Yachachikuypa kasqanman rinapaq

Yachachikuyman rinapaq

¿Chaninchanchikchu librawananchikpaq Jehová Diospa rurasqanta?

¿Chaninchanchikchu librawananchikpaq Jehová Diospa rurasqanta?

 ¿Chaninchanchikchu librawananchikpaq Jehová Diospa rurasqanta?

‘Israelpa Diosnin Señorqa alabasqayá kachun. Payqa [. . .] runankunatam salvaykurqa.’ (LUC. 1:68.)

1, 2. a) ¿Ima ejemplowanmi tupachichwan librasqa kay necesitasqanchikta? b) ¿Ima tapukuykunatam kay estudiopi contestasun?

HOSPITALPI mana hampiy atina onqoywan kasqaykita piensariy. Chaypiqa achkallañam kachkanmanku qam hina onqoqkuna. Ichaqa yacharuwaq hampita huk doctor maskasqanta. ¡Mayna kusikuywanchá suyawaq doctorpa hampi tarinantaqa! Doctorqa llumpayta llamkaspan hinaspa kallpanchakuspan hampita tarirunman. ¿Imaynataq tarikuwaq chaymanta yacharuspa? Maynatachá doctortaqa agradecekuwaq hinaspa respetawaq qamtawan huk runakunatapas salvasqanmanta.

2 Ichapas nichwan chaynapi mana tarikusqanchikta, ichaqa allinta piensariptinchikqa aswan sasachakuypiraqmi kachkanchik, chaymi necesitanchik pipas libraykuwananchikta (leey Romanos 7:24). Librawaqninchikqa Jehová Diosmi, Payqa Churinpiwanmi tukuyta rurarqaku salvawananchikpaq. Kay estudiopim 4 tapukuykunata yachasun: ¿Imanasqataq librawananchikta  necesitanchik? ¿Imatam Jesusqa rurarqa librawananchikpaq? ¿Imatam Jehová Dios ruranan karqa? ¿Imaynatam qawachichwan paykuna librawasqanchik chaninchasqanchikta?

¿Imanasqataq librawananchikta necesitanchik?

3. ¿Imanasqataq huchata tupachinchik tukuy hinastinman chaylla miraruq onqoywan?

3 Huk willakuypa nisqanman hinaqa, 1918 watapim gripe onqoy tukuy hinastinman mirarurqa chaymi millonnintin runakuna wañururqaku, chaynaqa manam puntataqa pasarqachu. Wakin onqoykunaqa manam achka runakunatachu hapin ichaqa yaqa lliw hapisqantam wañuchin. * Huchata tupachisun chaylla miraruq onqoywan. Romanos 5:12 kaynata nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”. Chaymi nichwan kay onqoyman rikchakuqwanqa llapallanchik contagiasqa kasqanchikta, llapallanchik huchayoq kasqanchikrayku (leey Romanos 3:23). ¿Hayka runakunataq hucharayku wañunku? Pablom nirqa “llapallanchik” wañusqanchikta.

4. ¿Imaynatam runakunaqa qawanku runapa hayka tiempo kawsasqanta, ichaqa imaynatam Jehová Diosqa qawan?

4 Huchatawan wañuytaqa kawsakuyninchikpi haykapipas pasaqta hinallam runakunaqa qawanku. Ichaqa yaqa llapallankum mana allintachu qawanku pipas warmalla wañukuptinqa, pipas yuyaqyaspan wañukuptinñataqmi mana chaynatachu qawanku. Manam cuentata qokunkuchu unanchaqninchikpa kaymanta ima piensasqanta. Runakunaqa manam Diospa munasqanman hinachu unay tiempota kawsanchik. Paypa yupasqanman hinaqa manam pipas huk punchawllapas kawsarqachu (2 Ped. 3:8). Chaymi Bibliaqa nin vidanchikqa wayta otaq samay hinalla kasqanta (Sal. 39:5; 1 Ped. 1:24). ¿Imanasqataq vidanchik chayna kasqanpi piensananchik? Hucha imaman apawasqanchikmanta allinta entiendespam, astawan chaninchasun Jehová Dios librawananchikpaq tukuy ima rurasqanta.

5. ¿Imataq chinkarurqa hucharayku?

