“Qamkunaqa manam kikikichikpañachu kankichik” (1 COR. 6:19).

1. ¿Imatam runakunaqa piensanku sirviente niq rimayta uyarispanku?

¿IMATAM piensanki “sirviente” niq rimayta uyarispayki? Achka runakunam piensanku ñakarichisqa runapi otaq pipapas kamachisqallanta ruraq runapi chaynataq llumpayta llamkaspanpas mana imatapas chaskiq runapi. Chaymi yaqa llapallan runakunaqa hukkunapa sirvienten kaytaqa mana munankuchu.

2, 3. a) ¿Imaynam tarikunchik Jesucristopa serviqninkunaqa? b) ¿Ima tapukuykunatam qatiqninpi kutichisun mayordomo hina llamkayninchikmanta?

2 Jesusmi nirqa qatiqninkuna humilde sirvientekuna kanankumanta. Ichaqa sirviente kaspankupas, cheqap cristianokunaqa manamá mana valeqpaq hinachu sientekunku. Aswanqa anchatam kusikunku sirviente kasqankuwanqa. Piensariy Jesus wañukunanpaq pisi tiempollaña kachkaptin ‘allin yuyayniyoq confianza sirvientemanta’ ima willakusqanpi (Mat. 24:45-47).

3 Lucasmi qellqasqanpi kay sirviente rimaypa rantinpi, “mayordomo” niq rimayta servichikun (leey Lucas 12:42-44). Kunan tiempopi yaqa llapallan cristianokunaqa, manamá Jesuspa rimasqan confianza sirvientechu kanchik. Ichaqa, Bibliaqa ninmi Diospa llapallan serviqninkuna mayordomo hina llamkayniyoq kasqanchikta. Chayna kaptinqa, ¿ima llamkayniyoqtaq kanchik? ¿Imaynatam chay llamkayninchikta qawananchik? Chaymanta yachanapaq, qatiqninpi qawasun ñawpaq tiempopi mayordomo kaqkuna ima rurayniyoq kasqankumanta.

MAYORDOMO KAQKUNAPA RURAYNINKUMANTA

4, 5. ¿Ima rurayniyoqmi karqaku ñawpaq tiempopi mayordomo kaqkunaqa? Rimarimuy qawamusqanchik mayordomokunamanta.

4 Ñawpaq tiempopiqa, mayordomoqa confianapaq sirvientem karqa, chaymi patronninqa wasinpi otaq negocionpi nanachikunanpaq churaq. Payqa nanachikuqtaqmi  patronninpa kapuqninmantawan qollqenmantapas, kamachiqtaqmi patronpa serviqninkunatapas. Chayna mayordomom karqa Abrahampa serviqnin Eliezerpas, paytam Abrahamqa tukuy kapuqninpi nanachikunanpaq churaykurqa. Yaqapaschá Abrahamqa payta kamachirqa Mesopotamia llaqtaman rispan churin Isaacpaq warmita maskapunanpaq (Gen. 13:2; 15:2; 24:2-4).

5 Abrahampa willkan Joseypas, Egipto nacionniyoq Potifar runapa mayordomonmi karqa (Gen. 39:1, 2). Tiempopa risqanman hinam, Joseypapas karqa wasinpi nanachikuq mayordomon, chay mayordomom Joseypa chunka wawqenkunata huk kutipi chaskirqa. Paytaqmi Joseypa kamachisqanman hina, sullka kaq wawqenpa costalninman qollqe vasota hinarurqa chaynapi patronninpa munasqan rurakunanpaq. Qawasqanchikman hinaqa mayordomo kaqkunaqa confianapaq runakunam karqaku (Gen. 43:19-25; 44:1-12).

6. ¿Ima llamkayniyoqmi kanku ancianokunaqa mayordomo hina kaspanku?

