Yachachikuypa kasqanman rinapaq

Yachachikuyman rinapaq

¿Bautizakunankuchu warmakuna?

¿Bautizakunankuchu warmakuna?

 ¿Bautizakunankuchu warmakuna?

FILIPINAS lawmanta Carlosmi * nin: “Ancha kusisqam kachkani warmi churiy Jehová Diospa testigon kasqanwan, paypas chaynachá tarikun”, nispa. Grecia lawmanta huk taytapas ninmi: “Señoraywan kuskam ancha kusisqa tarikuniku kimsa churi-wawayku warmallaraq kachkaspanku bautizakusqankumanta. Iñiyninkupim ñawparichkanku hinaspam ancha kusisqa tarikunku Jehová Diosta yupaychasqankumanta”, nispa.

Arí, Diosta serviq tayta-mamakunaqa churi-wawanku bautizakuptinkuqa anchatamá kusikunku. Wakinpim ichaqa kusisqa kaspankupas iskayrayanku. Huk cristianam nin: “Kusisqa kaspaypas iskayrayasqam karqani, yacharqanim warmaypa imapas rurasqanmanta Jehová Dios cuentata mañananmanta”, nispa.

Lliw mozo-sipaskunaqa kallpanchakunankum bautizakunankupaq. Ichaqa wakin cristianokunaqa ninmankupaschá: “Churi-wawayqa allintam iñiyninpi ñawparichkan, ichaqa ¿allin takyasqañachu kachkan huchapakuyman mana urmaykunanpaq hinaspa Diospa qayllanpi chuya kananpaqpas?”, nispa. Wakinkupas tapukunkuchá: “¿Hinallachu churi-wawayqa Diosta kusisqa servinqa, icha qollqella maskaymanchu qokurunqa?”, nispa. Chayna iskayrayaspaqa, ¿Bibliapa ima nisqankunam tayta-mamakunata yanapanman warmanku bautizakunankupaqña kasqanta yachanankupaq?

Bautizakunapaqqa Jesucristopa qatiqninraqmi kana

Hayka watanpi bautizakunanpaq tanteanamantaqa, Diospa Palabranmi qawachin pikuna bautizakuy atisqankumanta. Jesusmi qatiqninkunaman kaynata kamachirqa: “Llapallan nacionpi runakunaman rispayá willamuychik qatiqniykunaña kanankupaq hinaspayá bautizamuychik”, nispa (Mat. 28:19). Chaynaqa, bautizakunapaqqa Jesucristopa qatiqninraqmi kana.

Ichaqa, ¿imam Jesucristopa qatiqnin kayqa? “Manam paypi iñiyllachu, aswanqa Jesucristopa yachachisqankunata allinta qatiymi” (Perspicacia para comprender las Escrituras.) ¿Atikunmanchu warmallaraq kaspa Jesucristopa qatiqnin kayta? 40 wataña misionera  cristianam nin: “[Iskaynin ñañaykunawanqa] wataykupiñam kachkarqaniku Jehová Dios serviy munasqaykumantawan mosoq Pachapi kawsakuy munasqaykumantapas yachanaykupaq. Diosman qokusqaykum yanapawarqaku sipas kasqaykupi mana allinkunaman mana wichinaykupaq. Manam ñakakunikuchu warmallaraq kaspayku Jehová Diosman qokusqaykumantaqa”, nispa.

Tayta-mamakuna, ¿imaynatam yachawaqchik churi-wawaykichik Jesucristota allintaña qatisqankuta? Imayna kawsasqankupim. Chaymi Biblia nin: “Rurasqankunawanmi mozoqa imaynam kasqanta reqsichikun. Diospa munasqanman hina kawsasqantam reqsichikun”, nispa (Pro. 20:11). Chayraykum qawanaykichik Jesucristopa qatiqnin kaspanku imakunapi ñawparisqankuta (1 Tim. 4:15).

Imaynatam yachachwan Jesucristota allintaña qatisqankuta

¿Kasukunchu churi-wawayki? (Col. 3:20.) ¿Wasikipi kamachisqaykikunata ruranchu? Bibliaqa ninmi Jesusqa 12 watanpi tayta-maman kasukusqanta (Luc. 2:51). Manamá pi warmapas tukuy imapiqa kasukunchu. Ichaqa cheqap cristianokunaqa Jesustam allinta qatipakunanku. Chaynaqa, bautizakuy munaq mozo-sipasqa reqsisqam kanan kasukuq kasqanwan (1 Ped. 2:21).

Kaykunatawan tapukuychik: ¿Predicasqanwan qawachichkanchu Diospa munaychakusqanta puntata maskasqanta? (Mat. 6:33.) ¿Icha sapa kutichu hikutachkana predicananpaq? ¿Yachay munaq runakunaman kutichkanchu? ¿Willanchu Jehová Diospa testigon kasqanta estudiaqmasinkunaman hinaspa profesorninmanpas?

