IMAM SASACHASUNKIMAN

Sasachakuyninchikmanta huknikiwan rimaspaqa, ¿aswan piñasqachu tukurunkichik? Chayna kaptinqa kikikim astawan kallpanchakunayki allinlla rimanaykichikpaq. Chaypaqmi ancha allin kay yachayniki: Qariwan warmiqa manam hina chaynallatachu ima sasachakuymantapas rimanku. *

IMATAM YACHANAYKI

Yaqa llapan warmikunam munan imapas llakichisqanmanta qusanku uyariykunallankuta. Wakin kutipiqa uyarinakuykuyllam allinqa.

Antoniam * nin: “Qusayman imayna tarikusqaymanta willaptiy uyariykullawasqanwanmi allin tarikuni. Chaymi unayninmantaqa hawkayaykuniña”, nispa.

Mauram nin: “Manam ima ruwaytapas allillaqa ruwakuyta atinichu qusayman imayna tarikusqaymanta willakunaykama. Uyariykuwaptinñam hawkayaykuniqa”, nispa.

Lurdesmi nin: “Qusayman willasqayman hinam musyakuni imanasqa chayna tarikusqaymanta”, nispa.

Qarikunaqa chayllam ima sasachakuytapas allicharuyta munanku. Paykunaqa chayta ruwaspankum allin tarikunku. Chaymi warmichankupa ima sasachakuyninkupas kaptinqa yanapaykuyta munanku. Chayraykum warmichanku imaynata allichanankupaq nisqankuta mana uyariptinkuqa hukmanyanku. Kir sutiyuq qusam nin: “Sasachakuy allichayta mana munaspankuqa imapaqñaya willakunkupas”, nispa.

Huk qillqam nin: ‘Puntataqa uyariykunaraqmi pitapas imayna tarikusqanmanta, chaymantañam ninaqa imatapas ruwananpaqqa. Yaqa llapanpim huknikiqa uyariykunallaykita munachkan, manam sasachakuyninta allichanaykitachu’, nispa (Siete reglas de oro para vivir en pareja).

 ¿IMATAM RUWAWAQCHIK?

Qusa. Kallpanchakuy warmichaykipa nisusqaykita sumaqta uyarinaykipaq. Tomasmi nin: “Wakin kutipiqa warmiyta uyariylla-uyariruspaymi piensani sasachakuyninta mana allichasqayta. Ichaqa chayna uyariykunallaytam yaqa llapanpi warmichayqa munan”, nispa. Estepen runapas ninmi: “Kaytam yacharuni, imamantapas aswan allinqa kasqa warmiyta uyariykuymi, chaynata ruwaptiymi yaqa llapanpi allinña tarikusqanmanta niwan”, nispa.

Kayta ruwanaykipaq kallpanchakuy: Sichum warmichayki willasunki imapas llakichisqanmanta hinaptinqa ama, mana nisuchkaptikiqa imaynata allichanaykipaqqa niychu, aswanqa sumaqta uyariykuy. Hinaspayki imayna tarikusqanmanta entiendesqaykita sumaqllata niy. Carlospas ninmi: “Wakin kutipiqa warmiyqa munan imayna tarikusqanmanta entiendeykunallaytam”, nispa (bibliapa yachachisqan: Santiago 1:19).

Warmi. Qusaykita niy imapi yanapaykusunaykipaq. Elenam nin: “Piensanchikmi qusanchik chaylla entiendewasqanchikta, ichaqa wakinpiqa clarotam ninanchik imapi yanapawananchikpaq”, nispa. Inesmi qusakunawan imayna rimayta qallarinanpaq nin: “Llakiymi kachkan, chaywan imayna tarikusqaymanta uyariykuwanallaykitam munani, manam allichanaykitachu mañakusqaykiqa”, nispa.

Kayta ruwanaykipaq kallpanchakuy: Sichum qusayki llakikita mana allinta uyarisuchkaspayki chaylla allicharuyta munaptinqa, ama piensaychu mana kuyapayakuq kasqantaqa. Sunqunpiqa yanapaykuytam munasuchkankiman. Estermi nin: “Piñakunaymantaqa piensanin kuyawasqanrayku yanapaway munasqanta”, nispa (bibliapa yachachisqan: Romanos 12:10).

Iskaynikichik kayta ruwaychik. Runamasinchikpaqmi allin kaqkunata ruwanchik, chaynata paykunapas ñuqanchikpaq ruwananta munaspa. Ichaqa ima sasachakuytapas allichanapaqqa yuyaymananaykim huknikipa imaynam munasqanta (1 Corintios 10:24). Miguelmi kaynata nin: “Qarikunaqa uyariy yachaqmi kananchik, warmikunañataqmi wakinpiqa qusankupa imaynam allichay munasqankuta uyariq kananku. Chayna ruwayqa allinpim tukun”, nispa (bibliapa yachachisqan: 1 Pedro 3:8).

^ par. 4 Kay yachachikuypi qarikunapawan warmikunapa rimasqankuqa ichapas mana chaynachu wakin casadokunapiqa. Ichaqa kay yachachikuypi bibliapa yachachikuyninkunaqa yanapanmanmi pipas warminwan utaq qusanwan allinlla rimanakunankupaq.

^ par. 7 Sutikunaqa cambiasqam kachkan.