5 Imayna tarikusqanchikmanta entiendenapaqqa, qawasun hucharayku imakuna chinkarusqanta. Kaymanta entiendeyqa sasam kanman, hucha manaraq rikurichkaptin imayna vida kasqanta mana yachasqanchikrayku. ¿Imamantam rimachkanchik? Qallariypiqa Adanwan Evaqa mana pantaqmi karqaku. Chaymi controlaqku piensasqankuta, sientesqankuta hinaspa rurasqankutapas, chayna kasqankuraykum Diosta sapa punchaw aswan allinta servinmanku karqa. Ichaqa manam chaynatachu rurarqaku. Jehová Diosta mana kasukuspankum, kikinkupaqpas hinaspa ñoqanchikpaqpas chinkarachirqaku Diospa munasqanman hina kawsakuyta (Gen. 3:16-19). Chaymantapas, wañuyman apaq onqoywan hinam huchayoq rikurirurqaku, mirayninkunapas chaynallataqmi kanchik. Jehová Diosqa allin ruraq kasqanman hinam wañunankupaq sentenciarurqa, ñoqanchikmanmi ichaqa librasqa kanapaq suyakuyta qowanchik (Sal. 103:10).

Librawananchikpaq Jesuspa ima rurasqanmanta

6, 7. a) ¿Haykapim puntata Jehová Diosqa rimarqa librawananchikpaq pagananmanta? b) ¿Imatam yachanchik Abelpa hinaspa Diosta kasukuq wakin runakunapa animalkuna ofrecesqankumanta?

6 Jehová Diosqa yacharqam Adanpawan Evapa mirayninta librananpaq ancha valorniyoq kaqta pagananmanta. Genesis 3:15 willawanchik ima pagananmanta. Jehová Diosmi qomunan karqa huk ‘mirayta’ otaq libraqta,  paymi Satanasta puchukachinan karqa. Ichaqa librananpaq hamuspanmi chay mirayqa talonninpi kachusqa kaspan ñakarinman karqa. ¿Ima ninantaq talonninpi kachusqa kasqanqa? ¿Imakunawanmi ñakarinan karqa Diospa Akllasqan libraqninchikqa?

7 Runakunata salvananpaqmi, libraqninchikqa imatapas ruranan karqa, chaynapi huchanchik pampachasqa kananpaq hinaspa Dioswan runakuna allinyananchikpaqpas. ¿Imatam ruranan karqa? Qallariymantapacham qawakurqa sacrificio ruray necesitakusqanta. Diosman sonqo Abel, animalkunata ofreceptinmi Diosqa chaskiykurqa. Noey, Abraham, Jacob, Job hinaspa Diosta kasukuq huk runakunapa animalkuna ofrecesqankutapas Diosqa allinpaqmi qawarqa (Gen. 4:4; 8:20, 21; 22:13; 31:54; Job 1:5). Moisesman qosqan Leypipas Diosqa willarqam imapaq chaykuna rurakusqanmanta.

8. ¿Imatam ruraq sacerdotekunapa jefen Hucha Pampachana Punchawpi?

8 Leypa nisqanman hinaqa, Hucha Pampachana Punchawpi animalta ofrecesqankum ancha valorniyoq karqa. Sacerdotekunapa jefenmi kaytaqa sapa wata ruraq, hamuq tiempopi imakuna rurakunanta qawachispa. Puntataqa Jehová Diosmanmi ofrendakunata qoq sacerdotekunapa huchankumanta, hinaspañam mana sacerdote kaq wakin runakunapaqqa. Chaymantañam yaykuq Diospa yachanan karpanpi otaq templonpi chuyay-chuyay lugarman. Payllam chay lugarman yaykuyta atirqa hinaspa chay punchawllapitaq. Chaypim wañuchisqan animalpa yawarninta dedonwan sutuchiq contrato baulpa ñawpaqninman. Wakin kutikunapim baulpa hawanpi rikuriq kanchaq puyu, chaymi qawachiq Jehová Diospa tarikusqanta (Exo. 25:22; Lev. 16:1-30).

9. a) ¿Piwanmi tupachisqa Hucha Pampachana Punchawpi sacerdotekunapa jefenqa hinaspa animalkuna kañasqankupas? b) ¿Imawanmi tupan chuyay-chuyay sitioman sacerdotekunapa jefenpa yaykusqan?

9 Diospa yanapayninwanmi Pablo willarqa tukuy chay ruraykunapa ima ninanmanta. Qawachirqam sacerdotekunapa jefenqa Jesucristowan tupasqanta, animalkuna kañasqankutaq wañukusqanwan tupasqanta (Heb. 9:11-14). Jesuspa wañukusqanraykum hanaq pachaman riq 144.000 runakunapa hinaspa ‘sapaq ovejakunapa’ huchanku pampachasqa kanman (Juan 10:16). Chuyay-chuyay sitioman sacerdotepa jefen yaykusqanmi tupan Jesuspa hanaq pachaman yaykusqanwan, chaypim Jehová Diospa qayllanman presentarqa runakunapa rantinpi wañusqanta (Heb. 9:24, 25).

