Yachachikuypa kasqanman rinapaq

Yachachikuyman rinapaq

15 KAQ YACHACHIKUY

Diospa munasqanman hina yupaychanamanta

Diospa munasqanman hina yupaychanamanta
  • ¿Lliw religionkunatachu Diosqa chaskinman?

  • ¿Imaynatam yachachwan Diosta munasqanman hina yupaychayta?

  • ¿Pikunataq kunan tiempopi Diospa cheqap serviqninkuna kanku?

1. ¿Ima bendicionkunatam chaskisunchik Diosta munasqanman hina yupaychaspaqa?

JEHOVÁ DIOSQA anchatam kuyawanchik. Chaymi allinninchikta munaspan allin ñanninta purinanchikpaq yanapaykuyta munawachkanchik. Munasqanman hina yupaychaspanchikqa kusisqam tarikusunchik chaynataqmi achka sasachakuykunamantapas librakusun. Hinaspapas bendicionnintawan yanapakuynintam chaskisunchik (Isaias 48:17). Ichaqa pachakninpim religionkunaqa kachkan. Llapankuña cheqaptam Diosmanta yachachiniku niptinkupas manam kaqllatachu Diosmantaqa yachachinku nitaq ñoqanchikmanta Dios imam munasqanmantapas.

2. ¿Imaynatam yachawaq Jehová Diosta imayna yupaychanamanta, hinaspa imawantaq rikchanachichwan?

2 ¿Imaynatam yachawaq Jehová Diosta imayna yupaychanamanta? Manam llapallan religionkunapa yachachikuyninkunataraqchu tupachinayki yachanaykipaqqa. Imatapunim Biblia yachachin imayna yupaychanamanta, chayllatam yachanaykiqa. Kaywan rikchanachisun. Yachasqaykiman hinaqa falsificasqa qollqeqa achka llaqtakunapim sasachakuyta apamun. Yuyaymanay, sichu qamta pipas kamachisunkiman falsificasqa qollqeta cheqap qollqemanta rakinaykipaq hinaptinqa, ¿imaynatataq yachawaq mayqan cheqap kasqanta chaynataq mayqan falsificasqa kasqanta? ¿Qollqe imayna falsificasqa kasqanta yachaspaykiraqchu? ¿Manachu aswan allinqa kanman cheqap qollqe imayna kasqanta yachay? Cheqap kaq qollqe kasqanta allinta reqsispaqa yachankim mayqenkuna falsificasqa kasqanta. Chaynallataqmi cheqap kaq religionmanta allintapuni yachaspaqa, facilllatam pantasqa religionkunataqa reqsinki.

3. Jesuspa nisqanman hinaqa, ¿imatam rurananchik Jehová Dios chaskiwananchikpaqqa?

3 Jehová Diostaqa munasqanman hinam yupaychananchik. Achka runakunam ninku llapallan religionkunatam Diosqa chaskin nispa, ichaqa manam chaynatachu Bibliaqa yachachin. Manayá cristianom kani niyllachu, Jesusmi nirqa: “Manam: “¡Señorlláy, Señorlláy!” nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam”, nispa. Chaynaqa, Diospa imam mañawasqanchikmanta yachaspanchikmi hinaspa munayninta ruraspallanchikmi chaskisqaqa kasunchik. Diospa munasqanta mana ruraqkunatam Jesus suticharqa “mana allin ruraqkuna”, nispa (Mateo 7:21-23). Pantasqa religionqa falsificasqa qollqe hinam: mana ima valorniyoqmi. Aswanqa sasachakuykunamanmi apawanchik.

4. ¿Imamanmi rikchakun Jesuspa rimasqan iskay ñankuna, maymantaq apakun sapa ñanqa?

4 Jehová Diosqa munanmi llapallan runakuna wiñaypaq kawsanankuta. Ichaqa Paraisopi wiñaypaq kawsakuyta munaspaqa munasqanman hinam kawsananchik chaynataq munasqanman hina yupaychananchikpas. Ichaqa llakikunapaq hinam achka runakuna Diospa munayninta mana rurayta munankuchu, chaymi Jesus nirqa: “Kichki punkuntayá yaykuychikqa, hatun punkunta hinaspa hatun ñannintaqa richkanku infiernomanmi [sepulturamanmi] chaynintaqa achkallañam richkanku. Kichki punkunta hinaspa kichki ñannintaqa richkanku wiñay kawsaymanmi, aschallam chaynintaqa richkanku”, nispa (Mateo 7:13, 14). Qawasqanchikman hinaqa cheqap yupaychaymi wiñay kawsayman apawanchik pantasqañataqmi wañuyman. Jehová Diosqa manam munanchu pipas wañunantaqa, chaymi llapallan runakuna payta reqsinantaraq munachkan (2 Pedro 3:9). Imayna yupaychayninchikmi apawachwan kawsayman otaq wañuymanpas.

