“Allinta piensarispayá ama qonqaspa Diosta mañakuychik” (1 PED. 4:7).

1, 2. a) ¿Imanasqataq ancha allin ‘mana qonqaspa Diosta mañakuyqa’? b) ¿Ima tapukuykunatam ruwakunanchik?

TUKUY tuta llamkaq runam nirqa: “Achikyaykamunanpaqña kachkaptinmi rikchan-rikchanlla kayqa llumpay sasa”, nispa. Chaynallatam ninmanku tutapi llamkaq wakin runakunapas. Kunan tiempopiqa Satanaspa munaychakusqan tiempopa tukupayninpiñam kachkanchik. Chayqa rikchakunmanmi achikyaykamunanpaqña kasqan tiempoman. Chaymi cristianokunaqa astawan kallpanchakunanchik rikchan-rikchanlla kananchikpaq (Rom. 13:12). ¡Mayna llakikuypaqchá kanman kay tukupay punchawkunapi iñiyninchikpi puñuruyqa! Chaymi ‘allinta piensarispa’ kawsakunanchik, hinaspapas Bibliapa niwasqanchikman hinam ‘mana qonqaspa Diosta mañakunanchik’ (1 Ped. 4:7).

2 Tukupay tiempokunapi kawsasqanchikraykum kaynata tapukunanchik: “¿Chaninchanichu Dios mañakuyniyta? ¿Tukuy rikchaq mañakuykunawanchu Jehova Diosta mañakuni? ¿Sapa kutichu mañakuni? ¿Mañakunichu hukkunapaqpas, icha ñoqapa imapas munasqallaymantachu mañakuni? Chaymantapas, ¿ancha allinchu salvakunaypaq Jehova Diosta mañakuyniy?”, nispa.

“TUKUY RIKCHAQ MAÑAKUYWAN”

3. Diosta mañakuspaqa, ¿mañayllachu-mañakunanchik?

3 Apostol Pablom Efeso cristianokunaman qellqaspan nirqa “tukuy rikchaq mañakuywan” Diosta qayakunankupaq (Efes. 6:18, NM). Arí, yaqa llapanpim Diosta mañakunchik imapas pisipuwaqninchikta qowananchikpaq otaq imapas sasachakuyninchikpi yanapawananchikpaq. Chayna mañakusqanchiktaqa payqa uyarinmi (Sal. 65:2). Chayna kaptinpas, manam mañayllachu-mañakunanchik. Diosta mañakuspaqa alabananchiktaqmi, agradecekunanchiktaqmi hinaspapas ruegakunanchiktaqmi.

4. ¿Imanasqataq mañakuyninchikpi Jehova Diosta sapa kuti alabananchik?

 4 Tukuy imakunaraykum Jehova Diostaqa mañakuyninchikpi alabananchik. ¿Manachu ‘atiyninwan rurasqanmanta’ hinaspa ‘ancha hatun kasqanmanta’ yachayninchik kallpanchawanchik alabananchikpaq? (Leey Salmo 150:1-6.) Salmos libropa 150 capitulonpim alabay niq rimayqa 12 kutikama rikurin. Chaypim kallpanchawanchik Jehova Diosta alabanapaq. Salmos librota qellqaqkunamanta huk kaqninpas nirqataqmi: “Achka kutitam punchawpi alabayki. Reglamentoykikuna allin kasqanraykum alabayki”, nispa (Sal. 119:164). Arí, Jehova Diosqa alabasqamá kanan. Chaynaqa, ¿manachum mañakuyninchikpi ‘achka kutita’ otaq sapa kuti alabananchik?

5. ¿Imaynatam yanapawanchik mañakuyninchikpi Diosta agradecekuyqa?

5 Diosta mañakuspaqa agradecekunanchiktaqmi. Filipos cristianokunaman qellqaspanmi apostol Pablo nirqa: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik”, nispa (Filip. 4:6). Mañakuyninchikpi agradecekuyninchikqa allintam yanapawanchik. ¿Imanasqa? ‘Tukupay tiempokunapi’ kawsakusqanchikraykum ‘mana reqsikuq’ runakunapa chawpinpi kawsanchik (2 Tim. 3:1, 2). Mana cuidakuspaqa paykuna hinam ñoqanchikpas rikuriruchwan. Jehova Diosta mañakuyninchikpi agradecekuspanchikqa hawkallam tarikusun, chaynapim mana ‘ñakapakusunchu imayna kawsayninchik kasqanmanta’ (Jud. 16, Sagrada Biblia Quechua-Castellano, escritura actualizada). Tayta kaqkunaqa familiantam agradecekuq kanankupaq yanapanman paykunapa qayllanpi Diosta mañakuspa agradecekusqankuwan.

