyoq warmiqa casarasqa karqa, chaypim achka viudo otaq viuda qepaq runakunata reqsirqa. * Ichaqa qosan wañukuptinmi nirqa: “Manam haykapipas entienderqanichu imayna tarikusqankutaqa. Kikiy viudayaruspaymi chayraq entienderqani”, nispa.

MANA QONQANAPAQ HINA LLAKI

Wakin yachaysapa runakunam ninku pipapas qosan otaq señoran wañukuptin imamantapas aswan llakisqa qepasqankumanta. Chaynatam ninku señoran otaq qosan wañukuptin sapallan  qepaqkunapas. Mili sutiyoq warmim iskay chunka pichqayoq wataña casarasqa karqa, qosan unayña wañukuptinpas llumpay llakisqa kasqanmantam nirqa: “Imaypas faltawanman hinam tarikurqani”, nispa.

Viudayaruspa unay watakuna qosanmanta waqaq warmikunamantam Susan sutiyoq warmi piensarqa yanqamanta waqasqankuta. Ichaqa kimsa chunka pusaqniyoq wata casada kachkaspanmi Susanqa viudayarurqa. Chaymanta iskay chunka wata masninña pasaruptinmi, payqa nirqa: “Sapa punchawmi hinalla paypi piensani”, nispa. Hinallam qosanta yuyarispan kunankama waqan.

Bibliapas nintaqmi qosa otaq señora wañukuptinqa llumpay sasa hinaspa unaypaq kasqanta. Abrahampa señoran Sara wañukuptinmi, payqa ‘llakikuspa waqarqa’ (Gen. 23:1, 2). Kawsarimunanmanta yachaspanpas llumpaytam señoranmanta llakikurqa (Heb. 11:17-19). Jacobpas kuyasqan señoran Raqueltaqa manam chayllachu qonqarurqa. Paymantam churinkunamanpas kuyakuywan willarqa (Gen. 44:27; 48:7).

¿Imatam paykunamanta yachachwan? Viudo otaq viuda qepaqkunapa sonqonqa unay watakunamantañam tiyan. Chaynaqa waqaptin hinaspa llakikusqanta qawaspanchikqa entiendenanchikmi llakipa qatisqan kasqanta, ichapas necesitanku hinalla yanapananchikta.

HAMUQ PUNCHAWMANTAQA MANAM PIENSANACHU

Viudo otaq viuda qeparuyqa manam soltero vidaman kutiyllachu. Unay wataña casarasqa kasqankuraykum qosaqa yachanña señoran llakisqa kaptin imayna consuelayta hinaspa kallpanchaytapas. Señorapas yachanmi qosan kusisqa tarikunanpaq ima ruwaytapas. Mayna allinmi sumaq simiwan rimapayasqan hinaspa imapas munasqanpi interesakusqanpas. Chaymi señoran wañukuptinqa mana vidanpas-vidañachu. Viudopas viudapas manchakunkum hamuq tiempokunapi vidan imayna kananmanta. ¿Bibliapa ima nisqantaq yanapanman sonqonta tiyachinanpaq?

Sapa punchawmi Diosqa yanapasunki llakikuynikipi

“Amayá afanakuychikchu hamuq punchawmantaqa. Qepa punchawkunaqa achka afanakuykunatam apamunqa, sapa punchawpaq sasachakuykunaqa amañayá hatunyachunchu.” (Mat. 6:34.) Jesuspa kayna nisqanqa yanaparqam achka runakunata kuyay ayllunku wañukuptin hawkayanankupaq. Señoran wañukusqanmanta killakuna pasaytam Carlos sutiyoq runa qellqarqa: “Hinallaraqmi yuyarini señoray Monicata, wakinpiqa astawanraqmi llakikuni. Ichaqa llapanchikmi chayna tarikunchik, tiempopa risqanman hinach hawkayasaq”, nispa.

¿Imam Carlosta yanaparqa unay watakuna aguantananpaq? Paymi nin: “Jehova Diospa yanapakuyninwanmi hamuq punchawkunamantaqa mana piensaqchu kani”, nispa. Unay watakuna llakipi tarikuspanpas manam chaywanqa atipachikurqachu. Qosayki otaq señorayki wañukuptinqa,  ama piensaychu hamuq punchawkunapiqa.

Jehova Diosqa manamá runakuna wañunantaqa munarqachu. Chayqa ‘Diablopa ruwasqanmi’ (1 Juan 3:8; Rom. 6:23). Satanasqa wañuytam servichikun runakunata manchachispan mana suyakuyniyoqta saqenanpaq (Heb. 2:14, 15). Kusikuntaqmi runakunapa mancharisqallaña kawsasqankuta qawaspan. Chaynaqa, llakisqa tarikusqaykiqa Adanpa huchanmantawan Diablopa ruwasqanmantam (Rom. 5:12). Jehova Diosmi chinkachinqa Satanaspa tukuy ima ruwasqantaqa hinaspa wañuytapas. Chayta yachaspankum achka runakunaqa manaña manchakunkuñachu wañuytaqa.

Kay Pachapi kawsarimuyqa allinninchikpaqmi kanqa. Piensariy kaypi, tayta-mamakuna hinaspa abuelokunam kawsarimuspa churinwan hinaspa willkanwan kuska pantaq kasqankuta pisi-pisimanta saqenqaku. Manañam yuyaqyaypas kanqañachu. Yaqapaschá kunan tiempopi runakunaqa ñawpa tiempopi runakunataqa wiñaymasinkuta hinaña qawanqaku. Tukuy chaykunaqa mayna sumaqmá kanqa.