Churi-wawayki, ¿musyankuchu huñunakuykuna ancha allin kasqanta? (Sal. 122:1.) ¿Rimarinchu Biblia Estudianapaq Huñunakuypi, Diosmanta Yachachinapaq Escuelapi chaynataq Llaqta Cuidaq qellqata estudianapaq huñunakuypipas? (Heb. 10:24, 25.)

¿Kallpanchakunchu escuelapi hinaspa maypipas mana allin amistadkunamanta karunchakunanpaq? (Pro. 13:20.) ¿Ima takikunatam uyarin, imakunatam televisionpi hinaspa Internetpi qawan otaq imakunawantaq pukllan? ¿Imayna rimasqan hinaspa portakusqan qawachinchu Bibliapa nisqankunata kasukuy munasqanta?

¿Allintachu Bibliamanta yachan? ¿Sonqomantachu riman Familiawan Diosta Yupaychanapaq Tutapi yachasqankunamanta? ¿Atinmanchu yachachiyta Bibliapa mana sasa yachachikuyninkunamanta? (Pro. 2:6-9.) ¿Kikinmantachu leen Bibliatawan confianza sirvientepa qowasqanchik qellqakunata? (Mat. 24:45.) ¿Tapusunkichu Bibliapa mayqan yachachikuyninmantapas?

Kay tapukuykunam yanapasunki iñiyninkupi ñawparisqanta yachanaykipaq. Chaykunapi yuyaymanaruspaykiqa, yaqapaschá qawawaq warmayki manaraq bautizakunanpaq  kasqanta, wakinkunapi astawan kallpanchakunan kasqanrayku. Otaq qawawaqpas bautizakunanpaqña kasqanta, yaqachá Diosman qokuspan imayna kawsasqanwan qawachinña Jesucristopa qatiqnin kasqanta.

Mozo-sipaskunaqa atinmankum Dios serviyta

Achkam warmallaraq kasqankumantapacha Diostaqa servirqaku. Yuyarisun Joseyta, Samuelta, Josiasta hinaspa Jesustapas (Gen. 37:2; 39:1-3; 1 Sam. 1:24-28; 2:18-20; 2 Cro. 34:1-3; Luc. 2:42-49). Yuyarichwantaqmi Felipepa tawa warmi churinkunamantapas, paykunaqa Diosmanta willakuqmi karqaku. Yaqachá warmacha kasqankumantapacha Diosmanta yachachisqa karqaku (Hech. 21:8, 9).

Grecia lawmanta huk iñiqmasinchikmi nin: “Bautizakururqanim 12 wataypi, chay rurasqaymantaqa manam haykapipas ñakakurqanichu. Kunanqa 24 watañam bautizasqa kani hinaspa 23 wataña tukuy tiempoywan Diosta servichkani. Jehová Dios kuyasqaymi yanapawarqa mozo kasqaypi sasachakuykunata atipanaypaq. Manamá 12 wataypiqa anchatachu Bibliamantaqa yacharqani kunan hinaqa, ichaqa Jehová Diostam kuyarqani hinaspa wiñaypaq serviytapas munarqani. Anchatam kusikuni hinalla payta servinaypaq yanapawasqanmanta”, nispa.

Jesucristota allintaña qatisqanta qawachiqqa, hayka watayoqña kaspapas bautizakunmanñam. Pablom nirqa: “Sonqonchikwanmi iñinchik allin ruraypaq, ichaqa siminchikwanmi willakunchik salvasqa kanapaq”, nispa (Rom. 10:10, NM). Tayta-mamakuna, churi-wawayki bautizakuruptinqa llapallaykichikmi mana qonqanapaq kaqta hayparunkichik. Chaynaqa, amayá imawanpas harkachikuychikchu chay kusikuyta haypanaykichikpaqqa.

[Willakuy]

^ par. 2 Wakin sutikunaqa cambiasqam kachkan.

[5 kaq paginapi recuadro]

Bautizakuyta imayna qawanamanta

Wakin tayta-mamakunapaqqa warmankupa bautizakusqankuqa allinpunim, ichaqa manchapakunkum pantarunankuta, kayqa carrota manejanapaq papelta horqoy hinam. Ichaqa, ¿manchapakunapaqchu bautizakuywan Diosta serviyqa? Manamá. Bibliam nin: “Diospa bendicionninmi apuyachin runataqa. Tayta Diospa bendicionninqa manam apamunchu llakikuytaqa”, nispa (Pro. 10:22). Pablopas Timoteotam nirqa: “Diosta servispaqa qori-qollqeta hinam tarirunchik kapuqninchikwan contentakuyta yachaspanchikqa”, nispa (1 Tim. 6:6).

