Yachachikuypa kasqanman rinapaq

Yachachikuyman rinapaq

Leeqkunapa tapukuyninkuna

Leeqkunapa tapukuyninkuna

 Leeqkunapa tapukuyninkuna

¿Imaynatam pantaq runakunaqa kasukuchwan Jesuspa kayna kamachisqanta: “Taytaykichik hina alli-allin qespisqayá [otaq mana pantaqyá] kaychik” nisqanta? (Mat. 5:48.)

Kay tapukuyta kutichinapaqqa entiendenanchikmi “mana pantaq” otaq “mana pantaspa” niq palabrakunata imaynata Biblia servichikusqanmanta. “Mana pantaq” nispa Bibliapa nisqanqa manam llapanpi mana pantaspa ruraqmantachu rimachkan. Tukuypi mana pantaqqa Jehová Diosllam. Runakunawan tukuy imakunam ichaqa pantaq kanku. Hebreo hinaspa griego rimaypi “mana pantaq” nispa tikramusqanku palabrakunaqa, autoridadniyoq runapa qawasqanman hinaqa nichkanmi completo, poqosqa otaq sano kasqanta. Chaynatam kunanpas runakunaqa chay palabrata servichikunku, imatapas allinta ruraptinmi ninku mana pantaq kasqanta.

Qallariyninpiqa Adanwan Evaqa Unanchaqninkuta tukuypi kasukuspankum mana pantaq karqaku portakuyninkupi, cuerponkupi hinaspa Diosta serviyninkupipas. Ichaqa, Diosta mana kasukuspankum Diospa mañasqanwan manaña cumplirqakuchu chaymi paykunapas hinaspa wawa-churinkupas pantaqña karqaku. Chaynatam Adanqa huchatawan pantaq kayta hinaspa wañuyta lliwman saqewarqanchik (Rom. 5:12).

Orqopi yachachispanmi Jesusqa qawachirqa runakuna imallapipas mana pantaq kay atisqankuta. Chaypim qawachirqa kuyakuypi mana pantaq otaq completo kanamanta, chayqa Diospa kuyasqanman hina runakunata kuyaymi. Kaynatam nirqa: ‘Kuyaychik enemigoykichikkunata, mañapuychiktaq ñakarichisuqnikichikpaqpas [. . .], qamkunaqa kankichik hanaq pachapi kaq Taytapa churinkuna, paymi intitapas qespichimun allin otaq mana allin runakunapaqpas, paytaqmi parachimun justo runakunapaq chaynataq mana justo runakunapaqpas’, nispa (Mat. 5:44, 45). Chayna kuyakuq kaspankum Jesuspa qatiqninkunaqa mana pantaq Diospa ejemplonta qatipakunku.

Kunanpas enteron pachapim Jehová Diospa testigonkunaqa kallpanchakunchik runakunata chaynata kuyanapaq. Ejemplopaq, cheqapmantam yachachinchik: tukuy castayoq, religionniyoq hinaspa nacionniyoq runakunaman. Qanchis millon masnin runakunamanmi Bibliamanta yachachinchik 236 nacionkunapi hinaspa sitiokunapipas.

Jesusmi tapurqa: ‘Kuyaqllaykichikta kuyaspaqa ¿ima premiotataq chaskiwaqchik? Impuesto cobraqkunapas [. . .] chaynataqa ruranmi. Kuyanakuqpuralla rimaykanakuspaqa ¿ima allintataq rurachkankichik? Mana judio kaqkunapas chaynataqa ruranmi’, nispa (Mat. 5:46, 47). Cheqap cristianokunaqa manam sayapakunkuchu educacionniyoq otaq huk castayoq runakunamanqa. Manataqmi kuyaqninkunallatachu kuyanku. Aswanqa yanapankum wakchakunata, onqoqkunata, warmachakunata hinaspa yuyaqkunatapas. Chaynatam Diospa kuyakuyninta qatipakunku hinaspa chayta ruraspanku mana pantaq kanku.

Qallariypim Adanqa mana pantaq karqa, ¿yaqachu haykapipas chayna kachwan? Arí. Diospa Churinpa wañukusqanpi iñispa kasukuq runakunam Waranqa Wata Kamachimuptin mana pantaq kanqaku, ‘Diablopa rurasqankunamanta librawaptinchik’ (1 Juan 3:8).