Yachachikuypa kasqanman rinapaq

Yachachikuyman rinapaq

Yuyaymanay Jehová Diospa rurasqanpi

Yuyaymanay Jehová Diospa rurasqanpi

 Yuyaymanay Jehová Diospa rurasqanpi

JESUSPA kawsarimusqan qepallatam iskay discipulonkuna Jerusalenmanta Emaus llaqtachaman richkarqaku. Lucas librom willakun: “Rimaspa hinaspa tapunakuspa rimachkaptinkum paykunaman Jesus asuykuspan paykunawan rirqa. Aswanqa manam pay kasqanta reqsirqakuchu. Jesusmi paykunata tapuykurqa: ¿‘Imamantataq puristin tapunakuchkankichik’?, nispa. Chaymi llakisqallaña sayaykurqaku”. ¿Imanasqataq llakisqa tarikurqaku? Paykunaqa suyarqakum Jesucristo Israel nacionta Roma nacionmanta librananta ichaqa Jesustam runakuna wañurachirqaku. Chayraykum chayna sientekurqaku (Luc. 24:15-21; Hech. 1:6).

Hinaptinmi Jesusqa paykunata yuyaymanachirqa. “Moisespa qellqasqan librokunamanta qallarispam Diosmanta willakuqkunapa libronkunapi tukunankama kikinmanta rimaqta” entiendechispan. Yuyarichirqam predicasqan punchawkunapi imakuna rurasqanta chaywanmi iñiyninkuta kallpancharqa. Nisqanta uyarisqankuman hinam llakikunankumantaqa kusikuytaña qallaykurqaku. Chaymantam hina chay tutalla ninakurqaku: “¿Manachum sonqonchik ruparirqa ñanpi parlapayawaptinchik hinaspa Bibliamantapas entiendechiwaptinchik?”, nispa (Luc. 24:27, 32). ¿Imatam yachachiwanchik kay iskay discipulokunapa imayna sientekusqanku?

Suyasqanchik mana cumplikuptin imayna sientekusqanchikmanta

Kay iskay discipulokunaqa llakisqam tarikurqaku suyasqanku mana cumplikuptin. Proverbios 13:12 nin: “Runapa imapas suyasqan unamuptinmi sonqon hukmanyarun”, nispa. Kay tiempopipas chaynam pasan: wakiqninchikqa ichapas unay wataña tukuy sonqonchikwan Jehová Diosta servinchik hinaspam piensarqanchik “llumpa-llumpay ñakariy” punchaw chayamunantaña, Diospa prometesqan paraisopi kawsakuytaña (Mat. 24:21; Apo. 7:14). Suyasqanchik mana cumplikuptinqa llakisqamá tarikunchik.

Piensarisun, chay iskay discipulokunaqa kaqmantam kusikurqaku profeciakuna imayna cumplikusqanmanta entiendenankupaq Jesus yanapaykuptin, wakin profeciakunaqa paykunapa tiemponpim cumplikurqaña. Ñoqanchikpas paykuna hina yuyaymanaspaqa kusikuytam tarisun hinaspam hukmanyasqa  kasqanchiktapas atipasun. Diosta unayña serviq Michael sutiyoq ancianom nirqa: “Ama reparaychu Diospa manaraq rurasqankunapiqa aswanqa imakunaña rurasqanpi reparay”, nispa. ¡Kay consejoqa mayna allinmi!

Jehová Diospa rurasqankunamanta

Jehová Diospa admirakuypaq imakunaña rurasqankunapi piensay. Jesusmi nirqa: “Ñoqapi iñiqqa ruranqam ñoqapa rurasqaykunata, payqa ñoqapa rurasqaymantapas mastaraqmi ruranqa”, nispa (Juan 14:12). Kay tiempopim imay tiempomantapas Diosta serviqkunaqa enteron allpa pachapi astawan predicachkanchik. Diosta serviq 7 millon masnin runakunam llumpa-llumpay ñakariy punchawmanta librasqa kayta suyachkanchik. Manam haykapipas kunan tiempo hinaqa Diosta serviqkunaqa enteron allpa pachapi karqachu. Diosmi Churinpa nisqanta bendecichkan. Cheqaptamá Diospa llaqtanqa Jesuspa ‘rurasqanmantapas’ mastaraqmi rurachkan.

¿Imatawanraqtaq Jehová Diosqa ñoqanchikpaq rurarun? Llampu sonqo achka runakunatam mana allin runakunamanta rakichkan llaqtanpi favorecesqa kanankupaq (2 Cor. 12:1-4). Kallpanchakuy imakunawan favorecewasqanchikmanta yuyaymananaykipaq. Ejemplopaq, Salonpi otaq wasikipi Bibliamanta qellqakunata waqaychana sitiopi reparay. Chaynallataq Índice de las publicaciones Watch Tower nisqata leey otaq Watchtower Library nisqata computadoraykipi leey. Chayllaraq pasaq asambleapi drama uyarisqaykipi hinaspa qawasqaykipi yuyaymanay. Yuyaymanaytaq iñiqmasinchikkunawan hawkalla kawsakusqanchikpipas. Jehová Diosqa ancha kuyakuq kasqanraykum mikuchichkaq hina palabranwan achkanpi yanapawanchik chaynataq kuyakuq iñiqmasinchikkunawanpas. Cheqaptamá Diospa llaqtanpi ancha favorecesqa kawsachkanchik.

Rey Davidmi chayta reqsikuspan nirqa: “Dios Taytalláy, achka-achkallañam milagrokunapas rurallasqaykiqa. Achka-achkallañam favorniykupipas tanteallasqaykiqa”, nispa (Sal. 40:5). Chaynamá Jehová Diospa tukuy rurasqankunapi hinaspa kuyawasqanchikpi yuyaymanaspaqa manañam hukmanyasqañachu tarikusun chaymantapas kallpanchakusunmi tukuy sonqonchikwan Diosta hinalla servinanchikpaq (Mat. 24:13).

[31 kaq paginapi dibujo]

Jesusmi discipulonkunata yanaparqa Jehová Diospa rurasqankunapi yuyaymananankupaq

[32 kaq paginapi fotokuna]

Chayllaraq pasaq asambleapi yuyaymanay qawasqaykipi hinaspa uyarisqaykipi