Yachachikuypa kasqanman rinapaq

Yachachikuyman rinapaq

Iñiynikichikpi allinta takyaychik onqoq familiaykichikta cuidaspa

Iñiynikichikpi allinta takyaychik onqoq familiaykichikta cuidaspa

 Iñiynikichikpi allinta takyaychik onqoq familiaykichikta cuidaspa

KIM sutiyoq paninchikpa wasanpim doctorkuna tumorta tarirurqaku hinaspam nirqaku cancer onqoywan kasqanta. Steve sutiyoq qosanmi nin: “Tumorta horqoruspankum radioterapia hinaspa quimioterapia nisqa tratamientota rurarqaku. * Chay tratamientowanmi mana kallpayoq tarikurqa”, nispa.

Maynatachá Steve qosanqa llakikurqa kuyasqan señoran chay onqoywan ñakariptinqa. Ichapas qampa familiaykipas chayna onqoywan ñakarichkan otaq yuyaqyaywanpas sasachakuchkan (Ecl. 12:1-7). Chayna kaptinqa, kikiki allinta cuidakuspallam allintapas atiendenki. Chaypaqqa iñiynikipim allin takyasqa kanayki, mana chayqa hukmanyaruspam onqoy familiaykitaqa cuidayta atiwaqñachu. ¿Imatam rurawaq congregacionpi ruraynikitapas hinaspa onqoq otaq yuyaq familiaykitapas allinta atiendenaykipaq? ¿Imaynatam congregaciopi kaqkunapas yanapakunmanku?

¿Imaynatam lliw rurayninchikta allinta rurachwan?

Mana hukmanyaspalla onqoq familianchikta allinta cuidanapaqqa, tiemponchiktawan kallpanchiktam allinta servichikuna. Diospa Palabranqa ninmi ‘humillakuq runaqa yachayniyoq kasqanta’, huk rimaypiqa yachayniyoq runaqa reqsikunmi lliwta mana ruray atisqanta (Pro. 11:2). Hinaptinqa llumpayta mana pisiparunapaqqa, tiemponchiktawan tukuy rurayninchiktam allinta qawana.

Chaytam rurarqa Steve sutiyoq iñiqmasinchik. Llamkaspanpas Irlanda congregacionpim ancianomasinkunawan ruranankupaq yanapaq, hinaspapas chay congregacionpim predicacionmanta encargakurqa.  Chaymantapas iñiqmasinchikkunata hospitalpi yawarta mana churanankupaqmi chay lawpi yanapakurqa. Paymi nin: “Señorayqa manam imatapas niwaqchu tukuy ima rurasqayrayku mana allinta atiendesqaytaqa, ichaqa musyakurqanim llumpay rurayniyoq kasqayta. Chaymi achka kutita orakuspay ancianomasiykuna yanapaq kasqayta saqerurqani. Hinalla anciano kaspaypas, wakin rurayniykunata saqeruspaymi astawan tiempochakurqani señorayta allinta atiendenaypaq”, nispa.

Tiempopa risqanman hinam señoran allinyariptin tanteanakurqaku congregacionpi saqesqan rurayninkunata kaqllamanta rurananpaq. Hinaspam señoranpa yanapakuyninwan chaskirurqa. Paymi nin: “Iskayniykum yacharurqaniku onqospaqa lliw rurayniykuta mana ruray atisqaykuta. Jehová Diostam anchata agradecekuni yanapawasqanmanta, chaynataq señoraytapas, payqa onqoq kachkaspanpas manam imatapas niwanchu aswanmi yanapawan”, nispa.

Kunanñataq qawasun congregacionkunata watukuq Jerry ancianomanta hinaspa señoran Marymantapas, paykunam ruray munasqankuta saqenanku karqa yuyaqña tayta-mamankuta atiendenankupaq. Marym nin:  “Ñoqaykuqa huklaw nacionpim misionero kayta munarqaniku, ichaqa qosaymi tayta-mamanta atiendenan karqa sapallan churin kasqanrayku. Chaymi tantearurqaniku Irlanda lawpi qepaspa cuidanaykupaq. Chaynapim Jerrypa taytanta hospitalpi onqoptin cuidarqaniku wañukunankama. Kunanñataqmi suegrayta telefonowan sapa punchaw qayaniku imatapas necesitaptin yanapanaykupaq. Congregacionninpas allintam yanapawanku, chaymi congregacionkunata watukuypi hinalla servichkaniku”, nispa.

