IMANASQAM YACHANAYKIPUNI

Tayta-mamaykiwan allinta apanakuspaykiqa kusisqam kawsakunki.

¿IMATAM RUWAWAQ?

Huk kutipim miercoles punchaw tarde lawta 17 watanpi kaq Yefri sutiyuq mozo, tareankunata tukuruspan samariq hina televisionta qawachkarqa.

Hinaptinmi, qipanmanta taytan rikuramuspan nirqa:

“¡Yefri! ¿Imatataq chay televisionta qawaspayki tiempoykita usuchichkanki? ¿Manachu sullkallaykitapas tareankunata ruwaysichkawaq? ¡Manaña uyarikuq warma!”, nispa.

Yefriñataqmi winkurayaspan “mayñaya chayqa” nispa rimapakun.

Taytanñataqmi asuykuspan nirqa: “¿Ima ninkim?”, nispa.

Yefriñataqmi winkullanmanraq qawarispan “manam imatapas nirqanichu” nispa nirqa.

Chaymi taytanqa astawanraq piñakuspan nirqa: “¡Amam chaynataqa ñuqataqa rimapayaruwankichu!”, nispa.

Qam Yefri kaspaykiqa, ¿imatataq taytaykiwan mana piñanakunaykipaq ruwawaq karqa?

KAYPI YUYAYMANAY

¿Imatam ruwawaq carrowan ñanninta richkaptiki ñanpi hatun rumikuna rikuriruptin? Huk lawnintaña rinaykipaqchiki tanteawaq ¿aw? Chaynallatataqmi tayta-mamaykiwan imaynata rimanaykipaqpas allinta tanteanayki.

 IMA NIWAQTAQ KAYMANTA:

Lea sutiyuq sipasmi nin: “Taytaywan rimaspaymi llumpayta sasachakuni. Imamanta willakuptiypas mana allillaqa uyariwaspanmi niwan: ‘¿Ima? ¿Rimapayawankichus?’”, nispa.

IMATATAQ LEAQA RUWANMAN

  1. Piñasqa kaspachu imatapas nirunman.

    Piñasqallañachu taytanta ninman: “¡Uyariwayá! Uyariwanaykitam munani”, nispa.

  2. Manañachu rimapayanman.

    Mana uyarisqanraykuchu taytanwan rimaytaqa manaña munanmanñachu.

  3. Chaymantañachu rimapayanman.

    Chaymantaña taytanwan rimananpaqchu utaq cartaspanña willakunanpaqchu tanteanman.

¿Ima ruwanantataq qam munawaq?

KAYPI YUYAYMANAYKUY: Leapa taytanqa achka ruwaykunapi umayuq kaspanmi rimapayasqantaqa mana uyarirqachu. Chaymi taytanta piñasqa kaspa imatapas niruptinqa, taytanqa mana yachanqachu imanasqa warman piñakusqanmantaqa. Chayta Lea ruwaspaqa manataqmi taytanwanqa uyarichikunqachu, aswanqa taytantapas mana respetaq warmam kanqa (Efesios 6:2). Chaymi piñakuspa imatapas niyninqa mana allinchu kanman.

Tayta-mamaykiwan rimanaykipaq imaña sasachaptinpas kallpanchakunaykim allinllata rimanaykipaq, chaynapi allinlla kanaykichikpaq.

Manaña rimapayaypas mana yachaywan ruwaymi kanman. Lea taytanwan mana rimaspanqa manam sasachakuynin allichaytaqa atinqachu, manataqmi taytanpas mana uyarispaqa yanapayta atinqachu. Chaymi taytanta manaña rimapayayninpas mana allinchu kanman.

Chaymantaña rimapayaymi ichaqa kusallaña, chayta Lea ruwaspaqa manam taytanwan piñanakuymanqa chayanqachu. Taytanpaq carta ruwaypas allinmi kanman Leapaqqa.

Chay cartapiqa mana sasachakuspallam llakinmanta willakunman. Taytanpas cartata qawaspanqa yachanqam Leata imayna yanapayta. Chaymi chaymantaña rimananpaq utaq cartawanña willakunanpaq tanteasqanqa ancha allin kikin Leapaqpas chaynataq taytanpaqpas. Chayta ruwanamantam biblia nin: ‘Hinallayá hawkalla kanapaq imapas yanapawaqninchik kaqkunata ruwasun’, nispa (Romanos 14:19).

¿Imatawanraqtaq leaqa ruwanman?

Leapa imatawanraq ruwananmanta yachaspaykiqa, qillqaykuy. Qillqawaqtaqmi imapi chay ruway tukunanmantapas.

 ENTIENDENAPAQTA HINAM RIMANAYKI

Tayta-mamaykiqa manam rimasqaykiman hinachu wakinpiqa entiendesunki.

CHAYQA KANMANMI KAYNAPI:

Sichum imanasqa hukmanyasqa kasqaykimanta tayta-mamayki tapusuptiki, qamñataq niwaq: “Manam chaymantaqa rimayta munanichu”, nispa.

Hinaptinmi paykunañataq entiendenmanku kaynata: “Manam qamkunamanqa imatapas willaykichikmanchu, aswanqa amistadniykunallamanmi”, niqtaña.

Sichum nisyu sasachakuypi kachkaptiki huk kaqnin tayta-mamayki yanapasunaykipaq tapusunkiman, hinaptin qamñataq niwaq: “Ama llakikuychu, ñuqallachiki imaynatapas allichakusaq”, nispa. Hinaptinqa:

  • ¿Imatataq tayta-mamaykiqa entiendenman?

  • ¿Ima niytaq allin kanman?