Yachachikuypa kasqanman rinapaq

Yachachikuyman rinapaq

Jehová Diosqa munanmi libre kananchikta

Jehová Diosqa munanmi libre kananchikta

 Jehová Diosqa munanmi libre kananchikta

‘Librawaqninchik alli-allin leypi yuyaymanay’ (SANT. 1:25).

¿IMATAM NIWAQ?

¿Ima leytaq yanapawanchik cheqaptapuni libre kanapaq, ikunataq yanapachikunku?

¿Imatam rurananchik cheqaptapuni libre kanapaq?

¿Imatam haypanqaku Jehová Diosta kasukuq runakunaqa?

1, 2. a) ¿Imanasqam runakunaqa manaña librechu kawsanku? b) ¿Imatam suyanchik Diospa serviqninkunaqa?

KAY kawsasqanchik punchawkunapiqa, astawanmi mirachkan suwakuykuna hinaspa tukuy mana allin ruraykunapas (2 Tim. 3:1-5). Chaykuna mana kananpaqmi, autoridadkunaqa leykunata horqonku hinaspapas kallpanchakunkum policiakuna achka kananpaq. Chaymantapas, achka nacionkunapim runakunaqa wasinkupi alarmakunata churanku, suma-sumaqta trankakunku hinaspa wasinkupa lliw muyuriqninta corrientewan qenchakunku. Achkataqmi wasinkumanta tutapiqa mana lloqsinkuchu, nitaqmi munankuchu punchawña kaptinpas hawapi churi-wawanku pukllanankutaqa. Chaymi runakunaqa manaña hawka otaq libre kawsakuytaqa atinkuchu, manataqmi suyankuchu chaykuna tukunantapas.

2 Hinaptinqa, ¿imatam rurachwan hawka otaq libre kawsakunapaq? Eden huertapim Satanasqa nirqa Diosmanta karunchakuspa runakuna libre kawsananchikmanta. Ichaqa qawasqanchikman hinaqa, manamá chaynachu karqa. Runakunaqa Diosmanta astawan karunchakuspankum astawan ñakarinku. Chayna kasqanmi ñoqanchiktapas sasachawanchik. Ichaqa suyachkanchikmi, tukuy chay sasachakuykuna tukunanta hinaspa Bibliapa nisqanman hina ‘churinkunata Dios hatunchaspan librawananchikta’ (Rom. 8:21). Chaypaqqa ñamá Diosqa yanapawachkanchikña. ¿Imaynatam chayta rurachkan?

3. ¿Ima leytam Jehová Diosqa cristianokunaman qowarqanchik, hinaspa ima tapukuykunatam kutichisun?

3 Jehová Diosqa, Santiagopa nisqanman hinam librasqa kanapaq qowarqanchik ‘librawaqninchik alli-allin leyta’ (leey Santiago 1:25). Leykunamanta otaq  kamachikuykunamanta runakuna uyarispankuqa, piensankum imamantapas harkasqa kanankuta. Chaynaqa, ¿imataq kanman ‘librawaqninchik alli-allin leyqa’? ¿Imaynatam kusisqata kawsachiwanchik?

LIBRAWAQNINCHIK LEYMANTA

4. ¿Imataq ‘librawaqninchik alli-allin leyqa’, hinaspa pikunapaqtaq allinpuni?

4 ‘Librawaqninchik alli-allin leyqa’ manamá Moisesman qosqan leychu. Kay leyqa otaq kamachikuykunaqa ‘huchasapa kasqanchikta qawachiwananchikpaqmi’ karqa, chaytaqa ñamá Cristoqa cumplirqaña (Mat. 5:17; Gal. 3:19). ‘Librawaqninchik alli-allin leymanta’ Santiago rimaspanqa, rimachkanmi ‘Jesucristopa kamachikuyninkunamanta’ (Gal. 6:2). Hinaptinqa, kay ‘alli-allin leyqa’ Jehová Diospa lliw mañawasqanchikkunam. Kayqa hanaq pachaman riqkunapaqwan ‘sapaq ovejakunapa’ allinninkupaqmi (Juan 10:16).

5. ¿Imanasqataq mana sasachu ‘alli-allin leyta’ kasukuyqa?

5 Achka nacionkunapa kamachikuyninkunaqa, sasa kasukunapaqmi kanku. Ichaqa ‘librawaqninchik alli-allin leyqa’ manam chaynachu (1 Juan 5:3). Jesusmi nirqa: “Yugoyqa facil apayllam, qepiypas sampallataqmi”, nispa (Mat. 11:29, 30). Chaymantapas ‘alli-allin leyqa’ manam tukuy imapaq achka kamachikuykunatachu qowanchik, aswanmi rurasqa kachkan kuyakuywan kasukunapaq hinaspapas yuyayninchikpiwan sonqonchikpim qellqasqa kachkan (leey Hebreos 8:6, 10).

