Yachachikuypa kasqanman rinapaq

Yachachikuyman rinapaq

Runakunata yanapaq kamachiqkunawan sacerdotekuna

Runakunata yanapaq kamachiqkunawan sacerdotekuna

“Qamkunam ichaqa kankichik akllasqa runakuna, reyta servinaykichikpaq [otaq kamachiq] sacerdotekuna, Diosllapaqña kawsaq nacion hinaspa Diospa runankuna” (1 PED. 2:9).

1. ¿Imanasqam ‘Señorpa Santa Cenanqa’ sutichakuntaq Jesucristopa Wañukusqanta Yuyarinapaq Punchaw niqwan?

JESUCRISTOWAN 12 apostolninkunam, 33 watapa 14 nisan killapi pascua fiestata rurarqaku. Ichaqa Judas Iscariote lloqsiruptinmi, chay pascua fiestapa rantinpi huk fiestata ruranankupaq kamachirqa, reqsisqam kanan karqa ‘Señorpa Santa Cenanwan’ (1 Cor. 11:20). Chay tutapim Jesusqa iskay kutikama nirqa: “Kaynatam rurankichik qamkunapas yuyariwanaykichikpaq”, nispa. Chaymi chay fiestaqa sutichakuntaq, Jesucristopa Wañukusqanta Yuyarinapaq Punchaw niqwan (1 Cor. 11:24, 25). Jesus kamachisqanraykum enteron Pachapi Jehová Diospa testigonkunaqa sapa wata chayta ruranku. Kay 2012 watapiqa 14 nisan killaqa, tupachkanmi 5 punchaw abril killapi Inti seqaykuqta.

2. ¿Imatam Jesusqa tantamantawan vinomanta nirqa?

2 Lucasmi chay tutapi Jesuspa ima rurasqanmanta pisillapi kaynata nin: “Tantatapas hapiykuspanmi graciasta qorqa hinaspam parteykarispan nirqa: Kaymi cuerpoy qamkunarayku entregasqa. Chaynatam qamkunapas rurankichik ñoqata yuyariwaspa nispa. Cenaruspankuñataqmi vinoyoq vasota hapiykuspan nirqa: Kay vinoqa yawarniywan rurasqa mosoq contratom. Yawarniyqa qamkunarayku chaqchusqam”, nispa (Luc. 22:19, 20). ¿Imaynatam kay nisqanta apostolninkunaqa entienderqaku?

3. ¿Imatam apostolkunaqa entienderqaku tantamantawan vinomanta Jesus rimaptin?

3 Apostolkunaqa judiokuna kasqankuraykum, rikurqaku Jerusalenpa templonpi sacerdotekuna animalkunata wañuchispanku ofrenda qosqankuta. Chaytaqa ruraqku Jehová Diospa chaskisqan kanankupaqwan huchanku pampachasqa kananpaqmi (Lev. 1:4; 22:17-29). Hinaptinqa cuerpon qonanmanta hinaspa yawarnin chaqchunanmanta Jesuspa nisqantaqa, yaqachá apostolninkunaqa entienderqaku mana huchayoq vidanta paykunarayku  qonanmanta. Chayna ofrenda qosqanqa aswan allinmi karqa animalkunamantaqa.

4. ¿Imatam Jesusqa niyta munarqa “kay vinoqa yawarniywan rurasqa mosoq contratom” nisqanwan?

4 Jesusqa nirqataqmi: “Kay vinoqa yawarniywan rurasqa mosoq contratom”, nispa. ¿Ima ninantaq chayqa? Apostolkunaqa yacharqakum Jeremias 31:31-33 (leey) nisqanpi mosoq contratomanta willakuytaqa. Chayna nisqanwanmi Jesusqa qawachichkarqa chay mosoq contratota chay tutapi qallarichisqanta. Chay mosoq contratom Moisespa chaskisqan kamachikuykunapa rantinpiña kanman karqa. ¿Imapitaq tuparqa Moisespa chaskisqan kamachikuykuna mosoq contrato rurakusqanwan?

