¿IMAMANTA? Runakunapa wakin tapukuykuna rurakusqankumanta. Qampas tapukurqankipaschá kayna tapukuykunataqa:

  • ¿Nanachikunchu Dios ñoqanchikmanta?

  • ¿Haykapipas tukunqachu guerrakuna hinaspa ñakariypas?

  • ¿Imataq pasawanchik wañuptinchik?

  • ¿Kanmanchu ima suyakuypas wañusqakunapaq?

  • ¿Imaynatam mañakunanchik Dios uyariwananchikpaq?

  • ¿Imata ruraspataq kusisqa kachwan?

¿Imaynatataq yachawaq kay tapukuykunapa kutichiyninta? Kanmi kay asuntokunamanta yachachiq waranqantin librokuna. Ichaqa manam cheqaptachu yachachin. Wakinqa huk tiempollapaqmi servin, tiempopa risqanman hinam ichaqa manaña valenchu, chaymi huk librokunataña qellqanku.

Ichaqa kanmi confiakunapaq cheqapmanta yachachiq huk libro. Jesusmi Diosta mañakusqanpi nirqa: “Palabraykiqariki cheqapmi”, nispa (Juan 17:17). Chay Palabratam sutichakun Biblia nispa. Chaymi qallariypi kaq tapukuykunata Bibliapa nisqanman hina kutichisun.

 ¿Nanachikunchu Dios ñoqanchikmanta?

¿IMAYNANPITAQ KAYNATA TAPUKUNKU? Llumpay mana allin ruraykunapa chaynataq cheqninakuyllaña kasqanpim kawsanchik. Achkaq religionkunam yachachinku Dios munaptinmi ñakarinchik nispa.

BIBLIAPA YACHACHISQAN. Diosqa manam haykaqpas mana allintaqa ruranchu. Job 34:10 nin: “Mana allin rurayqa Diosmanta karunchasqayá kachun. Hucha rurayqa Tukuy Atiyniyoq Diosmanta karunchasqayá kachun”, nispa. Diosqa kuyakuq kayninpim runakunaman sumaq suyakuyta qowanchik chaymi Jesus yachachiwarqanchik kaynata mañakunanchikpaq: “Hanaq pachapi Taytayku [...], munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:9, 10). Diosqa ñoqanchikmantaqa nanachikunmi chaymi munaynin rurakunanpaq admirakuypaq kaqta rurarqa (Juan 3:16).

Qawaytaq Genesis 1:26-28; Santiago 1:13, hinaspa 1 Pedro 5:6, 7 nisqanta.

¿Haykapipas tukunqachu guerrakuna hinaspa ñakariypas?

¿IMAYNANPITAQ KAYNATA TAPUKUNKU? Guerrapiqa mana yupay atina runakunam wañuchkanku. Llapallanchikmi tukuy imaymanawan ñakarinchik.

BIBLIAPA YACHACHISQAN. Diosqa prometenmi enteron Pachapi hawkayay kananmanta. Hanaq pachamanta Dios gobiernamuptinqa runakunam ‘guerrapaqpas manaña yachanqakuñachu’ “espadankutapas rejakunamanñam tikrarunqaku” (Isaias 2:4). Diosqa chinkachinqataqmi ñakariykunatawan mana allin ruraykunataqa. Bibliaqa ninmi: “Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa [ñakariywan mana alli ruraykunaqa] pasarunñam”, nispa (Apocalipsis 21:3, 4).

Qawaytaq Salmo 37:10, 11; 46:9, hinaspa Miqueas 4:1-4 nisqanta.

¿Imataq pasawanchik wañuptinchik?

¿IMAYNANPITAQ KAYNATA TAPUKUNKU? Yaqa lliw religionkunam yachachinku runakuna wañuruptin cuerponku ukupi espiritun otaq alman hinalla kawsasqanmanta. Wakinqa ninkum wañusqakuna imatapas ruraruwananchikmanta, ninkutaqmi mana allin runakunata Dios infiernopi wiñaypaq castigasqanmantapas.

BIBLIAPA YACHACHISQAN. Eclesiastes 9:5 nin: “Manam imatapas yachanchu wañuqkunaqa”, nispa. Chaynamá, wañuqkunaqa manañam imatapas sientenkuchu, imatapas rurankuchu, manam imatapas rurawanchikmanchu nitaq yanapawanchikmanchu (Salmo 146:3, 4).

Qawaytaq Genesis 3:19 hinaspa Eclesiastes 9:6, 10 nisqanta.

 ¿Kanmanchu ima suyakuypas wañusqakunapaq?

¿IMAYNANPITAQ KAYNATA TAPUKUNKU? Llapallanchikmi kuyasqanchik ayllunchikkunawan kusisqa kawsakuyta munanchik. Chaymi kuyasqanchik ayllunchikkunawan kaqllamanta tupaykuyta munanchik.

