Yachachikuypa kasqanman rinapaq

Yachachikuyman rinapaq

Kallpanchakuyqa allinpim tukun

Kallpanchakuyqa allinpim tukun

 Kallpanchakuyqa allinpim tukun

DIOSPA “yachachikuyninman hina” warmakunata yachachinapaqqa, Familiawan Diosta Yupaychanapaq Tuta hinaspa Biblia estudiaymi anchata yanapakun (Efe. 6:4). Ichaqa chayllam estudiaytaqa aminku. ¿Imatam tayta-mamakuna rurananku warmankuna atencionwan uyarinankupaq? Qawasun Estados Unidosmanta 2 casarasqakunapa rurasqankuta.

Californiamanta George cristianom nin: “Warmaykuna uchuycharaq kaptinkum, señoraywan kallpanchakurqaniku estudiasqayku mana aminapaq hina kananpaq. Wakinpim Bibliamanta willakuq libropi runakunapa pachakusqankuman hina pachakuq kaniku. Rurarqanikutaqmi espadakunata, tawnakunatawan canastakunatapas. Pukllaykunatapas rurarqanikum Bibliapi huk kaqnin runapa imayna kasqanta qawachispayku, chaynapi wakinkuna pi kasqanta ninaykupaq. Papelkunapipas qellqaqmi kaniku sasa otaq facil tapukuykunata kutichinapaq. Wakinpiqa Noeypa buquen imayna kasqantam taksallata rurarqaniku, chaymantapas ima watapi imakuna pasasqantam qellqaq kaniku. Dibujarqanikutaqmi Bibliapa willakusqantawan chay tiempopi runakunatapas. Kay punchaykunapim dibujasaqku Efesios 6:11-17 nisqanpi hina Diospa qowasqanchik armakunata. Hinaspam willakusaqku imawan tupasqanta. Kaykuna rurasqaykum yanapawarqaku familiawan Biblia estudiasqayku sumaqllaña kananpaq”, nispa.

Michigan lawmanta Debi cristianam nin: “3 watachayoq warmachayku atencionwan yachachisqaykuta uyarinanpaqmi sasachakurqaniku. Huk punchawmi Bibliamanta willakuq libropi Isaacmantawan Rebecamanta leepuspay servichikurqani iskay muñecakunata. ¡Chayraqmi atencionwan uyariwarqa! Qatiqnin killakunapim chay muñecakunata huk runakunawanña rikchanachirqani. Huk willakuyta leeruptiykuñataqmi warmachaykuqa pukllanankunata kuchun-kuchun maskarqa rikchanachinaykupaq. ¡Pakata hinaraqmá maskarqa! Rahab warmipa wasintam rikchanachiq kaniku zapatopa cajanwan, guindo waskatañataq puka qaytuchawan. Escobapa kaspinpim wataq kaniku muñecamanta hatun culebrata, chaywanmi rikchanachirqaniku Numeros 21:4-9 willakusqanpi broncemanta culebrata. Tukuy chay pukllanakunatam wayqapi waqaychaq kaniku. Anchatam gustawaqku wayqanta taqwipaspan yachasqankunamanta kikin imayna tupachisqanta qawasqayku”, nispa.

Churi-wawakunata yachachiyqa manam facilchu, Jehová Diosta serviy munanankupaqqa manamá sapa semana yachachiyllachu. Ichaqa familiawan Diosta yupaychayqa hinaspa Biblia estudiayqa yanapanqam Diosta kuyanankupaq. Hinaptinqa kallpanchakusqaykichikqa manamá yanqachu kanqa.