Machuyachkaspapas astawan Diosta servisunchik

‘Jehová Diospa templonpi plantasqa hinam kachkan.[. . .] Chay sachaqa machuyaruspanpas ruruyoqmi kanqa.’ (SALMO 92:​13, 14.)

1, 2. a) ¿Imawantaq tupanaykachinku machuyaytaqa? b) ¿Imatam Diosqa Bibliapi prometen huchapa atipasqan kasqanchikmanta?

YUYAQÑA KAYQA. ¿Imapim yuyaymanachisunki? ¿Machuyaypichu? ¿Karullataña uyariypichu? ¿Kallpaykipas pisiyarunanpichu chaynataq makikipas chakikipas katkatananpichu? ¿Yuyaymanachisunkichu Eclesiastes 12:1-7 nisqanman hina “mana allin tiempokuna” hamuptin imayna tarikuymanta? Chayna kaptinqa, Eclesiastes libropi 12 rakiyninpi nisqanman hina machuyachkaspaqa allinmi kanman musyariyqa Unanchawaqninchik Jehová Diospa munaynin hina mana kasqanta, aswanqa Adanpa huchallikusqanmanta ñakarisqanchikta (Romanos 5:12).

2 Machuyaruyqa manapunim ñakakunapaqchu, aswanqa tiempo pasasqanman hina wiñaptinchik chaynataq yuyayniyoq kaptinchikpas kusikunchikmi. Soqta waranqa wataña huchapa munaychakusqan kasqanchikpi sasachakuykuna qawasqanchikqa allillamantam chinkanqa. Diosta llapallan kasukuq runakunam kusikuspa kawsakunqaku Paypa munasqanman hina manaña machuyastin nitaq wañukustinpas (Genesis 1:28; Apocalipsis 21:4, 5). Hinaptinmi manañam mayqanninkupas ninqakuñachu: “Onqochkanim” nispaqa (Isaias 33:24). Yuyaqkunaqa “mozo kasqanpi hina kallpayoqraqchá” rikurirunqa, hinaptinmi “aychallanpas rikurirunqa mozo kasqanpi” hinaraqchá (Job 33:25). Kunanmi ichaqa, Adanpa huchallikusqanmanta llapallanchik huchallikuypaq kasqanchikwan atipanakunanchikraq. Chayna kaptinpas, Jehová Diospa serviqninkunaqa machuyachkaspankupas suma-sumaq bendicionkunatam chaskikunku.

3. ¿Imaynatataq cristianokunaqa ‘machuyaruspanpas ruruyoq kanqaku’?

 3 Diospa Palabranmi niwanchik: Jehová ‘Diospa templonpi plantasqa hina kaqkunaqa [. . .] machuyaruspanpas ruruyoqmi kanqa’ nispa (Salmo 92:13, 14). Salmo qellqaqmi tupanaykachispa willan Jehová Diospa serviqninkuna maskiña machuyaptinkupas servisqankupi ñawparinankuta. Bibliapipas chaynataq tiemponchikpipas achkallañam yuyaqkunapa rurasqanku qawanapaq kachkan.

“Templomanta mana lloqsiqchu”

4. ¿Imaynatam Diosmanta willakuq Anaqa Diosta servisqanta qawachirqa, hinaspa imaynatam Jehová Diosqa bendeciykurqa?

4 Diosmanta willakuq Anata yuyariy. Payqa 84 watayoq kaspanmi “templomanta mana lloqsiqchu, tuta punchaw Señorta servispanmi ayunaq hinaspa mañakuq”. Leviy ayllumanta miraynin taytan mana kaptin, aswanqa “Aserpa mirayninmanta” templopiqa manamá yachanmanchu karqa. Musyariy maynataraqchá sapa punchaw kallpanchakurqa templopi kananpaq tempranomanta ofrendapaq tardeykuq ofrendata qonankukama. Ichaqa kallpanchakuspa Diosta servispanmi bendecisqa karqa, paymá qawarqa Joseywan Mariaqa temploman Leypi kamachisqanman hina Jehová Diosman presentanankupaq Jesus wawata apaptinku. Rikuykuspanmi, Anaqa “chay horallapi Diosta alabaspan wawa Jesusmanta willakuyta qallaykurqa Jerusalenpi libre kanankupaq llapallan suyaqkunaman” (Lucas 2:22-24, 36-38; Numeros 18:6, 7).

