Finlandia

Yachachispan

Kallpanchaspan

Predicaspan

Jehová Diospa llaqtanpi ancianokunaqa manam qollqeraykuchu imatapas ruranku. Aswanqa ñawpa tiempopi cristianokuna hinam Diospi ‘iñiqkunata cuidanku’ (Hechos 20:28). Paykunaqa Dios serviyninkupi allin takyasqa kanku, Diospa munasqanman hinam iñiqmasinkumanta nanachikunku; manam obligasqa hinachu nitaq qollqellaraykuchu aswanqa ‘tukuy sonqonkumantam’ (1 Pedro 5:1-3). ¿Imatam allinninchikpaq ruranku?

Cuidawanchik hinaspa yanapawanchik. Ancianokunaqa iñiqmasinkutam Dios serviyninkupi allin kanankupaq yanapanku. Anciano kanankupaq Dios churasqanraykum iñiqmasinkumanta sumaqllata cuentallikunku Dios serviyninkupi kusisqa kanankupaq (2 Corintios 1:24). Imaynam michiqpas ovejankunamanta nanachikun chaynam ancianokunapas sapa iñiqmasinkuta reqsinankupaq kallpanchakunku (Proverbios 27:23).

Diospa munayninta ruranapaqmi yanapawanchik. Sapa semanam ancianokunaqa huñunakuykunapi yachachiwanchik iñiyninchikpi allin takyasqa kanapaq (Hechos 15:32). Paykunataqmi predicanaykupaqpas umallinku, ñoqaykuwan predicaspam Diosta imaynata servinaykupaq yachachiwanku.

Sapakamatam kallpanchawanchik. Iñiyninchikpi allin kanapaqmi wasinchikman watukamuwaspanchik otaq huñunakuypipas sapakamata kallpanchawanchik. Chaymantapas Diospa Palabranwanmi consuelawanchik (Santiago 5:14, 15).

Congregacionpi yanapakusqankumantapas familiankuta mantienenankupaqmi llamkanku hinaspapas paykunamantam tukuy imapi allinta nanachikunku. Chaymi paykunataqa anchata respetananchik (1 Tesalonicenses 5:12, 13).

  • ¿Imakunatam ancianokunaqa congregacionpi ruranku?

  • ¿Imaynatam ancianokunaqa sapakamata yanapawanchik?