6, 7. ¿Imaynataq ruegakuyqa, hinaspa imamantam Diosta ruegakunanchik?

6 Diosta mañakuspaqa ruegakunanchiktaqmi, chayqa waqa-waqarispa sonqomanta Diosta mañakuymi. ¿Imayna tarikuspataq Diosta ruegakuchwan? Qatikachasqa hinaspa llumpayta onqospanchikmi. Arí, chayna sasachakuykunapi tarikuspanchikqa Diosta mañakuspamá ruegakunchik. Ichaqa, ¿chaynakunapi tarikuspallachu Diosta ruegakunanchik?

7 Diosta imayna mañakunapaq Jesus yachachiwasqanchikmanta qawasun, chaypim rimarqa Diospa sutinmanta, Munaychakuyninmanta hinaspa munayninmantapas (leey Mateo 6:9, 10). Kay Pachapiqa mana allinkunallañam kachkan, gobiernokunapas manam atinkuchu runakunapa imapas pisipuqninkunapi yanapayta. Chaymi Diosninchikta ruegakunanchik sutin chuyanchasqa kananpaq hinaspa munaychakuynin Satanaspa munaychakusqanta chinkachinanpaq. Ruegakunanchiktaqmi munaynin hanaq pachapi hina kay Pachapipas ruwakunanpaq. Chaynaqa, rikchan-rikchanlla kaspayá tukuy rikchaq mañakuywan Diosta mañakusunchik.

DIOSTA HINALLA MAÑAKUYCHIK

8, 9. ¿Imanasqataq Pedrowan wakin apostolkunaqa Getsemani huertapi rikchan-rikchanlla kayta mana atirqakuchu?

8 Apostol Pedrom cristianokunata kallpancharqa ‘mana qonqaspa Diosta mañakunankupaq’, ichaqa kikillanmi ñawpaqpi pantarurqa chay ruwaypi. Getsemani huertapi Jesus mañakunankama puñuruq qatiqninkunamanta hukninmi payqa karqa. Jesusmi paykunata nirqa: “Rikchaspayá Diosta [hinalla] mañakuychik”, nispa. Paykunam ichaqa mana chaynatachu ruwarqaku (leey Mateo 26:40-45).

9 ¿Chayraykuchu Pedropaqwan wakin apostolkunapaq mana allinta piensachwan mana rikchan-rikchanlla kasqankumanta? Yuyarinanchikmi chay kutipi llumpay pisipasqa kasqankumanta, ¿imanasqa? Paykunaqa  chay punchawpim tukuy imata allichakuspanku Pascua fiestata ruwarqaku. Chaymantapas, Señorpa Santa Cenantam ruwarqaku, chaynapi Jesuspa wañukusqanta haykapipas yuyarinapaq (1 Cor. 11:23-25). Chaymantañataqmi ‘yupaychanapaq takita takiruspanku Olivos Moqoman pasakurqaku’, chaypaqmi Jerusalen llaqtapa kichkillaña ñanninta rirqaku (Mat. 26:30, 36). Chaykamaqa yaqapaschá chawpi tutaña karqa. Sichu paykunawan ñoqanchikpas Getsemani huertapi kachwan karqa hinaspaqa yaqapaschá puñuruchwan karqa. Apostolkunata Jesus qaqchananmantaqa kuyakuywanmi kaynata nirqa: “Allin rurayta munaptikichikpas cuerpoqa mana kallpayoqmi kachkan”, nispa.

Pedroqa qallariypi pantaruspanpas chaymanta qepamanqa ‘mana qonqaspanmi Diosta mañakurqa’ (Qaway 10, 11 parrafokunata)

10, 11. a) Getsemani huertapi Pedro puñuruspan pantarusqanqa, ¿imaynatam vidanpi yanaparurqa? b) ¿Imatam qampas Pedromanta yachawaq?

10 Getsemani huertapi Pedro puñuruspan pantarusqanqa allintam vidanpi yanaparurqa. Ichaqa, manaraq chay pasakuchkaptinmi Jesusqa kaynata nirqa: “Kunan tutam llapallaykichik penqakuwankichik”, nispa. Pedroñataqmi nirqa: “Llapallanku qanmanta penqakuptinkupas ñoqaqa manam penqakusaqchu”, nispan. Kimsa kutikama negananmanta Jesus niptinpas Pedroqa nirqam: “Qanwan kuska wañunay kaptinpas manapunim negasqaykichu”, nispa (Mat. 26:31-35). Ichaqa, Jesuspa nisqanman hinam Pedroqa negarurqa. Chayna ruwarusqanmanta musyakuruspanmi “aminankama waqakurqa” (Luc. 22:60-62).

