Yachachikuypa kasqanman rinapaq

Yachachikuyman rinapaq

Religionniyta: ¿ñoqachu akllanay icha tayta-mamaychu?

Religionniyta: ¿ñoqachu akllanay icha tayta-mamaychu?

 Religionniyta: ¿ñoqachu akllanay icha tayta-mamaychu?

POLONIA nacionpi achka runakunam, Jehová Diospa testigonkunata kaynata ninku: “Religionniyoqñam nacerqani, kay religionpitaqmi kasaq wañunaykama”, nispa. Chayna nisqankum qawachin runakunaqa tayta-mamankupa religionninpi kanankuta. Yachasqayki lawpipas uyarirqankichá chayna nisqankutaqa. ¿Imataq pasan runakuna chaynata piensaptinku? Religionniyoq kayqa mana valorniyoq hinaspa costumbre hinallam rikurirun. ¿Chayna pasarunmanchu abuelonkumanta otaq tayta-mamankumanta Dios reqsiq testigokunata?

Timoteotaqa manam chaynachu pasarqa. Abuelanwan maman yachachiptinmi payqa ‘warma kasqanmantaraq’ Diosmanta yacharqa hinaspa kuyarqa. Ichaqa, Abuelanwan maman hinam Timoteoqa convencikurqa Jesucristota qatispa cheqap religionpi kasqanta. Payqa creerqam Jesucristomanta Biblia ima nisqanta (2 Tim. 1:5; 3:14, 15). ¿Imatam kaymanta yachanchik? Diosta servinankupaq warmankuta tayta-mamanku yanapaptinpas, kikinkum chaytaqa munananku (Mar. 8:34).

Cheqap religionpi kasqanchikmantaqa kikinchikmi convencisqa kananchik. Chaynapim allin sapichasqa sacha hina iñiynikichikpi kasunchik, kuyaspanchikmi Diosta servisun hinaspa imaña pasakuptinpas payta kasukusun (Efe. 3:17; Col. 2:6, 7).

¿Imatam wawa-churikuna rurananku?

Albertom * wiñarqa testigo familianwan, paymi nin: “Creerqanim testigokuna cheqap yachachisqankuta, ichaqa sasachakurqanim imayna kawsanaypaq niwasqankuta kasukunaypaq”, nispa. Mozo-sipas, ¿chaynatachu qampas piensanki? ¿Imanasqataq mana yachankichu imayna kawsanaykita Dios munasqanta? Chaynapim mana sasachakunkichu munayninta ruranaykipaq (Sal. 40:8). Albertom nin: “Huk punchawmi Diosta mañakuyta qallaykurqani. Qallariypiqa sasam karqa ichaqa kallpanchakurqanim. Chayllam cuentata qokurqani allinta ruranaypaq kallpanchakusqayta Dios chaninchananmanta. Chaymi yanapawarqa vidaypi cambianaypaq”, nispa. Dioswan amistadniki allin kananpaq kallpanchakuspaykiqa, munankichá paypa munaynin rurayta (Sal. 25:14; Sant. 4:8).

Piensariy munasqayki pukllaypi. Imayna pukllana kasqanta mana yachaspaqa amiruwaqchá. Ichaqa, ¿imataq pasanman pukllayta yachanaykipaq kallpanchakuptikiqa? Munawaqchá hinaspa imatapas rurawaqchá  pukllanaykipaq. Chaynam Jehová Dios serviypipas. ¿Imatam rurawaq astawan kusikunaykipaq? Allinta preparakuspayki huñunakuykunapi rimariy. Mozo-sipas kaspaykipas, hukkunatam ejemploykiwan kallpanchawaq (Heb. 10:24, 25).

Chaynatam nichwan predicacionmantapas. Kaytaqa rurana kuyasqanchikraykum manam obligasqa kaspachu. Tapukuy: “¿Imanasqam runakunaman Jehová Diosmanta rimayta munani? ¿Imanasqataq Diosta kuyani?”, nispa. Payqa kuyakuq Taytam, chayna kasqanta entiendenaykipaqqa kallpanchakuy. Jeremiaswanmi Dios nirqa: “Maskawaspaykichikqa tariwankichikmi tukuy sonqoykichikwan maskawasqaykichikrayku”, nispa (Jer. 29:13, 14). ¿Imatam necesitanchik chayta ruranapaq? Javiermi nin: “Imayna piensasqaytam cambianay karqa. Warma kasqaymantam huñunakuyman hinaspa predicaq rirqani, ichaqa costumbreman hinallam. Tukuy sonqoymanta servinaypaqmi Jehová Diosta reqsirqani hinaspa paywan amistadta rurarqani”.

