Yachachikuypa kasqanman rinapaq

Yachachikuyman rinapaq

 33 KAQ YACHACHIKUY

Uyarisuqnikikunaqa wiñay kawsaytam haypanqaku

Uyarisuqnikikunaqa wiñay kawsaytam haypanqaku

“Tukuy tiempoyá imayna kawsasqaykita qawarikuy, qawariytaqyá imam yachachisqaykitapas. Amayá kaykuna ruwaytaqa qunqaychu, chaynata ruwaspam kikikipas salvakunki chaynataq uyarisuqnikikunatapas salvanki” (1 TIM. 4:16).

67 KAQ TAKI “Diosmantayá willakusun”

¿IMAMANTAM YACHASUNCHIK? *

1. ¿Imatam ayllunchikkunapaq munanchik?

PAULINA * iñiqmasinchikmi willakun: “Diosmanta yachayta qallaykusqaymantapacham munarqani llapallan aylluywan kuska musuq pachapi kawsakuyta. Astawanraqmi qusaywan waway Jehova Dios yupaychanankuta munarqani”, nispa. Ñuqanchikpas wakin ayllunchik Diospi mana iñisqankuraykum, Paulina hina munanchik Jehova Dios yupaychanankuta.

2. ¿Ima tapukuykunamantam yachasun?

2 Ayllunchikkunataqa manam hikutananchikchu Diosta riqsinankupaqqa. Ichaqa, atichwanmi Diosta riqsinankupaq yanapaytaqa (2 Tim. 3:14, 15). Chaynaqa, ¿imanasqataq Jehova Diosmanta ayllunchikkunaman willananchik? ¿Imanasqataq ayllunchikkunapa imayna tarikusqanpi yuyaymanananchik? ¿Imakunatam ruwachwan Diosta kuyanankupaq? Hinaspa, ¿imaynatam iñiqmasinchikkunapas yanapaykuwachwan ayllunchikkuna Jehova Diosta riqsinankupaq?

¿IMAYNANPITAQ DIOSMANTA WILLANANCHIK AYLLUNCHIKKUNAMAN?

3. 2 Pedro 3:9 nisqanman hinaqa, ¿imaynanpitaq Diosmanta willananchik ayllunchikkunaman?

3 Jehova Diosqa manapas unaymantam, satanastawan runankunata chinkachinqa. Wiñay kawsayta haypay munaqkunallam kawsanqaku (Hech. 13:48). Chayraykum tiempochakuspa runamasinchikkunaman Diosmanta willanchik, chaynapi payta yupaychanankupaq. Chaytam ayllunchikkunapaqpas munanchik. Diosninchikpas kuyakuq kasqanraykum mana  munanchu pipas chinkarunantaqa, aswanqa llapallan runakuna huchankumanta wanakunankutam (qaway 2 Pedro 3:9).

4. ¿Imaynatam ayllunchikkunaman Diosmanta willarqanchik?

4 Diosmanta willakuspanchikqa wakinpim sunqunkuman chayanapaq hina willakurqanchik wakinpiñataqmi mana. Mana riqsinakusqanchik runakunawanqa yaqapaschá kuyakuywan Diosmanta rimanchik. Ayllunchikkunawanqa ichapas mana chaynatachu ruwanchik.

5. ¿Imatam yuyarinanchik Diosmanta ayllunchikkunaman willaspa?

5 Ayllunchikkunaman Diosmanta imayna rimapayasqanchikta yuyarispaqa ñakakunchikpaschá. Wakinpiqa “amapas chaynataqa niymanchu karqa” nisparaqchá ninchik. Apostol Pablom nirqa: ‘Rimasqaykichikqa kachiwan kachichasqa hinayá kachun’, nispa (Col. 4:5, 6). Ayllunchikkunawan rimaspaqa Pablopa nisqantayá yuyarisun, chaynapi paykunata Diosmanta astawan mana karuncharunapaq.

¿IMATAM RUWACHWAN AYLLUNCHIKTA YANAPANAPAQ?

Kuyapayakuq hinaspa allin runa kasqanchikmi yanapan ayllunchikkunata Diosman asuykunankupaq. (Qaway 6-8 kaqkama). *

6, 7. Willarimuy Paulina iñiqmasinchikmanta.

6 Imayna tarikusqanpiyá yuyaymanasun. Paulina iñiqmasinchikmi willakun: “Qusaywanqa Diosllamantañam rimayta munaq kani”, nispa. Qusanñataqmi, nisqantaqa mana kaqpaqpas hapiqchu bibliamanta mana yachasqanrayku. Hinaspapas chayllamantaña rimasqanraykum hukmanyarqa. Chaymantapas hukllawakusqan runakuna mana allin kananmanta hinaspa warminta imapas mana allin ruwarunankumantam mancharisqallaña tarikurqa.

