¿Pikunataq karqaku manaraq Sinchi para kachkaptin, Genesis 6:2, 4 nisqanman hina ‘Diospa churinkunaqa’?

Bibliam sutillata qawachin angelkuna kasqankumanta. ¿Imaynatam Bibliaqa chayta qawachin?

Genesis 6:2 nin: “Diospa churinkunam runakunapa warmi churinkunata buenamoza kasqanta qawaykuspanku llapallanmanta akllaspa casararqaku”, nispa.

‘Diospa churinkuna’ niq rimaykunaqa hebreo rimaypi punta kaq qellqasqa Bibliapiqa rikurinmi kay textokunapi: Genesis 6:2, 4; Job 1:6; 2:1; 38:7 hinaspa Salmo 89:6. Chay rimaykunaqa Chuya Qellqa Bibliapiqa rikurinmi Genesis 6:2, 4 hinaspa Salmos 89:6 textokunapi. ¿Imatam kay textokuna nin ‘Diospa churinkunamanta’?

Hebreo rimaypi punta kaq qellqasqa Bibliapiqa Job 1:6 nisqanpi ‘Diospa churinkunaqa’, Diospa qayllanpi angelkunam karqaku. Satanaspas chaypim kachkarqa, payqa Allpa pachata canton-canton muyumusqanmantam kutimurqa (Job 1:7; 2:1, 2). Hebreo rimaypi punta kaq qellqasqa Bibliapi Job 38:4-7 nisqanpiqa willakuntaqmi Jehova Dios kay Allpa pachata unanchaspan ‘esquinanpi hapiq rumita’ churaptin ‘Diospa churinkuna’ ‘qapariyllawanña kusikusqankumanta’. Diospa chay churinkunaqa angelkunachá karqa, chaykamaqa manaraqmi Diosqa runakunata unancharqachu. ¿Imatam nichwan Salmo 89:6 nisqanpi “Diospa churinkunamantaqa”? Paykunapas cielopi Diospa qayllanpi angelkunam kanku, manamá aychayoq tulluyoq runakuna hinachu kanku.

Hinaptinqa, ¿pikunataq karqaku Genesis 6:2, 4 nisqanpi ‘Diospa churinkunaqa’? Bibliapa nisqanman hinaqa, kay Pachaman hamuq angelkunam karqaku.

Wakinkuqa piensankum angelkunaqa warmikunawan mana puñuy atisqankuta, ¿imanasqa? Mateo 22:30 nisqanpi Jesuspa nisqanman hina, hanaq pachapi angelkuna mana casarakusqankurayku nitaq piwanpas puñusqankurayku. Ichaqa, wakinpim angelkunaqa runayaruspanku runakunawan mikurqaku hinaspa tomarqaku (Gen. 18:1-8; 19:1-3). Chaynaqa, angelkuna runayaruspankuqa atirqakum warmikunawan puñuytaqa.

Chayna kasqanmantam Bibliaqa sutillata qawachin. Judas 6, 7 nisqanpim Sodoma llaqtapi runakunapa huchanta tupanachin mana allin angelkunapa huchanwan, ‘paykunaqa punta munaychakuyninkuta mana waqaychaspankum saqerurqaku yachananku sitiota’. Chay angelkunaqa Sodoma llaqtapi runakuna hinam llumpay “huchapakuypi purirqaku”, hinaspam mana ruwana kaqkunata ruwarqaku. 1 Pedro 3:19, 20 nisqanpipas rimanmi mana kasukuq angelkunamanta, paykunaqa Noeypa tiemponpi mana allin angelkunawanmi tupan (2 Ped. 2:4, 5). Hinaptinqa, Noeypa tiemponpi mana allin angelkunapa ruwasqankuqa tupanmi Sodoma hinaspa Gomorra llaqtapi runakunapa ruwasqankuwan.

Qawamusqanchikman hinaqa, Genesis 6:2, 4 nisqanpi ‘Diospa churinkunaqa’ runayaruq angelkunam karqaku, hinaspankum warmikunawan huchapakururqaku.

 Bibliam nin Jesusqa “preso kaq espiritukunamanpas” willamusqanmanta, ¿imatam chaywan niyta munachkarqa? (1 Ped. 3:19.)

Apostol Pedrom rimarqa mana kasukuq angelkunamanta, “paykunam pacienciawan Dios suyachkaptinpas mana kasukurqakuchu buqueta Noey ruranankama” (1 Ped. 3:20). Chay angelkunaqa Satanaspa yanapaqninkunam karqaku. Chayna angelkunamantam Judaspas rimarqa, “paykunaqa punta munaychakuyninkuta mana waqaychaspankum saqerurqaku yachananku sitiotapas”. Nirqataqmi “hatun juicio punchawpaq” ‘Dios tutayaypi wiñaypaq cadenarusqanmantapas’ (Jud. 6).

¿Ima mana allintataq Noeypa tiemponpi chay angelkunaqa mana kasukuspanku ruwarurqaku? Manaraq Sinchi para chayamuchkaptinmi paykunaqa runayarurqaku, chayna ruwasqankuqa manam Diospa munayninchu karqa (Gen. 6:2, 4). Chaymantapas warmikunawanmi casarakurqaku. Manamá chayta ruwanankupaqchu angelkunaqa unanchasqa karqaku (Gen. 5:2). Kay mana allin angelkunaqa Diospa tanteasqan punchawpim chinkachisqa kanqaku. Chay punchawkamaqa Judaspa nisqanman hinam “tutayaypi” tarikunqaku, huk rimaypiqa presochasqa hinam kanqaku.

¿Haykapim hinaspa imaynatam Jesusqa chay ‘preso kaq espiritukunaman’ willamurqa? Chayqa karqa Pedropa nisqanman hina Jesus espiritupiña kawsarimusqan qepamanmi (1 Ped. 3:18, 19). Pedroqa nirqataqmi paykunaman Jesus willamusqanta. Chayna nisqanwanmi qawachin manaraq punta kaq cartanta qellqachkaptin chay espiritukunaman Jesus willasqanmanta. Chaynaqa, yaqachusmi kawsarimusqan qepamanña Jesusqa chay mana allin espiritukunaman castigasqa kanankumanta willarqa. Chay willasqan sumaq willakuy kananmantaqa, juiciopaq willakuymi karqa (Jon. 1:1, 2). Jesusqa wañunankama Diosman sonqo kasqanwan hinaspa kawsarisqanwanmi sutilla qawachirqa paypi Satanas mana munaychakusqanta, chayraykum payqa chay espiritukunaman willayta atirqa (Juan 14:30; 16:8-11).

Hamuq tiempopim Jesusqa Satanastawan mana allin angelkunata hapispan uku pozoman wischuykunqa (Luc. 8:30, 31; Apoc. 20:1-3). Chaykamaqa mana kasukuq angelkunaqa tutayaypi hinam kanqaku. Paykunaqa mana munaymi chinkachisqa kanqaku (Apoc. 20:7-10).