10. Bibliapa willakusqanman hina, ¿imam Jesusta pasanan karqa?

10 Qawasqanchikman hinaqa, Adanpawan Evapa mirayninta huchamanta librananpaqqa: Jesusmi vidanta qonan karqa. Diosmanta willakuqkunam Jesuspa puntantaraq kaykunamantaqa willarqakuña. Ejemplopaq, Danielmi nirqa “Akllasqa Kamachikuq” ‘wañuchisqa kananmanta’, chaynapi ‘mana allin rurasqanchikmanta pampachasqa kanapaq’ (Dan. 9:24-26). Isaiaspas nirqam: mana  chaskisqa, qatikachasqa, tuksipasqa otaq wañuchisqa kananta hinaspa runakunapa huchan qechunantapas (Isa. 53:4, 5, 7).

11. ¿Imayna kaspanmi Jesusqa qawachirqa ñoqanchikrayku vidan qoy munasqanta?

11 Manaraq kay Allpaman hamuchkaspanmi Diospa Churinqa yacharqaña runakunata librananpaq llumpay ñakarinanta hinaspa wañuchisqa kanantapas. Chayna pasananmanta Taytan willaptin, ¿manchakurqachu otaq qepancharurqachu? Manam. Payqa kusisqam Taytanta kasukurqa (Isa. 50:4-6). Kay Pachapi kaspanpas tukuypim kasukurqa. ¿Imanasqa? Taytanta kuyasqanraykum. Nirqam: “Hatu-hatun kuyakuyniyoqqa amistadninkunapa rantinpi wañuqmi”, nispa (Juan 14:31; 15:13). Arí, Diospa Churin kuyawaptinchiktaqmi salvakusunqa. Payqa vidantam qorqa, ichaqa salvawananchikpaqmi chay rurayta munarqa.

Librawananchikpaq Jehová Diospa rurasqanmanta

12. ¿Pipa munasqanraykum salvasqa kachwan, hinaspa ima cumplikunanpaqmi librasqa karqanchik?

12 Jesusqa manam kikinmantachu tantearqa ñoqanchikrayku wañunanpaqqa. Chaytaqa Jehová Diosmi tantearurqa munaynin cumplikunanpaq. Pablom entiendechirqa animalkuna kañananku templopa altarninqa Diospa munasqanwan tupasqanta (Heb. 10:10). Chaymi imamantapas puntataqa Jehová Diosta agradecekunanchik librawasqanchikmanta, chayqa munasqanraykum rurakurqa (Luc. 1:68). Chaymantapas, qawachinmi runakunata ancha kuyasqanta (leey Juan 3:16).

13, 14. ¿Imaynatam Abrahampa rurasqan yanapawanchik ñoqanchikrayku Diospa rurasqanta entiendenapaq?

13 ¿Imaynam Jehová Dios tarikurqa hatun kuyakuyninta qawachiwananchikpaq? Chaymanta allinta entiendenapaqmi yanapawasun Bibliapi tarikuq huk willakuy. Jehová Diosmi serviqnin Abrahamta nirqa churin Isaacta wañuchinanpaq. Kay rurayqa llumpay sasam karqa churinta Abraham anchata kuyasqanrayku. Jehová Dios chayta yachaspanmi nirqa: “Sapallan kuyasqayki churiki Isaacta”, nispa (Gen. 22:2). Ichaqa Abrahanmi entienderqa Isaacta kuyasqanmantaqa, Diospa munaynin ruray aswan allin kasqanta chaymi kamachisqanta kasukurqa. Jehová Diosqa manam saqerqachu hamuq tiempopi rurananta hina Isaacta Abraham wañuchinantaqa, aswanmi huk angelta kamachirqa wañuchinanpaq kachkaptin harkarunanpaq. Abrahamqa munarqam Diospa kamachisqan kasukuytaqa, yacharqataqmi churinta wañuchispanqa kawsarimuptin tupanantapas. Payqa yacharqam Isaacta Dios kawsarichimunanta. Chaymi Pablo kaynata nirqa: “Abrahamqa wañusqakunamanta kawsarimuchkaqta hinam churinta chaskiykurqa”, nispa (Heb. 11:19).

14 Manachá entiendeyta atinchikmanchu churinta wañuchinanpaq preparaspan Abrahampa imayna tarikusqanmantaqa. Chayna tarikusqanmi qawachin ‘kuyasqan Churinta’ wañunanpaq qospan Jehová Dios imayna sientekusqanta (Mat. 3:17). Diosqa astawanraqchá llakikurqa. Payqa millonnintin  otaq waranqa millonnintin watakunam Churinwan cielopi karqaku. ‘Ruraysiq maestroqa’ kusisqam Taytanwan llamkarqa, hinaspam paymanta willakurqa otaq ‘Simi’ karqa (Pro. 8:22, 30, 31; Juan 1:1). Manam entiendechwanchu Churinta ñakarichiptinku, burlakuptinku hinaspa mana allin runata hina wañuchiptinku Jehová Diospa imayna tarikusqantaqa. ¡Librawananchikpaqmi chayta rurarqa! ¿Imaynatam qawachichwan agradecekusqanchikta?