6 Apostol Pablopas nirqam congregacionkunapi cuentallikuqkuna “Diospa mayordomon” kanankuta (Tito 1:7). Paykunaqa ‘Diospa ovejankunata’ michinankupaqmi congregacionpi churasqa kachkanku, chaymi iñiqmasinkunata yanapanku hinaspa kallpanchakunku imayna kawsayninku qatipakunapaq hina kananpaq (1 Ped. 5:1, 2). Congregacionpi imapas rurayninkuqa manamá chaynallachu. Yaqa llapallan ancianokunaqa sapa congregacionpim llamkanku, congregacionkunata watukuq ancianokunam ichaqa achka congregacionkunata yanapanku. Betel Wasimanta Encargakuq ancianokunañataqmi, chay nacionpi lliw congregacionkunata yanapanku. Ichaqa llapallan ancianokunam imapas rurayninkuta allinta rurananku Diosman cuentata qonankurayku (Heb. 13:17).

7. ¿Imanasqam nichwan lliw cristianokuna mayordomo hina kasqanchikta?

7 ¿Ima nichwantaq mana anciano kaq cristianokunamantaqa? Apostol Pedrom llapallan cristianokunaman kaynata nin: “Diospa qosusqaykichikman hinayá sapakama yanapanakuychik. Qamkunaqa kaychik Diospa hatun favorninkuna aypuq allin mayordomo hinayá”, nispa (1 Ped. 1:1; 4:10). Ancha kuyakuyninpim Diosqa sapakamata imapas ruray atiqta unanchawarqanchik, chaykunawanmi atichwan iñiqmasinchikkunata yanapayta. Chaynaqa, Jehová Diosta lliw serviqkunaqa mayordomom kanchik. Payqa confianapaq hinam qawawanchik, munantaqmi kamachiwasqanchikkunata allinta rurananchikta.

DIOSPAM KANCHIK

8. ¿Imatam llapanchik yuyarinanchik?

8 Mayordomo hina kasqanchikpi lliw cristianokuna yuyaymanaspaqa, kaykunapim reparananchik. Punta kaq: Jehová Diospam llapanchik kanchik, chaymi cuentata qonanchik. Pablom nirqa: “Qamkunaqa manam kikikichikpañachu kankichik. Diosmi rantiwarqanchik preciowan”, nispa. Arí, Diosqa Jesucristopa yawarninwanmi llapanchikta rantiwarqanchik (1 Cor. 6:19, 20). Diospaqña kasqanchikraykum, mana-munay paypa kamachikuyninkunata kasukunanchik, manataqmi chay kamachikuyninkunaqa llumpay sasachu (Rom. 14:8; 1 Juan 5:3). Jesucristopa sirviententaqmi rikurirunchik. Ñawpaq tiempopi mayordomo kaqkunata hinam ñoqanchiktapas imapas rurayniyoq kanapaq saqewanchik, ichaqa manayá munasqanchikta ruranapaqchu. Imam kamachiwasqanchikman hinam tukuyta rurananchik. Congregacionpi ima rurayniyoqña kaspapas, llapanchikmi Diospawan Jesucristopa sirvientenkuna kanchik.

9. ¿Imaynatam Jesusqa huk kaqnin willakusqanpi qawachiwarqanchik patronkuna sirvientenwan imayna kasqankuta?

9 Jesusmi huk kaqnin willakusqanpi qawachiwanchik patronkuna sirvientenwan imayna kasqankuta. Qatiqninkunamanmi willarqa huk sirviente llumpay llamkasqanmanta  chayaramuptin patronnin ima nisqanmanta. Patronqa manamá sirviententaqa nirqachu: “Mesapi tiyaykuspa mikukuy”, nispaqa. Aswanqa kaynatam nirqa: “Cenayta preparapamuway, servimuwaptiki mikuruptiy tomaruptiyñam qampas mikunki hinaspa tomanki”, nispan. Hinaspanmi chay willakusqanmanta Jesusqa kaynata yachachirqa: “Qamkunapas tukuy kamachisusqaykichikta ruraruspayá niychik: ‘Mana imapaq valeqmi kanchik, deberllanchiktam rurarunchik’”, nispa (Luc. 17:7-10).