Predicaspa kusikunaykipaqqa allin amistadniyoqmi kanayki. Bibliam nin: “Yachayniyoq runakunawan juntanakuspaykiqa yachayniyoqmi kanki”, nispa (Pro. 13:20). Chaynaqa, maskanaykim Diosta astawan serviq amistadkunata. Yolanda sutiyoq cristianam nin: “Diosta serviypi kallpanchakuq mozo-sipaskunawan amistad rurasqaymi, anchata kallpanchawarqa predicanaypaq hinaspa chayta ruraspa aswan kusisqa kanaypaq”, nispa.

¿Imatam tayta-mamakunaqa rurananku?

Yolandam nin: “Tayta-mamaytam anchata agradecekuni Jehová Diosta servinaypaq yachachiwasqanmanta”, nispa. Arí, tayta-mamakunaqa yanapanmankum churi-wawanku allinta tanteanankupaq. Pablom nirqa: “Tayta-mamakuna, qamkunapas wawa-churikichiktaqa [. . .] kasukuqtayá uywaychik Señorninchikpa yachachikuyninman hina”, nispa (Efe. 6:4). Kaypi nisqanman hinaqa, manam tanteasqankuman hinachu churi-wawankutaqa uywananku, aswanmi Diospa nisqanman hina. Piensasqankuman hina imatapas tarinankupaq warmankuta ninankumantaqa, Diospa agradonpaq kaqkunata haypanankupaqmi kallpanchananku.

Tayta mamakuna warmankuta Diosmanta yachachinankupaqqa judiokunaman Diospa kayna kamachisqanman hinam rurananku: “Churikikunamanmi sapa kutilla yachachinki wasipi kaspa, ñanpi purispa, puñuq yaykuspa chaynataq hatarispaykipas” (Deu. 6:6, 7). Evawan Carlosmi kimsa warmayoq kanku, paykunam ninku: “Wasipim sapa kuti rimarqaniku imakunata ruraspa Diosta tukuy tiempowan astawan servinamanta”, nispa. ¿Imapim rurasqanku tukurqa? Paykunam ninku: “Warmachallaraq kaspankum Diosmanta Yachachinapaq Escuelapi matriculakuyta munarqaku, chaymantam predicarqaku, tiempopa  risqanman hinam bautizakunankupaq tanteakurqaku hinaspa precursor karqaku”, nispa.

Tayta-mamapa ejemplonqa ancha allinmi. Carlosqa nintaqmi: “Señoraywanmi tantearurqaniku mana iskay uya kanaykupaq hinaspa congregacionpi kasqaykuman hina wasiykupi kanaykupaqpas”, nispa. Tayta-mamakuna, kaynatam tapukunaykichik: “¿Imayna kasqaykutam wawa-churiyku ñoqaykupi qawan? ¿Dios kuyasqayta qawankuchu orakusqaypi, Bibliata sapa punchaw estudianaypaq kallpanchakusqaypi, iñiqmasiykunamanta imayna piensasqaypi, predicaciontawan kusirikuyta chaynataq qollqeta imayna qawasqaypipas?”, nispa (Luc. 6:40). Yuyariychik, wawa-churikichikqa sapa punchawmi qawasuspaykichik cuentata qokunku nisqaykichikman hina mana ruraptikichikqa.

Warmakunata allinta uywanapaqqa correginam. Bibliam nin: “Imaynam kawsananpaqyá yachachiy warmataqa”, nispa (Pro. 22:6). Chaynatam rurarqaku Evawan Carlospas, ninkum: “Tiempochakurqanikum sapakamawan Bibliata estudianaykupaq”, nispa. Chaypaqqa tayta-mamakunam tanteananku, ichaqa atiendenankum warmankupa sapakama necesitasqankuta. Tayta-mamakunaqa allin tanteaq hinaspa entiendeqmi kananku. Ejemplopaq, mayqan takikuna mana allin kasqanta ninankumantaqa, yanapanankum Bibliapa nisqanman hina kikinku akllakunankupaq.

