“Tanteasqaykikunata allinta qespichiy allinta consejachikuspayki” (Proverbios 20:18).

Qollqetaqa llapanchikmi servichikunchik familianchikta uywanapaq (Proverbios 30:8). Qollqeqa waqaychawananchikpaqmi (Eclesiastes 7:12). Wakinpiqa sasam familiapi qollqemanta rimayqa, ichaqa ama saqeychu casado vidaykipi sasachasunaykitaqa (Efesios 4:32). Iskaynikichik tanteaychik qollqeta imapi servichikunaykichikpaq.

 1 ALLINTA TANTEAYCHIK

BIBLIAM NIN: “Pipas torre hatarichiyta munaspaqa qespichinankama gastananpaqmi puntataqa tanteanqa” (Lucas 14:28). Ancha allinmi kanman qollqekichikta imayna servichikunaykichikpaq iskaynikichik tanteaynikichikqa (Amos 3:3). Rimaychiktaq imakuna rantinaykichikpaq hinaspa haykata gastanaykichikpaqpas (Proverbios 31:16). Imapas rantiy munasqaykichikpaq qollqekichik kaptinqa, manam chayraykuqa rantinaykichikpunichu. Ama manukunaykichikpaq kallpanchakuychik, aswanqa kapuqllaykichikta gastaychik (Proverbios 21:5; 22:7).

¿IMATAM RUWAWAQ?

  • Killa tukuyta qollqekichik puchuruptinqa, tanteaychik imapi servichikunaykichikpaq

  • Mana haypasuptikichikñataq imakunapi mana gastanaykichikpaq tanteaychik. Ichapas wasipi yanukuwaqchik huklawpi mikunaykichikmantaqa

 2 ALLIN KAQPI PIENSAY

BIBLIAM NIN: ‘Allin kaqta ruway [Jehova Diospa] qayllanpipas chaynataq runakunapa qayllanpipas’ (2 Corintios 8:21). Ama llullakuspa señoraykiman otaq qosaykiman niy hayka ganasqaykita hinaspa hayka gastasqaykitapas.

Imatapas rantiyta munaspaykichikqa tapunakunaykichikmi (Proverbios 13:10). Chay ruwasqaykichikmi casado vidaykichikpi yanapasunkichik hawkalla kawsakunaykichikpaq. Ganasqayki qollqetaqa ama kikikipata hinachu qaway, aswanqa familiaykipata hinaña (1 Timoteo 5:8).

¿IMATAM RUWAWAQ?

  • Tanteaychik sapakama hayka qollqe gastanaykichikpaq

  • Manam qollqemanta sasachakuy kanantaraqchu suyanayki chaymanta rimanaykipaqqa