¿IMAYNATAM YACHACHWAN DIOSTA MUNASQANMAN HINA YUPAYCHAYTA?

5. ¿Imaynatam reqsichwan Diospa munasqanman hina cheqap yupaychaqkunata?

5 ¿Imaynatataq tarichwan ‘wiñay kawsayman’ apaq ‘ñanta’? Cheqap yupaychaqkunataqa reqsichwanmi imayna kawsasqankuta qawaspa. Chaymantam Jesusqa kaynata nirqa: “Qamkunaqa sachata hinam rurunpi reqsinkichik. [. . .] Allin sachaqa allintam rurun”, nispa (Mateo 7:16, 17). Arí, Diospa munasqanman hina yupaychaqkunam iñiyninkupiwan rurayninkupi reqsichikunku cheqap cristiano kasqankuta. Huchayoq hinaspa pantaq runa kachkaspankupas, llapallankum Diospa munayninta ruraypi kallpanchakunku. Cheqap cristianokunata imayna reqsinamanta kaykunata qawasun.

6, 7. ¿Imatam Diospa serviqninkunaqa Bibliamanta ninku, imatam Jesuspas rurarqa?

6 Diospa cheqap serviqninkunaqa Bibliapa yachachisqantapunim yachachinku. Bibliapunim nin: “Bibliapi llapallan qellqasqa kaqkunaqa Diospa Espiritunpa qosqanmi, allinmi yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq hinaspa imaynam allin kawsakuy yachachiwananchikpaq chaynapi Diospa runankunaqa yachayniyoq kaspa tukuy allinkunata rurananchikpaq”, nispa (2 Timoteo 3:16, 17). Apostol Pablom cristianomasinkunaman qellqarqa: “Ñoqayku willaptiykum Diospa palabranta chaskirqankichik, ichaqa manam runapa rimasqanta hinallachu aswanqa Diospa cheqap palabranta hinam”, nispa (1 Tesalonicenses 2:13). Chaynaqa cheqap cristianokunapa yachachikuyninkunawan rurayninkunaqa manam runakunapa costumbrenkunapichu nitaq creenciakunapichu hapipakun. Aswanqa chuya espirituntakama Diospa qosqan Palabranpim.

7 Señorninchik Jesucristopas Bibliamantapunim yachachirqa. Taytanta mañakuspanmi nirqa: “Palabraykiqariki cheqapmi”, nispa (Juan 17:17). Jesusqa Diospa Palabranpim iñirqa, chaymi tukuy yachachisqanqa Bibliapa nisqanwan tuparqa. Sapa kutitam niq: “Bibliam nin” nispa, chaymantañataq Bibliapa huk kaqnin textonpa nisqanmanta willarqa (Mateo 4:4, 7, 10). Chaynallataqmi kunan tiempopipas Diospa serviqninkunaqa manam piensasqankuman hinallachu yachachinku. Aswanqa Biblia Diospa Palabran kasqanpim iñinku, chaymi Bibliapa yachachisqanmantapuni yachachinku.

8. ¿Imata ruraspataqmi Jehová Diosta yupaychana?

8 Diospa munasqanman hina cheqap yupaychaqkunaqa Jehová Diosllatam yupaychanku chaynataq sutintapas reqsichinku. Jesusmi yachachirqa: “Señor Diosllaykitam adoranki, payllatataqmi servinkipas”, nispa (Mateo 4:10). Chaymi Jehová Diospa serviqninkunaqa payllata yupaychanku. Diospa sutinmantawan sumaq kayninkunamanta willakuspankutaqmi yupaychanku. Salmo 83:18 kaynata nin: “Sutikiqa tayta [“Jehová”, NM] Dioslla kasqantayá yachachunku. Kay pachapa altonpiqa qamlla kasqaykitayá yachachunku”, nispa. Jesus hinam Diosta reqsiypi runakunata yanapanku. Kikinmi Taytanta kaynata nirqa: “Kay pachamanta qowasqayki runakunamanqa ñam willaniña pim kasqaykita”, nispa (Juan 17:6). Chaynallataqmi kunanpas Diospa munasqanman hina yupaychaqkunaqa runamasinkuta yachachinku Diospa sutinmanta, munayninmanta chaynataq sumaq kayninkunamantapas.

