TAIWÁN nacionpim Yan-Der Hsuuw sutiyuq profesorqa universidad nacional de ciencia y tecnología nisqapi sulluchakunamanta yachaqkunapa directornin. Ñawpaqtaqa kikillanmanta imapas rikurisqantam piensarqa, astawan yachaq rikuriruspanmi ichaqa manaña chaynatachu piensarqa. Imanasqa manaña chaynata piensasqanmantam ¡Rikchariy! qillqapaq willakun.

Tumpata willariwayku vidaykimanta.

1966 watapim nacerqani. Taiwán nacionpim wiñarqani. Tayta-mamayqa taoísmo hinaspa budismo religionniyuqmi karqaku. Wañusqa aylluykuta hinaspa taytacha-mamachakunata yupaychaspaykupas, manam unanchaq huk Dios kasqantaqa piensarqanikuchu.

¿Imanasqataq uywachakunamanta estudiarqanki?

Warmacha kaspaymi uywachaykunata kuyaq kani, chaymi unquptinku imayna yanapayta yachayta munarqani. Runakuna yanapaytapas munarqanitaqmi. Chaymi uywachakunamanta yachanaypaq estudiarqani, chaymantañam sulluchakunamantaqa estudiarqani, maymanta rikurimusqanchikta yachanaypaq yanapawananmanta piensaspay.

¿Imanasqataq kikillanmanta imapas rikurisqanta piensarqanki?

Chayna kasqanta universidadpi profesorkuna niwasqanraykum. Paykunam nirqaku chayqa chiqap kasqanta, chaymi chayna kasqanta piensarqani.

¿Imanasqataq biblia estudiayta qallaykurqanki?

Piensarqanim achka dioskunata yupaychasqankumanta mayqallanpas aswan atiyniyuq Dios kasqanta. Ichaqa manam yacharqanichu mayqan kasqantaqa. Chaymantapas biblia ancha riqsisqa kasqanraykum ima yachachisqanta yachayta munarqani. Chaymi huk escuelaman rirqani.

1992 watapim, Bélgica nacionpi universidad católica nisqapi estudiayta qallaykurqani. Chaypim rirqani iglesia catolicapa sacerdotenman bibliamanta yachachiwananpaq, ichaqa manam munarqachu.

¿Maypitaq chaynaqa tapukuynikikunamanta yacharurqanki?

Iskay wataña Bélgica nacionpi sulluchakunamanta yachachkaspaymi riqsirurqani Ruth sutiyuq Jehova Diospa testigonta. Paymi Diosmanta yachachinanpaq chino rimayta yacharusqa. Chaytapunimá Diosta mañakurqani, chaymi ancha kusisqa tarikurqani.

Ruthmi niwarqa Diospa palabranqa yachayniyuq runakunapa yachachisqankuwan tupasqanta. Bibliapim kamachikuq David kaynata Diosta mañakurqa: ‘Sulluchallaraq kachkaptiymi rikuwarqankiña ñuqataqa. Ruwanaykunaqa librollaykipi qillqasqañam karqa. Manaraqpas nacechkaptiymi qillqasqaña karqa’, nispa (Salmo 139:16). Kayna nisqanqa tupanmi  yachaysapa runakunapa yachachisqanwan. Manaraq chakiyuq, makiyuq hinaspa umayuq wawa kachkaptinmi ña wawapa ukunpiqa kanña imayna wiñananpaqpas. Chay yacharusqaywanmi manaña iskayrayarqanichu bibliaqa Diospa palabran kasqanmanta. Yacharurqanitaqmi Jehova1 Dioslla chiqap Dios kasqanmantapas. 1

¿Imanasqataq Dios unanchawasqanchiktaña piensayta qallaykurqanki?

Yachaysapa runakunaqa imapas chiqap kasqanmantam yachayta munanku. Sulluchakuna imayna wiñasqanmanta yacharusqayraykum Diospa unanchasqan kasqanchiktaña piensarqani. Kaypi yuyaymanasun, ingenierokunapas sumaqtam tanteanku ima ruwasqankupa imankunapas maymi kasqanpi yaykunanpaq. Yaqa chaynam sullucha wiñananpaqpas sumaq tanteasqa kachkan cuerpochan ukupi.

¿Imanasqataq sulluqa rikurin?

Sulluqa rikurin iskay celula nisqallanku hukllawakuruptillanmi. Chayllamantam achka celulakuna rikurin. Sullu wiñaptinmi cuerpon ukupi celulakunaqa yaqa chawpi punchawllapi utaq huk punchawllapi achkata miranku. Qallariyllanpiqa celula madre 2 nisqallankum rikurin. Chaymantam yaqa iskay pachak celulakuna rikurin. Sapa celulam wawapa umanta, makinta, chakinta, tullunta hinaspa llapa imankunata rikurichin.

Sulluchakuna imayna wiñasqanmanta yacharusqayraykum Diospa unanchasqan kasqanchiktaña piensarqani

Wawapa ima partentapas rikurichiq celulaqa maymi kasqanpim rikurichinan wawapa partenta. Puntataqa chay casta celulakunallam hukllawakurunku, chaynapi chaki kaspa utaq uma kaspapas rikurinankupaq. Manam ni pi ingenieropas sullu imayna wiñasqanta hinaqa ruwayta atinmanchu. Sullu imayna wiñananpaqmi ichaqariki celulapa ukunpi ADN nisqapi qillqasqa kachkan. Kaykunapi yuyaymanaspaymi mana iskayrayanichu Dios unanchawasqanchikmantaqa.

¿Imaynanpitaq Jehova Diospa testigonña kanki?

Kuyakuyta qawasqayraykum. Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Chayna kuyakuytam qawarqani testigokunawan hukllawakuyta qallaykuspay. Paykunaqa llapallan runakunatam kuyanku.

^ 1. Salmo 83:18, NM; 1 Corintios 8:5, 6.

^ 2. Profesor Yan-Der Hsuuw sutiyuqqa manam servichikunchu celula madre nisqankutaqa sunqunpi hawka tarikuyta munaspam.