5. Diospa qosqan kamachikuykunata kasukuspanku, ¿ima kaytam atinmanku karqa?

5 Mosoq contratoqa tuparqamá Moisespa chaskisqan kamachikuykunawanqa. Jehová Diosmi Israel runakunata nirqa: “Nisqayta kasuspaykichikqa chaynataq contratoytapas cumplispaykichikqa qamkunamá kankichik wakin runakunamanta akllakusqay runaykuna. Kay pachaqa ñoqapam. Llapallaykichikmi ñoqapaq kankichik reyta serviq [otaq kamachiq] sacerdotekuna, ñoqallata serviwanaykichikpaq sapaqchasqa nacion” (Exo. 19:5, 6). ¿Imam kananku karqa israelitakunaqa?

KAMACHIQ SACERDOTEKUNA KANANKUMANTA

6. ¿Ima cumplikunanpaqmi allinta yanapakurqa Diospa kamachikuykuna qosqan?

6 Israelitakunaqa entienderqakum contrato ima kasqantaqa. Ñawpaqtaraqmi Jehová Diosqa Noeywan hinaspa Abrahanwan contratokunata rurarqa (Gen. 6:18; 9:8-17; 15:18; 17:1-9). Diosmi Abrahanwan contratota ruraspan nirqa: ‘Kay pachapi lliw runakunam miraynikirayku bendecisqa kanqa’, nispa (Gen. 22:18). Kay nisqan cumplikunanpaqmi allinta yanapakurqa Israelman Diospa kamachikuykuna qosqan. Kasukuptinkuqa, Israel nacionmi ‘wakin runakunamanta akllakusqan runankuna’ kananku karqa, chaynapi ‘reyta serviq [otaq kamachiq] sacerdotekuna’ kanankupaq.

7. ¿Imamantam rimachkan ‘reyta serviq [otaq kamachiq] sacerdotekuna’ nisqanqa?

7 Israelitakunaqa uyarirqakum kamachiq reykunamanta hinaspa sacerdotekunamantapas, ichaqa Melquisedec runallam ñawpaqpiqa kamachiq kaspanpas sacerdote karqa (Gen. 14:18). Ichaqa Jehová Diosqa nichkarqam Israel nacionmanta ‘reyta serviq [otaq kamachiq] sacerdotekuna’ kay atinankumanta. Huk rimaypiqa kamachiq kaspankupas sacerdotekunam kananku karqa (1 Ped. 2:9).

8. ¿Ima rurayniyoqmi sacerdotekunaqa karqaku?

8 Kamachiqkunaqa munaychakuqkunam kanku. Ichaqa, ¿ima rurayniyoqmi sacerdotekunaqa? Hebreos 5:1 nin: “Runakunamanta akllasqa llapallan sacerdotekunapa jefenkunaqa runakunapa rantinpi Diosman asuykunankupaq churasqam kachkanku, chayraykum paykunaqa runakunapa huchanmanta Diosman ofrendakunata presentanku hinaspam animalkunatapas wañuchispa paypaq kañanku”, nispa. Arí, Diospa churasqan sacerdotekunaqa ofrendakunata qospanmi huchallikuqkunapa rantinpi Diosta mañakuq pampachaykunanpaq. Chaymantapas Jehová Diospa kamachisqankunata yachachiqmi karqaku (Lev. 10:8-11; Mal. 2:7). Diosta servispankum sacerdotekunaqa kallpanchakurqaku, runakuna Dioswan allin kanankupaq.

9. a) ¿Imaynanpim Israel nacionmanta kamachiq sacerdotekuna lloqsinan karqa? b) ¿Imanasqam Jehová Diosqa Israel nacionpi sacerdotekunata churarurqa? c) ¿Imanasqam Israel nacionqa mana atirqakuchu kamachiq sacerdotekuna kayta?