5, 6. ¿Imaynatam achka yuyaq wawqe-paninchikkunapas ruranku willakuq Anapa rurasqanman hina?

5 Kunanpas achka yuyaq wawqe-paninchikkunaqa Anapa rurasqanman hina huñunakuykunaman mana faltakunkuchu, mañakullankutaqmi Diospa munayninpas cumplikunanpaq chaynataq mana amispa allin noticiakuna predicaypipas kallpanchakunku. Pusaq chunka watayoq wawqenchik huñunakuykunaman warminwan rillaqmi nirqa: “Huk lawkunaman riymantaqa huñunakuykunallapi tarikuytam munaniku. Jehová Diospa serviqninkuna tarikusqankupim ñoqaykupas chaypi kaytam munaniku. Chaypim hawkalla tarikuniku” nispa. ¡Maynataraqmá chayqa ñoqanchiktapas kallpanchawanchik! (Hebreos 10:24, 25.)

6 80 watayoq masnin kaq Jean sutiyoq viuda paninchikmi nin: “Imapas Diosta yupaychanapaq kaptin, atispayqa manam faltakunichu. Wakin kutikunapiqa  cheqaptamá llakisqa tarikuni, ichaqa ¿imanasqamá ñoqa llakikuptiyqa wakinkunapas llakikunmanku?”, nispa. Hinaptinmi, kusikuywan willakun huklaw nacionkunaman Diosta yupaychananpaq risqanpi kusikusqanta. Pasasqan illasqallanpi paywan riqkunata nirqa: “Manañam munanichu paseakuqlla riytaqa. Aswanqa, ¡predicaytam munachkani!”, nispa. Chay illasqan llaqtapa imayna rimasqankuta mana yachachkaspanpas, paninchik Jeanqa kallpanchakurqa wakin runakunallatapas Bibliamanta predicananpaq. Chaymantapas, aslla wawqe-paninchik kaq congregacionpi achka watatam yanaparqa, chaytam rurarqa huk rimayta yachananraq kaptinpas hinaspa huñunakuykunaman rinanpaq huk horata illanan kaptinpas chaynataq wasinman kutikunanpaq huk horata illanan kaptinpas.

Diosmanta astawan yachaypi afanakusun

7. ¿Imaynatam yuyaqña kaspanpas Moisesqa qawachikurqa Diosta allinta reqsiruyta munasqantapas?

7 Tiempopa risqanman hinam pipas allin yachaqpas chaynataq allin entiendeqpas kanman (Job 12:12). Ichaqa, manamá tiempopa risqan hinallachu Diosmanta allin yachaqqa kasunchik. Chaymi, ñawpapi imapas yachasqallankuwan takyaruymantaqa Diosman sonqo serviqninkunaqa tiempopa risqanman hina ‘aswan yachayniyoq kanankupaqmi’ kallpanchakunku (Proverbios 9:⁠9). Jehová Dios llaqtanta librananpaq kamachiptinmi Moisesqa 80 watanpiña karqa (Exodo 7:⁠7). Chay tiempopiqa, manamá llapallan runakunachu chayna watayoqqa karqaku, chaymi nirqa: “Runapa kawsaypaq kawsasqaykuqa qanchis chunka watallañamiki. Allinta takyaqqa kawsallaniku pusaq chunka watallañamiki” nispa (Salmo 90:10). Moisesmi ichaqa astawan yachananpaq kachkaptinpas manapunim haykapipas llumpay yuyaqpaq hapikurqachu. Unay watataña Diosta servispan, Jehová Diospa achka sapaqchasqan ruraykunapi servispanpas chaynataq sasa ruray kaqpi nanachikuspanpas, Jehová Diosta mañakurqa: “Ruegakuykim qampa munasqaykita yachachiwanaykipaq chaynapi qamta reqsinaypaq” nispa (Exodo 33:13). Moisesqa munallarqamá Jehová Diosta alli-allinta reqsiruytaqa.

8. ¿Imaynatam Danielqa 90 watayoq masña kachkaspanpas Diosmanta astawan yachaypi afanakusqanta qawachirqa, hinaptin imapim rurasqanqa tukurqa?

