Noeypa tiemponpi runakunaqa llumpay mana allintam rurarqaku. Genesis 6:5

Adanwan Evaqa wawa-churiyoqmi karqaku, chaymi chaylla kay Pachapi runa mirarurqa. Hinaptinmi huk angelkunapas Diospa contranpi Satanas hina hoqarikurqaku.

Paykunaqa hanaq pachamantam uraykamurqaku hinaspam warmikunawan casarakunankupaq runaman tikrakurqaku. Wakin runakunamantaqa churinkupas aswan kallpasapa chaynataq mana allin ruraqllañam karqaku.

Kay Pachaqa mana allin runakunawanmi huntarurqa. Bibliam nin “kay pachapi runakunaqa llumpay mana allin rurayllapiña kasqankuta” hinaspa mana allin rurayllapiña piensasqankuta.

 Jehová Diosta kasukuspanmi Noeyqa hatun buqueta rurarqa. Genesis 6:13, 14, 18, 19, 22

Noeyqa allin ruraq runam karqa. Jehová Diosmi willarqa mana allin runakunata sinchi parawan chinkachinanmanta.

Nirqam maderamanta hatu-hatun cajaman rikchakuq buqueta rurananpaq. Chaymanmi yaykuchinan karqa familianta hinaspa tukuy rikchaq animalkunatapas.

Runakunamanmi Noey willarqa sinchi para kananmanta, ichaqa manam kasukurqakuchu. Wakinqa asikurqakum, hukkunañataq llumpayta piñakurqaku.

Buqueta qespirachispanmi Noeyqa animalkunata chayman yaykuchirqa.