11 Chaymanta qepamanqa manañam Pedroqa kikillanpiñachu hapipakurqa. Chaypaqqa Diosta mañakuyninchá allinta yanaparqa. Chaymi kikin Pedro niwanchik ‘ama qonqaspa Diosta mañakuychik’ nispa. ¿Kasukunchikchu chay niwasqanchikta? ¿Diospi hapipakusqanchiktachu qawachinchik hinalla mañakuspa? (Sal. 85:8.) Yuyarisuntaq apostol Pablopa nisqantapas, paymi nirqa: “Pipas qaqa hina sayasqanpaq hapikuqqa cuidakuchunyá wichiykunanmanta”, nispa (1 Cor. 10:12).

NEHEMIASPA MAÑAKUSQANTAM JEHOVA DIOS UYARIYKURQA

12. ¿Imanasqataq Nehemiasqa qatipakunapaq hina?

12 Rimarisun Diosta serviq Nehemiasmanta. Payqa punta cristianokunapa tiemponmanta yaqa 450 wata ñawpaqtaraqmi, Persia nacionpi Artajerjes reypa copa serviqnin karqa. Nehemiasqa tukuy sonqonwanmi Diosta mañakuq. Payqa Jerusalen llaqtapi judiokuna sasachakuypi tarikusqankuraykum, achka punchaw ‘ayunaspan mañakurqa hanaq pachapi munaychakuq Diosta’ (Neh. 1:4). Imanasqa llakisqa kasqanmanta  hinaspa paypaq ima ruwananmanta rey Artajerjes tapuptinmi, Nehemiasqa chaylla ‘hanaq pachapi munaychakuq Diosta mañakurqa’ (Neh. 2:2-4). Hinaptinmi Jehova Diosqa mañakusqanta uyariykuspan llaqtanta yanapaykurqa (Neh. 2:5, 6). ¡Maynatachá chayqa Nehemiaspa iñiyninta kallpanchaykurqa!

13, 14. ¿Imatam ruwananchik iñiyninchikpi allin takyasqa kanapaq?

13 Nehemias hina Diosta hinalla mañakuyqa yanapawanchikmi iñiyninchikpi allin takyasqa kanapaq. Satanasqa mana llakipayakuqmi, chaymi mana allinkunaman aysawanchik iñiyninchikpi hukmanyasqa tarikuptinchik. Sichu onqochkanchik otaq llumpay llakikuywan kachkanchik hinaspaqa yaqapaschá piensachwan sapa killa Bibliamanta willakusqanchikta Dios mana kaqpaqpas hapisqanta. Wakinpiqa ichapas hukmanyasqa tarikuchwan ñawpaqpi mana allin ruwarusqanchikmanta. Satanasqa mana kaqpaqpas hapikunanchiktam munan, chaynapi iñiyninchikpi chiriyarunapaq. Ichaqa, ‘mana qonqaspa Diosta mañakuspaqa’ iñiyninchikpim allin takyasqa kasun. Amataq qonqasunchu: iñiyninchikqa allintamá harkawasun ‘Diablopa rupachkaq flechankunata amachananchikpaq’ (Efes. 6:16).

‘Mana qonqaspa Diosta mañakuyqa’ ima sasachakuytapas atipanapaqmi yanapawanchik (Qaway 13, 14 parrafokunata)

14 Chaymantapas ‘mana qonqaspa Diosta mañakuspaqa’, manam iñiyninchikpi hukmanyasunchu qonqaymanta ima sasachakuyña hamuptinpas. Ichaqa, ¿imatam ruwachwan sasachakuypi tarikuspaqa? Nehemias hinam Jehova Diosta chaylla mañakunanchik. Diospa yanapakuynillanwanmi ima sasachakuytapas aguantaspa atipayta atisun.

