“Huchamanta librakuruspam Diospa sirvientenña rikurirunkichik” (ROM. 6:22).

1. ¿Imatam achka runakuna piensanku sirviente kaymanta, ichaqa imatam nin Romanos 6:22 nisqan?

ACHKA runakunam piensanku sirviente kayqa patronninpa llumpay ñakarichisqan runa kasqanmanta. Diospa sirvienten kaymi ichaqa mana chaynachu. Diospa Palabranqa ninmi cristianokunaqa kuyakuq Patronpa sirvienten kanankupaq kikinku akllakuy atisqankumanta. Punta cristianokuna ‘Diospa sirvienten’ kasqankumanta apostol Pablo rimaspanqa, Diosta kuyakuywan servisqankumantam rimachkarqa (Rom. 6:22). ¿Imaynataq Diospa sirvienten kayqa? ¿Imaynatam qepanchachwan Satanaspa chaynataq munaychakusqan kaqkunapa sirvienten kayta? ¿Ima bendicionkunatam chaskisun Jehova Diosman sonqo sirvientenkunaqa?

“KUYANIM PATRONNIYTA”

2. a) ¿Imanasqan judio sirvienteqa munanman hinalla sirviente kayta? b) ¿Imatam qawachirqa sirviente rinrinta uchkuchikusqanqa?

2 Israel llaqtaman kamachikuykunata Jehova Dios qosqanmi qawachiwanchik imayna sirvientenkuna kananchikpaq pay munasqanta. Judio sirvientekunaqa qanchis kaq watapim sirviente kayninkumanta libreña kananku karqa (Ex. 21:2). Ichaqa, huk kaq sirviente patronninta kuyaspan hinalla serviyta munaspanqa qepakuytam atinman karqa. Chaynaqa karqa Diospa kamachikuynin saqesqanraykum. Hinaptinmi sirvientepa patronnin chay sirvienteta punkunpa marconman asuykachispan alisnawan rinrinta uchkunan karqa (Ex. 21:5, 6). ¿Imaynanpimá rinrinpiqa uchkunan karqa? Ñawpaq tiempopi Hebreo rimaypiqa kasukuymi tupan uyarikuywan. Chaymi rinrinpi uchkuyqa qawachirqa patronninta kasukuspan chay sirviente hinalla serviy munasqanta. Kayqa Jehova Diosman qokusqanchikwanmi tupan. Payman qokuspam nirqanchik kuyasqanchikrayku kasukunanchikpaq.

3. ¿Imanasqataq Diosman qokurqanchik?

3 Manaraq bautizakuchkaspam tantearurqanchikña  Jehova Diospa sirvienten kananchikpaq. Payman qokuspam nirqanchik kasukunapaqwan munayninta ruwanapaq. Manam pipas hikutawarqanchikchu. Warmakunapas manataqmi tayta-mamankuta kusichinankuraykullachu Diosman qokuspa bautizakunku. Cristianokunaqa Jehova Diosninchikta kuyakusqanchikraykum paymanqa qokurqanchik. Chaymantam apostol Juanpas qellqarqa: “Diosta kuyaspanchikqa kamachikuyninkunatapas kasukunchikmi”, nispa (1 Juan 5:3).

SIRVIENTE KASPAPAS LIBREM KANCHIK

4. ¿Imatam ruwananchik ‘imatapas allintaña rurananchikpaq entregakuyta’ munaspaqa?

4 ¡Anchatamá Jehova Diosta agradecekunchik sirvienten kananchikpaq saqeykuwasqanchikmanta! Jesucristopa wañukusqanpi iñisqanchikraykum manaña huchapa sirvientenchu kanchik. Pantaq runakuna kaspanchikpas Jehova Diostawan Jesucristota kasukunapaqmi tantearurqanchik, hinaspam reqsikunchik patronninchik kasqankuta. Kaymantam Pablo nirqa: “Amaña huchallikunaykichikpaqyá wañusqa hinaña kaychik. Señorninchik Cristo Jesusman hapipakuspayá Diosllapaqña kawsasqaykichikpaq hapikuychik”, nispa. Nirqataqmi: “Yachasqaykichik hinam huk runa sirviente kananpaq patronninman entregakuspaqa kasukunan. Chaynam qamkunapas imatapas kasukuspaykichikqa chaypa sirvienten kankichik. Huchallikuptikim chay servisqayki patron wañuyman apasuchkanki. Patronta hina Diosta kasukuspaykim ichaqa allin ñanpi purichkanki. Ichaqa ¡Diosmanyá gracias kachun! Ñawpaqtaqa huchallikuspa mana allinta servichkaspaykichikpas cheqap yachachikuyninkunata chaskispam tukuy sonqoykichikwanña kasukuchkankichik. Chaymi huchapa munaychakusqanmanta librakuruspaykichikqa imatapas allinta ruranaykichikpaqña entregakurqankichik”, nispa (Rom. 6:11, 16-18). Qawasqanchikman hinaqa, Pabloqa ‘tukuy sonqonchikwan kasukunanchikmantam’ nirqa. Arí, Jehova Diosman qokuspanchikmi ‘imatapas allintaña ruranapaq entregakurqanchik’.

