Yachachikuypa kasqanman rinapaq

Yachachikuyman rinapaq

Chaskispa agradecekusun qosunñataq sonqomanta

Chaskispa agradecekusun qosunñataq sonqomanta

 Chaskispa agradecekusun qosunñataq sonqomanta

BIBLIAPA nisqanman hinam kuyakuq Jehová Diosninchikqa sapakama serviqninkunamanta nanachikun (1 Ped. 5:7). Chaytam qawachiwanchik tukuy sonqonchikmanta servinapaq yanapawaspanchik (Isa. 48:17). Payqa munanmi chay yanapakuyta allinta servichikunapaq, aswanraqmi ima sasachakuypipas tarikuptinchikqa. Qawasunchikyá Moisespa chaskisqan Leypa ima nisqanta.

Serviqninkunata Jehová Dios kuyasqanraykum Israel llaqtanta kamachirqa wakchakunata, viudakunata hinaspa forasterokunatapas yanapanankupaq (Lev. 19:9, 10; Deu. 14:29). Payqa yachantaqmi kunan tiempopi wakin serviqninkunapas iñiqmasinkumanta yanapakuy necesitasqankuta (Sant. 1:27). Chaymi Jehová Dios mayqan serviqnintapas yanapawananchikpaq kallpanchaptinqa, manam wischupakunachu. Aswanqa agradecekuspam chaskikunanchik.

Chaymantapas Bibliaqa nintaqmi paypa serviqninkunaqa qokuykuq kanankumanta. ¿Yuyachkankichu Jesuspa rimasqan iskay qollqechakuna churaq wakcha viudamanta? (Luc. 21:1-4.) Payqa yaqapaschá viudakunapaq Leypa nisqanman hina yanapakuyta chaskirqa. Wakchaña kaptinpas, runakunaqa manam paytaqa imapas chaskiq kasqanwanchu yuyarinku, aswanmi qokuykuq kasqanwan. Arí, qokuykuq kasqanwanqa kusisqam tarikurqa, Jesuspa nisqanman hinam, ‘imapas chaskiqmantaqa aswan kusisqaqa imapas qokuykuqmi’ (Hech. 20:35). Hinaptinqa, ¿imaynatam ñoqanchikpas qokuykuq kaspa kusisqa kachwan? (Luc. 6:38.)

¿Imaynatam Jehová Diosman kutichichwan?

Jehová Dios yanapaykusqanmantam salmista tapukurqa: “¿Imatataq Tayta Diosmanqa kutichisaq?”, nispa (Sal. 116:12). ¿Ima yanapakuykunatataq chaskirqa? ‘Sasachakuypi llakillawanña’ kachkaptinmi Jehová Dios yanaparqa. Arí, ‘wañuymantam librarqa’. Chaymi payqa agradecekusqanta qawachiyta munarqa. ¿Imaynata? Paymi nirqa: “Diosmanmi prometekusqaykunata cumplisaq”, nispa (Sal. 116:3, 4, 8, 10-14). Arí, payqa nichkarqam Jehová Diosman prometekusqanta hinaspa kamachikuyninkunatapas cumplinanmanta.

Ñoqanchikpas chayna ruraytaqa atichwanmi. ¿Imaynata? Diospa kamachikuyninkunata tukuy tiempopi kasukuspanchik. Chaymi imamantapas puntapi Dios yupaychayninchikta churananchik hinaspam saqekunanchik chuya espiritunwan yanapawananchikta (Ecl. 12:13; Gal. 5:16-18). Arí, Jehová Diosmanqa manam haykapipas tukuy qowasqanchikmantaqa pagayta atichwanchu. Chayna kaptinpas  tukuy sonqonchikwan servispanchikmi kusichiyta atichwan (Pro. 27:11). ¡Ima sumaqmi chayqa!

Iñiqmasinchikkunata yanapasun

Llapallanchikmi reqsikunchik imallapipas iñiqmasinchikkuna yanapawasqanchikmanta. Jehová Diosqa llaqtanwanmi achka yanapakuykunata qowarqanchik hinaspapas pantasqa religionpi tutayaypi hina kasqanchikmantam librawarqanchik (Juan 8:32). Chaymantapas huñunakuykunapi hinaspa asambleakunapim ‘allin yuyayniyoq confianza sirvientewan’ yachachiwarqanchik manaña ñakarispa wiñay kawsayta haypanapaq (Mat. 24:45-47). Arí, achka bendicionkunatañam Diospa llaqtanpiqa chaskirqanchik, chaynallataqmi hamuq tiempopipas chaskisunchik. Hinaptinqa, ¿imatataq rurachwan iñiqmasinchikkunapaq?

Apostol Pablom qellqarqa: ‘Llapallan iñiqkunatam [. . .] Cristo hukllachawanchik [. . .] cuerponpa partenkunata [. . .] hina, sapakama rurananchikta allinta ruraspa kuyakuywan kallpanchakuspa sumaqta wiñananchikpaq’, nispa (Efe. 4:15, 16). Hanaq pachaman riqkunapaq qellqaptinpas, kay yachachikuyqa kunan tiempopi llapallan cristianokunatapas yanapanmanmi. Arí, llapallanchikmi yanapanakuspa kallpanchanakuchwan. ¿Imaynata?