¿Imaynatam qawachichwan paykuna librawasqanchik chaninchasqanchikta?

15. a) ¿Imaynatam tukurqa Jesuspa ñoqanchikrayku wañukusqan? b) ¿Ima bendicionkunatam chaymantapacha chaskinchik?

15 Jesuspa ñoqanchikrayku wañusqanqa tukurqa kawsarimuspan hanaq pachaman kutiptinmi. Taytanwan huñunakuspanmi wañukusqanpa valorninta qorqa. ¿Ima bendicionkunatam chaywan chaskinchik? Puntataqa Jesucristopa wawqenkunapa huchanmi pampachasqa karqa, chaymantañataq ‘kay pachapi llapallan runakunapa’ huchankupas. Chaymantapas, huchankumanta wanakuspa Jesuspa qatiqnin kaqkunaqa Diospa amistadninmi kanmanku (1 Juan 2:2). Hinaptinqa, ¿imatam rurananchik?

16. ¿Ima ejemplon qawachin Jehová Dios librawasqanchikmanta agradecesqa kananchikta?

16 Qallariypi rimasqanchikta yuyarisun. Onqoynikipaq hampi tariruq doctormi kasqaykiman rispan wakin onqoqkunatawan nisunkichikman hampisqa kanaykichik seguro kasqanta, ninmantaq sanoyanaykichikpaqqa nisqanta kasukunaykichikpaqpas. Ichaqa achkam mana kasukunmankuchu llumpay sasa kasqanta piensaspanku. ¿Imatam rurawaq? ¿Manachu kasukuwaq allin kasqanta yachachkaspapas? ¡Kasukuwaqchá! Doctortachá anchata agradecekuwaq hinaspa tukuy nisqanta kasukuwaq. Hukkunatapas kallpanchawaqchá hampichikunankupaq. Chaynataqmi Jehová Diosta llapallanchik sonqomanta agradecekunchik Churinta wañunanpaq qospa librawasqanchikmanta (leey Romanos 6:17, 18).

17. ¿Imaynatam qawachichwan Jehová Dios librawasqanchikmanta agradecekusqanchikta?

17 Huchamantawan wañuymanta Jehová Diospa chaynataq Churinpa librawasqanchikmanta agradecekusqanchiktam qawachisun imayna kawsasqanchikwan (1 Juan 5:3). Kallpanchakusunmi huchawan mana vencechikunapaq, manataqmi yachachkaspaqa rurasunchu mana allintaqa nitaq iskay uyapas kasunchu. Chayna kaspaqa, ¿imaynatataq qawachichwan librawasqanchikmanta agradecesqa kasqanchikta? Aswanqa agradecekusqanchiktam qawachisun Dioswan amistadninchik allin kananpaq kallpanchakuspa (2 Ped. 3:14). Chaynataq, runakunamanmi willasun librawasqanchikmanta, chaynapi Jehová Dioswan allin amistad kanankupaq hinaspa hamuq tiempomanta suyakuyniyoq kanankupaqpas (1 Tim. 4:16). ¿Manachu Jehová Dioswan Jesuspas merecenku tukuy tiemponchikwan hinaspa kallpanchikwan alabanata? (Mar. 12:28-30.) Llapallanchikmi suyanchik huchamanta librasqa kayta hinaspa Diospa munasqanman hina mana pantaq kaspa wiña-wiñaypaq kawsakuytapas. ¡Tukuy kaykunaqa rurakunqa Jehová Dios librawananchikpaq rurasqanwanmi! (Rom. 8:21.)

[Willakuy]

^ par. 3 Llapallan runakunamantam tawa kaq parte masnin chay gripewan onqorqaku, paykunamantañataq yaqa chunka kaq parte wañurqaku. Kantaqmi ébola sutiyoq onqoypas, mana ancha reqsisqa kaspanpas kaywan onqoqkunataqa yaqa llapallantam wañuchirqa.

¿Imatam niwaq?

• ¿Imanasqataq necesitanchik librasqa kayta?

• ¿Imaynam kananchik vidanta Jesus qosqanrayku?

• ¿Imaynam tarikunki librawananchikpaq Jehová Diospa rurasqanmanta?

• ¿Imaynatam Jehová Diosta agradecekuwaq librawananchikpaq rurasqanmanta?

[Kay yachachikuypa tapukuyninkuna]

[27 kaq paginapi dibujo]

Hucha Pampachana Punchawpi sacerdotekunapa jefenqa Jesuswanmi tupan

[28 kaq paginapi dibujo]

Churinta Abraham wañuchiy munasqanmi qawachirqa Jesusta Jehová Dios qosqanta