8 Bibliapa nisqanman hina willakuq Danielqa 90 watayoq masña  kachkaspanpas hinallatam Diospa Palabrantaqa estudiarqa. Chay ‘librokunata’ estudiaspa tarisqanmi kallpancharqa Jehová Diosta ruegakuspan mañakunanpaq, estudiasqanmanta wakinchiki Levitico, Isaias, Jeremias, Oseas hinaspa Amos librokuna karqaku (Daniel 9:1, 2). Mañakusqanta uyarispanmi, Diosqa revelacionpi qawachirqa Akllasqa Kamachikuq hamunanmanta hinaspa qepa tiempokunapi Diosta yupaychanamanta (Daniel 9:20-27).

9, 10. ¿Imatam wakin wawqe-paninchikkuna rurarqaku Diosta serviypi astawan afanakunankupaq?

9 Moisespa chaynataq Danielpa rurasqanman hina ñoqanchikpas Diosmanta astawan yachaypi afanakuspa chaykunallapiña atinanchikkama ocupakusunchik. Chaynatamá achka wawqe-paninchikkuna ruranku. Worth sutiyoq wawqenchikqa congregacionpi punta apaqmi 80 watanpi masña kaspanpas, payqa “allin yuyayniyoq confianza sirviente” sapa kutilla Bibliamanta horqosqan qellqakunata leenanpaqmi kallpanchakun (Mateo 24:45). Payqa nillantaqmi: “Cheqapmanta astawan yachaspaymi sonqoymantapuni kusikuni, kusikunitaqmi chayraq achikyamuchkaq hina aswan-aswan punchawyarusqanta qawaspaypas” nispa (Proverbios 4:18). Fred sutiyoq wawqenchikqa Diospa llaqtanpi astawan servinanpaq nombrasqa kaspan soqta chunka wata masña servichkan, payqa kallpanchakunmi wawqe-panikunawan Bibliamanta rimaspan. Hinaptinpas ninmi: “Bibliapa nisqantaqa yuyayniypi allintam hatallinay. Pipas Bibliapa nisqanta kawsachkaq hina allinpaq hapiptinqa hinaspa yachasqanqa ‘cheqap yachachikuykunapa’ nisqanman hina kasqanta musyakuptinqa, manamá Bibliamanta yachaylla yachanqachu. Aswanqa musyakunqapuni alajapi hina imaynam sapaq sumaq kaqnin takyasqanta” nispa (2 Timoteo 1:13).

10 Yuyaqña kayqa manamá mosoq kaq nitaq sasa entiendena willakuykunata yachananchikmantaqa harkawanchikmanchu. Achka runakunam leeytawan qellqaytaqa yacharunku 60, 70 chaynataq 80 watanpiña kaspanku. Wakinkunañataqmi huklaw nacionkunapa mana yachasqanku idiomata yacharunku, chaynatamá Jehová Diospa testigonkunamanta wakinqa rurarunku allin noticiakunata huklaw nacionkunamanta runakunata willakunankupaq (Marcos 13:10). Harry sutiyoq wawqenchik warminpiwan yaqa 70 watanpiña karqaku portugués  nisqa rimayniyoq runakunata yanapayta qallariptinku. Paymi nin: “Cheqaptamá, machuyaruspaqa imapas aswan sasa ruranapaqñam kanman” nispa. Chayna kaptinpas, kallpanchakuspanku iskayninkuqa Bibliamanta estudiarqaku portugués rimaq runakunawan. Harryñataqmi achka watataña distrito nisqa asambleakunapi discursotapas qonmi.

11. ¿Imanasqataq wakin yuyaqkunapa rurasqankumanta rimachkanchik?

11 Cheqapmá, wakinkuqa onqospanku otaq imawanpas sasachakuspanku manam chayna sasa ruraytaqa atinqakuchu. Hinaptinqa, ¿imanasqataq wakin yuyaqkunapa rurasqankumanta rimachkanchik? Manamá llapallanku chaynataraq ruranankupaq nispachu. Aswanqa, Diosman sonqo punta apaqkunamanta Hebreo congregacionman cartaspan apostol Pablopa nisqanman hinam kallpanchachkanchik, paymi nirqa: “Imaynam kawsasqankupi yuyaymanaspayá paykuna hina confianzayoq kaychik” nispa (Hebreos 13:⁠7). Yuyaqkunapa kallpanchakusqankuta qawaspam, ñoqanchikpas kallpanchakunchik iñiyninkupi takyaspanku Diosta servisqankuman hina rurananchikpaqpas. Wawqenchik Harry 87 watayoq kaspanpas, imam payta kallpanchasqanta willawaspanchik nin: “Wañunaykama munaymanmi atisqayman hina Jehová Diosta serviytaqa” nispa. Wawqenchik Fredpas, Betel wasipi servispan kusisqam kachkan. Paymi nin: “Jehová Diosta imaynatam astawan servinanchikta yacharuspaqa chayllapiñayá afanakunanchikqa” nispa.