IMAYNATAM LIBRAWANCHIK ‘ALLI-ALLIN LEYQA’

6, 7. ¿Imatam nichwan Jehová Diospa kamachikuyninkunamanta? ¿Imaynanpim ‘alli-allin leyqa’ libreta kawsachiwanchik?

6 Jehová Diosqa kamachikuykunatam ñoqanchikpi churarqa allin kananchikpaq. Rimasun mikunapaq yarqawasqanchikmanta. Manamá pipas piñakunchikchu mikunapaq wiksanchik kamachiwaptinchikqa, aswanmi allinninchikpaq hapinchik. Chaynallataqmi Cristopa ‘alli-allin leynintakama’ yachasqanchik Diospa kamachikuyninkunapas allinninchikpaq rurasqa kachkan.

7 ‘Librawaqninchik alli-allin leyqa’ saqewanchiktaqmi mana pitapas sasachaspalla munasqanchikkunata ruranapaq. Hinaptinqa, libre kawsakunapaqqa otaq munasqanchikta ruranapaqqa, chay munasqanchikkunam Diospa kamachikuyninman hina kanan. Huk rimaypiqa, Diospa kuyasqankunatam kuyananchik, cheqnisqantañataqmi cheqninanchik. Chaytam yachachiwanchik librawaqninchik alli-allin leyqa (Amos 5:15).

8, 9. ¿Imaynatam yanapawanchik alli-allin leyqa? Jay runamanta rimarimuy.

8 Pantaq runakuna kasqanchikraykum hinalla sasachakusun mana allin munasqanchikkunata controlanapaq. Ichaqa alli-allin leyta kasukuspaqa, librem kawsasunchik. Chayna kasqanmantam qawachin Jay sutiyoq runa. Paymi cigarro pitaq kaspan Biblia estudiayta qallaykurqa. Estudiaspanmi musyakururqa cigarro pitayta Dios cheqnisqanta. Hinaptinqa, ¿hinallachu cigarro pitayman qokururqa icha Diostachu kasukurqa? Payqa tantearurqam Diosta servinanpaq hinaspa chay mana allin munayninta qepanchananpaqpas. ¿Imaynam tarikurqa qepancharusqanmanta? Paymi nirqa: “Ancha kusikunapaqmi karqa, qalaypaq libreñam kusisqa tarikurqani”, nispa.

9 Jay runaqa musyakururqam kay tiempopi runakunapa libre kasqankuman hina kawsayqa otaq ‘aychaman hinalla piensayqa’ ñakarichiwasqanchikmanta. Ichaqa Jehová Diospa munasqanman hina kawsayqa otaq ‘chuya espirituman hina piensayqa’, libre kawsakuytam qowanchik otaq  ‘hawkallatam kawsachiwanchik’ (Rom. 8:5, 6). ¿Maymantataq Jay runaqa kallpata horqorqa cigarro pitaymanta librakunanpaq? Chaypaqqa Jehová Diosmi yanaparqa. Paymi nin: “Sapa kutim Bibliata estudiaq kani, Diostapas mañakurqanim espiritunta qowananpaq, chaskirqanitaqmi iñiqmasinchikkunapa yanapakuynintapas”, nispa. Kay yanapakuykunaqa ñoqanchiktapas libre kanapaqmi yanapawachwan. Qatiqninpi kaymanta qawasun.

DIOSPA PALABRANTA ESTUDIASUN

10. ¿Ima ninantaq librawaqninchik leyta ‘allinta qawayqa’?

10 Santiago 1:25 nin: “Librawaqninchik alli-allin leypi yuyaymanaqqa [“allinta qawaqqa”, NM] hinaspa [. . .] kasukuqqa mayna kusisqam kanqa”, nispa. Griego rimaypi ‘allinta qawayqa’ tikrakunmantaqmi kumuykuspa qawaymanta, chaypaqqa kallpanchakunam. Chaynallataqmi sonqonchikpiwan yuyayninchikpi librawaqninchik ley takyananpaqqa, kallpanchakunanchikmi sapa kuti Bibliata estudianapaq hinaspa leesqanchikpi yuyaymananapaqpas (1 Tim. 4:15).

11, 12. a) ¿Imaynatam Jesusqa qawachirqa cheqap kaqmanta yachaspa kawsayninchikpi qawachinamanta? b) Kay paginapi dibujota qawasqanchikman hina, ¿imakunatam mozo-sipaskunaqa qepanchananku?