IÑIQMASINCHIKKUNAPAQ MAÑAKUSUN

15. Iñiqmasinchikkunapaq Dios mañakuymanta, ¿ima tapukuykunatam ruwakunanchik?

15 Jesusmi Diosta mañakurqa Pedropa  iñiynin mana pisiyarunanpaq (Luc. 22:32). Epafras sutiyoq cristianopas Jesusta qatipakuspanmi Colosas llaqtapi iñiqmasinkunapaq tukuy sonqonwan mañakurqa. Paymanta rimaspanmi apostol Pablo Colosas cristianokunaman kaynata qellqarqa: “Tukuy tiempo[m] qamkunapaq mañakuchkan tukuy sonqonwan Diospa munasqanman hina qaqa hina sayanaykichikpaq hinaspa imapipas Diosman hapipakunaykichikpaq”, nispa (Col. 4:12). Chaymi tapukunanchik: “¿Mañakunichu Diosta tukuy hinastinpi kaq iñiqmasiykunapaq? ¿Sapa kutichu mañakuni hatun desgraciakunapi ñakariqkunapaq? ¿Mañakunichu Diospa llaqtanpi punta apaqkunapaq hinaspa ñakariypi tarikuq congregacionpi iñiqmasiykunapaqpas?”, nispa.

16. ¿Imanasqam ancha allin iñiqmasinchikkunapaq mañakuyqa?

16 Sasachakuypi tarikuq iñiqmasinchikkunapaq Diosta mañakuyqa anchatam paykunata yanapanman (leey 2 Corintios 1:11). Jehova Diosqa anchatam kusikun sasachakuypi tarikuq iñiqmasinkunapaq serviqninkuna mañakuptinkuqa. Chayna sumaq sonqoyoq kasqankuta qawaspanmi, Diosqa paykunapa mañakusqankuta uyarispan sasachakuypi kaqta yanapan. Chaynaqa, amayá qonqasunchu iñiqmasinchikkunapaq mañakuytaqa. Epafras hinayá iñiqmasinchikkuna kuyasqanchikta qawachisun paykunapaq tukuy sonqowan mañakuspa. Chaynata ruwaspanchikmi ancha kusisqa tarikusun, Bibliam nin: “Ima chaskiqmantapas aswan kusisqaqa imapas qoqmi”, nispa (Hech. 20:35).

HICHPALLAPIÑAM KACHKAN SALVAKUNAPAQ PUNCHAWQA

17, 18. ¿Imaynatam yanapawanchik ‘mana qonqaspa Diosta mañakuyqa’?

17 Apostol Pablom nirqa: “Mana allin tiempom pasachkanña tuta hina hinaptinmi achkiramunqaña”, nispa. Ichaqa, chayta manaraq nichkaspanmi kaynata nirqa: “Yachachkankichikmi ima tiempopim kawsasqanchikta. Ñam rikcharinaykichik horaña. Cristoman iñisqanchik punchawmantam ña hichpamuchkanña cuerponchik salvaykuwananchikpaq punchaw”, nispa (Rom. 13:11, 12). Diospa prometewasqanchik mosoq pachaqa hinaspa salvakuyninchikqa kayllapiñam kachkan. Amayá iñiyninchikpiqa puñukurusunchu, amataqyá tiemponchiktaqa usuchisunchu kay Pachapi kusirikuykunapiqa. Aswanqa tiempochakusun ‘mana qonqaspa Diosta mañakunapaq’, chaymi yanapawasun Diospa piñakuynin punchaw chayamunankama ‘chuya sonqonchikwan Diosta servinapaq’ (2 Ped. 3:11, 12). Chayna kaspanchikmi iñiyninchikpi rikchan-rikchanlla kasqanchiktawan Diospa piñakuynin punchaw cheqaptapuni hichpallapiña kasqanta qawachisun. Chaynaqa, ‘tukuy tiempoyá Diosta mañakusunchik’ (1 Tes. 5:17). Jesus hinayá sapanchikpi Jehova Diosta mañakunapaq kallpanchakusun. Amayá utqayllamanqa mañakusunchu. Chaynata mana ruwaspaqa astawanmi Jehova Diosman asuykusunchik (Sant. 4:7, 8). ¡Chaytaqa manamá imawanpas tupachichwanchu!

18 Bibliam nin: “Cristoqa kay pachapi kawsaspanmi qaparispan hinaspa waqaspan ruegakuyllawanña wañuymanta libray atiq Diosta mañakurqa chaymi Diosqa payman sonqo kasqanrayku uyariykurqa”, nispa (Heb. 5:7). Jesucristoqa ruegakuspanmi Taytanta haykapipas mañakurqa, chaymi kay Pachapi kaspan wañukunankama payman sonqo kayta atirqa. Chayraykum Jehova Diosqa wañusqanmanta kawsariykachispan mana wañuq kananpaqña rikurirachirqa. Ñoqanchikpas ‘mana qonqaspa Diosta mañakuspanchikqa’ ima sasachakuypiña tarikuspapas hinallam Diosman sonqo kasun hinaspapas wiñay kawsaytamá haypasun.