Yachachikuypa kasqanman rinapaq

Yachachikuyman rinapaq

¿Imatam biblia nin warmimasillanwan utaq qarimasillanwan kaqkunamanta?

¿Imatam biblia nin warmimasillanwan utaq qarimasillanwan kaqkunamanta?

ESTADOS UNIDOS nacionpim 2015 watapi warmimasillanwan utaq qarimasillanwan runakuna casarakunankupaq autoridadkuna allinpaq kasqanta nirunku, wakin nacionkunapim ichaqa hinallaraq chaymanta atipanakuchkanku. Chaymantapacham achka runakuna internetman yaykuspanku chaymanta yachayta munarqaku. Tapukuqkum: “¿Ima ninya biblia warmimasillanwan utaq qarimasillanwan kaqkunamanta?”, nispa.

Warmimasillanwan utaq qarimasillanwan kaqkunamanta biblia rimaspanpas manam imatapas ninchu casarakunankumantaqa.

Achka runakunam chaymanta biblia ima nisqanta mana sumaqta yachaykuchkaspanku ninku: “Bibliaqa sutillatam qawachin warmimasillanwan utaq qarimasillanwan kaqkunaqa mana allin runakuna kasqanta”, nispanku. Wakinñataqmi bibliapa ‘runamasikitam kuyanki’ niq yachachikuyman hapipakuspanku allinpaq qawanku warmimasillanwan utaq qarimasillanwan kaqkunataqa (Romanos 13:9).

¿IMATAM BIBLIA NIN?

¿Mayqintaq chiqap kanman?

  1. Bibliaqa manam allinpaqchu qawan warmimasillanwan utaq qarimasillanwan kaqkunapa tukuy ruwasqankutaqa.

  2. Bibliaqa allinpaqmi qawan warmimasillanwan utaq qarimasillanwan kaqkunapa puñusqankuta.

  3. Bibliaqa warmimasillanwan utaq qarimasillanwan kaqkunata chiqninapaqmi yachachin.

KUTICHIYNINKUNA:

  1. CHIQAPMI. Bibliaqa ninmi ‘qarimasillanwan kaqkunataqa’ Dios mana chaskisqanta (1 Corintios 6:9, 10). Warmimasillanwan kaqkunatapas Diosqa manam chaskinchu (Romanos 1:26).

  2. LLULLAM. Bibliaqa yachachinmi casarasqa warmi-qarilla kuska puñunankumanta (Genesis 1:27, 28; Proverbios 5:18, 19).

  3. LLULLAM. Bibliam qawachin Diosqa warmimasillanwan utaq qarimasillanwan kaqkunata mana chaskisqanta, ichaqa manam yachachinchu chayna runakunata chiqninapaqqa nitaq maqanapaqpas (Romanos 12:18). [1]

 ¿Imaynatam qawaniku warmimasillanwan utaq qarimasillanwan kaqkunata?

Jehova Diospa testigonkunaqa bibliapa yachachikuyninkunatam allinpaq hapiniku allinniykupaq kasqanta piensasqaykurayku (Isaias 48:17). [2] Chayraykum, mana allinpaq qawaniku tukuy mana allin huchapakuykunata hinaspa warmimasillanwan utaq qarimasillanwan kaqkunapa ruwasqankutapas (1 Corintios 6:18). [3] Testigokunaqa wakin runakuna hinam akllakuniku imayna kawsakunaykupaq.

Jehova Diospa testigonkunaqa kallpanchakunikum runamasiykupaq allin kaqkunata ruwanaykupaq

Kallpanchakunikutaqmi llapallan runakunawan “hawkalla” kanaykupaq (Hebreos 12:14). Manataqmi warmimasillanwan utaq qarimasillanwan kaqkunapa ruwasqankuta ñuqayku hina mana allinpaq qawanankupaqqa pitapas hikutanikuchu, nitaqmi chayna runakunataqa maqanikuchu nitaq kusikunikuchu maqaptinkupas. Aswanmi kallpanchakuniku runamasiykupaq allin kaqkunata ruwanaykupaq (Mateo 7:12).

