Qaway dibujopi warmachata. Mancharisqam sapallan kachkan. ¿Haykapipas manchakurqankichu? . . . Llapanchikmá haykapipas chayna tarikurqanchik. Bibliam willawanchik Jehova Diospa serviqninkuna, payta kuyaspankupas manchakusqankumanta hinaspa sapallanku sientekusqankumantapas. Huk kaqninmi Elias karqa. Qawasun ima pasasqanmanta.

Jesus manaraq nacechkaptinmi Eliasqa unay watakuna ñawpaqtaraq Israel nacionpi yacharqa. Chay tiempopiqa, Israel nacionpa reyninwan señoranqa manam Jehova Diostaqa kuyarqakuchu. Paykunapa sutinmi karqa Acab hinaspa Jezabel, paykunaqa Baal taytachatam yupaychaqku. Chaymi yaqa llapallan Israel runakunaqa Baalta yupaychaqku. Reina Jezabelqa mana allin warmim karqa, chaymi Jehova Dios kasukuqkunataqa lliwta wañurachiyta munarqa. Eliastapas wañurachiytam munarqa  Diosta servisqanrayku. ¿Yachankichu imatam Elias ruwarqa? . . .

¡Payqa karu-karutam chunniqman ayqekurqa! Chaypim machay ukupi pakakurqa. ¿Imanasqam pakakurqa? . . . Manchakusqanraykum. Ichaqa manam manchakunanchu karqa. ¿Imanasqa? Payqa yacharqam Jehova Dios yanapananmanta. Ñawpaqtam Eliasqa Diosta mañakurqa, hinaptinmi mañakusqanman hina nina parata kachaykamurqa. ¡Jehova Diosqa atiyniyoqmá! Chaymi, Eliasqa mana iskayrayananchu karqa.

Machaypi Elias kachkaptinmi, Jehova Dios tapurqa: “¿Imanasqataq kaypi kachkanki?”, nispan. Eliasñataqmi nirqa: “Manchakunim ñoqatapas wañurachiwanankuta. Ñoqallañam qamtaqa servichkayki”, nispa. Payqa piensarqam Diospa lliw serviqninkunata wañurachisqankumanta. Ichaqa Diosmi nirqa: “Manam qamllachu kachkankiqa. Qanchis waranqa runakunaraqmi yupaychawachkanku. Ama manchakuychu, huk ruwayraqmi qampaq kachkan”, nispa. ¿Imaynataq Eliasqa sientekurqa chaynata Dios niptin? . . . ¡Kusisqachá tarikurqa!

¿Imatam yachachwan Eliasta pasasqanmanta? . . . Wakinpiqa sapallaykim sientekuwaq otaq manchakuwaqpas. Ichaqa Jehova Dioswan kuyasuqniki amistadnikikunam kachkanku. Diosqa aswan atiyniyoq kasqanraykum haykapipas yanapasunki. ¿Kusikunkichu mana haykapipas sapallayki kasqaykimanta yachaspayki? . . .