11 Chaymantapas kallpanchakunanchikmi Bibliapa nisqanta kasukunapaq, chaynapi imayna kawsasqanchikpi qawakunanpaq. Yaqa chaynatam Jesuspas qatiqninkunaman nirqa: “Sichu qamkuna seguinkichik nisqaykunata hinaspaqa cheqap discipuloykunam kankichik. Yachankichikmi cheqap  kaqmanta, chay cheqapmi libreyachisunkichik”, nispa (Juan 8:31, 32). Cheqap kaqmanta allinta yachanapaqqa, chay yachasqanchikman hinam kawsananchik. Chaynata ruraspallam nichwan ‘Diospa Palabranqa’ yanapawasqanchikmanta hinaspa Diospa imayna kasqanta qatipakunapaq yanapawasqanchikmantapas (1 Tes. 2:13).

12 Allinmi kanman kaynata tapukuyninchik: “¿Allintachu yachani cheqap kaqmanta? ¿Chayman hinachu kawsani? ¿Icha munapayachkaniraqchu runakunapa munasqallankuman hina kawsasqankuta?”, nispa. Testigo tayta-mamanwan uywasqa huk iñiqmasinchikmi, sipasllaraq kasqanmanta yuyarispan nin: “Testigo tayta-mamawan uywasqa kaspaqa, Jehová Diospim iñinki. Ichaqa manamá ñoqaqa allintapunichu Diostaqa reqsirqani. Manam cheqnirqanichu Diospa cheqnisqantaqa, manataqmi piensarqanichu ñoqamanta nanachikusqanta nitaq sasachakuyniykunapi Dios reparasqantapas. Ñoqaqa piensarqanim tukuy ima yachasqayta, ichaqa manamá chaynachu karqa”, nispa. Tiempopa risqanman hinam payqa musyakururqa pantasqanmanta, hinaspam cambiaspan precursora karqa.

CHUYA ESPIRITUQA YANAPAWANCHIKMI LIBRE KANAPAQ

13. ¿Imaynatam chuya espirituqa yanapawanchik libre kanapaq?

13 Bibliapi 2 Corintios 3:17 versiculopim nin: ‘Maypi espiritupa kasqanpiqa runakunapas librem’, nispa. ¿Imaynatam chuya espirituqa yanapawanchik libre kanapaq? Chuya espirituqa yanapawanchikmi ‘kuyakuq, kusisqalla, hawkalla, pacienciakuq, sumaq sonqolla, kuyapayakuq, cumpliq, llampu sonqolla hinaspa imapipas controlakuq’ kanapaq (Gal. 5:22, 23). Runakunaqa manamá libre kaytaqa atinmankuchu mana chayna sumaq kayniyoq kaspankuqa, astawanraqmi kuyakuyninku mana kaptinqa. Kayqa sutillamá kunan tiempopiqa qawakun. Chaymantapas Pabloqa nirqataqmi: “Manam ima kamachikuypas kay allin ruraykunapa contranpiqa kanchu”, nispa (Gal. 5:18). ¿Ima ninantaq kayqa? Arí, manamá ima kamachikuypas runakunapi Diospa sumaq kayninkuna wiñanantaqa harkayta atinmanchu. Jehová Diosqa munanmi kunan hinaspa wiña-wiñaypaqpas chayna sumaq kayniyoq kanapaq.

14. ¿Imaynatam kay Pachapi mana allin munaykunaqa pitapas sirvientenpiña rikurirachinman?

14 Kay Pachapi runakunapa imayna kawsasqankuman hina kawsaqkunaqa, yaqapaschá piensanmanku aychapa munasqanta ruraspanku libre kasqankuta (leey 2 Pedro 2:18, 19). Ichaqa manamá chaynachu, paykunaqa mana allin munaykunapa sirvientenmi kanku. Chaymi achka kamachikuykunata horqonku chaynapi runakunapa mana allin rurayninkunata controlanankupaq. Pablopa nisqanman hinam, “leyqa qosqa karqa manam allin runakunapaqchu aswanqa mana kasukuqkunapaqwan rebeldekunapaqmi” (1 Tim. 1:9, 10). Chaymantapas ‘aychapa munasqallanta rurasqankuraykum’, ñakarichikuq huchapa sirvienten kanku (Efe. 2:1-3). Imaynam chuspikunapas abejapa miskinpi pawakachachkaspanku qonqaymanta laqakurunku, chaynam runakunapas huchapa sirvientenña rikurirunku mana allin munayninkunata maskaspanku (Sant. 1:14, 15).

IÑIQMASINCHIKKUNAWANQA LIBREM TARIKUNCHIK

15, 16. ¿Imanasqam ancha allin Diospa llaqtanpi tarikuyqa, hinaspa imamantam libre tarikunchik?