Kayqa manamá nichkanchu Diosta servispa mana sasachakunamantaqa. Jeremiaspas achka sasachakuykunapim tarikurqa Diosta servisqanpi. Ichaqa, ¿imaynatam Dios yupaychayninta qawarqa? Nirqam: “Palabraykikunata mikuypaq-mikurqani. Chay palabraykikunaraykum sonqoypi anchallataña kusikurqani. Ñoqaqa sutikiwan sutichasqam kallani”, nispa (Jer. 15:16). Jeremiaspa nisqaman hinaqa cheqap yupaychayqa kusikuytam apamun. Satanaspa munaychakusqanmi ichaqa llakikuyllataña. Tayta-mamakuna, warmaykichiktayá yachachiychik allinta akllanankupaq (Jer. 1:19).

 [6 kaq paginapi dibujo hinaspa recuadro]

¿Suyananraqchu chaymantaña bautizakunanpaq?

Wakin tayta-mamakunam warmanku bautizakunankupaq kachkaptinpas tanteanku manaraq bautizakunankupaq. Ninkum:

“Manchakunim bautizakuruptin huchallikuruspan qarqorachikunanmanta.” Ichaqa, ¿chaymantaña bautizakunanpaq saqesqanraykuchu nichwan Dios mana cuentata mañananmanta? Salomonmi sapa mozo-sipasta nin: “Ichaqa ama qonqaychu [rurasqaykimanta] Dios juzgasunaykita”, nispa (Ecl. 11:9). Pablopas llapallanchiktam niwanchik: “Sapakamam Diosninchikman cuentata qosunchik”, nispa (Rom. 14:12).

Bautizasqa otaq mana bautizasqa kaspapas, lliwmi Diosman cuentata qosun. Ichaqa, payqa waqaychawasunmi hinaspapas ‘manam munanqachu mana aguantay atinanchikkama tentasqa kananchiktaqa’ (1 Cor. 10:13). Hinalla allin yuyayniyoq kanapaq hinaspa mana huchallikunapaq kallpanchakuptinchikqa, Diosqa yanapawasunmi (1 Ped. 5:6-9). Huk cristianam nin: “Bautizasqa warmakunam aswan karunchasqa kanku mana allinkunamanta. 15 watanpi bautizakuq qari wawaymi nin waqaychasqa kasqanta. Paymi niwarqa: ‘Manam piensayllapas piensanichu Dios qepanchaytaqa’, nispa. Bautizasqa kayqa kallpanchanmi allinta kawsanapaq”, nispa.

¿Allin ejemplotachu warmaykikunaman qorqanki hinaspa yanaparqankichu sonqomanta Diosta kasukunanpaq? Chayna kaptinqa, bautizakusqan qepatapas hinallam Diosman sonqo kanqa. Chaytam Proverbios 20:7 nin: “Mana culpayoqmi kawsakun allin ruraq runaqa. ¡Mayna kusisqam kachkanku paypa churinkunaqa!”, nispa.

“Munaymanmi churi-waway huk ruraykunataraq puntata haypananta.” Ichapas tayta-mamaqa munanman imatapas estudianantaraq. Mozo-sipasta chay yanapanan kaptinpas, manam allinchu chayllaman qokunanpaq otaq qollqellapi piensananpaq kallpanchayqa, aswanqa Diospa munayninta puntapi churananpaqmi kallpanchana. Jesuspa nisqanman hinaqa, imapas sasachanmanmi ‘muhu’ otaq Diospa Palabran wiñananpaq. Nirqam: “Wakin runañataqmi rikchakun kichka-kichka ukuman wichiykuq muhuman. Diospa palabranta uyarichkaspanpas kay pachapi kaqkunamanta sinchita preocupakuspanmi kusikuytapas tarin Ilapa kapuqninkunaIlapi chaynapim payqa kikillanta engañakun. Tukuy kaykuna runapa sonqonman yaykuruptinmi Diospa palabranqa mana yanapanñachu”, nispa (Mat. 13:22). Arí, kapuqniyoq kananpaq puntata kallpanchaptinchikqa, manañam munanmanchu Dios serviyta.

Warmanku bautizakunanpaqña kachkaptin tayta-mamanpa harkakusqanqa mana allinpim tukunman. Huk ancianom nirqa: “Bautizakunanta mana munaspaqa, iñiyninpi ñawparinantam harkarunman hinaspapas hukmanyarachinmanmi”, nispa. Watukuq ancianopas nirqam: “Iñiyninpi iskayrayaspanmi mana iñiq runakunawan hukllawakuyta qallaykunman”, nispa.

[Dibujo]

¿Universidadmanraqchu puntata rinan?

[3 kaq paginapi dibujo]

Wakinkuqa warmallaraq kaspankupas Jesucristota allinta qatisqankutam qawachinku

[3 kaq paginapi dibujokuna]

Preparakunkuchu huñunakuykunapaq hinaspa rimarinkuchu

[4 kaq paginapi dibujo]

Kasukunkuchu tayta-mamanta

[4 kaq paginapi dibujo]

Lloqsinkuchu predicaq

[4 kaq paginapi dibujo]

Mañakunkuchu Jehová Diosta