Yachachikuypa kasqanman rinapaq

Yachachikuyman rinapaq

¿Imakunamantam runakunaqa Diosta tapuyta munanku?

¿Imakunamantam runakunaqa Diosta tapuyta munanku?

SUSANMI qanchis watallanpiraq kachkaspan Diosmanta tapukuyta qallaykurqa isqun watachayuq Al sutiyuq amigochan polio nisqanku unquywan unquruptin, amigochanta hospitalman aparuptinkum samayta atinanpaq huk aparatopi karqa. Huk periodicopim Susanmanta willakurqaku (6 enero 2013 The New York Times).

Amigochanta hospitalpi watukuspanmi Susanqa mamanta tapurqa: “¿Imanasqataq Diosqa warmachata ñakarichin?”, nispa.

Mamanñataqmi nirqa: “Manam yachanichu imanasqa ñakarichisqanmantaqa, curam nisunkiman imanasqa Dios ñakarichisqanmantaqa”, nispa.

Chaymanta iskay wata pasaytam poliomielitis nisqanku unquypaq huk doctorpa hampi tarisqanta servichikuyta qallaykurqaku (1954, Jonas Salk). Hinaptinmi Susanpa maman nirqa: “Ichapas chay hampita ruwananpaqqa Dios yanapaykurqa”, nispa.

Susanñataqmi nirqa: “Ñawpaq watakunapiraq doctorkunata Dios yanapaykuptinqa manachá amigochayqa hospitalpichu kachkanman karqa”, nispa.

Warmacha kaspan ima piensasqanmantam Susan nirqa: “Chay watamanta pusaq wata pasayllatam amigochayqa wañukurqa, chay watapaqqa manañam Diospiqa creerqaniñachu”, nispa.

Imawanpas sasachakuspankum utaq runamasinku ñakarisqanta qawaspankum hukkunapas Susan hina tapukunku. Chaymi wakinqa Diospi manaña creenkuchu, creespankupas manam hapipakunkuchu.

Achka runakunam Diospiqa mana creenkuchu religionniyuq runakunapa mana allin ruwasqankuta qawasqankurayku. Ninkum yachay munasqankumanta tapukuptinku ima religionpi kaqkunapas mana contestay atisqanta. Paykunapa tapukusqankumantaqa religionpi kaqkunapas yachaytam munanku. ¿Imakunamantam runakunaqa Diosta tapuyta munanku? Qatiqninpiyá yachasun kimsa tapukuykunamanta chaynataq bibliapa ima nisqanmantapas.

 1 “¿IMANASQATAQ SAQINKI ÑAKARIY KANANTA?”

¿Imanasqataq chaynata tapukunku?

Achka runakunam ninku: “Kuyakuq Diosqa manachá saqinmanchu ñakariy kanantaqa”, nispa.

KAYPI PIENSARIY: Wakin llaqtakunapim uyankuta qawaspa rimasqanku qawachin kuyakuq kasqankuta, wakin llaqtakunapiñataqmi qawachin mana respetoyuq kasqankuta. Ichapas huk law llaqtayuq runakunapa imayna kasqankuwan utaq imapas ruwasqankuwan hukmanyarqanki llaqtaykipi ruwasqankuman hina mana ruwaptinku, ¿allinchu kanman chayna ruwasqankumanta mayqanninmantapas mana allinta piensayqa? Manam, allinqa kanman paykunata sumaqta riqsiykuymi.

Chaynallataqmi Dios imayna kasqanmanta rimanapaqpas paymanta sumaqta yachaykunanchik. Ñakariykuna kasqanraykum wakin runakunaqa piensanku Dios mana kasqanpi. Wakinñataqmi mana iskayrayankuchu Dios kasqanmantaqa, yachankutaqmi imanasqa ñakariykuna kananta saqisqanmantapas.

IMATAM BIBLIA NIN: Diospa piensasqanqa hinaspa ruwasqanqa manam runakunapa hinachu (Isaias 55:8, 9). Chaymi hukmanyachwan Diospa nisqankuna munasqanchikman hina chaylla mana ruwakuptinqa.

Runakunam ninku Diospa imapas ruwasqanwan tanteasqankuna mana entiendey atina kasqanta. Manam chayna nisqankuman hinachu piensana. Diosta allinta riqsinapaqmi biblia yanapawanchik, yachachiwanchiktaqmi ñakariykunata Dios imanasqa saqisqanmantapas. * Niwanchiktaqmi payman asuykuyta atisqanchikmantapas (Santiago 4:8).

 2 “¿IMANASQAM RELIGIONPI MANA ALLINTA RUWANKU?”

¿Imanasqataq chaynata tapukunku?

Wakin runakunam ninku: “Allin ruwananchikta Dios munaptinqa imanasqataq Diostam yupaychani niqkunaqa mana allinkunata ruwanku”, nispa.