9, 10. ¿Imakunata ruraspam cheqap cristianokunaqa kuyanakunku?

9 Diospa serviqninkunaqa cheqaptapunim kuyanakunku, manam kikinkupa munasqallankutachu ruranku. Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Ñawpa cristianokunaqa chaynatapunim kuyanakurqaku. Diospa serviqninkunapa kuyanakuyninkutaqa manam harkanchu huk castamanta nitaq huk llaqtamanta kaypas, apu otaq wakcha kaypas, aswanqa huk familia hinallam kawsakunku (Colosenses 3:14). Pantay religionkunapi kaqkunaqa manam chaynatachu kuyanakunku. Cheqapta kuyanakuspankuqa manachiki huk castamanta otaq huk llaqtamanta kaq runamasinwanqa wañuchinakunmankuchu. Cheqap cristianokunaqa manam armakunataqa hapinkuchu iñiqmasinkuta nitaq runamasinkunatapas wañuchinankupaqqa. Bibliam yachachin: “Suti reqsiyllam Diospa churinkunaqa, suti reqsiyllataqmi diablopa churinkunapas. Allinkunata mana ruraqqa otaq runamasinta mana kuyaqqa manam Diospa churinchu. “Kuyanakuychik” niqtam ñawpaqmantapuni uyarirqankichik. Amayá wawqen wañurachiq Cain hinachu kaychikqa. Payqariki diablopa runanmi karqa”, nispa (1 Juan 3:10-12; 4:20, 21).

10 Cheqap cristianokunaqa cheqap kuyakuyniyoq kasqankuraykum runamasinkutaqa mana wañuchinkuchu, ichaqa manam chaynallatachu kuyanakunankuqa. Kusikuywanmi tiemponkuta, kallpankuta hinaspa kapuqninkunatapas servichikunku yanapanakunankupaq chaynataq kallpanchanakunankupaqpas (Hebreos 10:24, 25). Sasa tiempokunapipas yanapanakunkum hinaspam hukkunapaqpas allin kaqllata ruranku. Bibliapa kay nisqantam kasukunku: “Lliwtayá yanapasun” niqta (Galatas 6:10).

11. ¿Imaraykutaq cheqap cristianokunaqa Jesucristotakamalla Diospa salvawasqanchikta reqsikunanku?

11 Cheqap cristianokunaqa Jesucristotakamalla Dios salvawasqanchiktam reqsikunku. Bibliam yachachin: “Jesusmanta hukqa manam pipas salvanmanchu, kay pachapiqa manataqmi pipas kanchu runakunata salvaqqa”, nispa (Hechos 4:12). 5 kaq yachachikuypi yachasqanchikman hinam Jesusqa wañurqa kasukuq runakunata salvananrayku (Mateo 20:28). Hinaspapas, Jehová Diosqa Jesustam hanaq pachapi Kamachikuq kananpaq churarunña kay Allpa pachata kamachimunanpaq. Chaynaqa, Jehová Diosqa munanmi Jesucristota kasukunanchikta chaynataq yachachikuyninman hina kawsakunanchiktapas. Chaynata ruraspallam wiñaypaqqa kawsakusunchik. Chayraykum Biblia nin: “Churipi iñiqqa wiñay kawsayniyoqmi, paypi mana iñiqmi ichaqa mana wiñay kawsayniyoqchu”, nispa (Juan 3:36).

12. ¿Ima ninanmi kay pachapi runakunapa rurayninkunawan mana chaqrukuyqa?

