Yachachikuypa kasqanman rinapaq

Yachachikuyman rinapaq

Allin noticiam chayan karu llaqtakunaman

Allin noticiam chayan karu llaqtakunaman

 Allin noticiam chayan karu llaqtakunaman

TUVAM tarikun Rusiapi, Siberia hinaspa Mongolia nacionpa hichpallanpi. Chaypi runakunaqa karu-karu llaqtakunapim yachanku chaymi Diospa Gobiernonmanta willayqa sasa. Ichaqa, chay lawmantam Kyzyl sutiyoq llaqtaman achka runakuna capacitacionman hamurqaku. Hamunankumanta yacharuspanmi Maria sutiyoq huk precursora tantearurqa lliw hamuqkunata predicananpaq.

Mariam willawanchik ima pasasqanmanta: “Profesora kaspay llamkasqay escuelapim, viciokunata imayna saqenamanta yachachiy kanan karqa. Chaymanmi hamunanku karqa Tuva lawpi kaq karu llaqtakunamanta yaqa 50 runakuna. Paykunaqa karqa profesorkuna, runata consejota qospan yanapaqkuna, warmakuna respetasqa kananpaq qawaqkuna hinaspa hukkunapas”. Mariaqa munarqam predicayta, ichaqa huk sasachakuyninmi karqa. Paymi nin: “Penqakuqmi kani chaymi sapallay predicaytaqa manchakuni. Ichaqa Jehová Diostam mañakurqani kallpata qowaptin mana manchakunaypaq hinaspa paykunata predicanaypaq”, nispa. ¿Imapim chay rurasqan tukurqa?

Paymi willawanchik: “Tarirurqanim manchakuymanta willaq ¡Despertad! revistata, hinaspam piensarqani: ‘Kaymantaqa leeytachá munanqa runakunata consejaspan yanapaqqa nispa’. Chaymi escuelaman aparqani. Chay punchawmi oficinayman rirqa huk profesora, hinaptinmi revistata qorqani. Payqa kusisqam chaskiykuwarqa. Niwarqam paypas chayna manchakuq kasqanta. Paqarinnintintam Lo que los jóvenes preguntan. Respuestas prácticas (volumen 1) nisqa librota aparqani, chaytapas chaskiykuwarqam. Allinta chaskiwaptinmi piensarqani hukkunapas munanankumanta. Chaymi escuelaman aparqani Los jóvenes preguntan librota huk cajata hinaspa huk qellqakunatapas”. Mariapa apasqan librokunatam lliwta chaylla apakurqaku. Mariaqa nintaqmi: “Predicasqay profesorapa amistadninkunam llamkasqay oficinaman hamuspanku tapukurqaku: ‘¿Maypitaq librota aypuchkanku?’”, nispa. ¡Librokuna tarinanku sitiomanmi rirqaku!

Capacitacionqa sabadotam tukurqa. Chay punchawqa Mariaqa manam llamkarqachu, chaymi oficinanpi achka mesakunapi qellqakunata saqerqa hinaspa pizarrapipas kaynata qellqarqa: “Kuyasqay profesorkuna qamkunapaq hinaspa reqsinakusqaykichikpaq kay qellqakunata apakuychik. Kaykunam yanapasunkichik llamkaynikichikpi, aylluykichiktapas kallpanchanqam”, nispa. ¿Imapim tukurqa? Paymi nin: “Chay punchawmi oficinayman rispay qawarqani yaqa lliw qellqakuna apakusqankuta. Utqayllamanmi huk librokunatawan revistakunata apamurqani”, nispa. Yachachikuy tukuykamaqa Mariam aypurusqa 380 revistakunata, 173 librokunata hinaspa 34 folletokunata. Paykunam llaqtankuman qellqakunata aparqaku. Mariam kaynata nin: “Ancha kusisqam kachkani Tuva lawpi karu llaqtakunaman allin noticia chayasqanwan”, nispa (Ecl. 11:6).

[32 kaq paginapi mapa]

(Imayna kasqanmanta yachanapaq qaway kay qellqata)

RUSIA

TUVA