15 Diospa llaqtanpi iñiqmasinchikkunawan kuska tarikunapaqqa, manam ñoqanchikchu chayna kananpaqqa tantearurqanchik. Aswanmi Jehová Dios pusamuwarqanchik (Juan 6:44). ¿Imanasqam chayta  rurarqa? ¿Yaqachu pusamuwarqanchik allin ruraq runakuna kasqanchikrayku? Manamá. Hinaptinqa, ¿imatam ñoqanchikpi qawarqa? Qawarqachá allin sonqoyoq kasqanchikta hinaspa tukuy kamachiwasqanchikta kasukunapaq kasqanchiktapas. Diospa llaqtanpi tarikuptinchikñataqmi, Diosqa Bibliawan yanapawarqanchik pantay yachachikuykunamanta librakunapaq hinaspa sumaq kayniyoqkuna kanapaqpas (leey Efesios 4:22-24). Chayna yanapawasqanchikraykum kunanqa pi runakunamantapas libre tarikunchik.

16 Tukuy sonqowan Jehová Diosta kuyaqkunawan kuska tarikuspaqa, manamá manchakunchikchu. Manataqmi huñunakunanchik Salonpiqa imanchiktapas qawakachachkanchikchu chinkarunanmantaqa. Aswanmi hawka hinaspa libre tarikunchik. Ichaqa ¡manamá chaynachu kanchik huk lawpi tarikuspanchikqa! Arí, Diospa llaqtanpi kunan libre tarikusqanchikqa, astawanraqmi qawakunqa mosoq pachapiqa.

‘CHURINKUNATA DIOS HATUNCHASPAN LIBRAPTIN’

17. ¿Imanasqam runakunapa allinninpaq kanqa ‘churinkunata Dios reqsichiptinqa’?

17 Hamuq tiempopi serviqninkunata Jehová Dios librananmanta rimaspanmi, Pablo nirqa: “Tukuy ima unanchasqankunapas sinchillataña munaspankum suyachkanku churinkunata Dios reqsichinanta”, nispa. Nirqataqmi: “Unanchasqakunaqa [. . .] suyachkanmi Dios librananta. Churinkunata Dios hatunchaspan libraptinmi tukuy imapas paykunawan kuska librakunqa”, nispa (Rom. 8:19-21). Kaypi ‘unanchasqa’ kaqkunamanta rimaspanqa, rimachkanmi kay Pachapi wiñaypaq kawsanankupaq suyakuyniyoq kaqkunamanta. Paykunapa allinninkupaqmi kanqa, hanaq pachapi kawsanankupaq suyakuyniyoq churinkunata Dios “reqsichiptin”. Chayqa qallaykunqam kay Pachapi mana allinkunata Jesucristowan kuska chinkachiptinku hinaspa “achkallaña runakunata” mosoq Pachapi wiñay kawsanankupaq yanapaptinku (Apo. 7:9, 14).

18. ¿Imaynatam kasukuq runakunaqa librasqa kanqaku, hinaspa imatam haypanqaku?

18 Hinaptinmi kasukuq runakunaqa aswan libre kanqaku, manañam Satanaswan demonionkunaqa ima ruraytapas atinqakuñachu (Apo. 20:1-3). ¡Mayna sumaqchá kanqa! Chaymantañataqmi Jesucristowan kuska kamachiq 144.000 reykunawan sacerdotekunaqa, Jesuspa wañukusqanpa valorninta servichikuspanku pisi-pisimanta huchamantawan wañuymanta runakunata libranqaku (Apo. 5:9, 10). Hinaptinmi, iñiyninku pruebaman churasqa karuptin runakunaqa Jehová Diospa nisqanman hina qalaypaq libreña kanqaku. Piensariy, manañam mana allin munaykunawanqa sasachakusunñachu. Llapallanchikmi mana pantaqña kasunchik hinaspam imayna kasqanchikpipas allintapuni Jehová Diosman rikchakusun.

19. ¿Imatam rurananchik librasqa kayta munaspaqa?

19 ¿Qampas munankichu tukuy imamantapas librasqa kayta? Chayna kaptinqa, kallpanchakuyá yuyaynikipi hinaspa sonqoykipi ‘librawaqninchik alli-allin ley’ takyananpaq. Chaypaqqa sapa kuti Bibliata allinta estudiay hinaspa chayman hina kawsay. Jehová Diosta mañakuy chuya espiritunta qosunaykipaq. Amayá Satanaswanqa Eva hinaqa engañachikuychu. Evaqa piensarqam Diospa kamachikuyninkuna sasa kasukuna kasqanta. Diabloqa sacrellañam, chayna kaptinpas toqllankunata yachasqanchikraykum atipayta atichwan (2 Cor. 2:11). Chaymantam qatiqnin yachachikuypi qawasunchik.

[Kay yachachikuypa tapukuyninkuna]

[9 kaq paginapi dibujokuna]

¿Munapayachkaniraqchu runakunapa munasqallankuman hina kawsasqankuta?

[9 kaq paginapi dibujokuna]

¿Diospa munasqanman hinachu kawsani?