12 Cheqap cristianokunaqa manam kay pachapi runakunapa rurayninkunawanqa chaqrukunkuchu. Roma nacionmanta kamachikuq Pilato Jesusta jusgachkaptinmi, Jesus nirqa: “Munaychakuyniyqa manam kay pachamantachu”, nispa (Juan 18:36). Mayqan nacionpiña yachaspankupas Jesuspa cheqap qatiqninkunaqa Diospa Munaychakuyninmanmi hapipakunku. Chayraykum mana chaqrukunkuchu politica nisqankupi nitaq kay pachapi chaqwakunapipas, aswanqa sapaqchasqam chaykunamantaqa kanku. Ichaqa huk runakuna politica nisqankuwan hukllawakuyta chaynataq kamachikuq kayta munaptinkuqa otaq huk kamachikuqta akllakuyta munaptinkuqa manam harkakunkuchu. Mayqan gobiernomanpas manaña sayapakuchkaspankupas, kasukunkum kamachikuyninkunataqa. ¿Imanasqa? Diospa Palabranmi cristianokunata kamachin, “kasukuychik autoridadnikichikta” nispa (Romanos 13:1). Ichaqa runapa kamachikuynin Diospa kamachikuyninpa contranpi kaptinqa, Diospa cheqap yupaychaqninkunaqa apostolkunapa ejemplontam qatikunku, paykunam nirqaku: “Runakunamanta puntataqa Diostam kasukuna”, nispa (Hechos 5:29; Marcos 12:17).

13. ¿Ima ninkutaq Diospa Gobiernonmanta Jesuspa qatiqninkuna, hinaspa imatam chayrayku ruranku?

13 Jesuspa cheqap qatiqninkunaqa Diospa Gobiernollan runakunapaq suyakuynin kasqantam yachachinku. Jesusqa willarqañam: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mateo 24:14). Jesuspa cheqap qatiqninkunaqa manam runakunataqa kay pachapi kaq kamachikuqkuna sasachakuyninkunata allichanankupi hapipakunankupaqqa kallpanchankuchu. Aswanmi Diospa Gobiernollan runakunapaq sumaq suyakuyta apamunanmanta willakunku (Salmo 146:3). Jesusqa yachachirqapunim chay sumaq gobierno chayamunanpaq mañakunanchikmanta, paymi nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:10). Hanaq pachapi kaq Gobiernomantam Biblia willakun: “Chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq”, nispa (Daniel 2:44).

14. Piensasqaykiman hinaqa, ¿pikunallataq Diosta munasqanman hina yupaychanku?

14 Kaykunamanta yacharusqanchikman hina tapukuy: “¿Pikunataq Bibliapa nisqanman hina yachachinku hinaspa Diospa sutin Jehová kasqantapas reqsichinku? Chaynaqa, ¿pikunataq Diospa nisqanman hina kuyanakunku, Jesuspi iñisqankuta qawachinku, kay pachapi runakunapa rurayninkuwan mana chaqrukunkuchu chaynataq Diospa Gobiernollan runakunapaq sumaq suyakuy apamunanmantapas willakunku? Allpantinpi llapallan kaq religionkunamanta, ¿mayqen kaqtaq chay soqta qawasqanchikkunata cumplen?”. Qawasqanchikman hinaqa, Jehová Diospa testigonkunam (Isaias 43:10-12).

¿IMATATAQ QAMQA RURANKI?

15. ¿Diospi creenanchikmantapas imatawantaraqmi payqa munan ñoqanchikmanta?

15 Jehová Diospa sonqonta kusichinaykipaqqa manam paypiqa creeyllachu-creenayki. Bibliaqa ninmi demoniokunapas Diospi creesqankutaqa (Santiago 2:19). Ichaqa manam Jehová Diospa munaynintaqa rurankuchu nitaq paypa chaskisqanchu kanku. Diospa sonqonta kusichinapaqqa manam creeyllachu-creenanchik, aswanqa munaynintapas rurananchikmi. Chaymantapas pantasqa religionkunamantam lloqsinanchik hinaspam Diospa munasqanman hina cheqap yupaychaqkunamanña hukllawakunanchik.

16. ¿Imatataq rurananchik pantasqa religionkunawan mana chaqrukunapaq?

16 Apostol Pablom qawachirqa pantasqa religionkunapa yupaychayninkuwan mana chaqrukunanchikmanta. Qellqarqam: “Señorqa nintaqmi: Paykuna ukumantayá lloqsiychik. Paykunamantayá sapaqchakuychik. Amayá hapiychikchu millakuypaq kaqkunataqa. Hinaptinqa chaskisqaykichikmi qamkunataqa”, nispa (2 Corintios 6:17; Isaias 52:11). Chayraykum cheqap cristianokunaqa pantasqa religionkunapa tukuy rurayninkunamanta karunchakunanku.