9 Hinaptinqa, Israel nacionmantam kamachiq sacerdotekuna lloqsinan karqa, chaynapi wakin runakunapas bendecisqa kanankupaq. Chaypaqqa Jehová Diospa  nisqantam kasukunanku karqa chaynataq contratontapas cumplinanku karqa. Ichaqa, ¿atirqakuchu allintapuni kasukuyta? Wakinpiqa atirqakum. Ichaqa manam atirqakuchu mana pantaspa kasukuytaqa (Rom. 3:19, 20). Chayraykum Jehová Diosqa Israel nacionpi sacerdotekunata churarurqa, chaynapi kañasqa ofrendakunata qoptinku israelitakunapa huchanku pampachasqa kananpaq (Lev. 4:1–6:7). Pampachasqataqmi karqa sacerdotekunapa huchankupas (Heb. 5:1-3; 8:3). Chay ofrendakunataqa Jehová Diosqa chaskirqam, ichaqa manamá hayparqachu lliw huchankumanta pampachasqa kanankupaqqa. Chay sacerdotekunaqa manataqmi atirqakuchu israelitakuna Jehová Dioswan amistadninku alli-allinpuni kanantaqa. Pablopas nirqam: “Torokunapa chaynataq chivatokunapa yawarninqa huchakuna horqoytaqa manam atinmanchu”, nispa (Heb. 10:1-4). Arí, kamachikuykunata mana kasukuyta atisqankuraykum, israelitakunaqa ñakasqa hina tarikurqaku (Gal. 3:10). Chayraykum sasa karqa lliw runakunata yanapanankupaq kamachiq sacerdotekuna kaytaqa.

10. ¿Imapaqmi karqa Moisesman qosqan kamachikuykunaqa?

10 Hinaptinqa, ¿yanqachu karqa Israel nacionmanta kamachiq sacerdotekuna lloqsinanpaq Diospa prometesqanqa? Manamá. Tukuy sonqonkuwan kasukunankupaq kallpanchakuspankuqa atinmankum karqa, ichaqa manamá Moisespa chaskisqan kamachikuykunata kasukuspachu. ¿Imanasqa? (Leey Galatas 3:19-25.) Kamachikuykunata tukuy sonqowan kasukuqkunaqa, waqaychasqam karqaku pantay yupaychaymanta. Israelitakunatam huchallikuq kasqankumantawan sacerdotepa qosqan ofrendakunamanta aswan allin ofrenda qonankumanta musyachirqa. Kamachikuykunaqa pusarqataqmi Cristoman otaq Mesiasman, kay rimaykunaqa “Sapaqchasqa” ninanmi. Cristo chayaramuptinmi ichaqa, Jeremiaspa willakusqanman hina Mosoq contratopiña kananku karqa. Cristota lliw chaskiqkunaqa mosoq contratopiñam kananku karqa hinaspam kamachiq sacerdotekuna kananku karqa. Kaymanta qatiqninpi qawasun.

MOSOQ CONTRATOM KAMACHIQ SACERDOTEKUNATA RIKURICHIN

11. ¿Imam pasarqa Jesusta hukkunapas kamachiq sacerdotekuna kanankupaq?

11 Nazaretmanta Jesusmi 29 kaq watapi Mesias rikurirurqa. 30 watanman chayaruspanñataqmi bautizakururqa Jehová Diospa munayninta rurananpaq. Jehová Diosmi nirqa: “Paymi kuyasqay Churiy”, nispa. Hinaspanmi chuya espiritunwan huntaykurqa (Mat. 3:13-17; Hech. 10:38). Chayraykum Jesusqa Sacerdotekunapa Jefen kaspanpas lliw runakunapaq Kamachiqnin kanan karqa (Heb. 1:8, 9; 5:5, 6). Payraykutaqmi hukkunapaq kamachiq sacerdote kayta atinmanku karqa.

12. ¿Imanasqam ancha allin karqa Jesuspa wañukuyninqa?

12 Sacerdotekunapa Jefen kaspanqa, ¿ima ofrendatam Jesusqa qonman karqa iñiqkunapa huchan qalaypaq pampachasqa kananpaq? Payqa mana huchayoq cuerpontam ofrendata hina qonan karqa, chaytam kikin nirqa wañukunan punchawta yuyarinapaq kamachiptin (leey Hebreos 9:11, 12). Jesusqa 29 watapi bautizasqa kasqanmantapacham achka sasachakuykunapi tarikurqa, chaykunawanmi qespichisqa karqa wañukunankama (Heb. 4:15; 5:7-10). Kawsariruspan hanaq pachaman rispanmi, Jehová Diospa qayllanman presentarqa ñoqanchikrayku wañukusqanta (Heb. 9:24). Chaymantapacham Jesusqa wañukusqanpi lliw iñiqkunapaq mañakuyta atirqa chaynapi wiñay kawsayta suyaspanku servinankupaq (Heb. 7:25). Chayna Jesuspa wañukusqanqa ancha allinmi karqa mosoq contrato rurakunanpaq (Heb. 8:6; 9:15).