Imatam hukkuna ruranmanku

Yuyaq viudakunata congregacion imayna yanapananmanta rimaspanmi apostol Pablo kaynata qellqarqa: “Pipas ayllunkunata mana mantieneyta munaspanqa, tukuymanta llalliqtaqa wasinpi yachaqkunata mana mantienespanqa qepanchakurunñam iñisqantapas, payqa Diosman mana iñiq runakunamantapas peorraqmi rikurirun”, nispa. Pabloqa qawachichkarqam, yuyaq tayta-mamanta hinaspa abuelonkunata imapas necesitasqankupi cristianokuna yanapanankupaq, chayna rurayqa Diospa qawasqanman hinaqa ancha allinmi (1 Tim. 5:4, 8). Ichaqa congregacionpi wakin iñiqmasinchikkunapas yanapakunankum.

Kunanñataq, Suecia lawpi yachaq Carl hinaspa señoran Inger sutiyoq yuyaqña iñiqmasinchikkunamanta rimasun. Carl iñiqmasinchikmi nin: “Cancer onqoywan señoray kasqanmanta yacharuspaykum imayna kaytapas atirqanikuchu. Inger señorayqa sanolla hinaspa kallpayoqmi tarikurqa, kunanmi ichaqa hampichikunanpaq sapa punchaw hospitalman rinayku karqa. Chay hampikunawanmi mana kallpayoq tarikurqa hinaspam wasillapi karqa, chaymi paywan qepaq kani cuidanaypaq”, nispa. ¿Imatam congregacion rurarqa yanapanankupaq?

Ancianokunam tantearurqaku telefonontakama huñunakuyta uyarinankupaq. Iñiqmasinchikkunapas watukurqakum, telefonowan qayarqaku hinaspa cartakunatawan tarjetakunatam apachirqaku. Carl iñiqmasinchikmi nin: “Musyakurqanikum Jehová Diospas iñiqmasinchikkunapas yanapawasqankuta. Mana yanapawaptinkuqa iñiyniykupim hukmanyaruymanku karqa. Kunanqa señoray allinyaykuptinmi huñunakuymanqa richkanikuña”, nispa. Onqoqkunata chaynataq yuyaqkunata atisqanman hina yanapananpaq kallpanchakuq cristianokunaqa ‘tukuy tiempopi kuyakuq cheqap amigom. Sasachakuy tiempopipas wawqe hinaraqmi kuyakun’ (Pro. 17:17).

Jehová Diosqa chaninchanmi rurasqaykitaqa

Onqoq familianchikta cuidayqa sasaniraqmi kanman, ichaqa bendicionkunatam apamun. Rey Davidmi nirqa wakchakunata hinaspa onqoqkunata yanapaq runaqa kusisqa kasqanmanta (Sal. 41:1).

¿Cheqaptachu kusisqa kanmanku onqoq familiankuta atiendeqkuna? Arí, Proverbios 19:17 nin: “Tayta Diosmanmi prestan wakcha runaman qoykuq runaqa. Chayna rurasqanmantam paymanpas Tayta Dios pagapunqa”, nispa. Jehová Diosqa payman sonqo serviqninkuna onqoptinkuqa anchatam interesakun hinaspam cuidaqninkunatapas bendicen. Davidmi kaynata takirqa: “Onqosqaña kaptinñapas Tayta Diosmi kallpanchanqa paytaqa. Onqoptinpas camantapas allichaspam cuidallanqa paytaqa”, nispa (Sal. 41:3). Chaymantapas, onqoqta cuidaq sasachakuypi tarikuptinqa Jehová Diosmi yanapanqa.

Onqoq familianchikta cuidasqanchiktaqa Jehová Diosqa anchatapunim chaninchan, chay yachasqanchikqa kusichiwanchikmi. Chay ruray sasaniraq kaptinpas, Diospa Palabranqa niwanchikmi ‘kañasqa ofrenda hina Diospa agradonpaq’, kasqanta (Heb. 13:16).

[Willakuy]

^ par. 2 Sutikunaqa cambiasqam kachkan.

[18 kaq paginapi dibujokuna]

Iñiynikipi allinta takyay hinaspa yanapakuyta chaskikuy