KAYPI PIENSARIY: Allin uywasqa churi taytanta mana kasukuspan kikinpa munasqanta ruwananpaq wasinmanta pasakusqanpi. Llakikuspanpas taytanqa manam harkakunchu munasqanta churin ruwanantaqa. Chay warmata riqsiruspaykiqa, manam niwaqchu taytan mana allin kasqantaqa nitaq mana taytayuq kasqantapas. Chaynallataqmi Diospas mana harkakunchu religionpi kaqkuna munasqankuman hina ruwanankutaqa.

IMATAM BIBLIA NIN: Niwanchikmi religionpi kaqkunapa mana allin ruwasqankuta Dios chiqnisqanmanta (Jeremias 7:29-31; 32:35). Ichaqa manam harkakunchu sapakama tanteakunankutaqa. Diostam yupaychani niqkunaqa yaqa llapankum bibliapa nisqantaqa mana kasukunkuchu, paykunaqa kikinkum tanteakunku imam allin utaq mana allin kasqanta (Mateo 15:7-9).

Diosta tukuy sunqunkuwan yupaychaqkunam ichaqa kamachikuyninkunata kasukunku. * Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Bibliam nin ‘kuyanakunapaq’ (Romanos 12:9). Religionpi kaqkunaqa yaqa lliwmi mana kuyanakunkuchu. Rimarisun Ruanda nacionmanta. 1994 watapim chay nacionpi wañuchinakuy karqa, hinaptinmi huk religionllapi kaqkunapas kikinkupura wañuchinakurqaku huk castallamanta mana kasqankurayku. Testigonkunam ichaqa pitapas mana wañuchirqakuchu, aswanqa iñiqmasinkutawan huk religionpi kaqkunata yanapanankuraykum wañuy patanpipas tarikurqaku. Huk religionpi kaqkuna mana allinta ruwaptinkupas, Diosta sunqunmanta yupaychaqkunaqa paytam kasukunku.

 3 “¿IMAPAQTAQ KAY PACHAPI KACHKANI?”

¿Imanasqataq chaynata tapukunku?

Runakunam ninku: “¿Imanasqataq 80 utaq 90 watakunalla kawsanchik? ¿Imapaqtaq allin chayna watakunalla kawsayninchikqa?”, nispa.

KAYPI PIENSARIY: Diospi mana creeq achka runakunam ninku hanaq pachapi chaynataq kay pachapi admirakuypaq kaqkuna qunqayllamanta mana rikurisqanta. Cuentatam qukunku allpa pacha hinaspa killapas maymi kananpi kasqanrayku kay pachapi imapas kawsasqanmanta, chaynataq maymi kananpi chaykuna takyananpaq imapas mana yanapaptinqa kay pachapi imapas mana kawsananmanta.

IMATAM BIBLIA NIN: 80 utaq 90 watalla kawsasqanchikraykum wakin runakunaqa piensanku Dios mana kasqanta. Ichaqa tukuy unanchasqankunam qawachin Dios kasqanta (Romanos 1:20). Diosmi kay pachatawan runakunataqa unancharqa munaynin ruwasqa kananpaq. Unanchawarqanchikqa kay pachapi kusisqa hinaspa wiñaypaq kawsakunapaqmi, chayqa paypa munasqanman hinam kanqa (Salmo 37:11, 29; Isaias 55:11).

Dios kasqanmantam yachachwan tukuy unanchasqankunata qawaspa, payqa manam munanchu unanchasqankunata qawaspalla munayninmanta yachanataqa. Kikinmi willawananchik munayninmantawan imapaq unanchasqa kasqanchikmantaqa. Mana sasachakuspalla chaykunamanta entiendenapaqmi palabranpi willawanchik. * Chaymi Jehova Diospa testigonkunaqa kallpanchaykiku bibliapa ima nisqanmanta yachanaykipaq.

^ par. 16 Imanasqa ñakariykuna kananta Dios saqisqanmanta astawan yachayta munaspaqa qaway ¿Imatapunim Bibliaqa yachachin? libropa 11 kaq yachachikuyninta. Kayqa Jehova Diospa testigonkunapa ruwasqanmi. Hurquwaqtaqmi www.jw.org/quy nisqanmantapas.

^ par. 22 Qaway ¿Imatapunim Bibliaqa yachachin? libropa 15 kaq yachachikuyninta. Kayqa Jehova Diospa testigonkunapa ruwasqanmi. Hurquwaqtaqmi www.jw.org/quy nisqanmantapas.

^ par. 28 Astawan yachayta munaspaqa qaway ¿Imatapunim Bibliaqa yachachin? libropa 3 kaq yachachikuyninta. Kayqa Jehova Diospa testigonkunapa ruwasqanmi. Hurquwaqtaqmi www.jw.org/quy nisqanmantapas.