Yachachikuypa kasqanman rinapaq

Yachachikuyman rinapaq

Guacamayo azul y amarillo nisqanku, 85 centimetro largoyuq.

Suma-sumaq wiqrucha

Suma-sumaq wiqrucha

TUKUY mana colorniyuq wiqrukunatam yaqa 1500 watapi Europa lawmanta hamuq runakuna rikurqaku qunqayllamanta sachakunapa ukunmanta pawariruqta, chayta rikuspankum ancha admirasqa qiparurqaku. Chay wiqrukuna rikusqankuqa karqa guacamayo sutiyuq wiqrukunam, paykunaqa yachanku hatun montekunapa kasqanpim. Chay runakunam wiqrukuna rikusqankuta dibujarqaku chay lawpa mapankunapi.

Chay guacamayo wiqrukunaqa chinanpas urqunpas tukuy mana colorniyuqmi, manam chaynachu wakin alton pawaqkunaqa. Manataqmi sapallankuchu purinkupas, aswanqa achkanpim hinaspapas llumpaytam chaqwakunku. Tutapayllam yaqa kimsa chunka hina mikuyninkuta maskanankupaq lluqsinku. Yaqa llapan wiqrukuna hinam chakichanwan mikuyninkuta hapiykuspanku kachunku. Mikuyta tukuruspankuñataqmi rinku qaqakunaman utaq mayupa patankunaman llinku mikuq. Yaqachusmi chay llinku mikusqankuqa yanapan cuerpochankupi allin kanankupaq.

‘Diosqa tukuy imatam tiempollanpi sumaqllataña ruwarqa’ (Eclesiastes 3:11).

Guacamayo wiqrukunaqa wañunankukamam huk parisniyuqlla kanku, iskayninkutaqmi  mallquchankutapas uywanku. Qistachakunkum sachakunapa hinaspa qaqakunapa uchkunkunapi, chaypitaqmi usachanakunkupas. Mallquchankuna suqta killamanta pawariyta atispankupas, tayta-mamanwanmi yaqa kimsa wata kuska kanku. Guacamayo wiqrukunaqa kacharisqa kaspankuqa yaqa 30 utaq 40 watatam kawsanku, uywasqa kaspankum ichaqa yaqa 60 watata. Kay wiqrukunaqa yaqa 18 rikchaqkunam kan. Wakiqninmi kaykuna.

Guacamayo aliverde, utaq guacamayo rojo y verde nisqanku, 95 centimetro largoyuq.

Guacamayo rojo y amarillo nisqanku, 85 centimetro largoyuq.

Guacamayo azul, utaq jacinto nisqanku. Huk metro largoyuqmi. Lliw guacamayo wiqrukunamantapas aswan hatunmi, llasanmi 1,3 kilo masta.