Timoteo sutiyoq mozoqa runakunata yanapaspanmi kusisqa tarikurqa. Huklaw llaqtakunamanmi rirqa runakunata yanapananpaq. Kawsakusqanqa sumaqmi karqa. ¿Munawaqchu paymanta astawan yachayta? . . .

Timoteotaqa mamanwan abuelanmi Jehova Diosmanta yachachiqku

Timoteoqa Listra llaqtapim wiñarqa. Mamanpa sutinmi karqa Eunice, abuelanpañataq Loida. Paykunam Jehova Diosmanta yachachiqku, uchuycha kasqanmantapacha. Chaymi Timoteoqa wiñasqanman hina runakunata yanaparqa Jehova Diosmanta yachanankupaq.

Huk kutipim, Timoteo mozoña kaptin, apostol Pablo nirqa: “Huklaw llaqtakunamanmi Diosmanta willakuq risaq. ¿Munawaqchu ñoqawan riyta?”, nispa. Timoteoqa kusisqallañam nirqa: “Arí, riytam munani”, nispa. Payqa runakuna yanapaytam munarqa.

 Pablowanmi Grecia nacionpi Tesalonica llaqtaman rirqaku. Chayman chayanankupaqqa, karu-karutam purirqaku hinaspa barcowanpas rirqaku. Chayaruspankum achka runakunata yanaparqaku Jehova Diosta reqsinankupaq. Ichaqa wakin runakunam piñakurqaku hinaspa maqaytapas munarqaku. Chaymi Pablowan Timoteoqa Diosmanta willakunankupaq huklaw llaqtaman pasakurqaku.

Timoteoqa kusisqam kawsakurqa

Chaymanta killakuna pasaytam, Pabloqa Timoteota nirqa Tesalonica llaqtaman kutinanpaq. Yachaytam munarqa chaypi cristianokuna imayna tarikusqankumanta. Chay llaqtapi runakunaqa Diosta serviqkunatam llumpayta ñakarichirqa. ¡Timoteo chay llaqtaman kutinanpaqqa ancha qarinchakuqmi kanan karqa! ¿Imatam Timoteo ruwarqa? Rirqam chaypi iñiqmasinkunamanta llakikusqanrayku. Kutimuspanqa allin willakuykunatam apamurqa. ¡Tesalonica llaqtapi cristianokunaqa hinallam Jehova Diosta servichkarqaku!

Timoteowan Pabloqa kuskankum Jehova Diosta achka watakuna servirqaku. Chaymi Pabloqa huk kutipi Timoteomanta kaynata qellqarqa: “Timoteotam kamachisaq cristianokunata yanapamunanpaq. Manam pay hinaqa pipas kanchu. Payqa Jehova Diostawan runakunatam anchata kuyan”, nispa.

Qampas kuyankim runamasikitaqa, ¿aw? ¿Munawaqchu Jehova Diosta reqsinankupaq yanapayta? . . . Chayta ruwaspaykiqa Timoteo hinam kusisqa kawsakunki.