17, 18. ¿Imataq “Hatun Babilonia” nisqaqa, hinaspa imanasqataq chaymanta utqayllaman ‘lloqsikunanchik’?

17 Bibliaqa yachachinmi llapallan pantasqa religionkuna “Hatun Babilonia” ukupi kasqankuta (Apocalipsis 17:5). * Chayna sutichakusqanmi yuyarichiwanchik Babilonia sutiyoq ñawpaq llaqtata, chay llaqtapim qallarirqa pantasqa religionkuna Sinchi para qepata. Chay llaqtapim rikurimurqa kunan tiempopi pantasqa religionkunapa yachachikuyninkunawan rurayninkunapas. Ejemplopaq, chaypi kaq runakunam yupaycharqaku hukllapi kaq kimsa dioskunata, kunan tiempopipas chaynatam achka religionkuna yachachinku hukllapi kimsa Dios kasqanta: Tayta, Churi hinaspa chuya espiritupas Dios kasqanta. Bibliam ichaqa cheqaptapuni yachachin Jehová, chullalla cheqap Dios kasqanta hinaspa Jesucristo, Churin kasqanta (Juan 17:3). Babilonia llaqtayoqkunaqa creerqakutaqmi runakunapa wañusqan qepata almanku kawsasqankupiraq hinaspa rawrachkaq ninapi ñakarisqankutaraq. Kunan tiempopipas yaqa lliw religionkunam yachachinku mana wañuq almayoq kasqanchikta chaynataq rawrachkaq ninapi ñakarisqanchiktaraq.

18 Ñawpa Babilonia llaqtapa religionninkupa yachachikuyninkunaqa lliw Allpantinmanmi cheqerirun. Chayraykum kay tiempopi kaq Hatun Babilonia nisqaqa enteron pachapi llapallan pantasqa religionkunaman tupan. Diosqa willarqañam lliw pantay religionkuna qonqayllata wiñaypaq puchukanankumanta (Apocalipsis 18:8). ¿Entiendenkichu imaraykum lloqsinanchikpuni lliw pantay religionkunamanta? Jehová Diosmi munan tiempo kachkaptinraq utqaymanpuni chay pantay religionkunamanta ‘lloqsikunanchikta’ (Apocalipsis 18:4).

Jehová Diosta Llaqtanwan kuska serviptikim astawanraq chaskinki imapas saqesqaykikunamantaqa

19. ¿Imatataq chaskinki Jehová Diosta serviptikiqa?

19 Pantasqa religionmanta lloqsikuptikiqa wakin reqsisqaykikunapaschá qanmanta karunchakurunqaku. Ichaqa, Jehová Diosta Llaqtanwan kuska serviptikim astawanraq chaskinki imapas saqesqaykikunamantaqa. Imaynam Jesuspa punta kaq qatiqninkunapas payta qatinankurayku tukuy ima saqesqankumanta achka bendicionkunata chaskirqaku, chaynam qampas Diospi iñiq achka wawqe-paniyoqkuna kanki. Cheqaptapunim allpantinpi kuyakuq wara-waranqantin cheqap iñiqmasikikunaman hukllawakunki. “Hamuq tiempopiñataqmi” wiñay kawsayta chaskinki (Marcos 10:28-30). Chaymantapas Diosmanta yachasqaykirayku qanmanta karunchakuq runakunaqa tiempopa risqanman hinam ichapas Bibliamanta yachanmanku hinaspam Jehová Diospa serviqninkunapas kanmanku.

20. ¿Ima sumaq suyakuytaq kanqa Diospa munasqanman hina yupaychaqkunapaqqa?

20 Bibliam yachachin kay pachapi millay ruraq runakunata Dios ña tukuchinanmanta hinaspa paypa Gobiernonña allin ruraq runakunata kamachinanmantapas (2 Pedro 3:9, 13). ¡Mayna sumaqchá mosoq pachapi kawsakuyqa kanqa! Chaypiqa chullalla cheqap yupaychayllañam kanqa. Chaynaqa, ¿manachu kunanmantapuni kallpanchakuwaq Diospa cheqap serviqninkunaman hukllawakunaykipaq?

^ par. 17 Kay libropa sapaq yachachikuyninkunapi 219 hinaspa 220 kaq paginankunapim astawan yachachichkan imaynanpim Hatun Babilonia nisqa allpantinpi kaq lliw pantay religionkunawan tupasqanmanta.