¿Bibliaqa warmimasillanwan utaq qarimasillanwan kaqkunata chiqninapaqchu yachachin?

Wakin runakunam ninku warmimasillanwan utaq qarimasillanwan kaqkunata chiqninapaq biblia yachachisqanta, chaymi ninku bibliapa nisqanta kasukuqkunaqa chayna runakuna kasqankuta. Wakiqninqa ninkuraqmi: “Bibliaqa ñawpaq runakunapaqmi qillqasqa karqa, ñawpaqpiqa pim kaqllatam chaskiqku. Kunanñataqmi lliw runakunataña chaskinchik”, nispa. Chayna piensaq runakunapaqqa warmimasillanwan utaq qarimasillanwan kaqkunapa ruwasqankuta mana allinpaq qawayqa manam allinchu. Ichaqa chayna piensasqankuqa manam allinchu. ¿Imanasqa?

Manam hina chaynallachu warmimasillanwan utaq qarimasillanwan kaqkunapa ruwasqankuta mana allinpaq hapiywan kikin runata chiqniywanqa. Bibliam nin Diosta serviqkunaqa lliw runakunata respetanankupaq (1 Pedro 2:17). [4] Ichaqa manam chayraykuchu Diosta serviqkunaqa runakunapa tukuy ima ruwasqankutaqa allinpaqqa hapinanku.

Kaypi yuyaymanay: Sichum llamkaqmasiki cigarro pitaqllaña kanman, qamñataq cigarro pitaytaqa mana allinpaq qawawaq. Chayraykuchu ¿mana allin yuyayniyuq hinaspa cigarro pitaqkuna chiqniq runa kawaq? Manam ¿aw? Sichum llamkaqmasiki hikutasunkiman cigarro pitaymanta ima piensasqaykita cambianaykipaq hinaspaqa, ¿manachu chay ruwasqanwanqa kikin qawachichkan mana allin yuyayniyuq kasqanta?

Bibliapa yachachisqantam kasukuniku, chaymi ima ruwaypas mana allin kasqanta biblia niptinqa ñuqaykupas mana allinpaq qawaniku. Ichaqa manam pitapas asipayanikuchu nitaq hukmanyachinikuchu ñuqayku hina mana ruwaptinkuqa.

¿Allinchu bibliapa yachachisqan?

¿Ima nichwantaq warmimasillanwan utaq qarimasillanwan kayta munaqkunamanta? ¿Chayna munayninkuqa mana allinchu? ¿Chaynañachu nacerqaku?

Bibliaqa manam willawanchikchu imanasqa wakin runakuna warmimasillanwan utaq qarimasillanwan kayta munasqankumantaqa, ichaqa rimanmi wakin runakuna imayna kasqankumanta. Willawanchiktaqmi Dioswan kuyachikunapaqqa ima ruwaykunata mana ruwananchikmantapas (2 Corintios 10:4, 5).

Chayna kaptinpas, wakinqa ninkum bibliapa yachachisqanqa mana allin kasqanta. Chaynataqa ninku imapas munasqanchikta ruwayqa mana hucha kasqanta piensaspankum hinaspa mana controlakuy atisqanchikta piensaspankum. Ichaqa bibliam alaban imapas ruway munasqankuta controlaq runakunataqa. Animalkunallam mana controlakuytaqa yachankuchu, runakunam ichaqa controlakuytaqa atinchik,  chaymi allin tanteayta yachanchik (Colosenses 3:5). [5]

Wakin yachaysapa runakunam ninku wakin runakunaqa piñakuqllaña utaq imayna genioyuqñapas nacesqankumanta. Bibliaqa manam imatapas ninchu chayna nacesqankumantaqa, ichaqa ninmi wakin runakunaqa ‘chaylla piñakuqllaña’ kasqankumanta (Proverbios 22:24; 29:22). Chaymi bibliaqa kallpanchan piñakuq kasqankuta saqinankupaq (Salmo 37:8; Efesios 4:31).