Diosman sonqolla manaña ñawpa hina rurayta atispapas

12, 13. ¿Imaynatam Barzilaiqa Diosta astawan servisqanta qawachirqa manaña ñawpapi hina ruraytapas atispan?

12 Sasam kanman machuyaspa imawanpas onqospa kawsayqa. Chayna kaspapas, Diostaqa servichwanmi. Chaynatamá Galaad lawmanta Barzilaiqa rurarqa. Davidpa contranpi Absalon hatarikuptinmi, Barzilaiqa 80 watapiña kaspa llumpay qoykukuqmi karqa Davidtawan tropankunatapas mikuykachispa hinaspa samaykachispanpas. Jerusalenman David kutichkaptinmi, Barzilaiqa Davidwan riqkunawanmi Jordan mayukama rirqa, chaypim reyqa palacionpi serviqnin kananpaq nirqa. Barzilaiñataq nirqa: “Pusaq chunka watayoqñam kani. Mikusqaypa chaynataq tomasqaypa gustontapas manañam musyaniñachu allin otaq mana allin gustoyoq kasqantapas. Manañam atinichu qaripa otaq warmipa takisqan uyariytapas.  [. . .] Kayqaya serviqniki Quimam, payña qanwan riptinyá paypaq ruray imam munasqaykita” nispa (2 Samuel 17:27-29; 19:31-40).

13 Yuyaqña kaspam manaña ñawpapi hina rurayta atispanpas, Barzilaiqa tukuy ima atisqanta rurarqa Jehová Diospa akllasqan reyta yanapananpaq. Ñawpapi hina ima mikusqanta nitaq ima uyarisqanta manaña allinta musyakuyta atisqanta reqsipakuspanpas, manamá rabiapakurqachu, aswanqa mana envidiakuspan kunakuykurqa Quimam sutiyoq runaña paypa rantinpi imatapas chaskikunanpaq, chaynata ruraspam imayna sonqoyoq runa kasqanta reqsichikurqa. Kunanpas achka yuyaq wawqe-paninchikkuna mana imatapas suyaspa qoykukuqmi kanku. Atisqankuman hina imatapas ruranku Diosta servinankupaq, ‘chay rurasqankuwan kañasqa ofrendawan hina Diosta agradasqankuta’ yachaspanku. ¡Ima allinmá kayna Diosman sonqo serviqninkunawan Diosta serviyqa! (Hebreos 13:16.)

14. ¿Imanasqataq Salmo 37:23-25 nisqanpi David yuyaqña kasqanmanta willakusqanqa chaypi nisqanta aswan allintaraq hapichiwanchik?

14 Watakuna pasasqanman hina Davidpas wakin kutikunapiqa manaña ñawpapi hina ruraytaqa atirqachu. Ichaqa payqa yacharqam Jehová Diosqa serviqninkunata kuyaspan cuidasqanpas manapuni cambiasqanta. Machuyaruspanmi Davidqa Salmo 37 kaq sutiyoq takita qellqarqa. Musyariykuy yuyaymanachkaqta, arpata tocastin kaynata takichkaqta: “Runataqa maymanña rillaptinpas Tayta Diosmi pusallachkan. Kawsasqanwan agradaq runataqa Tayta Diosmi takyachichkan. Payqa wichiykuspanpas manapunim pampapiqa kallanqachu. Tayta Diosmi paytaqa hapillaspan mana wichiykachinqachu. Ñawpaq warma kaspaypas, kunan yuyaq kaspaypas allin runataqa manam qonqarusqataqa rikurqanichu. Wawa-churintapas manam limosnakuqtaqa rikurqanichu” nispa (Salmo 37:23-25). Jehová Diosqa allinpaqmi David yuyaqña kasqanta kay takipi qellqarachirqa, chaymi kaypi rimasqantaqa aswan allintaraq hapichiwanchikpas.

15. Yuyaqña kaspan hinaspa manaña ñawpapi hina rurayta atispanpas, ¿imaynatam Diosman sonqo apostol Juanpa rurasqanqa qatikunapaq hina kanman?