5. ¿Imawanmi llapallanchik sasachakunchik hinaspa imanasqa?

5 Ichaqa, Diospa sirvienten hina kawsakuyta munaptinchikpas pantaq kayninchikmi sasachawanchik, chaywanmi apostol Pablopas sasachakuq. Paymi nirqa: “Diospa leyninmantam kusikuni sonqoymantapuni. Ichaqa musyakunitaqmi allin munasqaypa contranpi imapas peleasqanta, arí, chayqa presocharuwaspan huchaman pusawaqniymi”, nispa (Rom. 7:22, 23). Ñoqanchikpas sapa punchawmi pantaq kasqanchikrayku aychapa munayninkunawan atipanakuypi hina kachkanchik. Chaymi apostol Pedro kaynata niwanchik: “Kawsaychikqa libre kaq runakuna hinayá. Amataqyá libre kasqaykichikman hinaqa mana allinkunataqa ruraychikchu, aswanqa Diosta serviq runakuna hinayá kawsaychik”, nispa (1 Ped. 2:16).

6, 7. ¿Imatam Satanasqa ruwan kay Pachapi tukuy imakunapas munayllapaqña rikchakuwananchikpaq?

6 Sasachawanchiktaqmi kay Pachapi demoniokunapa munaychakusqan kaqkunapas. Kay Pachapi munaychakuq Satanasmi tukuy rikchaq toqllakunata churawanchik Jehova Diostawan Jesusta mana kasukunapaq. Payqa sirvienten kananchikta munaspanmi tentacionkunata churawanchik (leey Efesios 6:11, 12). Chaypaqmi kay Pachapi tukuy imakunata munayllapaqtaña qawachiwanchik. Apostol Juanmi nirqa: “Chaykunata kuyaqqa manam kuyanchu Dios Taytataqa. Manam Dios Taytamantachu kay pachapi mana allin ruraykunaqa. Kay pachapi mana allin kaqkunamantam rikurimun aychapa munapayayninkunaqa, ñawipa munarusqankunaqa hinaspa tukuy imamanta hatunchakuykunaqa”, nispa (1 Juan 2:15, 16).

7 Enteron Pachapim runakunaqa tukuy imayoq kayta munanku. Satanasmi runakunata umachan qollqesapa kaspanku cheqap  kusikuyta haypanankumanta. Tukuy hinastinpim kan tukuy imayoq hatun tiendakuna. Televisionpiwan radiokunapipas lliw runakunatam kallpanchanku tukuy imayoq hinaspa kusirikuykunallapi kayqa allinpuni kasqanmanta. Agenciakunapas Diosta mana reqsiq runakunawan hukllawakuspa kuyayllapaq llaqtakunaman rinapaqmi munachikunku. Maypiña tarikuptinchikpas, runakunaqa hikutawanchikmi paykuna hina kawsanapaq.

8, 9. ¿Imamanmi wichiykuchwan, hinaspa imanasqam cuidakunanchik?

8 Kay Pachapi mana allinkunawan inturachikuq cristianokunamanta rimaspanmi, Pedro nirqa: “Ratollapaq kusikusqankumantam kusisqapaq hapikunku. Paykunaqa fiestakunapi hinaspa kusikuykunapi compañasuspaykichikpas penqaypaq qanra runakunam”, nispa. Nirqataqmi: “Rimankupas yanqakunatam, aychapa munasqan qanra vidamanmi aysanku huchanmanta chayllaraq ayqekuqkunatapas. Libre kaytam prometenku kikinkupuni mana allinkunapa sirvienten kachkaspankupas, runaqariki munaychakuqninpa sirvientenmi”, nispa (2 Ped. 2:13, 18, 19).

9 ‘Ñawipa munarusqankunata’ haypanapaq kallpanchakuyqa, manam libreyachiwanchikchu. Aswanqa Diablopa sirvienten kanapaqmi tanqawanchik (1 Juan 5:19). Arí, qollqella kuyaymanmi wichiykuchwan hinaspam lloqsiytaqa manaña atichwanchu.

¿IMATAQ CHEQAP KUSIKUYTA APAMUN?

10, 11. ¿Pikunatam Satanasqa astawan urmachiyta munan, hinaspa imanasqam universidadkunapi estudiayqa sasachakuykunata apamunman?

