IMANASQAM YACHANAYKIPUNI

Pantasqaykikunata utaq huchaykita riqsikuspaykiqa yuyayniyuq runam kanki.

¿IMATAM RUWAWAQ?

Huk kutipim Tim sutiyuq warmacha warmamasinkunawan pelota haytaypi pukllachkarqa, hinaspanmi qunqaymanta kallpawan haytaspan vecinonpa carronpa hatun vidrionta pakirurqa.

¿Imatataq qamqa Tim kaspaykiqa ruwawaq?

KAYPI YUYAYMANAY

MAYQANTATAQ RUWAWAQ:

  1. Mancharikuspachu ayqikuwaq.

  2. Hukmanchu tumpaykuwaq.

  3. Imam kaqta vecinoykiman willaykuspachu pakisqaykimanta pagapuwaq.

Ichapas mancharikuspa ayqikuyta munawaq. Ichaqa imaña kaptinpas huchaykimanta riqsikuspa willakuymi aswan allinqa.

 IMAKUNARAYKUTAQ HUCHAYKITA RIQSIKUNAYKI

  1. Willakuyqa allin ruwaymi.

    Bibliapim nin: “Ñuqaykuqa munachkanikum tukuy imapi allin kawsakuyta”, nispa (Hebreos 13:18).

  2. Huchaykita riqsikuspaykiqa pampachasqaraqmi kawaq.

    Bibliapim nin: “Huchankuna pakaq runaqa manam allinchu kanqa. Huchanta willakuspa wanakuq runam ichaqa Diospa kuyapayasqan kanqa”, nispa (Proverbios 28:13).

  3. Jehova Diospa sunquntam kusichinki.

    Bibliapim nin: ‘Tayta Diosmi millakun mana allin runataqa, allin runatam ichaqa anchata kuyan’, nispa (Proverbios 3:32, Chuya Qellqa 2012).

Estados Unidos nacionniyuq 20 watanpi kaq Karina sutiyuq sipasmi, taytanpa carronwan lluqsispan llumpayta kallpachisqanrayku multarachikurqa. Ichaqa taytanman mana willaspanmi upallalla karqa. Taytanñataqmi yaqa watamanta Karinapa multachikusqan papelta tariruspan yacharurqa, hinaspanmi llumpayta piñakurqa.

¿Imatataq chaymanta yachachwan? Kikin Karinam nin: “Huchaykita pakayqa manam allinchu. Haykaqpas yachakusqan punchawmi ñakarinki”, nispa.

PANTASQAYKIMANTA YUYAYTA HAPIY

Bibliapim nin: “Llapallanchikmi sapa kuti pantanchik”, nispa (Santiago 3:2). Chaymi pantasqaykikunata chaylla riqsikuspaqa yuyayniyuq hinaspa mana hatun tukuq kasqaykita qawachinki.

Riqsikuspañataqmi chay pantasqaykimanta yuyayta hapinayki. Vera sutiyuq sipasmi nin: “Imapipas pantaruspayqa yuyayta hapinaypaqmi kallpanchakuni. Chaymi sapa pantaspayqa yuyaytaña hapini yapapi amaña pantanaypaq”, nispa. Kay uraypi sasachakuykunata qawaspa, ¿imatataq qamqa ruwawaq?

Taytayki bicicletanta quykusuptiki imantapas pakiruspaqa, ¿imatataq ruwawaq?

  • Upallallachu mana musyakunanta munaspa kawaq.

  • Imam kaqtachu willaykuwaq.

  • Hukkunaman tumpasparaqchu willakuwaq.

Escuelaykipi examenta quspayki mana salvaspaqa, ¿imatataq ruwawaq?

  • “Examenmi llumpa-llumpay sasa karqa” niwaqchu.

  • Mana estudiasqaykitachu riqsikuwaq.

  • Icha “profesorniymi llumpayta chiqniwan” niwaqchu.

Ñawpaqkunapi imapas pantasqaykikunamanta llumpayta pesapakuyqa, carropi richkaspa ñawpaqta qawanamantaqa espejonta qipata qawachkay hinam kanman.

 Kay rimamusqanchik iskay sasachakuykunapi taytaykita hinaspa profesornikita yuyariy. ¿Ima ninmankutaq qanmanta huchaykita chaylla riqsikuptikiqa? ¿Ima ninmankutaq qanmanta mana willakuptikiqa?

Kunanñataq qayna watapi mana allinkuna ruwasqaykita yuyarispa kay qatiqnin tapukuykunamanta rimariy:

¿Imapim pantarurqanki? ¿Imatataq ruwarqanki?

  • Upallallachu karqanki.

  • Hukmanchu tumpaykurqanki.

  • Chayllachu willakurqanki.

Huchaykita mana riqsikuspaqa, ¿imaynataq tarikurqanki?

  • Kusikurqanki.

  • Mana willakusqaykiraykuchu hukmanyarqanki.

¿Imatataq ruwawaq karqa?

¿Yuyaytachu chaywan hapirunki?

¿IMA NIWAQTAQ?

¿Imanasqataq wakinpiqa huchanchikta riqsikuyqa sasa?

¿Imatataq runakuna qanmanta ninmanku imatapas ruwaruspa sapa kuti upallalla kaptikiqa? ¿Imatataq ninmanku huchaykita chaylla riqsikuptikiqa? (Lucas 16:10).