Achka tapukuykunatam ruwakunku kawsarimuqkunamanta, kaymi huk kaqnin: ¿Imam pasanqa achka kutikama viudo otaq viuda kaqkunawan? Saduceokunam achka kutikama viudayaq warmimanta rimaspanku kaynata tapukurqaku (Luc. 20:27-33). ¿Mayqan qosanwantaq  kuska kawsanqa? Manam yachanchikchu, manataqmi imapipas serviwanchikchu chaykunapi piensayqa. Diosllapim hapipakunanchik. Hinaspapas hamuq tiempopaq Jehova Diospa imapas ruwasqanqa allinpaqmi kanqa, manam manchakunapaqchu.

KAWSARIYMANTA SUYAKUYQA SONQONCHIKTAM TIYACHIN

Diospa Palabranpa huk kaqnin yachachikuyninmi riman kuyay ayllunchikkuna kawsarimunanmanta. Ñawpa tiempopi runakunapa kawsarimusqankumanta Bibliapi willakusqanmi segurawanchik hamuq tiempopipas wañuqkuna kawsarimunankumanta (Juan 5:28, 29). Kawsarimuqkunata chaskiqkunam ancha kusisqa tarikunqaku. Kawsarimuqkunapas mayna kusisqachá tarikunqaku.

Wara-waranqantin wañuq runakunam kawsarimunqaku, chaymi lliw runakuna mana haykapipas kusikusqankuta kusikunqaku (Mar. 5:39-42; Apoc. 20:13). Kaykuna pasananpi yuyaymanaymi kuyay ayllunchik wañukuptin hawkayachiwananchik.

¿Yaqachu pipas llakisqa tarikunman wañusqakuna kawsarimuptin? Bibliapa nisqanman hinaqa manam. Isaias 25:8 nisqanpim nin: “Diosmi wiñaypaq chinkachinqa wañuyta[qa]”, nispa. Tukuy ima llakinchiktam chinkachinqa, chaymi nin: “Diosmi pichanqa llapallan waqaqkunapa weqenta”, nispa. Qosayki otaq señorayki wañukusqanwan llakisqa tarikuspaykiqa, kawsarimunanmanta yachaynikim kusichisunki.

Manam mayqanninchikpas allintapuniqa entiendechwanchu mosoq pachapi Jehova Diospa ruwananmantaqa, chaymi nin: “Cielokunaqa alto-altom kay pachamantaqa, chaynam kawsayniyqa ancha allin qamkunapa kawsaynikichikmantaqa. Chaynataqmi piensasqaykunaqa ancha allin qamkunapa piensasqaykichikmantaqa”, nispa (Is. 55:9). Kawsarimuymanta Jesuspa nisqanmi kallpanchawanchik Abraham hina Jehova Diospi hapipakunapaq. Chaymi llapallan cristianokunaqa Diosta kasukunanchik, chaynapi  kawsarimuqkunawan kuska Diospa favorecesqan kananchikpaq (Luc. 20:35).

SUYAKUYNIYOQ KANAPAQ

Llakikunamantaqa suyakuyniyoq kanapaqmi kallpanchakunanchik. Jehova Diosmi suyakuyta qowanchik. Manamá yachanchikchu tukuy ima munasqanchikta hinaspa necesitasqanchikkunata Jehova Dios imayna qowananchiktaqa, ichaqa manam iskayrayananchikchu qowananchikmantaqa. Apostol Pablom qellqarqa: “Confiakuspaqa suyachkanchik mana rikusqanchikta chaskinanchikpaqmi. Chaynaqa ¿imapaqmá suyachwan makinchikpiña suyasqanchik kachkaptinqa? Suyasqanchikta manaraq qawachkaspaqa pacienciakuspam confianzawan suyananchik” (Rom. 8:24, 25). Diospa promesankunamanta mana iskayrayaymi yanapasunki hinalla suyanapaq. Hinalla suyaptikiqa Jehova Diosmi “qoykullasunki sonqoykipapas munasqanta”, hinaspapas payqa “munasqankuwanmi llapallan kawsaqkunata saksaykachin[qa]” (Sal. 37:4; 145:16; Luc. 21:19).

Hamuq tiempopi Diospa promesankunapi hapipakuyqa kusikunapaqmi

Wañukunanpaqña Jesus kachkaptinmi apostolninkuna llakisqa kachkarqaku. Hinaptinmi paykunata consuelarqa: “Qamkunaqa amayá hukmanyaychikchu. Diospiyá confiakuychik, confiakuychiktaqyá ñoqapipas”, nispa. Nirqataqmi: “Manam sapallaykichiktachu saqerusqaykichik, kutimusaqmi qamkunaman”, nispa (Juan 14:1-4, 18, 27). Kayna nisqanpim pachaknintin watakuna hapipakurqaku hanaq pachaman rinankupaq suyakuyniyoq cristianokunaqa. Chaynallataqmi wañukuq ayllunkuwan tupay munaqkunapas kusisqa suyachkanku. Jehova Dioswan Churinqa manam llakisqataqa saqewasunchu. ¡Kaymantaqa manamá iskayrayachwanchu!

^ par. 3 Sutikunaqa cambiasqam kachkan.