Willasqayki huk mozomanta, payqa apostol Pablopa vidantam salvarurqa. Manam yachanchikchu sutinmantaqa, ichaqa Pablopa sobrinonmi karqa. Payqa qarinchakuqmi karqa. ¿Munawaqchu yachayta ima ruwasqanmanta? . . .

Pabloqa Jerusalenpim presochasqa kachkarqa. Chaytam ruwarurqaku Jesusmanta willakusqanrayku. Ichaqa karqataqmi Pablota cheqniq runakunapas, paykunam tantearurqaku soldadokunapa jefenman kaynata ninankupaq: “Pablota corteman pusachiy”, nispa. Paykunaqa ñanpi pakakuruspankum, chayninta Pablo pasaptin wañurachinanku karqa.

Pablopa sobrinonqa puntatam tionman willarqa, chaymantañataq soldadokunapa jefenman

Pablopa sobrinonmi chay tanteasqankumanta yacharurqa. ¿Imatam ruwarqa? Tionman willaqmi rirqa. Hinaptinmi payñataq nirqa: “Soldadokunapa jefenman rispayá, chay uyarisqaykita willamuy”, nispa. Chay ruwayqa sasamá karqa soldadokunapa jefen kasqanrayku. ¿Rirqachu Pablopa sobrinonqa willamunanpaq? . . . Arí, tukuy ima uyarisqantam willarqa. ¡Qarinchakuqmá karqa!

Soldadokunapa jefenqa uyariykurqam, hinaspam Pablotaqa Cesarea llaqtaman rinanpaq kamachirqa. Chaymantapas, pichqa pachak soldadokunatam kamachirqa riysinanpaq. Nirqam: “Kay tutalla pusaruychik”, nispa. ¿Wañurachirqakuchu Pablota chay mana allin runakuna? . . . Manam.

¿Imatam kaymanta yachachwan? . . . Qampas atiwaqmi Pablopa sobrinon hina qarinchakuq kaytaqa. Jehova Diosmanta runakunaman willanapaqqa qarinchakuqmi kana. ¿Hinallachu mana manchakuspa Jehova Diosmanta willakunki? . . . Ancha allinmi hinalla Jehova Diosmanta willakuyqa, chaynapi runakuna mana wañunankupaq.