Yaqa llapanchikmi allinpaq hapinchik mana piñakuq kanapaq bibliapa yachachisqantaqa. Yachaysapa runakunapas yanapankum piñakuq genioyuq runakunata mana chaylla piñakuruq kanankupaq.

Jehova Diospa testigonkunapas kallpanchakunikum bibliapa yachachisqanman hina imatapas ruwanaykupaq, chaymi mana allinpaq qawaniku manaraq casarasqa kaqkunapa puñusqankutapas. Bibliapas ninmi: “Sapakamayá cuerpoykichikta kamachiychik chuya kanaykichikpaq hinaspa Diospa chaskisqan kanaykichikpaq. Amayá [...] qariwan utaq warmiwan puñuy munapayaywanqa aysachikuychikchu”, nispa (1 Tesalonicenses 4:4, 5).

Saqirqakum mana allin kayninkuta

Ñawpaq tiempopim wakin runakunaqa Jesuspa qatiqninkuna manaraq kachkaspanku taytacha-mamachata yupaychaqku, hukwan pierdekuqku, qari kachkaspa warmi hina kaqku hinaspa qarimasillankuwan kakuqku, ichaqa bibliam nin chayna kayninkuta saqirusqankumanta (1 Corintios 6:9-11).

Ichaqa, ¿wiñaypaqchu qarimasillanwan kay munayninkuta saqirurqaku? Manachusmi. Chaymi biblia kaynata nirqa: “Hinallayá kawsaychik espiritupa munasqanman hina, hinaspaqa manam aychapa ima munasqantapas ruwankichikchu”, nispa (Galatas 5:16).

Qawasqanchikman hinam bibliaqa nin mana allin munaykunaqa runapi hinalla kananmanta. Ichaqa kallpanchawanchikmi mana allin munasqanchikkunata mana ruwanapaq. Chaymi Diosta serviqkunaqa mana allin munaykunapiqa mana piensarayankuchu chaynapi mana ruwanankupaq (Santiago 1:14, 15). [6]

Bibliaqa sutillatam qawachin ruway munayqa huk kasqanta, ruwaruyñataq hukña kasqanta (Romanos 7:16-25). Warmimasillanwan utaq qarimasillanwan kayta munaqqa atinmanmi chayna munayninkunata atipayta, imaynam qacha mana allin piensamientokunata atipasqanta hina (1 Corintios 9:27; 2 Pedro 2:14, 15).

Jehova Diospa testigonkuna bibliapa yachachisqanman hina kawsakuspaykupas, manam pitapas hikutanikuchu ñuqayku hina piensanankupaqqa. Manataqmi bibliapa yachachisqanman hina mana kawsakuqkunapa contrankupiqa hatarinikuchu. Allin kaqkunallatam yachachinikuqa, chaymi kallpanchakuniku lliwman willanaykupaq (Hechos 20:20).

^ 1. Romanos 12:18: ‘Llapallan runakunawan hawkalla kaychik’.

^ 2. Isaias 48:17: ‘Tayta Diosmi ñuqaqa kani. Allinnikipaq yachachiqnikim kani’.

^ 3. 1 Corintios 6:18: “Huchapakuymanta lluptiychik”.

^ 4. 1 Pedro 2:17: “Llapallan runakunata respetaychik”.

^ 5. Colosenses 3:5: “Cuerpoykichikpa mana allin ruway munayninkunatayá chinkachiychik, chinkachiychikyá: Huchapakuyta, millakuypaq ruwaykunata, qariwan utaq warmiwan puñuy munapayayta”.

^ 6. Santiago 1:14, 15: “Pipas sasachakuypiqa tarikun munasqankunawan aysachikuspa hinaspa apachikuspanmi. Hinaptinmi chay munasqan aswan atiparuptin huchallikun”.