Yachachikuypa kasqanman rinapaq

Yachachikuyman rinapaq

 1 KAQ TAPUKUY

¿Imayna runataq kani?

¿Imayna runataq kani?

IMANASQAM YACHANAYKIPUNI

Imayna runa kasqaykimanta yachayqa allintamá yanapasunki imapipas allinta tanteanaykipaq.

¿IMATAM RUWAWAQ?

Huk kutipim Karen sutiyuq sipas fiestapi kachkarqa. Hinaptinmi qipanmanta huk kaqnin sipasmasin nirqa:

¿Imatataq kaypi sapallayki ruwachkanki?”, nispa.

Chay rimapayaqninqa amistadnin Jessicam kasqa. Payqa makinpi iskay cervezayuq asuykuspanmi nirqa: “Manañamá warmañachu kanki. Asllataqa malliykuwaqmi ¿aw?”, nispa.

Karenñataqmi warmaraq kasqanta yachaspan tomaytaqa mana munarqachu. Ichaqa manataqmi munarqachu paymanta Jessica hukmankunata piensanantaqa. Chaymi sunqunpi rimapakurqa: “Jessicapas tomaptinqa, hukchus llumpay mana allin kanman. Chulla cervezallatam tomasaqkuqariki, droga kaptinchiki mana allinqa kanman”, nispa.

¿Imatataq qamqa Karen kaspaykiqa ruwawaq karqa?

KAYPI YUYAYMANAY

Chaynapi tarikuspa imatapas allinta ruwanaykipaqqa, allintam yachanayki qampaq imam allin utaq mana allin kasqanta. Chayta allinta yachaspaqa kikikipa tanteasqaykiman hinam imatapas ruwanki, manam hukkunapa nisusqaykiman hinachu (1 Corintios 9:26, 27).

Imayna runa kasqaykita yachanaykipaqyá tawa tapukuykunamanta rimasun.

 1 ¿IMAKUNAPITAQ MANA SASACHAKUNICHU?

Imakunapi mana sasachakusqaykita yachaspaykiqa, manam imapas ruwanaykimantaqa nitaq imapas ninaykimantaqa iskayrayankichu.

QATIPAKUNAPAQ RUNA: Apostol Pablom nirqa: “Allin rimakuyta mana atispaypas yachayniyuqmi kani”, nispa (2 Corintios 11:6). Payqa bibliapa nisqankunamantam allintapuni yacharqa, chaymi mana hukmanyarqachu runakuna paymanta mana allinta rimaptinkupas (2 Corintios 10:10; 11:5).

ASTAWAN RIQSIKUY: Imapas allin ruway yachasqaykita qillqay.

Imayna runa kasqaykimanta kaypi qillqay (ichapas churawaq kuyapayakuq, qukuykuq, mana llullakuq kasqaykita utaq huktapas).

2 ¿IMAKUNAPITAQ SASACHAKUNI?

Imaynam raku waskapas ismusqa lawninmanta tipikun, chaynam qampas imapipas sasachakusqaykiwan atipachikuspaqa ima mana allinmanpas wichiykuwaq.

QATIPAKUNAPAQ RUNA: Apostol Pabloqa yacharqam imakunapi sasachakusqanta, chaymi nirqa: “Chiqaptapunim Diospa leyninwan sunquypi kusikuni. Ichaqa musyakunim cuerpoypi huk ley kasqanta, chay leymi yuyayniypi kaq leywan peleachkan, chay peleaq leyqa cuerpoypi kaq hucham hinaspam controlawan”, nispa (Romanos 7:22, 23).

ASTAWAN RIQSIKUY: Imapipas sasachakusqaykita qillqay, hinaspa ama chaykunaman wichinaykipaq kallpanchakuy.

 3 ¿IMAKUNATATAQ RUWAYTA MUNANI?

¿Yaqachu carroman siqaruwaq maymanpas rinaykita mana yachachkaspa? Manam ¿aw?

Chaynam kawsakuynikipipas allinta yachanayki imakuna ruway munasqaykita, mana chayqa yanqapas carropi purichkawaq hinam kanki.

QATIPAKUNAPAQ RUNA: Apostol Pablom nirqa: “Ñuqaqa kallpachkani manam ñawsa hinachu”, nispa (1 Corintios 9:26). Pabloqa ñawsa hina yanqakunata ruwaspa muyunanmantaqa, allintam yacharqa ima ruway munasqanta, hinaspam chayman hina kawsakurqa (Filipenses 3:12-14).

ASTAWAN RIQSIKUY: Kay watapi imakuna ruway munasqaykita kimsata qillqay.

4 ¿DIOSPI IÑISQAYMANTACHU ISKAYRAYANI?

Imayna kasqaykita allinta yachaspaykiqa, allin sapichasqa sacha hinam mana imawanpas apachikunkichu.

Diospi iñisqaykimanta iskayrayaspaykiqa chayllam amistadnikikunapa ruwasqankuta qatipakuyta qallaykuwaq. Chayna kawsakuq runaqa manam riqsikunchu imayna runa kasqanta.

Yachasqaykikunamanta mana iskayrayaspam ichaqa kikikipa tanteasqaykiman hina imatapas ruwanki.

QATIPAKUNAPAQ RUNA: Bibliapi rikuriq Diospa serviqnin Danielqa warmallaraqmi karqa Babilonia nacionman apasqa kaspanqa. Chayna kachkaspanpas ‘tukuy sunqunwanmi tantearurqa’ Diospa kamachikuyninkunata kasukunanpaq (Daniel 1:8). Manam pinqakurqachu Diospa serviqnin kasqanmanta riqsichikuytaqa, manataqmi iskayrayarqachu Diospi iñisqanmantapas.

ASTAWAN RIQSIKUY: Tapukuspayki ima nisqaykita qillqay: ¿Imanasqataq Diospi iñini? ¿Imaraykutaq Dios kasqanmanta mana iskayrayanichu?

¿Allinnikipaqchu kanman Diospa kamachikuyninkuna? ¿Imanasqa?

Ima niwaqtaq: ¿Kayman chayman wayrapa apakachasqan llaqicha hina kaytachu munawaq, icha imaña kaptinpas allin sayaq sacha hina kaytachu? Allin sayaq sacha hina kayta munaspaykiqa imayna runa kasqaykitam alli-allinta yachanayki.