10. ¿Imanasqataq nichwan servinapaq kallpanchakusqanchikta Dios chaninchasqanta?

10 Jehová Diosqa chaninchanmi servinanchikpaq kallpanchakusqanchiktaqa. Bibliam niwanchik: “Diosqa justom. Payqa llamkasqaykichiktaqa manam qonqanqachu, manataqmi qonqanqachu pay kuyasqaykichiktapas”, nispa (Heb. 6:10). Jehová Diosqa manamá haykapipas mana ruray atisqanchiktaqa mañawanchikchu. Lliw mañawasqanchikqa kikinchikpa allinninchikpaqmi. Imayna kaptinpas, Jesusqa willakusqanpim yachachiwanchik sirvienteqa munasqanta mana puntapi churasqanta. Amataq qonqasunchu, Jehová Diosman qokuruspaqa sonqomantam nirqanchik paypa munayninta puntapi churananchikmanta.

¿IMATAM DIOSQA MUNAN LLAPALLANCHIKMANTA?

11, 12. ¿Imayna kasqanchiktam qawachinanchik mayordomo kaspaqa, hinaspa imakunatam qepanchananchik?

11 Iskay kaq: mayordomo kaspaqa llapanchikmi hina kaqllata kasukunchik. Congregacionpi wakin llamkaykunaqa wakin iñiqmasinchikkunallapaqmi, yaqa llapallan ruraykunam ichaqa congregacionpi lliw iñiqkunapaq. Piensariy, Jesuspa qatiqnin hinaspa Jehová Diospa testigon kasqanchikraykum llapallanchik kuyanakunanchik. Jesusmi nirqa kuyanakusqanchikpi cheqap cristianokuna kasqanchikta runakuna qawanankuta (Juan 13:35). Kuyanchiktaqmi mana iñiqmasinchik kaqkunatapas. Chayna kuyakuytaqa llapallanchikmi atichwan qawachiyta.

12 Jehová Diosqa munantaqmi allin kawsakunanchikta. Llapanchikmi munanchik Bibliapa cheqnisqan mana allin ruraykunata qepanchayta. Pablom nirqa: “Diospa munaychakusqanmanqa manam yaykunqachu huchapakuypi puriqkunapas, taytacha-mamacha adoraqkunapas, casado kachkaspa hukwan kakuqkunapas nitaq qarimasinwan kaqkunapas nitaq suwakunapas, qollqella kuyaqkunapas, sinkakuqkunapas, cuento qepikunapas nitaq engañakuqkunapas”, nispa (1 Cor. 6:9, 10). Llapanchikmá reqsikunanchik Diospa munasqanman hina kawsanapaq kallpanchakunanchikmanta. Chayna kallpanchakusqanchikqa kikinchikpa allinnillanchikpaqmi kanqa. Yanapawasunmi mana ancha onqonapaq, hukkunawan allinta apanakunapaq hinaspa Diospa chaskisqan kanapaqpas (leey Isaias 48:17, 18).

13, 14. ¿Ima rurayniyoqmi llapallanchik kanchik, hinaspa imaynatam chayta qawananchik?

13 Chaymantapas, mayordomokuna hinam ñoqanchikpas huk rurayniyoq kanchik. Jehová Diosqa ancha chaninchanapaq cheqap yachachikuytam qowarqanchik. Payqa runamasinchikman chay yachachikuyta willananchiktam munan (Mat. 28:19, 20). Pablom nirqa: “Ñoqaykutaqa Cristopa yanapaqninta hinallayá qawawachunku. Ñoqaykuqa kaniku mayordomo hina Diospa kunankama pakasqan yachachiqllam”, nispa (1 Cor. 4:1). Pablopa nisqanman hina mayordomokuna kaspaqa, ‘Diospa kunankama pakasqan’ kaqkunatam otaq Bibliapa cheqap yachachikuyninkunatam waqaychasun, hinaspapas Patronninchik Jesucristopa kamachisqanman hinam hukkunamanpas yachachisun (1 Cor. 9:16).