7 Iñiqmasinchik Paulinaqa huñunakuypi, Diosmanta willakuypi hinaspa iñiqmasinchikkunawan kuska kasqanraykum wasinpiqa  manaña anchachu kaq. Chaymantam kikin willakun: “Qusay wasipi mana tariwaspansi, llakisqa tarikuq”, nispa. Qusanqariki paykunawan kaytam munaq. Qusanqa manataqmi warminpa iñiqmasinkunataqa riqsiqchu, chayraykum nikurqa “ñuqamantaqa iñiqmasinkunatam puntapi churan” nispa. Chaymi papelwan rakikuy munasqanwan manchaykachirqa. Chaykunaqa manamá pasakunmanchu karqa Paulina puntamanta qusanpa imayna tarikusqanta qawaptinqa.

8. 1 Pedro 3:1, 2 nisqanman hinaqa, ¿imatam ayllunchikkunaqa qawanku?

8 Ruwayninchikwanyá qawachisun imayna runa kasqanchikta. Ayllunchikkunaqa imapas ruwasqanchiktam qawanku, nisqanchikkunamantaqa (qaway 1 Pedro 3:1, 2). Paulinam chayna kasqanmanta musyakururqa. Paymi nin: “Musyakurqanim qusay ancha kuyawasqankumanta, hinaspa papelwan ñuqamanta rakikuy munasqanqa manchachiwanallanpaq kasqanmanta. Ichaqa ñuqamanta rakikuy munasqanwanmi musyakururqani tukuy ima ruwasqaykunaqa mana Jehova Diospaq hina kasqanmanta, chaymi tantiakururqani Diospa nisqanman hinaña imatapas ruwanaypaq. Rimaylla-rimanaymantaqa ruwayniywanmi qawachinay karqa imayna kasqayta”, nispa. Iñiqmasinchikqa manañam qusantaqa hikutaqchu bibliamanta rimanankupaqqa, aswanmi llamkayninpi imayna chisyamusqanmanta tapuq. Chayna kasqanwanmi qusanqa musyarurqa kuyakuqllaña kasqanta, hinaspa churinpas suma-sumaq wawa kasqanta (Prov. 31:18, 27, 28). Bibliamanta yachasqan warmichantawan churinta yanapasqanwanmi, bibliamantaqa uyariytaña munarqa (1 Cor. 7:12-14, 16).

9. ¿Imanasqataq hinalla kallpanchakunanchik ayllunchikkunata yanapananchikpaq?

 9 Hinallayá kallpanchakusun. Jehova Diostayá qawarisun, payqa qalay runakuna wiñay kawsay haypanankutam munan, chaymi kunankamapas hinalla llapallan runakunata kuyapayachkan. Chayqa qatipakunapaqmi (Jer. 44:4). Apostol Pablopas Timoteotam nirqa llapallan runakunata hinalla yanapananpaq, chaynapi kikin hinaspa uyariqninkunapas wiñay kawsayta haypanankupaq (1 Tim. 4:16). Ayllunchikkunata kuyasqanchikraykum kallpanchakunanchik bibliamanta imam kaqta yachanankupaq yanapaypi. Paulinapas rimasqanwan hinaspa ruwasqanwanmi qusanta yanaparqa. Kunanqa kusisqallañam qusanwan kuska 70 horata Diosmanta willakunku. Qusanpas punta apaqñam.

10. ¿Imanasqataq mana amispa hinalla ayllunchikkunata yanapananchik?

10 Ama amispayá hinalla ayllunchikkunata yanapasun. Jehova Diospa munasqanman hinaña kawsakuyta qallaykusqanchikwanmi ayllunchikkunaqa hukmanyayta utaq piñakuyta qallaykurqaku. ¿Imanasqam chayna tarikurqaku? Fiestakunapi paykunawan manaña kasqanchikraykum, hinaspa autoridadkunawan manaña chapukusqanchikraykum (Mat. 10:35, 36). Imaynaña kaptinkupas, hinallam yanapananchik Diosta riqsinankupaq. Chayta mana ruwaspaqa wiñay kawsayta haypanankupaq hina, mana kasqankumantam nichkachwan. Wiñay kawsayta haypananpaq utaq mana haypananpaq hina kasqantaqa señorninchik Jesucristollam ninqa (Juan 5:22). Mana amispa ayllunchikkunata hinalla yanapaptinchikqa yaqapaschá Diosmanta uyariyta munanqaku (qaway “ Internetpi jw.org niqman yaykunankupaqyá nisun” niqta).

