Warmi-qari puñuchkanmankupas hina qari kayninwan otaq warmi kayninwan sapallanku rurasqankuqa Diospa cheqnisqanmi, chayna ruraqkunaqa kikillanpim piensanku, yuyaynintapas qachachankum. * Chayta ruraqkunaqa aychapa munasqanta ruranallanpaqmi runamasinta qawanman. Mana kuyakuyniyoq kasqantam qawachin, aswanqa warmiwan otaq qariwan puñusqanku imayna kasqanta sientenallankupaqmi ruranku. Chayta ruraspankupas manam hawkallaqa tarikunkuchu. Chay millakuypaq rurasqankuqa manam huchapakuymanta nitaq millakuypaq kaqkuna ruranankumantapas harkanchu, aswanmi munapayachin chaykunata ruranankupaq (Colosenses 3:5).

Apostol Pablom qellqarqa: “Kuyasqay wawqe-panillaykuna, chayna promesakuna kachkaptinqa aychanchikpi hinaspa espiritunchikpi tukuy mana allinmantayá chuyanchakusun, Diosta manchakuspayá aswan-aswan payllapaqña sapaqchakusun”, nispa (2 Corintios 7:1). Chuyanchakunapaq Diospa kamachisqan cumpliyqa wakin runakunapaqmi llumpay sasa, ichaqa manam hukmanyananchikchu, Jehová Diosqa ‘hucha pampachaq’ hinaspa yanapaq Diosmi (Salmo 86:5; Lucas 11:9-13). Wakin kutipiqa yapamantapaschá chayta ruranmanku, ichaqa chay rurasqankumanta  pesakusqankuwanmi qawachinku chay millakuypaq rurayta saqey munasqankuta. Ichaqa amayá qonqasunchu: Diosqa sonqonchikpi kaqtaqa “lliwtam yachan” (1 Juan 3:20). Diosqa manam pantasqallanchiktachu qawan, aswanqa imayna kasqanchiktam. Imayna kasqanchikta yachaspanmi pampachawananchikpaq mañakuptinchik llakipayawanchik. Chaynaqa, amayá qonqasunchu tukuy sonqonchikwan hinaspa humillakuspa mañakuytaqa, kaytaqa rurananchik, taytanpa yanapakuyninta warmacha mañakuchkaq hinam. Arí, Jehová Diosqa conciencianchik chuya kananpaqmi yanapawanchik (Salmo 51:1-12, 17; Isaias 1:18). Ichaqa, manam mañakuyllachu-mañakunanchik, aswanqa mañakusqanchikman hinam rurananchik, hinaspa huchapakuypaq kaqkunataqa manañam qawananchikchu, nitaq mana allin amistadkunawanpas hukllawakunanchikchu. *

Sichu warmi-qari puñuchkanmankupas hina qari kayninwan otaq warmi kayninwan sapallanku rurasqankuta mana saqeyta atispankuqa, cristiano taytanwan otaq mamanwanmi rimanan, otaq iñiyninpi allin takyasqa cristianowan (Proverbios 1:8, 9; 1 Tesalonicenses 5:14; Tito 2:3-5). *

^ par. 1 Chay millakuypaq ruraqkunaqa qari kayninwan otaq warmi kayninwami, warmiwan-qari puñuchkanmankupas hina sientenankukama sapallanku ruranku.

^ par. 2 Internet kaptinqa, computadoratam wakinkuqa churanku lliwpa rikunan sitiopi, chaynapi millakuypaq kaqkunata mana qawanankupaq. Hukkunañataqmi computadorapi millakuypaq kaqkuna mana rikurimunanpaq huk programata churanku. Ichaqa manam chaykunaqa llapan millakuypaq kaqkuna rikurimunanmantachu harkan.

^ par. 1 Chay millakuypaq rurayta imayna saqenamanta astawan yachanapaqqa, qawariy noviembre 2006 watapi ¡Despertad! nisqa revistapa “Los jóvenes preguntan . . . ¿Cómo puedo superar este hábito?”, nisqa yachachikuyta, hinaspa Lo que los jóvenes preguntan. Respuestas prácticas, nisqa libropa vol. 1, 205-211 paginankama.