14 Diospa cheqap yachachikuyninkunata hukkunaman yachachispaqa kuyakuyninchiktam qawachichkanchik. Ichaqa, manamá llapallanchikchu Diosmanta willakuspaqa chaynallata ruranchik, chaytaqa Jehová  Diosqa entiendenmi. Ancha allinqa sapakama lliw atisqanchikman hina ruraymi. Chaynata ruraspam qawachinchik Dios kuyasqanchiktawan runamasinchik kuyasqanchiktapas.

Tukuy sonqowan rurasun Diospa kamachiwasqanchikkunata

DIOSMAN SONQO KAYQA ANCHA ALLINMI

15-17. a) ¿Imanasqataq ancha allin sirviente patronninman sonqo kayninqa? b) ¿Imaynatam Jesus qawachirqa mana Diosman sonqo kayqa mana allinpi tukusqanmanta?

15 Kimsa kaq: Diosman sonqo kaspam kasukunanchik. Huk mayordomoqa sumaq kayniyoqkuna chaynataq imakuna ruray atiqpas kanmanmi, ichaqa manamá chaykunaqa imapaqpas valenmanchu patronninman mana sonqo kaptinqa otaq kamachisqankunata mana ruraptinqa. Patronninman sonqo kayninqa ancha allinmi paypa munayninta allinta rurananpaq. Yuyarisun Pablopa kayna nisqanta: “Allin mayordomoqa patronpa kamachisqantam cumplin” (1 Cor. 4:2).

16 Amayá iskayrayasunchu: Diosman sonqo kaspaqa yanapakuynintam chaskisun. Mana chayna kaspam ichaqa mana allinkunapi tarikusun. Chayna kasqanmantam Jesus qawachirqa wayqapi qollqemanta rikchanachisqanpi. Chay rikchanachisqanpim patronqa kusikurqa payman sonqo hinaspa qollqenta mirachiq sirvientekunamanta. Mana chayna kaq sirvientetam ichaqa nirqa: “Mana allin sirviente”, nispan. Nirqataqmi ‘mana valeq sirviente’ kasqanmanta. Patronqa qosqan qollqeta qechuspanmi kamachirqa chay sirvienteta wischumunankupaq (leey Mateo 25:14-18, 23, 26, 28-30).

17 Jesusqa huk rikchanachisqanpipas qawachirqam mana Diosman sonqo kayqa mana allinpi tukusqanmanta, nirqam: “Apu runapam karqa mayordomon. Paypa contranpi mana allin rimaykunata uyarispanmi qayaykuspa tapurqa: ‘Mana allin rimaykunatam qanmanta uyarini. Cuentata qoway llamkasqaykimanta, manañam mayordomoyqa  kawaqñachu’”, nispan (Luc. 16:1, 2). Sirviente chayna kasqanraykum patronninqa wischururqa. ¡Kayqa llapanchiktam yachachiwanchik haykapipas Jehová Diosman sonqo kanapaq!

¿ALLINCHU KANMAN PIWANPAS TUPACHIKUY?

18. ¿Imanasqataq hukkunawanqa mana tupachikunanchikchu?