11-13. ¿Imatam yachachwan Alicia iñiqmasinchikmanta?

11 Kuyakuq chaynataq mana manchakuqmi kananchik (Prov. 15:2). Rimarisun Alicia iñiqmasinchikmanta. Payqa Diostam riqsirqa tayta-mamankunamanta sapaqchakuruspanña. Dios mana kasqantam tayta-mamanqa niqku, hinaspapas autoridadkunatam tukuypi yanapaqku. Chaymi Aliciaqa yachasqankunamanta tayta-mamanman willanan karqa. Paymi nin: “Diosmanta yachasqaykita hinaspa Diospaq hinaña kawsakuy munasqaykitaqa chayllam aylluykikunaman willanayki, mana chayqa llumpaytam piñakunqaku”, nispa. Aliciaqa tayta-mamanmanmi mana piñakunankupaq hinalla huk cartata qillqarqa. Chaypim kuyakuywan tapurqa bibliapa nisqankunamanta. Huk kaqnin tapukuyninmi karqa kuyakuymanta (1 Cor. 13:1-13). Hina chay qillqasqanpim tayta-maman uywasqanmanta agradecekurqa. Hinaspapas sapa kutim imachallatapas apachiq. Watukuq rispanpas mamantam tukuy imapi yanapaq. Chaywanpas Diospi iñikusqanmanta willaptinmi tayta-mamanqa piñarikurqa.

12 Aliciaqa tayta-mamanwan kachkaspapas mana manchakuspam sapa punchaw biblianta ñawincharqa. Chay ruwasqanwanmi maman musyakururqa, Aliciapaqqa biblia ancha chaninniyuq kasqanmanta. Hina chayllamantaqmi taytanpas biblia ñawinchayta qallaykurqa, chaynapi bibliaqa yanqa kasqanta qawachinanpaq. Aliciam willakun: “Bibliata manaraq quchkaspaymi, chay bibliapa ukunpi ancha kuyasqayta qillqarqani”, nispa. Ñawinchasqanwanmi taytanqa musyakurqa bibliaqa allinninpaq kasqanmanta.

13 Imaña kaptinpas kuyakuqllaña hinaspa mana manchakuqmi kananchik (1 Cor. 4:12b). Aliciapas chaynam karqa. Paymi willakun: “Bautizakurusqaywanmi mamayqa mana allin wawa kasqayta niwarqa”, nispa. ¿Imatam ruwarqa Aliciaqa? Paymi willakun: “Mana manchakuspam nirqani testigo  kasqaymanta hinaspa haykaqpas mana kutinaymanta. Hinaspapas paykunata ancha kuyasqaymantam nirqani. Chaywanmi mamayqa ñuqawan kuska waqakururqa, chaymantam miski mikuyta yanukuruspa mikururqaniku. Chaymantapacham mamayqa musyakururqa kuyakuqllaña kanaypaq biblia yanapawasqanmanta”, nispa.

14. ¿Imanasqataq ayllunchikkunapa nisqantaqa mana ruwananchikchu?

14 Wakin ayllunchikkunaqa manamá kusisqachu tarikunqaku Diosta yupaychasqanchikwanqa. Chaynam karqa Aliciawan. Payqa Diosmanta 70 horata willakunanpaqmi tantiakururqa, tayta-maman estudiananpaq nichkaptinpas. Chayta yacharuspanmi mamanqa kaqmanta waqapakurqa. Aliciam willakun: “Ayllunchikkunata manchakusqanchikrayku nisqankuta ruwaptinchikqa astawanmi nisqankuta ruwanapaq tanqawasun. Ichaqa, mana manchakuspa iñisqanchikmanta ayllunchikkunaman kuyakuywan willaptinchikqa yaqapaschá uyariyta munanqaku”, nispa. Tukuy kaykunam payta pasarqa. Kunanqa taytan hinaspa mamanmi 70 horata Diosmanta willakunku. Taytanqa punta apaqtaqmi.

¿IMAYNATAM IÑIQMASINCHIKKUNAPAS YANAPAYKUWACHWAN?

¿Imaynatam iñiqmasinchikkunaqa yanapaykuwachwan ayllunchikkuna Diosta riqsinankupaq? (Qaway 15, 16 kaqta). *

15. Mateo 5:14-16 hinaspa 1 Pedro 2:12 nisqanman hinaqa, ¿imaynatam iñiqmasinchikkunaqa yanapaykuwachwan ayllunchikkuna Diosta riqsinankupaq?