15 Diosman sonqo apostol Juanpa rurasqanpas allinmi kanman qatikunapaq hina, paypas yuyaqña kaspan hinaspa manaña ñawpapi hina rurayta atispanpas Diosta  servirqa. Yaqa qanchis chunka wata Diosta servisqan qepata Patmos sutiyoq islapi preso karqa “Diospa palabranmanta hinaspa Jesucristomanta willakusqayraykum” (Apocalipsis 1:9). Ichaqa Diospa munaynin rurayninqa manaraqmi tukurqachu. Aswanpas, Juanpa llapallan qellqasqanqa Bibliapim tarikun, chaykunatam qellqarqa wañukunanpaqña hichpamuq watakunapi. Patmos islapi kachkaptinraqmi admirakunapaq revelacionkunata qawaspam Apocalipsis librota qellqarqa (Apocalipsis 1:1, 2). Chaymantataqsi Roma nacionpi Nerva sutiyoq kamachikuq kacharirqa, chaymanta yaqa 90 watanpi 100 watanmanña richkaspan Jesucristomanta willaq librota hinaspa sutinwan kimsa cartakunata sutichasqata qellqarqa, chaytaqa qellqarqa yaqa 98 watapiña.

Mana qonqay atina Diosta servispa aguantasqankumanta

16. ¿Imaynatam Jehová Diosta servisqankuta qawachinmanku machuyasqankuman hina qallunpas watakuptin?

16 Yuyaqña kaspa imaymanatapas sasachakunchikmi. Wakin wawqe-paninchikkuna machuyasqankuman hina qallunpas watakuyta qallariptinmi kusikuywan yuyarinku kuyakuywan Diospa favorecesqanmanta. Rimaptinku qallun watakuptinpas sonqonmantapuni Jehová Diosta kaynata ninku: “¡Maynatam yachachikuynikita kuyallani! Chaypim tukuy punchaw yuyaymanani” nispa (Salmo 119:97). Jehová Diosñataqmi reqsichkan “paymanta yuyaymanaqkunata” hinaspa nisqanta yanqapaq hapiq runakuna hina mana kasqankumantapas paykunataqa kuyanmi (Malaquias 3:16; Salmo 10:⁠4). ¡Maynataraqmá kallpanchawanchik piensasqanchikpas Jehová Diospa agradonpaq kaptin! (1 Cronicas 28:9; Salmo 19:14.)

17. ¿Ima suma-sumaq bendiciontam chaskirunku unay watataña Diosta serviqkunaqa?

17 Unay watataña Jehová Diosta serviqkunaqa mana maylawpipas tariy atina suma-sumaq bendiciontam chaskirunku, chayqa mana qonqay atina Diosta servispa aguantasqankum. Jesusmi nirqa: “Pipas takyaqmi kawsayniyoqqa kanqa” nispa (Lucas 21:19). Wiñay kawsayta haypanapaqqa alli-allinmi aguantayqa. Qamkunamanta ‘Diospa munasqanta’ ruraqkuna chaynataq tukuy imapi Diosman sonqolla kaspaykichikqa suyakuwaqchikmi “paypa prometesqankunata chaskinaykichikpaq” (Hebreos 10:36).

18. a) ¿Imataq Jehová Diosta kusichinman yuyaqkunapa rurasqankumanta? b) ¿Imamantam yachasunchik qatiqnin estudiopi?

 18 Jehová Diosqa anchatam chaninchan tukuy kallpawan yuyaqkuna servisqankuta maskiña achkatapas otaq asllatapas ruraptinkuqa. Imaynatapas ‘cuerponchik’ machuyaptinpas ‘espiritunchikqa’ aswanmi sapa punchaw mosoqyachkan (2 Corintios 4:16). Jehová Diosqa cheqaptamá llamkasqaykichiktaqa allinpaq hapichkan, chaynatamá kunanpas pay kuyasqaykichiktaqa manam qonqanqachu (Hebreos 6:10). Qatiqnin estudiopim yachasunchik Diosman sonqo kaynikichikqa wiñaypaq kasqanta.

¿Imaniwaqtaq?

• ¿Imatam Anaqa rurarqa kay tiempopipas yuyaq wawqe-panikuna chayta qatikunankupaq?

• ¿Imanasqataq yuyaqña kayqa mana harkawanchikmanchu imapas rurananchiktaqa?

• ¿Imaynatam yuyaqkunapas Diostaqa hinalla servinmanku?

• ¿Imaynatam Jehová Diosqa qawan yuyaqkunapa servisqankuta?

[Kay yachachikuypa tapukuyninkuna]