13. ¿Imakunatam suyarqaku mosoq contratoman yaykuqkunaqa?

 13 Mosoq contratoman yaykuqkunapas, chuya espirituwan sapaqchasqam kanku (2 Cor. 1:21). Chay mosoq contratopim puntataqa kachkanku Diosman sonqo judiokuna hinaspa mana judio kaqkunapas (Efe. 3:5, 6). Paykunaqa suyarqakum lliw huchanku pampachasqa kananta. Diosmi nirqa: “Mana allin rurasqankuta pampachaspaymi huchankutaqa manaña yuyarisaqchu”, nispa (Jer. 31:34). Huchanku chayna pampachasqa kasqankuwanmi, atinmankutaqmi karqa kamachiq sacerdotekuna kayta. Hanaq pachaman rinankupaq suyakuyniyoq cristianokunamanmi Pedro nirqa: “Qamkunam ichaqa kankichik akllasqa runakuna, reyta servinaykichikpaq [otaq kamachiq] sacerdotekuna, Diosllapaqña kawsaq nacion hinaspa Diospa runankuna chaynapi Diospa atiyninmanta willakunaykichikpaq. Paymi tutayaymanta qayasurqankichik admirakuypaq kanchayninpi purinaykichikpaq”, nispa (1 Ped. 2:9). Mosoq contratopi kaq cristianokunaman Pedropa kayna nisqanqa, horqosqam kachkan Israel nacionman kamachikuykunata Jehová Dios qoptin nisqanmanta (Exo. 19:5, 6).

RUNAKUNATA YANAPANANPAQ KAQ KAMACHIQKUNAWAN SACERDOTEKUNA

14. ¿Maypitaq kamachiq sacerdotekuna Diosta servinku?

14 ¿Maypitaq Diosta servinanku karqa mosoq contratoman yaykuqkunaqa? Paykunaqa sacerdotekuna hinam kay Pachapi servinanku karqa. Diospa rantinpi hinataqmi runakunaman willakunanku karqa hinaspa horallanpitaq Diosmanta yachachinanku karqa (Mat. 24:45; 1 Ped. 2:4, 5). Wañukuspa kawsariramuspankuñataqmi, hanaq pachapi Cristowan kuska kamachiqkuna hinaspa sacerdotekuna kaspanku Diosta servinanku karqa (Luc. 22:29; 1 Ped. 1:3-5; Apo. 1:6). Chayna kasqanmantam apostol Juan revelacionninpi qawarqa. “Carneropa” qayllanpi “mosoq takita” takispankum ninku: “Diospaqmi runakunata yawarnikiwan rantirqanki llapallan llaqtakunamanta, tukuy idioma rimaqkunamanta, ayllukunamanta hinaspa nacionkunamanta. Diosniykupaqmi munaychakusqantawan sacerdotekunataña rurarurqanki. Kay pachapi gobiernanankupaqmi chaynataqa rurarurqanki”, nispa (Apo. 5:8-10). Chayna qawasqanpitaqmi nirqa: “Paykunaqa  kanqa Diospa hinaspa Cristopa sacerdotenkunañam, paykunaqa Cristowanmi gobiernanqaku waranqa wata”, nispa (Apo. 20:6). Cristowan kuskam kamachiq sacerdotekuna kanku, chaynapi lliw runakunata yanapanankupaq.

15, 16. ¿Ima allinkunatam kamachiq sacerdotekunaqa kay Pachaman apamunqaku?