BIBLIAPA YACHACHISQAN. Yaqa llapallan wañusqakunam kawsarimunqaku. Jesusqa prometerqam ‘wañuqkuna kawsarimunankumanta’ (Juan 5:28, 29). Kay Pachapi kawsarimuqkunaqa kay pachapim suma-sumaq paraisopi kawsakunqaku, qallariymanta Diospa munasqanman hina (Lucas 23:43). Cheqapmá, hamuq tiempopim Diosman sonqo runakunaqa mana onqospa wiñaypaq kawsakunqaku. Bibliam nin: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 37:29).

Qawaytaq Job 14:14, 15; Lucas 7:11-17, hinaspa Hechos 24:15 nisqanta.

¿Imaynatam mañakunanchik Dios uyariwananchikpaq?

¿IMAYNANPITAQ KAYNATA TAPUKUNKU? Yaqa lliw religionkunapim runakunaqa Diosta mañakunku. Ichaqa achkam piensanku mañakusqankuta Dios mana uyarisqanta.

BIBLIAPA YACHACHISQAN. Jesusqa nirqam: ‘Mañakuspaykiqa amam nisqallaykitachu kutirispa-kutirispa rimanki’, nispa (Mateo 6:7). Mañakusqanchikta Dios uyarinanpaqqa munasqanman hinam mañakunanchik. Chaypaqqa yachananchikmi Diospa imam munasqanmanta chayman hina mañakunanchikpaq. “Paypa munasqanman hina mañakuptinchikqa uyariwanchikmi” nispam nin 1 Juan 5:14.

Qawaytaq Salmo 65:2; Juan 14:6, 14, hinaspa 1 Juan 3:22 nisqanta.

¿Imata ruraspataq kusisqa kachwan?

¿IMAYNANPITAQ KAYNATA TAPUKUNKU? Runakunaqa piensankum qollqeyoq kaspa, allin reqsisqa kaspa hinaspa allin rikchayniyoq kaspa kusisqa tarikunankumanta chaymi chaykunapi afanakunku. Ichaqa manamá kusisqachu tarikunku.

BIBLIAPA YACHACHISQAN. Jesusmi kusikuyta imayna tarinamanta nirqa: “Mayna kusisqam ‘Diostam necesitani’ niqkunaqa”, nispa (Mateo 5:3). Kusisqaqa tarikusunchik Dios necesitasqanchikta reqsikuspa hinaspa paymanta chaynataq munayninmanta cheqapta yachanapaq kallpanchakuspallam. Cheqap yachachikuykunataqa Bibliapim tarisunchik, chayta estudiaymi yanapawasun allinpaq otaq mana allinpaq kaqta yachananchikpaq. Bibliapa nisqanman hina tanteakuspanchikqa otaq ruraspanchikqa kusisqam kawsakusunchik (Lucas 11:28).

Qawaytaq Proverbios 3:5, 6, 13-18 hinaspa 1 Timoteo 6:9, 10 nisqanta.

 Bibliapa yachachisqanman hina soqta tapukuykunamantam yacharunchik. ¿Munawaqchu astawan yachayta? Sichum qampas ninki ‘Diostam necesitani’ nispa, hinaptinqa astawan yachaytachá munanki. Tapukunkipaschá kayna tapukuykunatapas: “¿Ñoqanchikmanta Dios nanachikuspanqa imaraykutaq permiten ñakariykunatawan mana allin ruraykunataqa?, ¿Imaynatam familiaywan kusisqa kawsakuyman?”, nispa. Kayna tapukuykunamanta hinaspa hukkunamantapas Bibliaqa allintam kutichin.

Ichaqa achka runakunam Biblia estudiaytaqa mana munankuchu. Unay tiempo leenapaq hinaspa sasa entiendenapaqmi hapinku. ¿Munawaqchu Bibliapa yachachisqankunamanta yachanaykipaq yanapakuykuna chaskiyta? Chaypaqmi Jehová Diospa testigonkuna iskay yanapakuykunata rurarunku.

Punta kaq yanapakuyqa kaymi ¿Imatapunim Bibliaqa yachachin? nisqa librom, kaytaqa rurakurqa Bibliapa nisqanman hina tapukuykunata kutichinanpaqmi, chaynapi mana tiempoyoq runakunapas yachanankupaq. Iskay kaq yanapakuyqa wasinkupi mana qollqellapaq Bibliamanta yachachiymi. Mana imamanpas obligasuspaykim Jehová Diospa testigonkuna wasikipi otaq munasqayki sitiopi watukamususpayki sapa semana pisi-pisimanta Bibliamanta allinta yachachisunki. Millonninpi runakunam kay yanapakuykunata chaskinku, hinaspam achkaq runakuna cheqapmanta yachasqankuta reqsikunku.

Qampas yachawaqmi Bibliapa yachachisqan ancha valorniyoq kasqanta. Bibliapa yachachikusqanqa creenciakunamanta, pantay yachachikuykunamanta, hinaspa manchachiwasqanchik kaqkunamanta librawaspanchikpas suyakuyniyoqta, hawkallata hinaspa kusisqatam kawsachiwanchik. Jesuspunim nirqa: “Yachankichikmi cheqap kaqmanta, chay cheqapmi libreyachisunkichik”, nispa (Juan 8:32).