10 Satanasqa mana experienciayoq kaqkunatam astawan urmachiyta munan. Paykunam kanku lliw mozo-sipaskuna. Satanasqa manam munanchu mayqan mozo-sipaspas nitaq pi runapas Jehova Diospa sirvienten kanantaqa. Payqa tukuytam ruwan Diosman qokuruspa bautizakuqkunata huchaman wichiykachinanpaq.

11 Kaqmanta rimarisun rinrinta uchkuchikuyta munaq sirvientemanta. Rinrinta uchkuptinku qallariypi nanaptinpas pisi-pisimantam chay nanayqa chinkan. Ichaqa, sutillam qawakun sirviente kananpaq señalachikusqanqa. Chayna sasataqmi otaq nanaypaq hinataqmi kanman mozo-sipaskunapaqpas mana iñiq amistadninkupa ruwayninkunamanta rakikuyqa. Satanasqa runakunatam umachan universidadkunapi otaq chayman rikchakuq kaqkunapi estudiaspa cheqap kusikuyta haypanankumanta. Cheqap cristianokunam ichaqa yachananchik cheqap kusikuyqa mana chaymanta kasqanta. Jesusmi  nirqa: “Mayna kusisqam ‘Diostam necesitani’ niqkunaqa”, nispa (Mat. 5:3). Arí, cheqap cristianokunaqa Diosta servinanchikpaqmi kawsanchik manam Satanasta servinapaqchu. Diospa kamachikuyninkunatam kuyanchik, hinaspam ‘tuta punchaw’ chaypi yuyaymananchik (leey Salmo 1:1-3). Ichaqa, cristianokuna universidadkunapi estudiaptinkuqa manañam tiemponku kanñachu Bibliapa nisqankunapi yuyaymananankupaq.

12. ¿Imata akllakunankupaqmi mozo-sipaskunapa makillankupi kachkan?

12 Corinto cristianokunaman qellqaspanmi Pablo nirqa: “Sirviente kachkaspallaraq qayasqa kaptikiqa manam imananchu, librakuyta atispaqa librakuyá”, nispa (1 Cor. 7:21). Punta cristianokunapa tiemponpi wakin patronkunaqa llumpaytam sirviente kaq cristianota sasachaq. Chayna kaptinqa, ancha allinmi karqa sirviente kasqankumanta librakuyqa. Kunan tiempopiqa, achka nacionkunapim kamachinku mozo-sipaskuna colegionkuta tukunankukama estudianankupaq. Tukuruspankum ichaqa kikinkuña ima estudiaytapas akllakunmanku. Chayna kaptinqa, tukuy tiemponkuwan Diosta servinankupaqmi tanteakunmanku. Ichaqa, universidadpi estudianankupaq tantearuspankuqa manam atinmankuchu tukuy tiemponkuwan Dios serviytaqa (leey 1 Corintios 7:23).

¿Pipa sirvienten kaytam munanki?

¿IMA YACHACHIKUYTAQ ASWAN ALLINQA?

13. ¿Ima yachachikuytaq Diospa serviqninkunata allinta yanapan?

13 Pablom Colosas cristianokunaman nirqa: “Cuidakuychikyá, amayá engañachikuychikchu yachayninkumanta rimaqkunawanqa hinaspa yanqakunalla rimaqkunawanqa, paykunaqa manam Cristomanchu hapipakunku aswanqa runakunapa costumbrenkunallamanmi hinaspa kay pachapi yachachikuykunallamanmi”, nispa (Col. 2:8). Yachayniyoq achka runakunam kunan tiempopiqa kay Pachapi yachachikuykunallaman hinaspa costumbrekunallaman hapipakuspanku yachachinku. Universidadpi chayna yachachisqankuqa, manam estudiaqkunataqa yachachinchu sapa punchaw imayna vida pasanankupaqqa. Cheqap cristianokunam ichaqa as tiempolla imatapas estudianankupaq akllakunku chaynapi kapuqllankuwan kawsakuspanku tukuy tiemponkuwan Jehova Diosta servinankupaq. Timoteoman apostol Pablopa kayna nisqantam allinta kasukunku, nirqam: “Diosta servispaqa qori-qollqeta hinam tarirunchik kapuqninchikwan contentakuyta yachaspanchikqa”, nispa. Nirqataqmi: “Pachanchikpas mikunanchikpas kaptinqa, chaywanyá contentakusun”, nispa (1 Tim. 6:6, 8). Cheqap cristianokunaqa titulokunata otaq diplomakunata huñunankumantaqa,  astawanmi kallpanchakunku Diosmanta willakuspanku runakunata Jesuspa qatiqnin kanankupaq yanapaypi (leey 2 Corintios 3:1-3).