15 Jehova Diospa runankuna imayna kasqanta qawaspankum achka runakuna Diospa llaqtanman hamuchkanku (qaway Mateo 5:14-16; 1 Pedro 2:12). Qusanchik utaq warminchik mana testigo kaspanpas, ¿yaqachu iñiqmasinchikkunata riqsin? Paulinam  iñiqmasinchikkunata wasinman rinankupaq niq, chaynapi qusan iñiqmasinchikkunata riqsinanpaq. Qusanmi huk kaqnin iñiqmasinchik yanapaykusqanta yuyarispan anchata kusikun. Paymi willakun: “Bibliallamanta rimasqankupaqmi hapirqani, ichaqa manam chaynachu kasqa. huk punchawmi llamkanan kachkaptinpas ñuqawan kuska televisionpi pelota qaytasqankuta qawarqa. Chaywanmi musyakururqani bibliallamanta mana rimasqankuta”, nispa.

16. ¿Imaynanpitaq ayllunchikkunata huñunakuyman riysiwananchikpaq ninanchik?

16 Ayllunchikkunataqa yanapachwantaqmi huñunakuykunaman pusaspanchik (1 Cor. 14:24, 25). Paulinapa qusanpas wamaqmi Jesuspa wañukusqanta yuyarinapaq huñunakuyman rirqa. Chay huñunakuymanqa rirqa samasqan hora hinaspa yaqa huk horalla kasqanraykum. Paulinapa qusanmi willakun: “Imamanta rimasqankutapas manam yuyanichu, ichaqa kuyakuywan rimapayaykuwasqankutam kunankama yuyani. Maymi kasqayman hamuspankum kuyakuywan taqllapayaykuwarqaku, chaywanmi musyakururqani kuyakuqllaña kasqankuta”, nispa. Casarasqa iñiqmasinchikmi Paulinata yanaparqaku warmachanwan huñunakuypi hinaspa Diosmanta willakuq lluqsiptin. Chayta qawaspanmi Paulinapa qusanqa bibliamanta yachayta qallaykurqa.

17. (1) ¿Imawantaq mana hukmanyananchikchu? (2) ¿Imanasqataq hinalla yanapananchik ayllunchikkunata?

17 Llapallanchikmi munanchik, llapallan ayllunchik Jehova Diosta riqsispanku yupaychanankuta. Ichaqa tukuyta ruwaptinchikpas wakinqa manam Jehova Diostaqa yupaychanqakuchu. Chaywanqa amayá hukmanyarusunchu. Manam hikutachwanchu Jehova Diosta yupaychanankupaqqa. Chaywanpas hinallayá kallpanchakusun tukuy imapi. Chaynapi kusisqallaña kasqanchikta qawaspa ichapas Jehova Diosta yupaychanmanku. Chaymantapas Jehova Diostayá paykunapaq mañakusun, Jehova Diosmantayá kuyakuywan willasun, hinaspapas ama amispayá hinalla yanapasun (Hech. 20:20). Hinalla kallpanchakuptinchikqa Jehova Diosmi yanapawasun. Ayllunchikkuna willasqanchikta uyariwaspanchikqa wiñay kawsaytam haypanqaku.

57 KAQ TAKI Llapankumanyá Diosmanta willakusun

^ par. 5 Kay yachachikuypim yachasun, Diospi mana iñiq ayllunchikkuna Diosta riqsinankupaq imayna yanapaymanta. Ñuqanchikqa munanchik Jehova Dios riqsinankutam, ichaqa sapakamam chaytaqa tantiakunanku.

^ par. 1 Sutikunaqa cambiasqam kachkan.

^ par. 53 FOTOMANTA WILLAKUY: Musu iñiqmasinchikmi taytanman qawachichkan jw.org® niqpi videonchikkunata, taytanqa Diospi mana iñiqmi.

^ par. 55 FOTOMANTA WILLAKUY: Iñiqmasinchikmi, qusan imayna chisyasqanmanta willaptin sumaqta uyariykuchkan. Chaymantam kimsanku pukllanankupaq kachkanku, qusanqa Diospi mana iñiqmi.

^ par. 57 FOTOMANTA WILLAKUY: Iñiqmasinchikmi wasinman qayaykun wakin iñiqmasinchikkunata. Iñiqmasinchikkunañataqmi qusanwan asi-asillaña rimachkanku. Qusanqa chaymanta qipallamanmi Jesuspa wañukusqanta yuyarinapaq huñunakuypiña kachkan.