Iñiqmasinchikkunata Diosta hinalla servinankupaq kallpanchaspa (Rom. 14:19). Chaymantapas yanapachwanmi paykunawan kusisqalla, kuyakuq, hawkalla, pacienciakuq hinaspa sumaq sonqo kaspa (Gal. 5:22, 23). Yanapachwantaqmi ‘allin ruraykunawan hinaspa kapuqninchikwan yanapanakuspapas’ (Heb. 13:16; Gal. 6:10). Pablopa nisqanman hinam mozo-sipaskunapas, yuyayniyoqkunapas kuyakuyninkuwan iñiqmasinchikkunata kallpanchanmanku.

Chaymantapas, llapallanchikmi imapas ruray yachasqanchikta, kallpanchikta hinaspa imapas kapuqninchikta servichikuchwan predicananchikpaq. Jesusmi nirqa: “Mana imallawanmi chaskirqankichik”, nispa. Hinaptinqa, ¿imatam rurananchik? Kikinmi nirqa: ‘Mana imallapaqtaqyá qamkunapas qoychik’, nispa (Mat. 10:8). Chaynaqa kallpanchakuyá Jesuspa qatiqnin kanankupaq runakunata predicaypi (Mat. 24:14; 28:19, 20). Ichaqa, ¿imatam rurawaq munasqaykiman hina predicayta mana atispaykiqa? Yuyariy Jesuspa rimasqan wakcha viudamanta. Pay asllata qoptinpas Jesusqa nirqam hukkunamantaqa achka qosqanta, chay qosqanqa tukuy atisqanmi karqa (2 Cor. 8:1-5, 12).

Agradecekuspa chaskisun ima yanapakuytapas

Wakinpim ichaqa ñoqanchik necesitanchik wawqe-paninchikkunapa yanapakuyninta. Hinaptinqa chaskikusunyá chay yanapakuytaqa, kaymi yanapawasun imapas sasachakuyninchikta atipanapaq. Jehová Diosmi congregacionpi ancianokunata churarqa serviqninkunata kuyakuywan cuidanankupaq. Paykunam ima sasachakuypi kaptikipas yanapasunki (Hech. 20:28). Ancianokuna hinaspa wawqe-paninchikkunaqa munankum ima sasachakuynikipipas yanapaykuyta chaynataq consuelaytapas (Gal. 6:2; 1 Tes. 5:14).

Hinaptinqa sumaq sonqowanyá chaskikuy, amataq qonqaychu chay yanapakuy chaskisqaykimanta agradecekuytapas. Yuyariy chayna yanapakuywanmi Diosqa kuyakuyninta qawachiwanchik (1 Ped. 4:10). Manamá kay pachapi runakuna hinaqa kayta munanchikchu.

 Entiendeq kasunchik

Filipos llaqtapi iñiqmasinkunaman apostol Pablo qellqaspanmi, Timoteomanta nirqa: “Manam pipas pay hinaqa kanchu ñoqawanqa, ñoqa hinam paypas qamkunamanta cheqaptapuni sientin, wakinkunaqa kikillankupaq maskaspallam purinku Jesucristopa munasqanta mana maskaspanku”, nispa (Fili. 2:20, 21). Pablopa chay nisqanpi piensarispam tapukunanchik: “¿Imatataq rurayman munasqallaypi mana llumpayta piensanaypaq?”, nispa.

Manataqmi iñiqmasinchikkunataqa hikutanachu imaynatapas yanapawananchikpaqqa. ¿Imanasqa? Piensarisun kaypi: Anchatachá agradecekuchwan atisqankuman hina qollqenkuwan yanapawaptinchik, ichaqa manamá hikutachwanchu qowananchikpaqqa. Chaynallataqmi yanapawananchikpaq tiemponkutapas llumpaytaqa mana mañakunachu, yanapakuyta munaptinkupas. Ñoqanchikqa munanchikmi mana obligasqalla kusikuywan iñiqmasinchikkuna yanapawananchikta.

Iñiqmasinchikkuna tukuy necesitasqanchikpi yanapaykuyta munaspankupas, wakinpiqa manapaschá atinqakuchu. Chayna kaptinqa, segurom kawaq salmos qellqaqta hina Jehová Dios yanapasunaykimanta (Sal. 116:1, 2; Fili. 4:10-13).

Hinaptinqa, amayá qepanchasunchu Jehová Diospa yanapakuy qowasqanchiktaqa, aswanraqmi sasachakuy tiempopiqa (Sal. 55:22). Payqa munanmá agradecekuspa chaskikunanchikta. Munantaqmi kusikuywan imatapas qonanchikta. Chaymi ‘sonqonchikpi tanteasqanchikman hina’ cheqap yupaychayta yanapakusun tukuy atisqanchikwan (2 Cor. 9:6, 7). Chaynapim, imatapas chaskispayki agradecekunki, qospaykiñataq tukuy sonqowan ruranki.

[31 kaq paginapi dibujokuna hinaspa recuadro]

Yanapawasqanmantaqa, “¿imatataq Tayta Diosmanqa kutichisaq?” (Sal. 116:12)

▪ Kallpanchakuy ‘allin ruraykunawan’ iñiqmasikikunata yanapanaykipaq

▪ Sumaq rimaykunawan iñiqmasikikunata kallpanchay

▪ Atisqaykiman hina kallpanchakuy Jesuspa qatiqnin kanankupaq runakunata predicaypi