APOSTOL Pablom nirqa: “Diospa palabranqa kawsachkanmi hinaspapas atiyniyoqmi”, nispa (Heb. 4:12). ¿Imanasqam chaynata nirqa? Runakunapa sonqonman chayaspan vidankuta cambiasqanraykum.

Ichaqa lliw apostolkuna wañukuptinkum, Pablopa chay nisqantaqa hukmanpataña qawarqaku Diosmanta llulla willakuqkuna miraruptinku (2 Ped. 2:1-3). Tiempopa risqanman hinam, sacerdotekunaqa ima mana allinkunamanta harkakuq kasqanta piensaspanku Bibliata servichikuyta qallaykurqaku. Chaymanta rimaspanmi Harry Y. Gamble yachachiq runa nirqa Orígenes sutiyoq sacerdote 200 kaq watakunapi ima nisqanmanta, nirqam: “Magia qellqakunapa nisqan atiyniyoq kaptinqa, manachu aswan atiyniyoqraq kanman Diospa Palabranqa”, nispa. Hina chay yachachiq runapa nisqanman hinaqa, 300 kaq watakuna tukuyninpi yachaq Juan Crisóstomo runam willakurqa Bibliapa wakin textonkunata runakuna imamantapas harkakuq kasqanta piensaspanku kunkankupi wallqakuykuspanku purisqankuta. Willakurqataqmi Crisóstomo kayna nisqanmanta: “Diospa Palabran pipapas wasinpi kaptinqa demonioqa manam asuykuytaqa atinmanchu”, nispa. Nirqataqmi Agustín de Hipona runa “Bibliapi kaq Juan qellqawan sawnakuykuspa puñuyqa uma nanaypaq allin kasqanmanta”. Qawasqanchikman hinaqa, Diospa Palabrantam runakunaqa servichikuqku ima mana allinkunamantapas harkakuq kasqanta piensaspanku. Ichaqa, ¿allinchu kanman mana allinkunamanta harkakuq kasqanta piensaspa Bibliata servichikuyninchik?

Kunan tiempopi achka runakunam bibliomancia nisqa creenciapi hapipakunku. ¿Imataq chayqa? Chayqa Bibliapa otaq huk libropa mayqan partentapas qonqaymanta kichaykuspa leeymi, chayta ruraqkunaqa piensankum chaypi nisqan yanapananmanta. Gamble yachachiq runam nirqa Agustín de Hipona runa huk kutipi sapaq wasimanta huk warmachapa: “Kichaspayki leey, kichaspayki leey” nisqanta uyarisqanmanta. Agustín de Hipona runaqa chay nisqantam entienderurqa Bibliata kichaspan leenanpaq Dios kamachisqanta.

Ichapas uyarirqanki wakin runakuna sasachakuypi tarikuspa Diosta mañakuspanku Bibliapa mayqan partentapas qonqaymanta kichasqankuta, chaynatam ruranku sasachakuyninkupi yanapananta piensaspanku. Ichaqa, cristianokunaqa manam chaynata ruraspachu Diospa Palabranwanqa yanapachikunanku.

Jesusmi discipulonkunata nirqa ‘chuya espiritu’ hamuspan paykunata yanapananmanta. Hinaspam nirqa: “Paymi tukuy imata yachachisuspaykichik yuyarichisunkichik qamkunaman tukuy ima nisqayta”, nispa (Juan 14:26). Yuyarichiwananchikpaqqa Bibliamanta yachayniyoqmi kananchik, ichaqa bibliomancia nisqata ruraqkunaqa manam chayna yachayniyoqchu kanku.

Chay bibliomanciatawan achka creenciakunatam runakuna ruranku Bibliata servichikuspanku. Ichaqa, Diospa Palabranqa kamachinmi adivinokunapa rurasqankuta mana ruranapaq (Lev. 19:26; Deut. 18:9-12; Hech. 19:19). “Diospa palabranqa kawsachkanmi hinaspapas atiyniyoqmi”, ichaqa allintam servichikunanchik. Runakunataqa yanapan Bibliapa yachachiyninkunata reqsisqankum, manam qonqayllamanta Bibliapa mayqan partentapas kichaspa leesqankuchu. Achka runakunatam Diospa Palabranqa yanaparqa sumaq kayniyoqkuna kanankupaq, mana allin rurasqankuta saqenankupaq, familiankupi kusisqa kawsanankupaq hinaspa Dioswan allin amistad kanankupaqpas.