14. Filipenses 3:8 nisqanman hinaqa, ¿imaynatam Pabloqa Diospa chaynataq Jesuspa sirvienten kasqanta qawarqa?

14 Rimarisun Pablomanta. Payqa Diospa Leyninmanta yachachiq Gamaliel sutiyoq runawanmi yachachisqa karqa. Chayna yachachisqa kasqanqa tupanmanmi kunan tiempo universidadkunapi yachachisqankuwan. Ichaqa, ¿imaynatam tukuy chaykunata qawarqa Diospa chaynataq Jesuspa sirvienten kaspanqa? Paymi nirqa: “Señor Jesucristota reqsinayraykum tukuy imatapas mana valeqpaqña hapini, payrayku tukuyta pierderuspaymi chaykunataqa qopata hinaña hapini chaynapi Cristota tarinaypaq”, nispa (Filip. 3:8). Pablopa kayna nisqanqa, cristiano mozo-sipaskunatawan tayta-mamankutapas yanapanmanmi allinta tanteanankupaq (qaway dibujokunata).

DIOSPA YACHACHIKUYNINTA ALLINTA SERVICHIKUSUN

15, 16. ¿Ima yachachikuytam Diospa llaqtanpi chaskinchik, hinaspa imapaq?

15 ¿Imaynataq kanku universidadpi kaqkunaqa? Paykunaqa yaqa llapanpim gobiernopa otaq autoridadkunapa contranpi hoqarikunku, hinaspapas kusirikuykunallapi kaspankum huchapakunku (Efes. 2:2). Jehova Diospa llaqtanpim ichaqa congregacionkunapi alli-allin yachachikuyta chaskinchik. Sapa semanam Diosmanta Yachachinapaq Escuelapi yachachisqa kanchik. Kantaqmi Solterokunapaq Bibliamanta Escuelapas hinaspa Casarasqa warmi-qaripaq Bibliamanta Escuelapas. Kay escuelakunam allinta yanapawanchik patronninchik Jehova Diosta kasukunapaq.

16 Chaymantapas yanapawaqninchik yachachikuykunatam tarichwan Índice de las publicaciones Watch Tower nisqapi chaynataq Watchtower Library nisqa discopipas. Tukuy chaypi yachachikuykunaqa Jehova Diosta yupaychanapaqmi yanapawanchik. Yachachiwanchiktaqmi runakunata Dioswan allinyanakunankupaq yanapanapaqpas (2 Cor. 5:20). Chaynapim paykunapas hukkunata yanapayta atinqaku (2 Tim. 2:2).

SIRVIENTE KASQANCHIKMANTA BENDICIONKUNA

17. ¿Ima bendicionkunatam chaskinku Diospa yachachisqan kayta akllakuqkunaqa?

17 Serviqninkunaman qollqeta saqeykuspan illaruq apumanta Jesuspa rikchanachisqanpim, iskay sirvientekuna alabasqa karqaku allin llamkasqankumanta. Chaymi patronnintin anchata kusikurqaku. Hinaspapas patronninmantam aswan llamkayta chaskirqaku (leey Mateo 25:21, 23). Kunanpas ancha kusisqam tarikuchwan Diospa yachachisqan kayta akllakuspanchikqa. Rimarisun Michaelmanta. Payqa estudiaqmasinkunamantapas allin estudiaqmi karqa, chaymi profesorninkuna kallpanchaq universidadpi estudiananpaq. Michaelmi ichaqa universidadpi estudiananmantaqa huk oficiota estudiarqa. Pisi tiempollamantam payqa kikinña mantienekuspan precursor karqa. ¿Ñakakurqachu chayna tantearusqanmanta? Paymi nin: “Precursor kaspay hinaspa congregacionpi kunan anciano kaspay Diospa yachachikuyninta chaskisqayqa, manam imawanpas tupanchu. Qollqesapa kanaymantaqa Diospa bendicionninkuna chaskisqaymi aswan chaninniyoq. ¡Ancha kusisqamá tarikuni universidadpi mana estudiasqaymanta!”, nispa.

18. ¿Imanasqam nichwan Diospa yachachikuyninkunaqa imamantapas aswan allin kasqanta?

18 Diospa yachachikuyninqa imamantapas aswan allinmi, yanapawanchikmi Jehova Diospa munayninmanta allinta entiendenapaq hinaspa sirvienten hina servinapaqpas. Qowanchiktaqmi ‘Dios librawananchikpaq’ sumaq suyakuytapas (Rom. 8:21). Tukuy chaykunamantapas astawanqa Patronninchik Jehova Dios kuyasqanchikta qawachinapaqmi yanapawanchik (Ex. 21:5).