15 ¿Ima allinkunatam chay 144.000 runakunaqa kay Pachaman apamunqaku? Apocalipsis 21 capitulopim paykunata rikchanachin Mosoq Jerusalenwan, nintaqmi ‘Carneropa casarasqan’ kasqanta (Apo. 21:9). Chaymantapas 2-4 versiculokunam nin: “Hinaptinmi rikurqani chuya llaqtata otaq mosoq Jerusalenta Diospa qayllanmanta uraykamuqta. Allichasqam kachkasqa novionpaq sumaqllaña adornasqa novia hina. Hinaptinmi hatun tiyanamanta nimurqa: Diosqa runakunawanñam yachachkan. Paykunam kanqa runankuna, Diosñataqmi kanqa paykunapa Diosnin. Diosmi pichanqa paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam”, nispa. ¡Mayna sumaqmi kayqa! Wañuy manaña kaptinqa, manañam waqaypas nanaypas kanqañachu. Hinaspam runakunaqa mana pantaqña kanqaku, Dioswan amistadninkupas alli-allinña kanqa.

16 Aswan allintaraqmi Apocalipsis 22:1, 2 nisqan qawachin imakunataraq apamunankumanta, ninmi: ‘Qawaykachiwarqam kallpaq chuyay-chuyay mayuta. Chay yakuqa kasqa Cristal hina chuyay-chuyaymi, chayqa lloqsimusqa Diospa hinaspa Carneropa tiyananmantam. Chay llaqtapa callenpa chawpinpiñataqmi mayupa kaylaw-waklawninpi wiñarqa Kawsay qokuq Sacha. Watapim rurusqa chunka iskayniyoq kutita. Killan-killanmi chay sachaqa rurusqa. Rapinkunañataqmi kasqa nacionkuna hampikunankupaq’, nispa. Kayna nisqanwanmi qawachin Adanpa chaskisqanchik huchamanta lliw “nacionkuna” otaq lliw runakuna hampisqa hina kananchikta. Hinaptinmi ñawpaq kaqkunaqa manaña kanqachu.

KAMACHIQ SACERDOTEKUNAPA IMAM RURASQANKU TUKUSQANMANTA

17. ¿Imam rurakunqa kamachiq sacerdotekunapa yanapakuyninwan?

17 Kamachiq sacerdotekuna waranqa wata kamachiyta tukuruptinkuqa, yanapakuyninwanmi kay Pachapi runakunaqa mana pantaqña kanqaku. Hinaptinmi tukuy imapas allichasqa kaptin, Cristoqa Sacerdotekunapa Jefen kaspan Jehová Diosmanña munaychakusqanta qoykunqa (leey 1 Corintios 15:22-26). Chaypim kamachiq sacerdotekunapa imarayku churasqa kasqankuqa tukunqa.

18. Kamachiq sacerdotekunapa imarayku churasqa kasqanku tukuruptin, ¿imaynatam paykunata Jehová Dios servichikunqa?

18 Chaymantaqa, ¿imaynatañam Jehová Diosqa paykunata servichikunqa? Apocalipsis 22:5 nin: ‘Wiña-wiñaypaqmi gobiernanqaku’, nispa. ¿Pikunatam gobiernanqaku? Bibliaqa manam chaymantaqa rimanchu. Ichaqa tukuy chaykuna rurasqankuwanmi alli-allin yachayniyoq kachkanku chaynapi Jehová Dios munaychakuyninpi hinalla servichikunanpaq.

19. ¿Imatam yuyarinanchik Jesuspa wañukusqanman punchawman lliw riqkunaqa?

19 Jesucristopa wañukusqanta 2012 watapa 5 abril killapi yuyarispaqa, yuyarisunyá kay yachasqanchikkunata. Hanaq pachaman rinankupaq suyakuyniyoq cristianokunam, mana qonchuyoq tantata mikunqaku hinaspa vinotapas tomanqaku, chaywanmi qawachinqaku mosoq contratoman yaykusqankuta. Chayna rurasqankum yuyarichinqataq Diospa munaynin rurakunanpaq ima ancha allin rurayniyoq kasqankuta. Lliw runakunata yanapananchikpaq kamachiq sacerdotekunata Jehová Dios churasqanmanta agradecekuspayá, ama qonqaspa Jesuspa wañukusqan punchawta yuyarinapaq risunchik.

[Kay yachachikuypa tapukuyninkuna]

[29 kaq paginapi dibujo]

Kamachiq sacerdotekunaqa lliw runakunapaqmi suma-sumaq kawsakuyta apamunqa