18 Sapakamam tapukuchwan: “¿Imaynatam Diospa munayninta rurachkani mayordomo kaspayqa?”, nispa. Rurasqanchikkunata hukkunapa rurasqanwan tupachispaqa hukmanyaruchwanmi. Bibliam niwanchik: “Sapakamam kikinpa vidanta qawakunan. Sichum allin kaspaqa kikillanpaqchá allin, hukpa vidanwanqa manam tupachikunmanchu”, nispa (Gal. 6:4). Rurasqanchikkunata hukkunapa rurasqanwan tupachinamantaqa, imapas ruray atisqanchikkunapim reparananchik. Chayna rurayninchikqa yanapawasunmi mana hatunchakunapaq hinaspa mana hukmanyarunapaqpas. Diospa munayninta imayna rurasqanchikmanta tapukuspaqa, reqsikunanchikmi imayna tarikusqanchikqa wakinpi cambiasqanmanta. Yaqapaschá onqosqanchikrayku, yuyaqyarusqanchikrayku otaq familianchikta atiendenanchikrayku manaña ñawpaqpi hinachu rurasunchik. Wakinpim ichaqa musyakuchwan astawan ruray atisqanchikta. Chayna kaptinqa, ¿atichwanchu Diosmanta astawan willakuyta?

19. ¿Imanasqataq mana hukmanyarunachu congregacionpi ima llamkaytapas chaylla mana haypaspaqa?

19 Manataqmi allinchu kanman congregacionpi imapas rurayniyoq kaqkunawan tupachikuyqa. Ichapas huk kaqnin iñiqmasinchik congregacionpi anciano kayta otaq asambleakunapi yachachiyta munanman. Chayta haypanapaq kallpanchakuyqa allinmá, ichaqa amayá hukmanyarusunchu chay munasqanchikta chaylla mana haypaspaqa. Ichapas piensasqanchikmantaqa astawanraq suyananchik kanqa. Moisespas 40 watam suyarqa Israel runakunata Egipto nacionmanta horqonanpaq. Chay suyasqan watakunaqa allintam yanaparqa sumaq kayniyoqkuna kananpaq, chaynapi mana kasukuq Israel runakunata allinta pusananpaq (Hech. 7:22-25, 30-34).

20. ¿Imatam Jonatanmanta yachachwan?

20 Wakinpiqa manapaschá congregacionpi imapas haypay munasqanchiktaqa haykapipas chaskisunchu. Chaynam Jonatantapas pasarqa. Payqa rey Saulpa piwi churin kasqanraykum taytanpa rantinpi rey kananpaq derechoyoq karqa. Jehová Diosmi ichaqa Davidta akllarurqa, payqa Jonatanmantaqa aswan mozollaraqmi karqa. ¿Imaynam Jonatanqa tarikurqa? Manamá hukmanyarurqachu, aswanqa wañuy patanpi tarikuspanpas Davidtam yanaparqa. Davidtam nirqa: “Qanmi huk punchaw kanki Israel runakunapa reynin, ñoqañataqmi kasaq qampa qepaykiman qatiqllaña”, nispan (1 Sam. 23:17). Jonatanqa manamá taytan Saul hinachu Davidtaqa mana allinta qawarqa. ¿Imatam kayqa yachachiwanchik? Congregacionpi pipas ñawpariptin mana allinta qawanamantaqa, kallpanchakusun kikinchikpa rurayninchikta allinta ruranapaq. Ama qonqasunchu, mosoq pachapiqa Jehová Diosmi tukuy kusikunanchikpaq kaqta qowasunchik.

21. ¿Imaynatam qawananchik Diospa mayordomon kasqanchikta?

21 Chaynaqa, Diospa mayordomon kaspaqa manamá ñakarichisqachu tarikunchik nitaq mana valeqpaq hinachu sientekunchik. Aswanqa confianzapaqmi Diosqa hapiwanchik hinaspam kay tukupay punchawkunapi paymanta willakunapaq ancha chaninniyoq llamkayta qowanchik. Chay llamkayqa manamá haykapipas kaqmantaqa rurakunqachu. Diosqa saqewanchiktaqmi atisqanchikman hina paypa munayninta ruranapaq. Hinaptinqa, Diosman sonqo mayordomoyá kasunchik hinaspapas anchatayá chaninchasun tukuy imapas unanchaq Jehová Diospa serviqnin kasqanchikta.