Yachankichá warmaykikuna allin portakusqankuta hinaspa paykunamanta ima munasqayki yachasqankutapas. Chayna kaptinpas yanapanaykipaqmi hinalla kallpanchakunayki. Kayta yuyariy: “Pozopi uku-uku yaku hinam runapa tanteayninqa. Imayna horqoytapas yachanmi entiendeq runaqa” (Pro. 20:5). Cuenta qokuqmi kanayki, wawa-churikipa sonqonpi mana allinkuna sapichakuyta qallariptinqa chayllam yanapanayki. Mana acusaspalla niy preocupasqa kasqaykita hinaspa cuidadollawan tapuy. Ichaqa, amayá rimasqaykitaqa tapuyllapiñaqa tikraruychu. Sonqomanta paykunapi interesakuspaqa mana sasachakuspallam yanapayta atinki.

 Hukkunapas yanapanmanmi

¿Iñiqmasinchikkuna atinmankuchu mozo-sipaskuna yanapayta Diosmanta yachasqankuta chaninchanankupaq? Tayta-mamankum warmankutaqa yachachinanku, chayna kaptinpas wakin iñiqmasinchikkunapas yanapanmankum, aswanraqmi ancianokunaqa. Astawanmi yanapana taytallan otaq mamallan Diosta serviq kaptinqa.

¿Imatam ancianokuna ruranmanku mozo-sipaskuna Diosta kuyanankupaq, allin qawasqa kanankupaq hinaspa allin sientekunankupaqpas? Polonia nacionmanta Mariusz sutiyoq ancianom nirqa: “Allinpunim mozo-sipaskunawan ancianokunapa rimasqanchikqa. Tukuy tiempom rimananchikqa manam sasachakuy kaptillanchu. Paykunawanqa rimachwanmi predicaspa, huñunakuy tukuyta otaq imallatapas invitaykuspa”. ¿Imanasqataq mana tapunkichu congregacionmanta ima piensasqankuta? Paykunawan imam kaqta rimaymi yanapanqa iñiqmasinchikman asuykunankupaq hinaspa congregacionpi allin sientekunankupaqpas.

Anciano kaspaykiqa, ¿kallpanchakuchkankichu congregacionnikipi llapan mozo-sipaskunata reqsinaykipaq? Rimasqanchik Albertom kunanqa anciano, ichaqa mozo kaspanmi sasachakuykunata atiparqa. Ninmi: “Watukuwaspanmi ancianokuna kallpanchawaspan consejawarqa”, nispa. Mozo-sipaskunapi interesakusqanchiktaqa qawachisuntaqmi Diosta servisqankupi allin kanankupaq orakuspapas (2 Tim. 1:3).

Allinmi congregacionpa rurayninkunapi llapanku ruranankupaq mozo-sipaskunata yanapayqa. Mana chayqa kay pachapi ruraykunamanmi qokurunmanku. ¿Yaqachu predicanaykipaq invitawaq hinaspa amistadnin kawaq? Paykunawan imatapas ruraychik, kusisqa hinaspa allin sientekunankupaq kallpanchaychik. Yolandam yuyarin: “Huk precursoram yanapawarqa. Chayraqmi kikiymanta predicayta munaspayqa paywan lloqsirqani”, nispa.

Qanmi tanteanaykiqa

Mozo-sipas, ¿imakunatam Diosta servispa haypayta munanki? Manaraq bautizasqa kaspaykiqa, ¿tantearunkiñachu bautizakunaykipaq? Jehová Diosta cheqapta kuyaspaykim bautizakunaykiqa, manam obligasqa kaspachu nitaq familiaykita qatipakuspachu.

Diosqa amistadnikim kanman, paymanta yachasqaykitapas pakata hinam qawawaq. Paymi Isaiaswan nirqa: “Amayá hukmanyaychikchu. Ñoqam Diosnikichik kani”, nispa. Jehová Diosman asuykuptikiqa payqa manam saqesunkichu. ‘Churinta alleq makinwan hapichkaq runa hinam allinta ruraspa atiyniywan pusasunki’ (Isa. 41:10).

[Willakuy]

^ par. 6 Wakinpaqa manam cheqap sutinkuchu.

[4 kaq paginapi dibujo]

Warmaykipa sonqonpi ima kasqanta yachanaykipaq kallpanchakuy

[6 kaq paginapi dibujo]

Jehová Diosta kuyasqaykiraykum bautizakunaykiqa