ALLIN tayta-mama kayqa sasamá. Aswan sasaraqmi kanman warmaykikunata mana corregiptikiqa, ¿imanasqa? Warmaykikunam munasqankuta ruwayta qallaykunqaku, chaywanmi astawan hukmanyawaq. Chaymantapas warmaykikunata corregispayki nisqaykiman hina mana ruwaptikiqa, paykunaqa iskayrayasqam qipanmanku.

Kuyakuywan hinaspa allin tanteowan warmakunata corregiyqa yanapanqam allin warmakuna kanankupaq. Yanapanqataqmi allin tanteayta yachanankupaq hinaspa wiñaspanku allin runa kanankupaqpas. ¿Maypim warmakunata allinta uywanapaq yanapakuykunata tarinkiman?

Kay qillqata ruwaq Jehova Diospa testigonkunaqa, manam iskayrayanikuchu bibliaqa allin “yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq” kasqanmanta (2 Timoteo 3:16). Arí, bibliaqa ima qillqakunamantapas aswan allintapunim yachachiwachwan. Nisqankunaqa allintam ayllukunata yanapanman. Chaymantayá qatiqninpi qawasun.

BIBLIAM NIN: “Yanqakunallapim piensan warmaqa”, nispa (Proverbios 22:15).

Warmakuna allin ruwaq hinaspa kuyakuq kaptinkupas yaqa llapanpim llutanpi imatapas ruwanku. Chayraykum paykunata corregina (Proverbios 13:24). Chaymanta allinta yachayqa yanapasunkim warmaykita allinta uywanaykipaq.

BIBLIAM NIN: “Warma corregiytaqa amayá recelaychu”, nispa (Proverbios 23:13).

Amayá piensaychu warmaykita kuyakuywan hinaspa allin tanteowan corregiptikiqa wañurunankumanta utaq wiñaypaq chiqnisunaykimantaqa. Aswanqa yachachichkankim llampu sunqu kananpaq hinaspa pipas corregiptin chaskikunanpaq (Hebreos 12:11).

 BIBLIAM NIN: “Runaqa imapas tarpusqantam cosechanqa”, nispa (Galatas 6:7).

Allinmá tayta-mama warmankuta imamantapas waqaychayninkuqa, chaytamá ruwananku. Chaypaqmi allin tanteaq kananku. Warmaykipa imapas mana allin ruwasqanta kikiki allichaspaykiqa manam yanapankichu. Manataqmi yanapankichu profesornin utaq pipas mana allin ruwasqanmanta nisuptiki harkakuptikiqa. Chay runakunata yanapasuqnikita hina qawaspaykiqa, warmaykikunapas yachanqakum yuyayniyuq runakunata respetayta (Colosenses 3:20).

BIBLIAM NIN: ‘Munaysapa warmam mamanta pinqayman churan’, nispa (Proverbios 29:15).

Tayta-mamakunaqa manamá warmankuta uywasqankurayku maqakuqllañaqa kanankuchu, manataqmi saqinankuchu imapas munasqanta ruwanankupaq. Huk qillqam nin: “Munasqallankuta ruwanankupaq saqiq tayta-mamapa warmankunaqa manam musyakunkuchu tayta-mamanku wasinkupi kamachiq kasqantaqa”, nispa (El precio del privilegio). Tayta-mamakuna warmankuta mana corregiptinkuqa paykunaña kamachisqankutam piensanqaku. Mana allin ruwaykunaman wichiykuptinkuñataqmi pinqaypi qipachisunkiman (Proverbios 17:25; 29:21).

BIBLIAM NIN: “Qarim [...] hukllawakunqa warminmanña chaymi iskayninku huk runa hinallaña kanqaku”, nispa (Mateo 19:5).

Bibliam yachachin qariwan warmi manaraq churi-wawayuq kachkaspanku casarakunankumanta. Nintaqmi warmanku wiñaruptinpas hinalla kuska kanankumanta (Mateo 19:5, 6). Huk rimaypiqa manaraq tayta utaq mama kachkaptikim puntataqa casarasqa kanayki. Chaynata mana ruwaptikiqa warmaykikunam pimantapas aswan allinpaq hapikunmanku (Romanos 12:3). Tukuy ima munasqanta quypi tayta-mamakuna afanakuspankuqa casado vidankupim hukmanyayta qallaykunmanku.

Tayta-mamakuna, warmaykikunata allinta uywanaykipaqqa qatiqninpi nisqanman hina ruway.

Kuyakuq kay. Bibliam nin: “Tayta-mamakuna, ama piñachiychikchu wawa-churikichikta chaynapi ama hukmanyarunankupaq”, nispa (Colosenses 3:21).

Nisqaykiman hina ruway. Bibliam nin: “‘Arí’ nispaqa, chayna nisqaykichikman hinayá ruwaychik, ‘manam’ nispapas chayman hinayá ruwaychik”, nispa (Mateo 5:37, NM).

Warmaykikunata entiendey. Bibliam nin: “Mana allin ruwasqaykichikman hinallam corregisqaykichik”, nispa (Jeremias 30:11, NM). *