Leeqkunapa tapukuyninkuna

¿Imanasqataq Moisesqa piñakururqa Aaronpa churin Eleazarwan hinaspa Itamarwan, Nadab chaynataq Abiu wawqenkunapa wañukusqan qepata? ¿Imataq Moisesta yanaparqa hawkalla kananpaq? (Lev. 10:16-20.)

Diospa yachanan karpanpi sacerdotekuna llamkanankupaq churasqa kasqanku qepatam, Jehová Diosqa wañurachirqa Aaronpa churin Nadabtawan Abiuta “mana paypa kamachisqanman hina” qontichisqankurayku (Lev. 10:1, 2). Moisesqa manam munarqachu Eleazar hinaspa Itamar, chay wawqenkunarayku llakisqa kanankutaqa. Chaymantañataqmi Moisesqa paykunawan piñakurqa hucha pampachanapaq chivato ofrendamanta mana mikusqankurayku (Lev. 9:3). ¿Imanasqataq piñakururqa?

Moisesman Leyta qosqanpim, Jehová Diosqa sacerdotekunata kamachirqa asuykunanku karpapa pationpi hucharayku ofrendamanta mikunankupaq. Chay rurasqanmi qawachirqa ofrenda qoq runapa huchanmanta pay cuentallikusqanta. Ichaqa ofrendamantaqa manam mikunankuchu karqa chay animalpa yawarnin Diospa Sapaqchasqan sitioman apasqa kaptinqa (Lev. 6:24-26, 30).

Aaronpa iskay churinkuna wañuchisqa kasqankuraykum, Moisesqa munarqapaschá Diospa lliw kamachikuyninkunata kasukunankuta. Hucharayku chivato ofrenda kañarusqankumanta yacharuspanmi, Moisesqa piñasqallaña Eleazartawan Itamarta nirqa: ‘¿Imanasqataq chay hucharayku ofrenda chivatomantaqa mana mikurqankichikchu?’, nispa. Chaytaqa mikunankum karqa Diospa chuya lugarman yawarnin mana apasqa kasqanrayku (Lev. 10:17, 18).

Paykunapa rantinpim Aaronqa rimarirqa, yaqachá chaynata ruranankupaq churinkunata nisqanrayku. Iskay churinkuna wañuchisqa kasqankuraykum, Aaronqa yaqapaschá tapukurqa hucha pampachanapaq ofrendamanta mikuy sichu sacerdotekunapaq allin kasqanmanta. Ichapas piensarqa mikusqanku Diosta mana agradananmanta, paykunaqa manamá Nadabpa hinaspa Abiupa rurasqankumantaqa huchayoqqa karqakuchu (Lev. 10:19).

Aaronqa piensarqachá churinkuna chayllaraq sacerdotekunapa rurasqankuta rurasqankurayku, Jehová Diosta agradanankupaq tukuy imatapas cuidadowan ruranankuta. Nadab hinaspa Abiu churinkunam ichaqa Diospa sutinta penqaypi churarqaku, chaymi Diosqa wañurachirqa. Chaychá Aaronqa piensarqa wañuqkunapa ayllun wakin sacerdotekuna kasqankurayku ofrendakunamanta manaraq mikunankuta.

Moisesqa Aaronpa nisqantaqa uyarirqam, chaymi Bibliaqa kaynata nin: “Chayta uyariruptinmi Moisespa sonqon chayraq tiyaykurqa”, nispa (Lev. 10:20). Yaqachá Aaronpa chayna nisqanqa Jehová Diospaqpas allin karqa.